LAB sindikatuko 7 kide epaituak izan dira gaur goizean Iruñeako epaitegietan, 2010eko irailean Santander Bankuaren Iruñeako bulego nagusietan euren buruak kateatuz egindako protesta dela eta. Epaiketa honen harira egunotan ekimena jarri du martxan LABek, "Emilio Botini herri epaiketa" lelopean, benetan epaitu beharrekoak bankako arduradunak direla salatuz.
LABeko 7 auzipetuak epaitegian zeuden bitartean, sindikatuko hainbat kidek kanpoaldean protesta egin dute, Emilio Botin eta banka espainiarraren aurkako epaiketa bat simulatuz.
Botinek berak esana da Santander bankuak 5.000 milioi baino gehiago irabazi dituela. Herritarroi murrizketak bata bestearen atzetik inposatzen ari zaizkigun honetan, zerbitzu publikoak murriztu eta lan erreforma inposatu diguten honetan, banka herritarrek, langileek sortutako aberastasuna bereganatzen ari dela salatzen du LABek.
Salaketa hori bera izan zen sindikatuko kideak Santanderreko bulegoetan kateatzera eraman zituen arrazoia.