Enpresa batzordeak deituta, Corrugadoseko langileek Ajuria Enea aurrean elkarretaratzea egin dute, oraingo honetan Eusko Jaurlaritzari zuzenduz, Corrugadosen egoerarekiko erantzukizunaz galdegiteko. Gogoratu behar dugu Jaurlaritzak Gallardo Taldeari 5 milioi euro emanak dizkiola 2016.urtera arte jarduera mantentze aldera.
Azpeitiko CORRUGADOS enpresako langileek euren lantokian bizi duten egoera salatzeko greba mugagabean eta etengabeko mobilizazioetan jarraitzen dute. Enpresaren etorkizuna argitu eta bermatuko duen bideragarritasun plana eskatzen dute, baina Gallardo Taldeak (berriki Madrilen eginiko bileran erakutsi duen moduan) eskaera horri erantzunik eman gabe jarraitzen du.
Enpresak ezarri asmo duen enplegu etete EEEaren eraginez 60 langile kaleratu nahi dituzte eta gainerako beharginei urte amaiera bitarte 66 eguneko suspentsio EEE bat aplikatu nahi die; horrekin batera, lanaldia urteko 49 ordu gehiagoan luzatu nahi die eta soldatak %35 jaitsi.