Gaur Osakidetzako Mahai Sektorialaren bigarren bilera burutu da eta LABek zuzendaritzaren aldetik gardentasun falta eta negoziatzeko borondate eza besterik ez dutela jaso salatu nahi du. Beste behin , lanaldiaren igoera ardatz hartu dute baina ez dute proposamen argirik aurkeztu.
Azpimarratzeko modukoa:
• Lanaldiaren igoera: ez dute igoera negoziatuko, eta zelan inposatuko duten ez dute zehaztu. Argi utzi dute lanaldi osoak edo lanaldi erdiak izango direla, eta bidea egin diote gehiegizko ordutegiagatik egun libreak hartu ahal izateari, edo irakaskuntza helburuak betetzeagatzik (besteak beste, lan orduetatik kanpo euskara ikastea aipatu dute), edo baita helburu asistentzialak lortzeagatik. Oporrak lau alditan banatu ahal izango dira.
• Pribatizazioa: zerbitzu berrietan ez ezartzeko aukerari buruz baino ez dute hitz egin, errentagarritasuna eta zenbait eginkizunetan pilatutako eskarmentua oinarri hartuta.
• EI: Rajoyren dekretua aplikatzea planteatzen dute
• Lan-taldeak proposatzen dituzte hurrengo gaietan: mugikortasuna, euskara, kontratazio-zerrendak, laborategi-plana eta OSIak.
Laburbilduz, ez dute ezer berririk ekarri, ez dute idatziz ezer konkretatu, eta, batez ere, BENETAN EZ DUTE NEGOZIATZEKO ASMORIK, baizik eta gai zehatzetarako lan-taldetan gu saretzeko, garratzitsuena inposatzen diguten artean.
LABen iritziz:
• Salatu dugu Gurutzetan Ertzaintza erabili izana langileon mobilizazioak zapaltzeko. Osakidetzaren erantzun jasangaitzak argi uzten du euren jarrera: “langileek euren borondatez hustu dute ospitalea, eta parte hartu behar izan dute zerbitzua galarazten zelako”.
• Gardentasun falta eta negoziatzeko borondate eza salatzen dugu. Ingururak nahastu baino ez dute egiten.
• Lanaldiaren igoerari buruzko proposamenak malgutasun handiagoa dakar, horrela, enplegua deusezten da, lanaldia desarautzen da eta zerbitzuen kalitatea okertzen da. Planteatzen dute ordu gehiago egingo dela lan, diru gutxiagoren truke, eta, horrez gain, lapurtu dizkiguten egun libreetako bat lortzeko, aparteko orduak egin beharko dira!
• Ez gaude ados aldebitako bileretan negoziatzearekin, eta dirudienez bide hori da Osakidetzak nahiago duena aurrera jarraitzeko. LABek planteatzen du negoziazioa sindikatu guztiekin batera izan behar dela.
• Azkenik, gainontzeko sindikatuei datorren astean biltzea proposatu diegu, PNVren itxikeriari erantzun bateratuak planteatzen saiatzeko.
Mobilizazioak bide onetik doaz, beraz lantokietan mobilizazioekin jarraitzera animatu nahi zaituztegu langile guztiok, gero eta indartsuago. Negoziazio kolektiborako eskubidea eta lan publikoaren sorrera defendatzen jarraituko dugu.
{module[111]}