Alkartasuna Fundazioak mahai inguru bat antolatu zuen atzo arratsaldean, Bizkaiko Batzar Nagusien hitzaldi aretoan, "Pentsio duinen euskal sistema publiko baten alde" izenburupean. LABeko Ekintza Sozialeko idazkari Bea Martxueta bertan izan zen, beste hizlari batzuekin batera, eta sindikatuak pentsioei buruz egiten duen irakurketa plazaratu zuen.

Pentsiodunentzat eskertza hitzak izan zituen Bea Martxuetak bere agerraldian: "Eskertzekoa da LABeko pentsiodunen arloko kideek eta plataforma ezberdinek egiten duten lana. Kalean gaude egunero pentsiodunen eskubideak defendatzen". Hau esanda, pauso bat harago eman zuen, hizpide zuen gaiaren garrantzia kontutan hartuta: "Pozten naiz gaurko pentsiodunak hemen ikusteaz, baina gustuko izango nuke biharkoak ere ikustea, guztioi eragiten digun arazoa baita; eskubide urraketak eta lan merkatuaren prekarizazioa".

Pentsioen egungo egoera aldez aurretik pentsatutako estrategia baten ondorioa dela nabarmendu zuen; Espainiako Estatuko gobernu desberdinek egituratutako estrategia baten ondorioa, alegia. Zentzu honetan, aipatu zuen euskal sistema, Espainiako sistema ez bezala, bideragarria izango litzatekeela: "Borondate politikoa besterik ez da behar horretarako". Hori bai, nabarmendu zuen aberastasunaren banaketa eta lan merkatuaren aldaketa eman beharko liratekeela ezinbestean, helburuak betetzeko. "Babes sozialerako marko eta sistema propio eta publikoa da gure proposamena. Lan merkatuaren inguruan egin beharreko politika publikoak guztiz lotuta daude babes sozialarekin eta, beraz, pentsioekin", jakinarazi zuen.