Arratian lan eta bizi. Gaur Dimak be argia amatau dau (Dima Berriak)
ARRATIAN LAN ETA BIZI! Plataformak oso positiboki baloratzen du enplegu suntsiketaren aurka deitutako itzalaldiak izaniko erantzuna
Arratian Lan eta Bizi! Plataformak gaur asteazkena 30, mobilizazio eguna deitua dugu eskualdean; Arratiarrek gure deialdiari emaniko erantzuna oso positiboki baloratzen dugu.
Argie amatau etorkizune izitako izenarekin, dei egin diegu Arratiako bizilagunei arratsaldeko 7.30etatik 8.00etara argi itzalaldi bat egiteko, enplegu suntsiketaren aurka. Ekimen honek eragile eta erakunde ugariren atxikimendua jaso du eta babes hori ikusi ahal izan da egunean zehar hainbat mobilizazioren bidez. Eremu askotatik iritsi zaizkigu atxikimenduak, esparru politikotik, sindikaletik nahiz sozialetik. Eremu instituzionalean nabarmendu ditzakegu, besteak beste, Lemoa, Bedia eta Arteako Udaletan ordezkatuak dauden talde guztiek (EAJ, BILDU, PSOE eta ALDATUZ) emaniko babesa, baita Diman eta Igorren Bilduk eta Igorre Danontzat-ek eskainitakoa ere.
Lan munduan ELA eta LAB sindikatuek joan den astelehenean prentsaurreko bidez ia dozena bat enpresa batzorderen atxikimendua aurkeztu zuten, tartean, Cementos Lemona, Ormazabal, Negarra eta Alyasa. Hala, gaurkoan egunean zehar zenbait bilkura egin dituzte GEA Iberica, Forjas Unidas eta Tecnichapa enpresetan langileen lantegi atarietan; halaber, horietako askotan itzalaldia ere burutu da.
Arratsaldean Arratiako herri guztietako plazetan deitu diren bilkuretan lagun ugari batu dira: Bedian 100 lagunetik gora, Lemoan beste 100 eta Igorren 70 inguru. Azpimarratzekoa da hiru herri horietan alkateek ere parte hartu dutela. Horrez gain elkarretaratzea egin dira Zeanurin, Diman, Artean… Elkarretaratzerik jendetsuenak Lemoa, Bedia, Igorre eta Dimakoak izan dira. Ilunpean, kandelak piztu eta auto nahiz plazetan ipinitako sirena hotsekin hasi dituzte herritarrek elkarretaratzeak.
Azkenik, Arratian Lan eta Bizi plataformatik gogorarazi nahi izan dugu deialdia arrakastatsu honen ostetik oraindik asko geratzen dela egiteko, oraindik hor daudela ALFUS eta INCOESAko gatazkak, Arratian mila lagun baino gehiago daudela langabezian, eta soilik eredu sozial eta ekonomiko berri batek bermatuko digula egoerari buelta ematea. Hori lortzeko bestelako politika ekonomikoak egiten hasi beharra dagoela aldarrikatzen dugu plataformatik, eta dei egiten dugu hain beharrezkoa dugun alternatiba horren alde lanean eta mobilizatzen jarraitzeko.
Arratian, 2013ko urriaren 30ean
{module[111]}