Sei urteko borrokaren ondoren eta bi urte negoziatzen ibili ondoren, 2021eko urtarrilaren 8an LAB sindikatuak, CCOO eta UGT sindikatuekin eta ANEIS patronalarekin batera, akordio historikoa lortu zuen sektorea duintzeko, eta, hala, Nafarroako esku-hartze sozialaren lehenengo hitzarmen sektoriala sinatu zen. Orain, Espainiako Estatuko OEIS patronalak (Ekintza eta Esku-hartze Sozialaren arloko Erakundeen Estatuko Elkartea) hitzarmen hori salatu du. Epaiketa apirilaren 26an izanen da Nafarroako Auzitegian. OEISen barruan elkarte hauek daude: Gurutze Gorria, Cáritas, Acción contra el Hambre, Secretariado Gitano eta Asociación Española contra el Cáncer. Orain salatzaile gisa agertzen diren enpresa horiek ez zuten bere garaian hitzarmenaren negoziazio prozesuan parte hartu nahi izan, jakinaren gainean egonda eta gonbidatu bazeuden ere.

LABen iritziz, salaketa hau oso larria da, gizarte-zaurgarritasun egoeran dauden herritarrei ematen zaizkien zerbitzuen kalitateari zuzenean eragiten diolako, eta, orobat, sektorean aritzen diren 1.600 langile ingururen lan eskubideen aurka egiten duelako. Hitzarmenari esker, langile horiek egiten duten lan sozial eta profesional goraipagarria aitortua eta duindua izatea lortu zen.

LABek bere esku dagoen guztia eginen du hitzarmena defendatzeko, langileekin eta prest dauden gainerako eragileekin batera. Badakigu berri hau ez dela atsegina, baina ziur gaude antolakuntzaren eta borrokaren bidez lortuko dugula egoerari buelta ematea, hitzarmenaren negoziazioan egin genuen bezala. Bi hilabete ditugu borroka egiteko.

Idazki honen bidez sektoreko langile guztiei dei egin nahi diegu hurrengo egunetan eginen diren batzarretan parte hartzera, egoera denen artean aztertzeko, zalantzak argitzen saiatzeko eta OEISek egin digun eraso honi nola erantzun erabakitzeko.

Batzarrak:

  • Otsailak 25, ostirala
    • 10:00 Katakrak (Kale nagusia), Iruñea
    • 17:00 LABen egoitza (Arga ibaia 12-14) Rotxapea, Iruñea
  • Otsailak 28, astelehena
    • 10:00 Katakrak (Kale nagusia), Iruñea
    • 17:00 Katakrak (Kale nagusia), Iruñea
  • Martxoak 2, asteazkena.
    • 17:00 La Rúa gizarte etxea. Tutera