Arantza eta Deustuko Erriberan lan egin zuten gaileta-egileak omendu genituen larunbatean, Artiach lantegia zegoen lekuan. Egon zirenengatik, gaudenengatik eta etorriko direnengatik!
Blog Page 566
Osasunbidea: Ospitalegunean, mugikortasuna modu arbitrarioan kudeatzen da
Erizaintzako azken deialdien ondoriozko lanpostuen adjudikazioek berriz ere agerian utzi dute zuzendaritzen antolaketa ezin kaskarragoa dela langileen kudeaketari dagokionez, mugikortasuna arbitrariotasunez aplikatzen baitute modu sistematikoan, akoplamenduaren figura arautzen duen araudia behin eta berriz urratuz.
Langileen Zuzendaritzak bat egin du Erizaintzako Zuzendaritzaren trikimailuekin, interesatzen zaizkion pertsonak bere iritziz egon behar duten lanpostuetan jartzeko. Hori helburu, ez dute inolako lotsarik, Erizaintzako Zuzendaritzarekin batera, lanpostu batzuk diskrezionalki sortu, eta profesional "aukeratu" batzuk bertan kokatzeko, langile horien lan-ordutegia eta ordainsari ekonomikoa aldatu behar badute ere. Ez zaie inporta jokabide horrekin antolaketa-disfuntzio garrantzitsuak sortzea eta plantilla organikoa batere justifikaziorik gabe eta legez kanpo aldatzea.
Hori horrela, hemendik gutxira sartuko diren erizainak lanean hasten direnean, horietako batzuk ez dira sartuko puntuazioaren arabera bete beharko luketen lanpostuetan, baizik eta langile kontratatu gisa aritu diren lanpostu beretan, buruek eta zuzendariek hala erabakita. Hori etengabe egiten ari dira, baita langile finkoekin ere. Horrela, lanpostu horiek gainerako langileei eskaintzea galarazten dute, eta zenbait plaza erreserbatuta gelditzen dira, haiek nahierara betetzeko.
Zerbitzu-eginkizunak ere behatzez esleitzen dira, araudian jasotako prozesua batere errespetatu gabe. Eta hori estamentu guztietan gertatzen da: pisu handiagoa dute zuzendaritzek beren pupiloak ondoan atxikitzeko izaten dituzten "interesek" lan irizpide argiek baino. Gainera, zerbitzu-eginkizunen esleipen hori, askotan, behin betiko mugimendu gisa agertzen da plantilla organikoan, eta zaildu edo ezabatu egiten du gainerako profesionalek plaza horiek eskuratzeko duten aukera.
Ulertezina iruditzen zaigu profesionalen zuzendaritzak (zerbitzu zentralak eta Nafarroako Ospitaleguneko zuzendaritza) egoera horretaz ez ohartzea. Bitartean, zuzendaritza batzuk (Erizaintzakoa bereziki, horrelako barne-mugimendu asko egin dituelako) egoera horretaz baliatzen ari dira Ospitalegunea ospitale pribatu bat balitz bezala zuzentzeko, barne-mugikortasuneko prozesuak erabat kenduz, deialdien arteko denbora behin eta berriz luzatuz eta deialdietan oso lanpostu gutxi eskainiz (erakargarritasun gutxien duten lanpostuak, hain zuzen), horrela lanpostuak haiek nahi duten bezala esleitu ahal izateko. Eta hori guztia justifikatzeko esaten dute bidean zailtasun eta traba asko dituztela: Zuzendaritzak berak eragindako zailtasunak.
LABetik eskatzen dugu zintzoki errespetatu dezatela profesionalen mugikortasunari eta plantilla organikoari buruzko araudia eta publiko egin daitezela, Nafarroako Gobernuaren Gardentasunaren Atarian, plaza-zenbaki bakoitzaren hasierako destinoa eta izan duen mugikortasuna. Ziurtatu beharra dago Ospitalegunean urtero egiten direla akoplamendu prozesuak, eta behar diren bitartekoak jarri behar dira profesionalenganako legez kontrako egoera hori berehala konpontzeko.
Ez dugu uste denak balio duenik erakunde publiko bat kudeatzeko orduan, erakunde horren gobernamendu onaren aitzakiapean egiten bada ere. Kargu publikoetan ari direnak indarrean dagoen araudia behin eta berriz urratzea ezin da inola ere justifikatu.
Enegarrenez, Erizaintzako zuzendariaren eta haren menpeko arloko buruen dimisioa eskatzen dugu, haiek baitira Ospitaleguneko profesionalen kudeaketa desegituratu izanaren arduradun nagusiak, plantilla organikoan disfuntzio larriak sortuz eta funtzio publikoan oinarrizko lan-eskubideak urratuz.
Patronala eta Jaurlaritza lan heriotzen erantzule direla salatu dugu Bilbon, hildako eta desagertutako langileak gogoan
Euskal gehiengo sindikalak deituta, kalera irten gara berriro, lan heriotzen eta lan istripuen sarraskia salatzeko. Eusko Jaurlaritzaren Bilboko egoitza okupatu genuen asteazkenean, erantzuleak seinalatzeko; bada, mobilizazioa egin dugu ostegun arratsaldean, Bilboko Arriaga plazan, Hego Euskal Herrian aurten hil diren 11 langileak eta Zaldibarren lur azpian desagertuta dauden biak gogoan. LABeko Ekintza Sindikaleko idazkari Xabier Ugartemendiak hartu du hitza, eta lan istripuak ez direla kasualitatea, prekarietatearen ondorio direla berretsi du.
Xabier Ugartemendiaren hitzetan, "astebete bete da bi langile desagertuta daudenetik Zaldibarren. Bitartean, patronala mehatxuka dabil, iraingarriak diren adierazpenak egiten, eta Iñigo Urkullu buru duen Gobernuaren lehentasuna hauteskundeak dira, eta autopista irekitzea".
Urtea hasi zenetik Hego Euskal Herrian lanean 11 langile hil direla salatu du: "Langileen osasuna eta bizitza bermatzen ez duen eredu batek ezin du duina izan. Beraz, argi eta garbi esan behar dugu prekarietateak hil egiten duela".
LABeko Ekintza Sindikaleko idazkariaren esanetan, "lan istripuetan hltzen diren langileen ardura patronalarena da, beraiek egiten dutelako prekarietatearen aldeko apustua; lan istripuetan hiltzen diren langileen ardura Jaurlaritzarena da, behin eta berriz patronalarekin lerrokatzen delako eta beraiei babesa ematen dielako. Politikak aldatzeko garaia da. Behingoz garaia da. Nahikoa da. Lakra honekin amaitu behar dugu. Langileek eskubidea dute etxera osasuntsu eta bizirik itzultzeko".
Elkarretaratzearen ondoren, komunikatu bat irakurri dugu, eta minutu bateko isilunea egin ere hildako langileen omenez. Ondoren, txalo zaparrada handi batekin amaitu da mobilizazioa.
Bilbon mobilizatuko gara gaur arratsaldean euskal gehiengo sindikalak deituta, prekarietateak hil egiten duela salatzeko
2020 hasiberritan 11 hildako jasan ditugu Euskal Herriko lantokietan eta bi lankide desagertuta dauzkagu Zaldibarko luizian. Instituzioetako arduradunen atsekabe eta elkartasun hitzekin nekatuta gaude, ekintzarako garaia da.
Behin-behinekotasunak hil egiten du. Azpikontratazioak hil egiten du. Prebentziorako neurririk ez izateak hil egiten du. Diru-goseak hil egiten du, langileen aurka prekaritatea darabilen patronal aseezina da honen erantzulea eta patronal honekin erabat lerrokatuta dagoen Eusko Jaurlaritza konplizea.
Zaldibarren lanean aritu izan diren langileak urteetan arriskupean jarriak izan dira kaltegarriak diren sustantzietara esposatuz, babesik gabe. Luizian lanera joandako langileei ez zieten amiantoaren presentziaren informaziorik eman, zabortegian hura pilatzen ari zirela jakin arren. Helburu bakarra autopista irekitzea izan da, ikuspegi ekonomizista berriz gailenduz. Lehentasunezkoa da langile biak aurkitzea, baita senide, lankide eta biztanlegoari kudeaketa gardena bermatzea ere.
Eusko Jaurlaritzari egun dauzkan baliabide guztiak prekaritateari aurre egiteko erabil ditzala exijitzen diogu (Ikuskaritza, Osalan…) eta segituan prekaritatearen aurkako larrialdi-plan bat onar dezala pandemia honi aurre egiteko beharrezko baliabideak lortze aldera. Bada garaia herri honetako langilea den gehiengoaren interesak defendatzen hasteko.
Langileok lantokietan pairatzen dugun egoera salatzeko, lanean istripuak jasan dituzten lankide guztiak oroitzeko, bereziki momentu honetan lan-istripuen ondorioak jasaten ari diren senide, lagun eta lankide guztiei gure elkartasuna adierazteko, eta erakundeei politiken aldaketa bat exijitzeko, ostegun honetan Euskal Herriko Gehiengo Sindikalak mobilizazio bat burutuko du Bilboko Arriaga Plazan, 18’30etan.
Herri eta auzoetan lan, pentsio eta bizitza duinen aldeko borrokan segitzeko deia egin dugu, errepresio mota guztien gainetik
Gaur, Espainiako Poliziak Donibaneko hiru gazte atxilotu ditu urtarrilaren 30ean egin zen Greba Orokorraren pikete batean parte hartzeagatik. Horietako bat pistolaz atxilotu dute, gainera. LAB sindikatuak bere elkartasuna adierazi nahi die atxiloturikoei, bai eta poliziaren bortizkeria pistoladuna salatu ere.
Zaldibarko bi langile desagertzeagatik, greba eskubidea urratzeagatik edo legalki jasota dauden lan baldintzak ez betetzeagatik atxilotutako enpresaburuen eta arduradun politikoen kopurua zero da. Aldiz, Nafarroan lan, pentsio eta bizitza duinaren alde mobilizatzeagatik atxilotutako langileen kopurua 19koa da dagoeneko.
Errealitate horrek argi erakusten digu zein den kapitalismo basati honen helburua, langileon bizitzak suntsitzea. Izan ere, atxiloketa hauek auzoko apustu etxe baten jabeak jarritako salaketaren ondorioz izan dira. Gazte eta langileon bizitzak pikutara bidaltzen dituzte, miseria zabaltzen dute gure herri eta auzoetan, eta, horrez gain, patronalaren piketea -hau da, polizia eta botere judiziala- erabiltzen dute beraien ereduaren aurrean egiten ari garen mobilizazioen indarra mugatzeko.
Ez dute lortuko. Greba egunean herri eta auzoetan jendartearen erantzuna ikaragarria izan zen. Herri eta auzoetan egindako lana balioan jarri behar dugu gure aldarrikapenak errealitate bihurtzeko aukerak zabaltzen dituelako. Beraz, mobilizatzen jarraitzeko deia egin nahi dugu, lan, pentsio eta bizitza duinak lortu arte.
Hartara, LAB sindikatutik gure elkartasun osoa adierazi nahi diegu atxilotutako Donibaneko gazteei. Horrekin batera, behingoz prozedura judizial guztiak bertan behera uztea ere eskatzen dugu. Gaur torturaren aurkako egun honetan bereziki poliziak erabilitako bortizkeria pistoladuna salatu nahi dugu. Jarrera hori erabat antidemokratikoa iruditzen zaigu eta, horregatik, Espainiako gobernuak Nafarroan duen ordezkariaren azalpenak eskatzen ditugu.
Berriz diogu: gobernuek, patronalak, apustu etxeek eta poliziek ez digute ukatuko lan, pentsio eta bizitza duina izateko dugun eskubideak. Beraz, oain arte bezala mobilizatzen jarraituko dugu, gurea dena lortu arte. Ilusioz eta determinazioz!
Nafarroako Administrazio Publikoko langileei soldatak %2 igotzea erabaki bada ere, 2012ko murrizketak ez direla oraindik zuzendu gogorarazten dugu
Gaur goizean Negoziazio Mahai Orokorrean jorratu diren gaien artean, langile publikoentzako 2020ko soldata-igoerarena egon da. Neurri hori begi onez ikusten dugu, baina, horrekin batera, 2012ko murrizketak zuzentzea ere eskatzen dugu.
Negoziazio Mahai Orokorrak gaur goizean egin duen bileran erabakitzeke dauden hainbat gai jorratu dira, tartean Nafarroako Administrazio Publikoen zerbitzuko langileei %2ko soldata-igoera onartzearena. 2020. urteari dagokion igoera da, eta, alde horretatik, ez dago ezer berririk…
Arazoa, ordea, lehenagotik dator. Krisia zela-eta langile guztiei ezarri zizkiguten murrizketei buruz ari gara. Murrizketak aldi baterako izango zirela ziurtatu ziguten, baina, ohiz kanpoko neurri hori ezarri zigutenetik urte batzuk igaro ondoren eta krisia gaindituta, oraindik ez digute itzuli kendu zigutena. Administrazioak urteko soldata-igoerak aplikatzen jarraitzen du, eta beste alde batera begiratzen du murrizketen zuzenketari dagokionez, gauza batek bestea estaltzen duela pentsatuta.
Ba… ez! Ez ditzagun gauzak nahasi! Gauza bat da soldaten urteko igoera, eta beste bat, oso desberdina, 2012an jasan genituen murrizketen zuzenketa, urte hartan, batez beste, ordainsarien %5 kendu baitziguten: E mailako langileei %0,24, D mailakoei %1,38, C mailakoei % 3,54, B mailakoei %4,86, eta A mailakoei %6,7. Horregatik, LABek murrizketa horiek zuzentzea eskatzen du.
Ez dugu ahaztu behar LABek aurreko legealdian egindako lan sindikalak fruitu oparoak eman zituela, adibidez: funts gehigarriak banatzeko akordioa, Nafarroako Gobernuan E maila desagertzeko eta zenbait kolektibo mailaz igotzeko (besteak beste, administrariak edo hezkuntzako zaintzaileak) balio izan zuena. Orain, legealdi berri honen aurrean, LABen espero dugu aurreko legealdian bezain baliotsuak izatea Nafarroako Administrazio Publikoetako langile guztientzako lan baldintza duinen alde lan egiteko, eta, horren ondorioz, baita herritar guztientzako kalitatezko zerbitzu publikoen alde egiteko ere.
Uruguai-ko FUECYS-PIT CNT sindikatuaren aurkako erasoa gaitzesten dugu
LAB sindikatuak Uruguai-ko FUECYS-PIT CNT (Zerbitzu pribatu eta komertzio sektoreko sindikatua) sindikatuari bere elkartasun osoa adierazten dio eta bere egoitzen kontra egondako erasoak gogor gaitzesten ditu.
Mehatxu hauen aurrean honakoa adierazi nahi diogu bai FUECYS-i eta baita PIT CNT zentral sindikalari:
• Bere egoitzan agertutako margoketak, eta beraien aktibitate sindikalaren kontrako jazarpena gaitzesten ditugula.
• Gertakari hauek Uruguai-n ematen ari den eskubiko indarren hazkundearen testuinguruan ulertu behar dela. Herrialde honek oso ongi daki sindikalisten aurkako jazarpena zer den, eta iraganeko gertakariak izatea espero dugu.
• Klase sindikalgintzak mundu osoan pairatzen dituen jazarpen eta mehatxu hauek guztiak herriarekin eta langile klasearekin daukagun konpromisoaren ondorio direla, eta beraz mehatxu hauek guztiak batzuk demokraziari eta askatasunari dioten beldurraren seinale direla. Gauzak horrela, zalantzarik gabe klase sindikatuok bide beretik jarraituko dugu.
• Gertakizun hauek argitzea eta hauen atzean daudenak identifikatzeko ahal duten guztia egitea, eta berriro ez gertatzeko eskura dituzten neurri guztiak hartzea eskatzen dugu.
• FUECYS eta PIT-CNT -ko kideei gure elkartasun eta babes osoa helarazten dizkiogu.
Nafarroako patronalari eta gobernuari lan, pentsio eta bizitza duinak bermatzeko akordioak eta neurriak proposatu dizkiegu
Nafarroako Gobernuaren Errealitate Sozialaren Behatokiak aurkezturiko Nafarroako Enpleguaren Diagnostikoak oso balio handia du LABendako, arrazoia ematen baitio urte askoan salatu izan duen horretan, alegia, Nafarroako enpleguaren egoera txarra baino txarragoa dela, patronalak bultzaturiko prekarizazio-prozesuaren ondorioz.
Behin-behinekotasuna (egunetako edo asteetako kontratuak, bereziki Administrazioan berean), heriotzak eta lan-istripuak, soldataarrakala matxista, lan-araugabetzea (autonomo faltsuak), prekaritate handiagoa langile migratzaileen artean, langile pobreak, iraupen luzeko langabezia emakume-aurpegiarekin, gazteen langabezia, pobrezia eta gizarte-zaurgarritasuna, gizarte-babesik eza (langabezia-prestazioak), Errenta Bermatuaren hartzaileen kopurua handitzea… Hori da nafar gehienek lan eta bizitza duinak izatea galarazten duen errealitate gordina.
Eta horren aitzinean, Nafarroako gizarteak ez du Elkarrizketa Sozialaren Kontseilua bezalako txiringito gehiagorik nahi, ez eta orain arte langile klasearen arazo eta beharren aurrean guztiz eraginik ez dutela frogatu den bertze Enplegu Plan bat bezalako plan izarrik ere.
Bertzalde, berretsi da LABek lan-harremanen eta gizarte-babesen esparru propioari buruz behin eta berriz egiten duen aldarrikapena funtsezkoa dela egoera tamalgarri horri buelta emateko neurriak hartu ahal izateko. Nafarroako Gobernuak berehala eskatu behar ditu enplegu-politika pasiboen gaineko eskumenak (kontratazioak, lan-baldintzak, kaleratzeagatiko kalte-ordaina, erretiro-adina…). Ezin gara ekintza eta neurri osagarri hutsak egitera mugatu.
LABek Nafar Lansare hartzen du parte (SNE-NL), eta ikusi ahal izan du bere bitartekaritza-tasa benetan txikia dela: Nafarroan izan ziren lanpostu guztien %2 baino ez. Hori onartezina da. Nafar Lansare berraztertu eta sustatu behar da, eta bere esku-hartzean kalitate eta kantitate jauzia egin, politika aktiboak oso eraginkorrak izan baitaitezke, kontratazioari ematen zaizkion pizgarrietatik harago —pizgarri horiek auzitan daude Europan, patronalari bakarrik egiten diote mesede, eta lan prekarioen sinonimo dira—. LAB da funtzionatzen ez duen eredu pribatuaren aurrean kudeaketa publikoa planteatzen eta defendatzen duen sindikatu bakarra.
Bertze behin ere —eta hori Nafarroako Gobernuaren jarrera kezkagarria da—, klase enpresarialari kritika eta interpelazio zuzena egitea falta zaio, lan-erreformak eta horren ondoriozko lan-araugabetzea aprobetxatuz, patronala lan-harremanen eredu prekarioa ezartzen ari baita, bere onura ekonomikoa lehetsiz, langile klasearen osasuna okertzearen eta pobretzearen kontura.
Horregatik guztiagatik, tresna eraginkorrik eza nabaria den egoera tamalgarri horren aitzinean, LAB sindikatuak akordio eta neurri hauek proposatzen ditu (horietako batzuk dagoeneko Euskal Herriko Eskubide Sozialen Kartaren izenean proposatuak):
CEN patronalari
1. Lanbidearteko akordioa soldata arrakala matxistaren bukatzeko.
2. Lanbidearteko akordioa, gutxieneko 1.200 euroko soldata ezartzeko (14 paga garbietan), Nafarroan.
3. Lanbidearteko akordioa asteko 35 orduko gehieneko lanaldia eta asteko 20 orduko gutxieneko lanaldia ezartzeko.
4. Azpikontratatutako enpresetako langileen subrogaziorako eskubidea bermatzeko lanbidearteko akordioa.
Nafarroako Gobernuari
5. Lan Harremanen eta Gizarte Babesaren Esparru Propioa. Ildo horretan, Lan Ikuskaritzaren eta enplegu-politika pasiboen arloko eskumenen transferentzia erreklamatzea.
6. Pentsioak:
• Gutxieneko pentsioak 1.080 euroraino osatzea. Nafarroako Gobernuak baditu eskumenak neurri hau hartzeko.
• Sektore publikoko langileen erretiro aurreratua ahalbidetzeko mekanismo berriak bilatzea eta berreskuratzea.. Hala nola:
â—¦ Erretiro primak berreskuratzea.
â—¦ % 75eko erretiro partziala lan-kontratudunendako eta antzeko formulak langile guztiendako.
7. Lan baldintzak Administrazioan eta azpikontrataturiko enpleguan:
• Enplegu publikoan den prekaritatea berehala bukatzea. Administrazio publikoko behin-behinekotasun maila %40tik gorakoa da eremu batzuetan. Beharrezko mekanismoak hartzeko eskatzen dugu, birjartze eta egonkortze tasak gaindituz, aldi baterako enplegua finko bihur dadin.
• Azken urteotan aplikatutako murrizketak lehengoratzea. Azken urteetan galdutako erosteko ahalmena berreskuratzea.
• Zerbitzu publikoei baliabide egokiak ematea, inbertsioa nabarmen handituz, gutxienez Europako batez bertzekoetara ailegatzeko.
â—¦ Osasunean, BPGaren %4,78tik %7ra.
â—¦ Hezkuntzan, BPGaren % 3,54tik %4,6ra.
• Azpikontrataturiko enpleguaz:
a) 1.200 euroko gutxieneko soldata eta 35 orduko gehieneko lanaldia ezartzea.
b) Nafarroako Kontratu Publikoen Legearen aplikazioa bermatzea.
c) Gutxienez, Nafarroako hitzarmen sektorialaren aplikazioa bermatzea, bai eta bertze klausula sozial batzuena ere.
d) Subrogaziorako eskubidea bermatzea.
8. Fiskalitatea: eredu fiskalaren erabateko aldaketa sustatu behar da, diru-bilketa Europako batez bertzekoaren mailan handitzeko (zergak errenta altuei, enpresei eta kapitalei handituz eta soldataz kanpoko errenten iruzur fiskal handia borrokatuz).
9. Nafarroako Kontratu Publikoen Legea betetzea.
10. Eskubide sozialak:
• Legez bermatzea mendekotasun-egoeran dauden pertsona guztiek zerbitzu publiko, unibertsal eta doako baten bidez ziurtatua izateko eskubidea.
• Eskubide Sozialen Kartak pobreziaren eta gizarte bazterketaren aurka sustaturiko Herri Ekimen Legegilearen edukiak onartzea, hala nola:
â—¦ Errenta bermatua Lanbidearteko Gutxieneko Soldataren %100ean ezartzea
â—¦ Establecer la Renta Garantizada en el 100% del SMI, bi pertsonen bizikidetza unitateen kasuan % 50 gehiago handituz, eta 3 kide edo gehiagokoetan bertze %50 gehiago.
â—¦ Alokairu sozialeko etxebizitza eskuratzeko eskubidea bermatzea.
11. Lanetik bizirik itzultzeko eskubidea bermatzea eta lan osasunaren kudeaketa publikoa.
12. Elkarrizketa Sozialerako Kontseiluaren desgitea eta derogazioa.
13. Igande eta jaiegunetan 0 irekitzea.
14. Nafar Lansareren kudeaketa publikoa.
Espainiako Gobernuari:
15. Lan erreformak bertan behera uztea.
16. Pentsioen erreformak bertan behera uztea.
Hainbat eragilek adierazpen bat sinatu dugu, El Salvadorreko demokraziaren defentsan
Hainbat erakunde politiko, sindikal eta sozialok El Salvadorreko presidenteak egindako estatu autogolpe saiakera gogor arbuiatzen dugu. Nayib Bukelek Asanblea militarizatu, eta zuzenbide estatu konstituzionala urratu zuen, organo legegile hori bere borondatearen arabera jardutera eta erabakitzera behartzeko.
Joan den otsailaren 9an, El Salvadorren, Nayib Bukele presidenteak arbitrarioki eta bere kabuz Asanblea Legegilea deitu zuen 109 milioi dolarreko mailegu bat onartzera behartzeko, delinkuentziaren aurkako Lurralde Kontrolerako Planaren 3. fasea gauzatzeko hain zuzen ere. Beharrezko quoruma ez zeukala ikusita, Nayib Bukele indar militar eta polizialarekin Asanblea Legegilean aurkeztu zen, Estatuaren botere horrekiko beldurrarazte eta presio ahalegin ukaezin batean.
Honen aurrean, adierazpen honen sinatzaileok honakoa exijitzen dugu:
• Nayib Bukele Errepublikako presidenteak segurtasun eta legezkotasun juridikoaren bidez eratutako ibilbideak errespetatzea, eta bakea eta elkarrizketa politikoari eutsiz, botereen independentzia eta herrialdearen instituzionaltasun demokratikoa bermatzea
• El Salvadorreko Konstituzioa arautzen duten printzipioak errespetatuz, bere eginkizunetan, legebiltzarrarekin harmonia soziala eta koordinazio-bideak izatea.
• Mario Ponce Biltzar Legegileko lehendakariari, Salvadorko herriari une oro segurtasun juridikoa eta bakea lehenestea exijitzen diogu.
• Organo legegilearen egoera, erabilera eta abusua autokudeatzeko ahalegin horren aurrean, Justizia Auzitegi Goreneko Konstituzio Arloko Aretoari, kasu horietan dagokion konstituzio-kontrola egitea eta herrialdeko presidenteari erantzukizunak eska diezazkion exijitzen diogu.
Nazioarteko elkartasunetik dei bat egiten dugu El Salvadorren ordena konstituzionala errespeta dadin, militarizazio gero eta handiagoari aurre egin dakion eta El Salvadorrreko herriarentzat bake sozial eta justua berma dadin.