2008. urtean krisia hasi zenetik, ikusten ari gara honen aitzakia pean bata bestea baino bortitzagoak izaten ari diren erreforma ezberdinak inposatzen ari direla. Erreforma hauek guztiak langileria osoari kolpatuko bagaitu ere, oso modu bortitzean eragingo digu kolektibo kaltetuenak osatzen ditugunoi, emakumeoi barne.
LABeko emakumeon asanblada Iruñeako Gurutze Plazako institutuan 10:00etan.
EMAKUMEOK ERABAKI DUGU: zapalkuntzaren aurka eredu berri bat
Inposaturiko neurri hauek guztiek prekarietate laboral eta sozialea modu ikaragarrian areagotzea suposatuko dute eta bereziki emakumeon kasuan, urteetako borrokari esker lorturiko eskubideak ere galtzeko arriskua izanik. Baina argi daukagu ez gaudela prest egoera hauek guztiak onartzeko.
Neurri hauen artean aipatzekoak dira kontziliazioari oraindik oztopo handiagoak ipiniko dizkiotela, jardunaldi partzialetan ordu estrak onartuko direlako eta modu honetan, lantokietan malgutasuna areagotuz, zaintzarako lan orduen murrizketan ordu konkrezioa egiteko eskumen osoa emango die enpresei beraiek erabaki dezaten eta langileekin ez adosteko, amatasun edo eta zaintzarako baimenaren ondorengo diru laguntzak kendu dituzte eta absentismoaren ondoriozko kaleratzeak erraztuko dituzte, jakinda honek ondorio larriak izango dituela bereziki emakumeon kasuan, izan ere, oraindik bateragarritasunak gure gain erortzen jarraitzen duelako.
Modu berean ezin ditugu aipatu gabe utzi murrizketa guztiak, emakumeongan eragin zuzena izango dutenak, hauen artean gutxieneko soldata interprofesionala izoztea, bereziki kaltegarria etxeko langileentzat eta enplegu zentro berezietan dauden langileentzat beste batzuen artean (azken hauen soldata kopuru honen arabera erabakitzen da), pentsioen murrizketa non berez emakumeon kasuan askoz txikiagoak dauzkagun, gastu soziala txikitzea, zerbitzu sozialen murrizketa ekarriko duena. Azken hau beharrezkoa dugu kontziliazioa posible egin ahal izateko eta ondorioz, emakumeok lan gehiago egin beharko dugu korrespontsabilitatea ez delako sustatuko…
Premiazkoa da eredu ekonomiko eta sozial berri bat eraikitzea Euskal Herrian. Eraso hauei aurre egiteko aukera bakarra dugu. Eredu berri bat non emakumeak eraikuntza honen parte izango garen, eredu berri bat non langileriaren erdia baino gehiago osatzen dugun emakumeok kontuan hartuak izango garen, eta egungo eredu patriarkala suntsitzea helburu izango duena.
Eredu justuago bat, non lanaren banaketa erreal bat emango den, lana bere osotasunean kontuan harturik. Eredu honek ez du babestuko emakumeok egiten dugun lan erreproduktiboari inolako aitortza sozial ezta ekonomikorik ez egitea.
Baina jakitun gara aldaketa hauek guztiak erdiesteko emakumeok hitza eta erabakia izan behar dugula, izan ere, edozein aldaketa ez baita nahiko izango euskal emakumeok pairatzen dugun zapalkuntza hirukoitza gainditzera zuzenduta ez badago. Honetarako alternatiba bakarra daukagu, prozesu hau guztia feminismotik eraikitzea, egun dauden neurri partzialetatik haratago benetako aldaketa estruktural bat izan dadin, non gure eskubideak aitortuak izango ditugun.
LABetik oinarrizkoa deritzogu mobilizazio sozial, sindikal eta politikoa bultzatzea euskal herriko emakumeok gure etorkizuna erabaki dezagun.
Hau guztia kontuan harturik, datorren martxoaren 29an emakumeek greban parte har dezazuen deialdi berezi bat egin nahi dizuegu, gune hauek ere gureak egin eta ikustarazi aspaldi erabaki genuela ez gaudela prest inolako zapalkuntzarik onartzeko.
Gure herrian eredu berri bat sortzera goaz!