2026-04-09
Blog Page 872

Abenduaren 12rako greba erregistratu dute EAEko unibertsitatez kanpoko Hezkuntza Publikoko kolektiboek

admin
-
0
Abenduaren 12rako greba erregistratu dute EAEko unibertsitatez kanpoko Hezkuntza Publikoko kolektiboek

LAB, ELA eta STEILAS sindikatuok grebara deitu dugu egun horretarako, azken asteotan egin diren Borroka Asteei segida emateko, ikasturte hasieran iragarri bezala.

LAB, ELA eta STEILAS sindikatuok mobilizazio ugari deitu ditugu EAEko unibertsitatez kanpoko hezkuntza publikoan. Urrian zehar hainbat herri eta ikastetxeetan itxialdiak eta jai aldarrikatzaileak egin ditugu ikasle, guraso eta langileekin batera. Urriaren 28an familia eta herritarrekin batera manifestazio jendetsuak antolatu ditugu Gasteiz, Donostia eta Bilbon. Aurreko hiru astetan Haurreskolak Partzuergoko hezitzaile eta langileek, Sukaldari eta Garbitzaileek, eta Heziketa Bereziko Hezitzaileek izan zituzten Borroka Astea eta greba eguna, eta aste honetan Irakasleon txanda da. Hain zuzen ere, irakasleok bihar egingo dute greba.

Abenduaren 12an, berriz, kolektibo guztiek greba egingo dute, eta deialdi hori erregistratu dugu gaur, Bilbon, Eusko Jaurlaritzaren egoitzan.
 

 

 

Arabako enpresetan gertatzen den diskriminazioa eta iruzurrarekin amaitzeko eskatu dugu

admin
-
0
Arabako enpresetan gertatzen den diskriminazioa eta iruzurrarekin amaitzeko eskatu dugu

LABek irailean egindako agerraldi batetik abiatuta, gaur, kontratazioan ematen diren iruzurra eta diskriminazioari buruzko mozio bat eztabaidatu dute Arabako Biltzar Nagusietako Plenoan. Hori dela eta, elkarretaratze bat egin dugu Probintzia Plazan, aldundiaren aurrean, Araban enplegu duina aldarrikatzeko.

Gaur, hilak 29, mozio bat eztabaidatu eta onartu da Arabako Biltzar Nagusietan, enpresetako kontratazioan ematen diren iruzurraren eta diskriminazioaren inguruan. Mozio honen abiapuntua sindikatuaren agerraldi bat izan zen, pasa den irailean Enplegu Batzordean Arabako lan merkatuaren azterketa eta gure kontratazio proposamena aurkeztu baikenituen. Hori dela eta, elkarretaratze bat burutu dugu Arabako Foru Aldundiaren aurrean “Ni fraude ni discriminación, ARABAn ENPLEGU DUINA” lelopean.

Lehenik eta behin, salatu nahi dugu Arabako Biltzar Nagusiek beste alde batera begiratu dutela denboraz luzez eta soilik eztabaida bertara eraman dugunean hitz egin dela honetaz. Kontratazioan dauden iruzurra eta diskriminazioa aspalditik datozen arazoak dira eta LABen ustez, erakunde publikoek behingoz esku hartu behar dute beraiek ezabatzeko.

Hala eta guztiz ere, positiboki baloratzen dugu mozioa adostasun handiz onartu izana. Ikuskaritzak tresna eta bitarteko gehiago behar dituela uste badugu ere, LABen aburuz iruzur eta diskriminazioaren kontrako mozio hau abiapuntua izan daiteke erakunde publikoek esku hartzeko Patronalak eta, oro har, enpresa handiek mantentzen duten jokabideei aurre egiteko eta behingoz egoera larriak konpontzeko. Ildo horretatik, eta mozioaren 3. puntuaren deialdiari helduz, LABek, zenbaitetan beste sindikatu batzuekin batera jada enpresa batzuetan proposatu du kontratazio eredua alde guztien artean adostea, irizpide garden, objetibo eta ez-diskriminatzaileak aintzat hartzeko.

Edonola ere, ezin dugu ahaztu Arabako erakundeek eta PNV, PSE eta PP alderdiek hilabeteotan erabateko babesa ematen dietela Patronala eta herrialdeko enpresa handiei, noiz eta Ikuskaritzak berak beraien iruzurra ebatzi duenean, noiz eta diskriminazioa eta entxufismoa inoiz baino ageriagoa direnean. Eta ez hori bakarrik, enpresa iruzurtiak eta diskriminatzaileak txalotzeaz gain, Patronalaren TRIPARTIOAk (PNV-PSE-PP) zergak jaitsiko dizkiete, herritarron kaltetan.

Horregatik, LABek lanean jarraituko du mozio hau paper hutsean ez gelditzeko eta erakundeen inplikazioa bultzatzeko. Aldi berean, gure kontratazio-proposamena zabaltzen jarraituko dugu, bai gizarte eragileen artean bai enpresetan, iruzurra eta diskriminazioa ezabatzeko eta azken batean Araban enplegu duina, kalitatezkoa eta bermeekin lortzeko.
 

 

 

Alfako enpresa batzordeak mobilizatzeko deia egin du

admin
-
0
Alfako enpresa batzordeak mobilizatzeko deia egin du

ALFA taldea 800 langile izatetik 200 izatera pasatu da azken 5 urteotan. 2010 ingurutik ez da soldata igoerarik egon. Gainera, ordutik hona %10 eta %30 arteko soldata jaitsierak izan dituzte langileek. Aurreko urtean, ALFA LAN (enpresa taldearen burua) enpresako diru kontuetan, 3 pertsonen artean 2.240.000 euro banatu zituztela aurkitu zuten, hau Industris GOL enpresa saldu ostean kobratu dute "arrakasta prima" moduan. Langileek eta komiteak saiakera handiak egin dituzte errekuperazioa lortzeko, baina datu hau ezagutu izanak borrokatu areagotu du azken hilabeteotan. Langileak mobilizatzen hasi direnean (paroak, pankartak…) enpresak mehatxuei ekin die, oraingo honetan EEE bat mahai gainean jarrita. Honengatik guztiagatik, enpresa batzordeak egoeraren berri eman du gaur, Eibarren, eta euren aldarrikapenak eta datozen egunetarako mobilizazioak aurkeztu ditu; gaur arratsaldeko manifestazioa, tartean.

Hau da Alfako enpresa batzordeak kaleratu duen oharra:

Alfa Precision Casting enpresako beharginen batzarra barikuan bildu zen (2017-11-24), eta enpresak Auto Mecanizados enpresari aurkeztu enplegua iraungitzeko espedientearen aurkako iritzia eman zuen; gehiengoak azaroaren 27an, 28an, 29an eta abenduaren 4an eta 5ean GREBA egitekoaren ALDEKO botoa eman zuen.

Grupo Alfako behargin-kopurua 800 beharginetakoa izatetik 200 izatera igaro da azken urteotan; enplegu galera izugarria izan da hortaz.

Duela 5 urte, Alfako beharginoi ezarri ziguten soldata-jaitsiera %10a eta %30a bitartean egon zen, behargin bakoitzak izan zitzakeen soldata-mailen araberakoa. Hori guztia lanpostuei eusteko egin zen. Horrez gain, gogoratu gura dugu eros-ahalmenaren murrizketa, honezkero, %23koa dela, batez beste; aurki, egoera konpondu ezean, aipatu galera gero eta handiagoa izango da.

2017.eko uztailean, Grupo Alfako zuzendaritzarekin izan genuen azken bileran esan ziguten Alfa Precision Casting enpresaren altxortegia oso positiboa zela, baina hala ere, 6.000.000 €tako hipoteka-zorra zeukala. Behargin guztiok dakigu aipatu zorra Industrial Gol erosi izanak eraginda sortu zela.

Eta zer jazo da Industrial Golen salmentan irabazitako diruarekin (22.000.000 € inguru)? Tamalez, erantzuna guk geuk bilatu behar izan genuen Merkataritza Erregistroan; hura baieztatu ziguten enpresaren 3 kontseilarik: “arrakasta-sari” kontzeptuan 2.289.092 €tako huskeria banatu zuten.

Ez dugu ahazten ere Mecánicas Mallabiren likidazioa, taldearen beste enpresetako bat, ez eta haren gardentasun eza eta asmo gaiztoak.

Aipatu dugun guztia eta bestelako jazoerak ikusi ostean, beharginak nazkatuak daude, aldiro, enpleguak erregulatzeko espedienteak aurkeztearekin egiten zaizkion mehatxuokin, bertan lan egiten dugun familien etorkizunarekin enpresa batera garbi ez jokatzearekin, soldatak jaistearekin eta horrenbeste urtez izoztearekin, enpresa likidatzeaz egiten diren mehatxuekin eta Mecanizadosen aurkeztu den enplegua erregulatzeko espedientearekin.

Horrengatik, Batzarrak erabaki du 5 egunetan Greba eginez mobilizatuko garela, Mecanizadoseko lankideei sostengua adierazteko eta enpresak EGONKORTASUN ETA ETORKIZUNEKO KONPROMISOAK bere egin ditzala eskatzeko, beti ere, ALFAKO FAMILIAK KONTUAN HARTUZ.
Talde honen zuzendaritza ez zaigu fidagarria iruditzen, bilerak eta informazioa ukatu dizkigute, haren jarrera ez da batere gardena izan eta berriro, enplegua erregulatzeko espediente berria daukagu mahai gainean.

Proiektu berriak izan badaude, prozesua kontrol handiagoz egiten da, baditugu bezero handiak, badago gaitasuna,… baina hala ere, zuzendaritza horrek gura duen bakarra opilaren zati handi- handia da… Horrela, geure buruei galdetzen diegu: zeintzuk dira zuzendaritza horren benetako asmoak?, zeintzuk dira dauzkagun egonkortasuneko eta etorkizunerako konpromisoak?, zuzendaritza horrek berriro banatuko ditu “arrakasta-sariak”?

Alfaren etorkizunaren, lanpostuak eustearen eta Alfako beharginen baldintza duinen aldeko borrokari eutsiko diogu.
Horrengatik, Grupo Alfako behargin guztiak eta Eibarko hiritarrak deitzen ditugu bat egin dezaten azaroaren 29an, 19:00etan eta Untzaga plazatik abiatuko den manifestazioarekin.

 

 

 

CENek argudio juridikoak erabili ditu aitzakiatzat, lan-baldintzak Nafarroan negoziatzeko eskubidea langileei ukatzeko

admin
-
0
Nafarroako patronalak jakinarazi die ELAri eta LABi ez duela nahi Lanbidearteko Akordio bat, baldin eta horren helburua estatu-hitzarmenetako baldintza anitzez apalagoak Nafarroatik kanpo uztea bada.

Zapateroren Gobernuaren 2011ko lan-erreformak bide ematen die estatu-esparruko hitzarmenei negoziazio-gai jakin batzuk haientzat erreserbatzeko, eta sektoreko probintzia-hitzarmenetan ezarritakoa guztiz edo zati batez deuseztatzeko. Hori horrela, UGT eta CCOO ari dira estatu-hitzarmenak Madrildik ezartzen (eraikuntzan, ostalaritzan, metalgintzan, sukaldaritza kolektiboan…), zenbaitetan soldatak erdira jaitsiz.

2017ko ekainean ELAk eta LABek proposamen bat helarazi zieten CENi eta UGT eta CCOO sindikatuei, Nafarroako sektore-hitzarmenak lehenesteko, Madrilen sinatzen direnen aitzinetik. Ez dago beste helbururik langile nafarrei lan-baldintzak erabakitzea uztea baino, Madrilgo esku-sartzerik gabe.

CENek ezetza eman dio gure proposamenari, legezkotasuna auzitan jarriz. ELAn eta LABen ez dugu uste benetako arrazoia hori denik. Alde horretatik, oroitu beharrekoa da aurtengo urtarrilean ELAk, LABek, UGTk, CCOOek eta Confebaskek tankera bereko akordio bat sinatu zutela EAEn, eta ez du inork zalantzan jarri haren legezkotasuna.

ELAren eta LABen iritziz, benetako arrazoia da CEN guztiz bat datorrela azken lan-erreformekin, negoziazio kolektiboa ahultzea eta langileria pobretzea ekarri dituzten erreformekin.

ELAk eta LABek deitoratzen dute CENen jarrera hori, zeren horrela langile nafarrei lan-baldintzak erabakitzeko eskubidea ukatu baitiete, eta negoziazio kolektiboa estatalizatzeko bidea urratu baitute.
 

 

 

Kutxabank eta PSOEren arteko akordioa, azken honen zorra barkatzen duena, mesede-tratua da

admin
-
0
Kutxabank kasuko herri-akusazioak EAJ, PP eta PSOEri exijitzen die izan daitezkeen ustelkeri kasuak argitzeko, arduradunak epaitu eta zigortzeko, eta euskal herritarron beharrizanon alde, Kutxabanken pribatizazio eta bankarizazio prozesuan atzera egiteko. Euskal sistema finantziero publikoa osatu beharra dago, era horrela bakarrik ekidingo dira aurrean dauzkagun iruzur kasuak.

Kutxabank kasuko herri-akusazioaren oharra:

Kutxabanken Cabieces auzian, herri akusazio bezala agertu ginenetik, argi izan dugu, eta horrela azaldu dugu, Kutxabankek Cabieces lanik egin gabe soldatapean izatea alderdien arteko mesede tratua izan zela, Kutxabanken bankarizazio eta pribatizazio prozesuan aurrera egiteko. Denbora guzti honetan ordea, argi izan dugu eta horrela azaldu dugu, azaleratu genuen kasua ez zela bakarra. Atzetik beste hainbat egon behar zirela, eta Kutxabanken pribatizazioa bultzatu zuten alderdiek bultzatzaileek, erantzule izanda, pausu bat aurrera eman beharko luketela, eta ikertuak eta zigortuak izan beharko zirela egon zitezkeen mesede tratu, ustelkeri eta ate birakari kasu guztiengatik.

Beste behin ere, zuzen egon gara, eta beste ustezko mesede-tratu batekin aurkitu gara. Martxoan, PSOEko zuzendaritza eta Kutxabankeko ordezkari Xabier de Iralaren arteko akordioa sinatu zuten, PSOEri 21 milioi eurotako zorra barkatzeko. Zor hori PSOEk 80ko hamarkadatik zuen, eta oraingo zuzendaritzak gaia konpondu nahi omen zuen. Argi dago, gainontzeko herritarroi bankak ez dizkigula gure zorrak barkatzen, eta kobratzeko, gure etxeetatik kaleratzera iristen dira. Momentu honetan, gaia Senatuan dago, PPk alderdien ustezko finantziazio irregularra argitzeko osatu duen batzordean. Bestalde, Kontu Auzitegiak ere,azalpenak eskatu dizkio bai PSOEri eta bai Kutxabanki.

Kutxabankek, Eusko Jaurlaritzako kontrolerako batzordean ordezkaria dauka, eta PPk, Senatuko alderdi batzuen ustezko finantziazio irregularraren batzordea, bere ustelkeria kasuak zuritzeko asmatu zuen. Beraz, herri akusazio honek, esperantza gutxi dauka mesede tratu hau argitzeko. Jakina da, sarritan salatu dugun bezala, PPk PSOEk eta EAJk bankuekiko duten menpekotasuna. Kasu honetan, Kutxabankekiko duten menpekotasunak bultzatu ditu pribatizazio eta bankarizazio prozesuan hartu zituzten erabaki politikoak hartzera. Mesede-tratu gabe, ustelkeria gabe eta ate birakari gabe, bankarizazio eta pribatizazio prozesua ez zen posible izango.

Herri akusazio honek, EAJ, PP eta PSOEri exijitzen die izan daitezkeen ustelkeri kasuak argitzeko, arduradunak epaitu eta zigortzeko, eta euskal herritarron beharrizanon alde, Kutxabanken pribatizazio eta bankarizazio prozesuan atzera egiteko. Euskal sistema finantziero publikoa osatu beharra dago, era horrela bakarrik ekidingo dira aurrean dauzkagun iruzur kasuak.
 

 

 

EAEko 2017-2020 Enplegu Plana aurkeztu zenean egindako kritikak berresten ditugu

admin
-
0
Askotan mediatikoki horrela saldu arren, ezin da izkutatu aurtengo aurrekontua enpleguari dagokionez ez dela BPGaren hazkundearen portzentaira ere iristen, ezta horrela saltzen dutena ez dela enplegu plan bat ere.

Urtez urte programa berdinak errepikatzen dituzte, autoenplegua, renove plana, mikroenpresen sorrera edo kontratazio prekario eta aldi baterakoa.

Enplegua sortzeko funtsezkoa dena da produktibitatean ematen diren hobekuntzak inbertsio produktibora eta enpleguaren sorrerara bideratzen direla, ez patronalaren irabazietara. Gainera, administrazioek bitarteko finantzarioak bideratu beharko lituzkete kalitatezko enpleguaren sorrerara, ehun produktiboan zuzenean inbertituz eta zerbitzu publikoak unibertsalizatuz. Hau da EAEko gobernuaren enplegu planean agertzen ez dena, hain zuzen ere.
 

 

 

“Gero eta gehiago estutzen gaituzten enpresen esku utzi gaitu Jaurlaritzak”

admin
-
0
“Gero eta gehiago estutzen gaituzten enpresen esku utzi gaitu Jaurlaritzak”

Ekimen Ibiltaria Zamudioko teknologia parkera iritsi da gaur, Eusko Jaurlaritzaren politiken "adierazgarri argia" den enpresagunera. Hitza hartu dugu Ide enpresaren aurrean, eta multinazionalen jokabidea gogor salatu dugu: "Soldatak izozten dizkigute, Estatuko hitzarmenak aplikatu, lana eta bizitza uztartzea ezinezkoa egiten dituzten ordutegiak ezarri, malgutasuna inposatu, eta, bitartean, irabaziak metatzen dituzte egunez egun", nabarmendu dugu.

Eusko Jaurlaritzak ardura handia duela salatu dugu, "txeke zuria eskaintzen dielako patronalari eta enpresei, inongo eskakizun sozialik egin gabe", enpresak erosten dituzten atzerriko taldeei ere ez. "Gero eta gehiago estutzen gaituzten enpresen esku utzi gaitu Jaurlaritzak", berretsi dugu.

Zamudiora iritsi aurretik, Lezaman izan gara "Lan duina, bizi duina" Ekimen Ibiltariarekin, ekintza sindikaleko tailer bat egin baitugu bertan. Bihar, berriz, Zallan izango gara, 10:00etatik 13:30ak bitartean, Madres Irlandesas plazan. Enkarterrin bizi eta lan egiteko eskubidea aldarrikatuko dugu.
 

 

 

Urondo eta Urertza ontzien salmentak 25 lanpostu suntsituko lituzkeela ohartarazi dugu Ondarroan

admin
-
0
Urondo eta Urertza ontzien salmentak 25 lanpostu suntsituko lituzkeela ohartarazi dugu Ondarroan

Elkarretaratze bat egin dugu Ondarroan, Urondo enpresako bi arrantza ontzi horien salmentak ekarriko lituzkeen ondorioen berri emateko. "Ondarroako portuari eta herriari buelta ezina den galera lazgarria datorkio gainera berriro", adierazi dugu.

25 arrantzaleen lanpostu zuzenen galerak, berorrek ekarriko dituen beste hainbat zeharkako lan eta aberastasun galeraz hitz egin beharrean gaude (saregileak, mantenimendukoak, deskargatzaileak, garraiolarirak, enpakatzaileak,…), hau da, lanpostu eta aberastasun zuzenaren galera sortuko du Urondo eta Urertzaren salmentak beste herrialde batetara.

Gai traumagarri honez gain, ontzien salmenta honek gure herriari eskubideak kentzea dakar. Arrantza baimenak, arrantza eskubideak saltzen ditu Urondo enpresak Galiziara, eta behin saldu ostean ezin izango ditugu berreskuratu, saldu egingo dira armadore lapurren patriketara diru mordoa joanaz, ze diru hori, arrantzatzeko eskubideak saldu osteko dirua, armadoreen patriketara doa soilik.

Zergatik eduki behar du armadore batek arrantza egiteko eskubidea bere menpe? Eskubidea unibertsala da, eskubideak eta baimenak publikoak behar dituzte izan publikotasunetik lortu baitzituzten enpresek eskubide horiek, Europar Gobernuak doan emana bere garaian, arrantzatu ahal izateko Europako uretan.

Jaurlaritzak, Gobernuek, Urkulluren Industria 4.0 Plan ospetsuak, zer egiten dute kontrol publiko hori bermatzeko? Zergatik ez dugu Euskal Herrian kontrol publikoa egiten unibertsalak eta publikoak izan beharko liratekeen eskubideak defendatzeko? Zer egingo dute guztiek lanpostu horien galeren aurrean?

Hitz asko eta ekimen gutxi lanpostuen defentsan, bermerik ez eskubide galeren aurka.

Gauza asko ditugu egiteko:

– Arrantza eskubideak eta baimenak berton mantendu orain eta gerorako.
– Langileen lanpostuak bermatu.
– Euskal Herrian ditugun arrantza eskubideak bertotik ez direla aterako/salduko ziurtatu.
– Itsasoko lan arautu, Lan Hitzarmenak arrantzaleentzat, soldatak eta nominak bermatu, lan atsedenak, oporrak, kaladeroen zaintzak, … eta abar luzea, guzti hori dago egiteko.

 

 

 

Nafarroako Gobernuaren politika ekonomikoak ez duela langileontzat aldaketa handirik ekarri adierazi dugu Iruñean

admin
-
0
Nafarroako Gobernuaren politika ekonomikoak ez duela langileontzat aldaketa handirik ekarri adierazi dugu Iruñean

Euskal Herriko Eskubide Sozialen Kartak eta Parlamentu Sozialak deituta, dinamika horietan gauden eragile sozial, politiko eta sindikalok aurrekontu burujabe, sozial eta parte hartzaileen aldeko ekitaldi bat egin dugu gaur, Iruñean, Labrit pilotalekuan. LABeko idazkari nagusi Garbiñe Aranburuk hartu du hitza bertan, besteren artean, eta salatu du Nafarroako aurrekontuak ez direla burujabeak eta ez dutela aldaketa sozialean sakontzen. Ekitaldia amaituta, manifestazio bat egin dugu Iruñeko kaleetan.

Garbiñe Aranbururen hitzetan, "Nafarroan 2015ean, erregimena instituzioetatik bota eta eman zen aldaketa politikoa. Sekulako aurrera urratsa izan zen. Gehiengo sozialak aldarrikatzen dugun aldaketa sozialerako ezinbestekoa da erregimenarekin amaitzea. Asko aurreratu da demokratizazioan. Azken astean, urrutira joan gabe, beste urrats bat eman da. UPNk ezabatu zuen irakasleen Zerrenda Bakarra berreskuratu egin da. Irakasle euskaldunen diskriminazioari amaiera eman zaio. LABek lan handia egin du azken bi urteetan norabide horretan eta ospatzeko moduko albistea iruditzen zaigu. Aurreratu da, bai, demokratizazioan. Baina motz geratu da aldaketa soziala. Motz lan harremanetan eta eredu sozioekonomikoan, Nafarroako Gobernuaren politika ekonomikoak ez du aldaketa handirik ekarri langileontzat".

Hain zuzen ere, aldaketa soziala motz geratuko dela esan du aurrerantzean ere aurkeztu duten aurrekontu proiektua bere horretan, hobekuntzarik gabe, aurrera ateratzen bada. Aldaketaren gobernuak bi muga nagusi izan ditu, LABeko idazkari nagusiak nabarmendutakoaren arabera:

-Burujabetzarik eza.
-Geroa Bairen gobernuaren politika ekonomiko eta sozialaren mugak. Etengabe CEN patronalarekin aurrez aurre jartzea ekidin dute Ayerdi jaunaren politikek.

"Azken urteak, inboluzio urteak izan dira. Inboluzio bikoitza, soziala eta politikoa, eta beste hainbat neurriren artean konstituzioaren bi artikulutan jarri behar dugu arreta, 135.ean eta 155.ean. Biak ala biak erabaki ahalmena, burujabetza mugatzeko neurriak; inboluzio sozialaren adierazle nagusiena lehena eta inboluzio politikoaren adierazle nagusiena, bigarrena. Krisiaren ekonomikoaren aitzakiarekin, erreformak eta murrizketak bata bestearen atzetik inposatu zaizkigu azken urteetan. Konstituzioaren 135. artikulua era erreformatu dute, zorraren ordainketa guztiaren gainetik jartzeko eta zorpetze mugak ezartzeko. Hitz potoloak, sarri ulertzeko zailak diren kontzeptuak, hitz xaloetan esan daiteke. Nafarroak duen dirua, berak nahi duenerako ezin duela erabili esan nahi du eta politika sozialetarako diru gutxiago dagoela", azaldu du Garbiñe Aranburuk.

Inboluzio politikoari dagokionez, estatua 155.en artikuluarekin urrats bat harago joan dela esan du; birzentralizazioaren aldeko apustu argia, alegia. "Estatu espainiarrak erabakitzeko eskubidea ez du onartzen, ez du errespetatzen. Guk erabakitzeko eskubidea nahi dugu, erabakitzeko eskubidea behar dugu. Eraldaketa sozialik ez dago, erabakitzeko eskubiderik gabe, Nafarroako Gobernuak inboluzio eta mugapen hauen guztien barruan planteatzen du aurrekontuen eztabaida, dagoen markoan egin dezakeguna egitera mugatzen da. Nafar langileek zilegitasuna eta eskubidea dute nahi dituzten aurrekontuak eta nahi duten eredu ekonomiko eta soziala erabakitzeko", adierazi du LABeko ordezkariak.

Hala, Garbiñe Aranbururen hitzetan, "ezinbestekoa iruditzen zaigu, Nafarroako gizartearen erabakitzeko eskubidearen aldeko apustua. Ezinbestekoa da markoaz hitz egitea. Ezinbestekoa da joko arauak auzitan jartzea. Zergatik ezarri behar du Madrilek Nafarroako aurrekontuen zenbatekoa? Zergatik eman behar zaio lehentasuna zorraren ordainketari? Zergatik ezin zaizkie administrazioko langileei soldatak igo, estatuak finkatutakoaren gainetik? Argi eta garbi esan beharra dago: Nafarroako autogobernua erabat mugatua dagoelako. Eta horixe da ireki beharreko eztabaida politiko eta soziala".

Hitzaurreak hitzaurre, Labriten ere bozkatzeko aukera izan dute bertaratutakoek, aurrekontu burujabe, sozial eta parte hartzaileen alde ote dauden galderari erantzun baitiote. 

Ekitaldia eta gero, manifestazio bat egiten dute, Nafarroako Parlamentua helmuga.

 

 

 
1...871872873...1,607Page 872 of 1,607

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus