2014ko urtarrilaren 30ean, Alduntzar enpresako langile batek lan istripu larria izan zuen Usurbilgo Fagor Victorio Luzuriagan. Langilea, 38 urteko errrumaniarra, makinen prebentzio lanetan ari zela lubaki batera erori zen, eta horren ondorioz atzo hil egin zen. Luzuriagako Enpresa Komiteak elkarretaratzea deitu du biharko azken lan heriotz hau salatzeko.
Heriotza honekin gutxienez 6 dira Euskal Herrian aurten hil diren langileak. Eta Gipuzkoan dagokionean, heriotza eragin duen 2. lan istripua da aste honetan.
Langileok, bizi ahal izateko egiten dugu lan eta ez, saiakera horretan bizia galtzeko. Lan istripuak ez dira bizitzako gertakari arruntak, langile bat hiltzea ez da lanaren ezaugarri bat. Ez, lan istripuak patronalak lan egiteko orduan ezartzen dizkigun baldintza eta lan egiteko moduen emaitza dira. Beste behin ere hildakoa langile gazte bat da, etorkizun ta lan baldintza hobeagoen bila etorria zena gure herrira.
Horregatik guztiagatik, langileok laneko gaixotasun eta lan istripuekiko TOLERANTZIA ZERO ohiukatu behar dugu. Arazo horiekin bukatzeko eredu aldaketa bultzatu behar dugu, gure osasun eskubidea egiazkoa izan dadin aldaketa politikoa, ekonomikoa eta soziala aldarrikatuz.
Baina aldaketa hori ez da etorriko Gasteiz, Iruñea edo Baionatik; patronalak eta legeek ez digute ezer oparituko. Aldaketa langileok ekarriko dugu, lantoki, herri eta auzo bakoitzean hartutako gure konpromisoen ondorioz, hori bait da gure osasuna eta bizia defendatzeko modu bakarra.
LAB sindikatuak bihar Luzuriagako komiteak goizeko 13.00etatik 15.00etara deitutako lanuzte eta elkartaratzearekin bat egiten du.