2026-01-21
Blog Page 785

Osasunbideko B, C, D eta E mailetako langileek buruzagitza eta kooordinazioetara sarbidea izatea babesten dugu

admin
-
0
Osasungintzako Mahai Sektorialaren bilera egin da.

Atzo, apirilak 26, Osasungintzako Mahai Sektorialaren bilera egin zen. Honetan, beste gai batzuen artean, B, C, D eta E mailetan dauden pertsonak buruzagitza eta koordinazio lanpostuetara sarbide izatea ahalbidetuko duen araudia onartu da.

LABek aurkeztutako testua babestu du, nagusiki arreta unitateko zuzendaritzara sarbidea ahalbidetzen diolako B, C, D eta E mailetan dagoen edozein langileri, koordinatzaile ez medikuaren figura arautzeagatik, eta gardena bihuartzen duelako aldi baterako barne-promoziorako prozedura. Honekin, jende askok sarbidea izan lezakeela koordinazio lanpostuetan eta hauek betetzen ari denak honezkero dagokion ordainsaria jaso ahal izango du, orain arte Nafarroako Ospitaleetako zuzendaritzak ordaintzeari uko egiten diona.

Aurkeztu zaigun Berkokatzeen inguruko Foru Dekretuari dagokionez, Osasunbidean arautzen dituen behinbetiko testua aurkeztu zaigu. LAB bi arrazoirengatik abstenitu da: ez zaio langile kontratatuei ezarriko (langileen %51 dira) eta ez du jasotzen Gizarte Segurantzaren Instituto Nazionalak Desgaitasun Orokor Iraunkorra aitortzen dieten langileak Osasunbide barruan berkokatzeko aukera jasotzen, hortaz, egoera honeta legokeenak bere lanpostua galduko luke. Gogora arazi nahi dugu sektore pribatuan berkokatzeko betebeharra dagoela.

Zuzendaritzak gauetarako borondatezko exentzio proposamen bat aurkeztu du 55 urteko gorakoentzat. Ona izan daitekeen proposamen bat da, baina, erredaktatuta zegoen moduan, anbiguo eta zehaztasunik gabekoa zen. Zuzendaritzak aitortu digu helburua gaiari buruzko eztabaida bat irekitzea dela eta ekarpenak egitera gonbidatu gaitu. Informazio eta datu gehiago eskatu ditugu lanketa hori egiteko.

Azkenik, estatalizaziorako Enplegu Publikorako Eskaintza aurkeztu digute, eta hau birjartzerako Enplegu Publikorako Eskaintzari gehituko litzateke. LABen ustez, oso eskaintza eskasa da; oso urruti geratzen da behin behineko kontratazioa %8ra murrizteko helburutik. Madrilgo Gobernuaren inposizioa eta esku hartzea kritikatu dugu, Europako alderdi iruzurgileenaren esku dagoen Gobernuarena, eta Nafarroaren autogobernu ahalmena baldintzatzen duela esan dugu, eta, ondorioz, Enplegu Publikorako Eskaintzen bitartez plantilla publikoak eta euren postuen estaldura kudeatzeko ahalmena. Era berean, Nafarroako Gobernuari egiten diogun kritikaren berri eman dugu. Iruditzen zaigu menpekotasun jarrera erakusten duela eta ez diola kontra egiten Madrilen esku hartze zentralizatzaileari.

Data zehatzei dagokienez, aurreikusita dago prozesuaren deialdia 2018ko ekainetik aurrera egitea eta frogak 2019. Urtean izatea.
 

 

 

Sistema kapitalista, arrazista eta heteropatriarkal honek kondenatu nahi dituen emakume guztiei gure elkartasuna adierazi nahi diegu #gukSinistenDizuegu

admin
-
0
Sistema kapitalista, arrazista eta heteropatriarkal honek kondenatu nahi dituen emakume guztiei gure elkartasuna adierazi nahi diegu #gukSinistenDizuegu

Amorrua, nazka, tristura, beldurra, harridura, sinesgogortasuna, haserrea, gorrotoa… une hauetan ezin dugu besterik sentitu. Ez dugu justizia honetan sinesten. Ez dugu justizia hau nahi. Ez da bidezkoa. Patriarkala da.

Euren logika patriarkalaren menpe jarri nahi gaituzten instituzioetaz nazkatuta gaude, beti gure ekintzak epaitzen, gure keinuak aztertzen, baietz edo ezetz esan dugun erabakitzen, nahiko erresistentzia azaldu dugun edo EZETZ nahiko argi ahoskatu dugun ala ez zelatatzen!. Ea begiak itxi ditugun edo ez. Oihukatzen dugun edo isiltzen garen. Egiten dugun mugimendu bakoitzaren zuen logika misoginoaren interpretazioaz aspertuta gaude. Zuek boterean eroso, infantilizatzen, inbizibilizatzen, hitza kentzen digun justiziaren izenean, zerbait indarkeria den ala ez erabakitzen duzuen epaile gorenak bezala…

Indarkeria eta larderia da zuena, begien bistakoa dena aitortzen duzue gaitasunik gabeko sententziekin. Gertaera guztiari garrantzia kenduz, gure lekukotasunak ukatuz eta gure hitzak zalantzatan jartzen.

Gure bizitzak baliogabetzen dituzten indarkeririk gabe eta askatasunean bizi nahi dugula aldarrikatzera emakume guztiak kalera irteten bagara ere, berdin zaizue. Bortxatu egiten gaituzte, hil egiten gaituzte, erail egiten gaituzte, jo egiten gaituzte, iraindu egiten gaituzte,…eta hau gertatzen zen bitartean modu obsesibo eta zentzugabe batez, gu zer egiten ari ginen aztertzen duzue. Eta gu menperatuak mantentzeko, boterean mantentzen zarete, zuek elikatzen duzuen sistema kapitalista eta misogino honi begiratuz.

Baina ez duzue lortuko. Antolatuak gaude. Asko gara. Elkarrekin gaude. Indartsuak gara. Ez dugu zuen sisteman, zuen autoritatean ezta zuen justizian sinisten. Zuen bidegabeko gezurren aurrean, guk gure ahizpei, gure kideei, gure lagunei sinisten diegu.

LABetik sistema kapitalista, arrazista eta heteropatriarkal honek kondenatu nahi dituen emakume guztiei gure elkartasuna adierzi nahi diegu. Guk sinisten zaituztegu.

Gora borroka feminista! Justizia patriarkalik ez!
 

 

 

Bizkaiko bulego eta langeletako langileak berriro irten dira kalera

admin
-
0
Bizkaiko bulego eta langeletako langileak berriro irten dira kalera

Atzokoaren ostean, bigarren greba eguna egin dute gaur. Mobilizazioak ez dira falta izan; Bilbon egindako manifestazioa, kasu.

Gaur, apirilaren 26an izan da Bizkaiko Bulego eta Langeletako langileen lehen greba eguna. 23.000 langile zeuden grebara deituak eta jarraipena atzokoaren antzerakoa izan da, %75 ingurukoa.

Hitzarmenaren negoziazioaren mahaia ordezkaritza duten lau sindikatuek (ELA, COO, LAB eta UGT) deitzen zuten eta CGT, ESK eta CNTk ere babestu dute.

Gaur, atzoko antzean, mobilizazioak egin dituzte goizean sektoreko enpresa nagusietan. Ondoren, pikete mugikorra egin dute 10:00etatik aurrera Zabalburun hasita. 12:00etan manifestazioa egin dute Arriaga Plazatik Bilboko udaletxeraino. Eserialdia egin dute manifestazioaren amaieran.

Blokeatuta dago hitzarmenaren negoziazioa eta CEBEK patronalak lan- baldintzak okertu nahi ditu. Langileek ezetz esan diete murrizketei, gutxieneko bermea eta aintzinakotasunaren galerari, modu mugagabean soldata izozteari eta langileen prekarietatea zabaltzeari. Guztia, enpresak diru asko irabazten ari diren sektore batean.

Deitzaileek, erantzun zabala nabarmendu dute, erantzun duten langileak zorionduz. Espero dute azken bi egunotako greba eta mobilizazioek patronalaren jarrera aldatzea.

 

 

Okupazioari dagokionez, gizon eta emakumeen artean dagoen arrakalaz ohartarazi dugu

admin
-
0
Lan munduan ez dago aukera berdintasunean aurrera urratsik emateko benetako politikarik.

Emakumea lan mundura sartzearen prozesua lan-arrakala txikitzen ari da okupazioari dagoionez. Prozesu hau alde batetik, sistema produktiboaren beharrizanengatik egin da eta prekarietatea areagotzearen kontura. Honen erakusgarri dira aldibaterakotasun tasa handiagoak, behartutako partzialitatea, soldata-diskriminazioa, segregazio okupazional…

2017an %54,6koa zen gizonezkoen okupazio tasa, emakumezkoena baino ia 9 puntu altuagoa, %45,7koa baitzen hau. 2008tik, krisian egonda ere, murrizten jarraitu zuen gizon eta emakumeen arteko okupazio tasaren aldeak. Enplegu arrakala krisia zehar gizonezkoen lan egoera kaltetzearen kontura murrizten da. 2014an hasi zen enplegu berreskuratzen (kuantitatiboki, baina kalitate txarragokoak() baina galgatu egiten da arrakalaren murrizketa. Arriskua dago lan-arrakalaren hobekuntza gelditzea diskriminazio forma anitzak zuzentzen ez badira.

Azken hiru hilabetekoan langabeziak gora egin du. LABetik hiru gauza azpimarratu nahi ditugu:

Ez dago lan merkatuaren bilakaera positiborik gobernuek eta patronalak hori esan arren. Langabeziak gora egin du aurreko hiru hilabetekoari begiratuz gero. Urtez urteko datuak begiratzen baditugu, langabeziaren jeitsiera orokorra eten egin dela esan behar dugu.

Biztanleria Jardueraren Arabera azterketak eman dituen datuen sexuaren arabera aztertzen baditugu argazkia guztiz salagarria da. 1.800 langabetu gehiago daude bai, baina emakumeen langabeziak gora egin duen bitartean gizonen artean langabeziak behera egin du. Hots, 5.600 emakume gehiago daude langabezian, 3.900 gizon gutxiago daude bitartean. Datu hauek argi eta garbi adierazten dute segregazioak zenbateko indarra duen oraindik lan munduan:

1. Enplegua industrian eta eraikuntzan sortu da zerbitzuetan suntsitu den bitartean. Emakumeak sektore horietatik kanpo jarraitzen dugu, zerbitzu sektorearen gora beheretara lotuak jarraitzen dugun bitartean.

2. Gabonetako kanpainaren amaierak uzten dituen datuak direla esan dute askok baina egoera askoz ere
kezkagarriagoa da gabonetako kanpaina urtero bukatzen delako, ez horrela datu hauek.

3. Azpimarratu behar dugu ere suntsitu den enplegua behinbetikoa izan dela bereziki. Beraz ez gara momentuko gora beheraz ari, emakumeon enplegua suntsitu da bereziki azken hilabeteetan, gizon eta
emakumeen arteko arrakala handituz.

Bilakaera honek argi eta garbi uzten dute lan munduan ez dagoela aukera berdintasunean aurrera urratsik emateko benetako politikarik. Berdintasun planak porrota dira, ez dute gizonentzat gordetzen dituzten sektoreetan emakumean aukera berdintasunean sartzeko aukerarik sortu. Ez dute soldata arrakala murrizteko balio izan. Ez dira eraginkorrak izan emakumeon lan baldintzak hobetzeko.

Datu hauek ikusita derrigor salatu behar ditugu patronalaren buru den Larrañaga jaunaren hitzak. Lan merkatua ez da horrela emakumeok ez dugulako jakin ikasketak ongi aukeratzen. Oraindik orain, emakumeontzat lanbide eta sektore zehatzak gordetzen dira, lan baldintza askoz ere kaxkarragoetan, eskubide sozial eta laboraletara iristeko aukera txikiagokin. Horrela da gure prekarietateak egiten duelako sistema hau bideragarri, horrela empresariak etekin gehiago ditzan gure kontura. Horrela da instituzioek patronalaren hitzak eta jarrerak babesten eta zilegiztatzen dituelako.

Datu hauek ez dute momentuko egoera bat erakusten, egoera estrukturalaren adierazle dira. Emakume langileak langabezira, aitortua ez den lana egitera eta prekarietatean lan egitera kondenatzen gaituen sistemaren argazkia dira.

Martxoan 8an esan genuen indarra argazki hau goitik behera aldatzeko behar dugun indarra da. Indar guzti hori aktibatzea eta patronalaren politikak aldatzeko baliatzea da LABen erronka, mugimendu feministarekin konpartitzen dugun erronka hain zuzen ere.

 

 

 

Protestekin jarraitzen dute Vicinay enpresako langileek

admin
-
0
Protestekin jarraitzen dute Vicinay enpresako langileek

Vicinayko Sestaoko langileek greba egin dute gaur, joan den apirilaren 17an egin bezala. Elkarretaratze bat egin dute goizean lantokiaren sarrerak. Ondoren, Leioako Vicinay Marinerara joan dira, eta, ondoren, Sestaoko lantokira martxa bat egin dute.
 

 

 

Nafarroako suhiltzaileek Larrialdietako Garraio Sanitarioa eramateko habilitazioa galdegin dute

admin
-
0
Nafarroako suhiltzaileek Larrialdietako Garraio Sanitarioa eramateko habilitazioa galdegin dute

Suhiltzaileek elkarretaratzea egin dute Osasun Departamentuaren aurrean.

Gaur goizean suhiltzaileek elkarretaratzea egin dute Osasun Departamentuaren aurrean eskatzeko Larrialdietako Garraio Sanitarioan egiten duten lana egiten jarraitu ahal izateko eman diezaieten beharrrezko habilitazioa. Horren ezean, adierazi dute, kaos batean murgilduko ginateke.

LANGILE BATZORDEAREN ADIERAZPENA:
Nafarroako Babes Zibila eta Suhiltzaileok Nafarroako gizarteari dei egin nahi diogu Larrialdiko Osasun Garraioak duen arazoa dela eta. Hau da, suhiltzaileok anbulantziak gidatzeko behar dugun Habilitazioa ez aurreko gobernuak, ez eta oraingoak ez digutelako eskuratu bere erantzunkizunen utzikeriaz.

Nafarroako Suhiltzaileok gure sistemak dauzkan garraio sanitarioan baliabide publiko bakarrak kudeatzen ditugu eta gure kolektiboak hori defendatzeko sekulako ahaleginak egin ditu. Berriro aipatuko dugu: gure anbulantziak dira Garraio sanitarioko dauden baliabide publiko bakarrak. Edo berdina dena; gureak ez beste guztiak esku pribatuetan daude. Publikotasunaren defentsa neketsua izan da guretzako , izan ere, hainbat eraso egin zaizkigu pastel hau gustora banatuko zutenen aldetik. Defentsa horrek suposatu du derrigorrez egin behar ditugun lan egunez gain beste lan txanda batzuk egin izana, salatuak izan bitartean, gure promozio berriak gelditzeko ahaleginak medio, etabar. Halere, guk gurean segitzen dugu: kalitatezko anbulantzia publikoak suhiltzaileok gidatuta nahi ditugu.

Gure konpromezuak, baina, tamalez Administrazio Publikoarekin egiten du talka, nonbait. Osasunbideak,ezulergarri, harrigarriki, 2013an Agindu Foral bat kaleratu zuen legeztatzeko anbulantziako sektorean gaudenak baina, honen edukinagatik Nafarroako Suhiltzaileok inhabilitagarri bihurtzen gara. Sinestezina da Administrazioko arduradunek ez zutela erreparatu Nafarroan, arloan gabiltzan baliabide publiko garen bakarrak, hau da, 300 suhiltzaile baino gehiago, erregulazio honen kanpoan gelditu izana. Habilitazioa, edo iadanik egiten ditugun funtzioen errekonozimendua, ez dago legedi foralaren arabera suhiltzaileon esku enpresa pribatuetako langilegoa habilitatzen den bitartean.

Administrazioak guzti honen berri badauka urte asko dira. Aldiz, ez du ezer egin konpontzeko. Nafarroako Suhiltzaileen Zuzendaritza ezberdinek orain arte arazoa ez dute konpondu langile oro gure ekimen sanitarioa babesteko orduan.

Eta bereziki gaur Osasubideari zuzendu nahi diogu gure mezua aipaturiko 162/2013 Agindu Forala zuzendu dezan gure Habilitazioa ofizioz balia diezagun. Izan ere, behartuta daude langileon eskubideak eta hiritargoaren interesak bermatzera kalitatezko zerbitzu publiko sustengarriak interes pribatuen gainetik.

Gauzak honela, Osasunbideari zera exijitzen diogu: Konpondu dezala ahalik eta lehen arazo hau kontutan izanda gu habilitatzeko konpetentzia daukan organismo bakarra delako.

Era berean, Nafarroako lehendakaria den Uxue Barkos andereari bilera bat publikoki eskatzen diogu gure kezka helarazteko Larrialdiko Garraio Sanitarioaren inguruan.
 

 

 

Lanean bizirik eta osasuntsu, izena duena bada

admin
-
0
Lanean bizirik eta osasuntsu, izena duena bada

Apirilaren 28an, lan instripuek eragindako osasun galera eta heriotzak salatzearekin batera, arreta jarri nahi dugu Laneko Gaixotasunetan. Ikusezinak eta ahaztuak izaten jarraitzen dute. Lan istripuek eragindako laneko heriotz bakoitzeko 18 langile hiltzen dira lan gaixotasunagatik, baina, berehalako ondorioak ez dituztenez, behar baino gutxiago deklaratzen dira eta jatorrian dauden arriskuei aurre egiteko beharra alde batera uzten da.

Gaixotasun profesionalak ezkutatzeak zer ikusi handia du bajei loturiko planteamendu ekonomikoekin. Gaixotasuna laneko gaixotasun gisa aitortu ala ez, mutuak ala osasun sistema publikoak, batak ala besteak, hartzen du bere gain. Mutuek kontingentzia profesional gisa ez aitortzeko irizpidearekin dihardurte, gaixotasuna artatzea eta hari dagokion prestazio ekonomikoa osasun sistema publikora bideratzeko.

Mutuak dira egoera larri honen erantzuleak, eta patronala, egoeraren onuraduna, gaixotasunen laneko jatorria ukatzea aitzakia bihurtzen baita prebentziorik ez egiteko.

Lanean jarraitu behar dugu lakra sozial honen aurkako borroka egin eta gaurko lan osasuneko ereduaren alternatibak garatzeko. Osasunaren babeserako sistema alternatiboa aldarrikatzen dugu, pertsonen bizitza eta osasuna erdian jarriko dituena.

Apirilaren 28aren harira, bezperan, mobilizazioak egingo ditugu Hego Euskal Herriko lau hiriburuetan. Mobilizatu gaitezen patronala neurriak hartzera behartzeko, instituzioak interpelatuz, egoeraren erantzule zuzenak seinalatzeko, lan- gileen kontrako indarkeria patronalarekin amaitzeko.

 


Apirilaren 27, ostiraleko mobilizazioak:

-BILBO 12:30ean Manifestazioa Plaza Zirkularretik
-DONOSTIA 11:30ean Bilbao plazatik manifestazioa
-GASTEIZ 11:30ean Landatxo Gizarte Etxetik manifestazioa
-IRUÑEA 11:00etan Gurutze plazatik manifestazioa

 

 


Patronalen erantzun ezak greba deialdiak indartzera behartzen gaitu EAEko Gizarte Ekimeneko ikastetxeetan

admin
-
0
Patronalen erantzun ezak greba deialdiak indartzera behartzen gaitu EAEko Gizarte Ekimeneko ikastetxeetan

Maiatzaren 15 eta 16ra deitu dugu grebara.

Hauxe da gaurko agerraldian irakurritako testua:

Kristau Eskola, AICE, Ikasgiltza eta Elizbarrutiko Ikastetxeen aldetik gure eskariei emandako erantzun ezak eta EAEko Gizarte Ekimeneko sektoreko langileek martxoaren 20ko grebari emandako babes handia ikusita, sektorean ordezkaritza dugun sindikatuok (ELA, STEILAS, CCOO, LAB eta UGT) bi greba-egun gehiago iragartzen ditugu ikasturteko hirugarren hiruhilekorako.

Honez gero jakingo duzuenez, iazko irailean, negoziazioa urtetan ito-puntuan egon ondoren eta hitzarmena 2009tik berritu gabe, sindikatuok gutxienezko eskariak jasotzen zituen plataforma bateratua aurkeztu genien patronalei, baina ez ziguten ganoraz erantzun. Hori zela-eta, azaroan sektoreko sindikatuok negoziazio-mahaia utzi genuen, eta mobilizazio-sail bati ekin genion, bertan geldirik zeuden patronalak mugiarazteko modu bakarra zelakoan.

Martxoaren 20an sektoreko langileok oso modu zabalean babestu genuen ELA, STEILAS, CCOO, LAB eta UGT sindikatuok egindako greba deialdia. Bilbon, Donostian eta Gasteizen izandako manifestazio jendetsuak sektorea ia-ia guztiz gelditu zelaren frogarik argiena dira, %70tik gorako jarraipenarekin. Egun hartan ondo agerian geratu zen premiazkoa zela negoziazioak edukiz betetzea, eta gure eguneroko lanerako eta gure lan-baldintzetarako behar-beharrezkoak diren alderdiak adostea: ordu osagarriak, kidegorik prekarioenak artatzea (hezkuntza-laguntzako espezialistak eta haur-hezkuntzako lehen zikloko langileak), enpleguari eusteko plan baten beharra, eta galdutako eroste-ahalmena arian-arian berreskuratzea.

Gure aldarrikapenak oso argiak dira, baina patronalen aldetik ez dute erantzunik izan, beraien ardurak saihesten eta informazio toxikoa zabaltzen jarraitzen duten bitartean. Aukera baliatu nahi dugu argi uzteko ez dela egia gure eskaerek ikastetxeen bideragarritasuna arriskuan jartzen dutenik; horietako batzuk ez dute kostu ekonomikorik (ordu osagarrien kasuan) eta beste batzuk kolektibo txikiei eragiten diete.
Patronalaren proposamen ezaren aurrean mobilizazioak indartu behar ditugu, bi greba-egun gehiagorekin. Maiatzaren 15a eta 16a izango dira, eta greba-deia EAEko Gizarte Ekimeneko ikastetxe guztietako langileentzako da: Haur Hezkuntza, Lehen Hezkuntza, DBH, Batxilergoa, Lanbide Heziketa, Hezkuntza Laguntzako Espezialistak eta Administrazio eta Zerbitzuetako pertsonala.

Aurrera begira egoera aldatu ezean, mobilizazioak areagotu beharko ditugu hurrengo ikasturtean, greba deialdi berriekin. Horiek garaiz iragarriko ditugu, baina kopuruz askoz nabarmenagoak izango direla aldez aurretik esan dezakegu.
 

 

 

[IRITZIA] “Ikus gaitzazuen”

admin
-
0
[IRITZIA] “Ikus gaitzazuen”


Apirilaren 26a lesbianen ikusgarritasun eguna da. LABeko kide Irati Tobarrek, Maddalen Doradorrek, Aitziber Perez de Karkamok, Ainara Ladronek eta Ainhoa Etxaidek sexualitate aniztasuna dute hizpide iritzi artikulu honetan.

Apirilaren 26a lesbianon ikusgarritasun eguna da. Bai, ikusiak izateko eta gure existentziaz ohartarazteko eguna behar dugu, munduak begiak zabal ditzan. Ez ikusiarena egin nahi duen heteropatriarkatuaren aurrean, gure existentzia aldarrikatu nahi dugu.

Genero eta sexualitate sistemen interrelazioan gaude, baina sistema bietako zentroan baino, sistema bietako marginetan bizi gara lesbianak. Itotzen gaituen sistema patriarkalaren barruan emakumeak*; zapaltzen gaituen sistema heteronormatiboaren barruan, lesbianak. Justizia lortzeko eta gure eskubideak defendatzeko borroka latz bi egin beharra dauzkagu: misoginiari eta lesbofobiari aurre.

Lan munduan ez zaigu lesbianoi toki propiorik egin. Oraindik orain gure enpleguak senarraren soldataren osagarri direla adierazten digute lan merkatutik.

Bazterkeria ekonomikoa emakumeon* gaineko kontrol sistema da. Horregatik, gizon baten menpe ez dauden familiak bereziki zigortzen ditu. Eredu tradizionalari uko egin dioten ama bakarreko familien egoera benetan da latza. Edozelan, egoera hau aztertua izaten da, datuak eman eta fokoa ipintzen da bertan. Hala ere, pobreziak ama biko familiak zelan gaztigatzen dituen ez da inondik ageri. Kasu honetan ere inork ez gaitu ikusten. Datu ekonomikoetatik ere at.

Ez dezagun ahaztu, emakumea*, genero rolaren eraikuntzaren arabera, bere gorputzaren eta sexualitatearen jabe ez den subjektua dela. Beraz, lesbiana, bere gorputzaren jabe den subjektua izanik, kapitalaren eta patriarkatuaren eredua transgreditzen duen pertsona da.

Patriarkatuak gizona zentroan jartzen duen bezala, kasu honetan homosexualitateaz hitz egitean, gayak izaten dira subjektu. Gizonak maite dituzten gizonak mehatxua dira heteroarauarentzat, baina ez dira zertan ezinbestez mehatxua patriarkatuarentzat. Gayen aldetik ikusgarritasuna lortzen doaz, egia bada ere zigortuak eta erasotuak izaten direla, eta borroka horretan tinko jarraitu beharra dagoela. Baina egia ere bada gizonek egiten duten edozerk beti duela inportantzia, onerako zein txarrerako.

Zer esanik ez, batzuetan kapitalak bere metaketarako ere erabiltzen du homosexualitatea. Kapitalak bere burua berrasmatzeko gaitasun handia dauka. Merkatuarentzat negozio bide bihurtu dira gizon bikoteak, bikotekide bien eros-ahalmena bikote heterosexual batena eta, zer esanik ez, lesbiana bikote batena baino altuagoa da izaten da eta. Honek ere gayen ikusgarritasunean eragina izan du.

Lesbianen existentziak ez dauka kapitalarentzat inportantziarik eta, gainera eta bereziki, patriarkatua zein heteroaraua, sistema biak, kolokan jartzen ditu. Horregatik ezkutatzen da lesbianon existentzia bera. Gizonik gabe bizi ahal garen emakumeak* patriarkatuarentzat arriskutsuak gara, lesbianismoak gizonen autoritate politiko, ekonomiko eta sexuala desafiatzen dituelako.

Lesbiana izatea sistemarentzat ez da batere errentagarria eta ondorioz, bizitza antolatzen den arlo guztietan ezkutatua egotetik harago, eskubide gutxiagokoa da. Horrela, lan munduan, babes sozialean, zerbitzu publikoetan edota beste eremuetan ez gara existitzen eta ez zaizkigu eskubideak bermatzen. Hareago, zigortua izatearen beldurrez, askotan ez dugu bere sexualitate aukera adierazten.

Lesbianon existentzia estaltzea, lesbianok ikustezin bihurtzea, erreferente publikoak egotea galarazten digu, bai. Baina ondorio maltzurragoak ere badauzka: lesbofobia ere estaltzen da; subjektuak eurak eta hauen kontrako zapalketa estrategiak ezkutaturik, lesbianok existentziatik desagerrarazi nahi gaituzte. Eta honen bitartez aldaketa sozialaren eragile izateko aukera ere kendu nahi zaigu, lesbianoi eta, gurekin batera, emakume* guztiei.

Beraz, lesbianon ikusgarritasunaren egunean, lesbianak ikusgarri egitea eta sexualitate aniztasuna aldarrikatzea goraipatu nahi dugu, lan eremuan zein bizitzako beste edozein arlotan aurrerapausoak egin ditzagun. Guztion ardura da lesbianon hautua defendatu eta askatasunez bizi gaitezen borroka egitea. Lan eremuan zein beste esparrutan gertatzen diren erasoen aurrean, sindikatua borrokarako tresna daukagu, baina baita gure existentzia aldarrikatzeko eta eskubidedun subjektu bihurtzeko tresna ere. Ikusgarri egiteak ez gaitu aske egiten, lesbiana moduan agertzea da aske egin gaituena.

*Emakume erabiltzen dugu M8an bezala bollerak, trans, identitate anitzak adierazteko… Lesbiana kategoria politiko bezala konsideratzen baitugu eta lesbiana asko emakume hitzarekin ez baitira identifikatzen.

 

 

 
1...784785786...1,586Page 785 of 1,586

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus