Iruñeko El Vergel helduen egoitzan urteak daramatzagu mantentze-lanetako laguntzaile gutxi izaten, eta orain, lankide batek erretiroa hartu berri duela-eta, plantilla minimoen azpitik geratu da. Nolanahi ere, Funtzio Publikoari esker jakin berri dugu, hainbat urtez zentroaren beharrei erantzuteko moduko kontratazio-zerrenda bat eskatu ondoren, badagoela halako bat, duela bost hilabete baino gehiago eratua, gainera. Hala bada, zergatik jarraitzen dute langile beharrari erantzun gabe?
El Vergel zentroko langileek denbora asko, gehiegi dagoeneko, daramagu sortzen diren beharrei erantzun ahal izateko mantentze-lanetako laguntzaileen kontratazio-zerrenda bat egin dezatela eskatzen.
Eta, bat-batean, duela gutxi jakin dugu zerrenda hori badagoela. Urte honetan bertan, otsailaren 21ean, argitaratutako zerrenda bat da, eta 542 pertsona daude izena emanda. Ezinezkoa da, beraz, zerrenda hori agortua izatea.
Egoera horren ondorioz, El Vergelen mantentze-lanetako laguntzaileak ez kontratatzearen benetako arrazoia zein den jakin nahi dugu. Jokabide horrekin lortzen ari diren gauza bakarra da eskaintzen den zerbitzuan eragin negatiboa izatea. LABen ez gaude prest denbora gehiago jasateko hain larria den eta langileen eta erabiltzaileen artean hainbesteko ezinegona sortzen duen egoera hau.
Horregatik guztiagatik eskatzen dugu beharra dagoen bakoitzean, mantentze-lanetako laguntzaileak kontratatzea ahalik eta azkarren.
LABetik, arazo hau konpontzeko gure konpromisorik sendoena erakutsi nahi dugu, eta, gainera, exijitzen dugu konponbidea etor dadila kontratazioari buruz indarra duen araudiaren bidetik, hots, aldi baterako kontratazioak kudeatzeko arauak finkatzen dituen 814/2010 Foru Aginduan ezarritako arauak betez.