2026-05-05
Blog Page 539

Patronalek eta sindikatu sinatzaileek birkokatzeko bermerik gabeko akordioa adostu dute EAEko Gizarte Ekimeneko ikastetxeentzat

admin
-
0
Patronalek eta sindikatu sinatzaileek birkokatzeko bermerik gabeko akordioa adostu dute EAEko Gizarte Ekimeneko ikastetxeentzat

Gaur, Gizarte-Ekimeneko ikastetxeen negoziazioen azken esperpentoa bizi izan dugu. ELA, Steilas, CCOO eta UGT sindikatuek Kristau Eskola eta AICE-IZEA patronalekin, ikasgela jaitsieragatik lanpostuen galera dela eta, ikasturte honetan 40 langile baino gehiago birkokatzeko bermerik ez ematea adostu dute.

Uztailaren 15ean adostu duten xedapen gehigarri hau, joan den azaroan korrika eta presaka sinatu zuten greba-amaierako akordioaren arintasunagatik eta jaso zituzten hainbat eduki ez betetzetik sortu da. 8 hilabeteko epealdi luzearen ondoren, patronalak langileak ez birkokatzeko aitzakiak jartzen ari zirela ikusita, joan den astean LABek, langileei lanpostua bermatu ezean, patronalak epaitegietara eramatearekin mehatxu egin zuen.

Hori dela eta, alderdi sinatzaileek, hainbat desadostasunen ondoren, “Larrialdi egoerarako irteera” bat bilatu behar izan dute, betetzen ez den eta edukien aldetik gero eta murriztuago dagoen akordio bat defendatzeko.

Patronalek eta sindikatu sinatzaileek, egoera zail honen aurrean, beraien irudia garbitzeko antzezpena egin dute, langile guztiak benetan birkokatu gabe, Eusko Jaurlaritzaren finantzaketa publikoa jaso ahal izateko eta erretiro aurreratuak ordaintzeko. Benetako iruzurra langileei, 29 greba egun egin baikenituen hitzarmen duin baten eta lanpostuak bermatzearen alde.

Azken finean, azken momentuan eta birkokapen prozedura serio eta sendo batek eskatzen duen patxadarik gabe adabaki bat jarri duten zuloz jositako hitzarmenean: alde batetik, Hezkuntza Laguntzako Espezialistak prozesu honetatik kanpo utzi dituzte eta, behin baino gehiagotan sindikatu guztiok salatu dugun moduan, funtzionatzen ez duen espezialisten poltsara kondenatzea erabaki dute; bestetik, gardentasunik eta bermerik gabeko prozesu bat adostu dute, sindikatu sinatzaileen hitzek argi uzten duten moduan, “arautu gabe dagoen” birkokapen prozedura bati babesa eman die.

Argi dago helburu bat eta bakarra duela azken orduko testu honek: finantzaketa publikoa jasotzeko tramitea betetzea, ahalik eta langile gutxien birkokatuz, orain arte bezala jarraituz; langileak “hatzez” kaleratuz eta kontratatuz.

Iaz 150 milioi euroko irabaziak izan eta 130 milioi baino gehiago dibidenduetan banatu ondoren, Mercedesek ezin die murrizketarik planteatu langileei

admin
-
0
Iaz 150 milioi euroko irabaziak izan eta 130 milioi baino gehiago dibidenduetan banatu ondoren, Mercedesek ezin die murrizketarik planteatu langileei

LAB sindikatuak Mercedes-Benzeko egoeraren azterketa ekonomikoa egin du, eta datu bat nabarmendu du: azken 4 urteetan 500 milioi euro baino gehiago banatu ditu dibidenduetan. Gainera, 2015etik 2019ra, 485 milioiko irabaziak izan ditu. Egoera horretan, lizuna da enpresak eta taldeak langileei murrizketak ezarri nahi izatea.

Egindako azterketa ekonomikotik ondorioztatzen da Mercedes-Benz Españak egoera erabat onbideratua duela. Izan ere, 2019an 150 milioi euro baino gehiagoko mozkin errekorra lortu zuen, 2018an baino 20 gehiago, 2015ean eta 2017an baino bi aldiz gehiago eta 2016koaren halako hiru. Onura hori plantillaren %8 gutxiagorekin gertatu zen, enpresak ebentualak kaleratu baititu (soldata eskala bikoitza aplikatzen jarraitzen du) eta langileak kanpora atera dituelako Zerbitzu Medikuan, logistikan, ingenieritzan… Hori guztia, oro har, 2015 eta 2019 artean, 485 milioiko mozkina izan duen bitartean.

2016. eta 2017. urteetako praktikara itzuliz, eta langileek sortutako aberastasuna biltzeko logika kapitalista hutsari erantzunez, Mercedesek aurreko urteko mozkin guztia dibidenduetan banatu zuen iaz, zehazki, 130 milioi euro baino gehiago. 2018an aurreko urteko mozkinen ia laukoitza banatu zuenez, enpresa nolabait deskapitalizatuz, azken 4 urteetan 500 milioi euro baino gehiago banatu ditu dibidenduetan.

Gauzak horrela, LABen ustez, mozkin maila horrekin, diru kopuru handi hori dibidenduetan banatu ondoren, Mercedesek langileei murrizketak egin nahi izatea zentzugabea da. Gure iritziz, ezin dute iradoki langileen lan-eskubide eta lan baldintzei eragiten dien neurririk. Uste dugu Mercedesek duen egoera ekonomikoa edukita onartezina dela langileak eta, oro har, Gasteizko jendartea beldurtu nahi izatea planteamendu horiekin. LABek langile guztien baldintza duinak defendatzen jarraituko du orain eta etorkizunean, kapitalaren logika prekarizatzailearen aurrean.

Olaberriako Arcelor Mittal-eko langileak lanuzteekin hasi dira enpresak euren eskakizunei jaramonik egin gabe jarraitzen duelako

admin
-
0
Olaberriako Arcelor Mittal-eko langileak lanuzteekin hasi dira enpresak euren eskakizunei jaramonik egin gabe jarraitzen duelako

Zuzendaritzak orain arte izandako jarrerak ez du mobilizaziora jo beste aterabiderik utzi. Horregatik langileek batzarrean adostutako presio neurriak martxan jarri dituzte. Errelebo bakoitzaren azken orduan paroak burutu dituzte gaur eta sarreraren aurrean mobilizatu dira. Larunbatean gauza bera egingo dute.

Duela bi aste buruturiko langileon batzarrean ELA eta UGTk gutxiengoan sinaturiko aurreakordioari ezezkoa eman genion. Horrez gain, LAB eta CCOOen artean adostutako plataforma eta plangintzari baiezkoa eman genion. Modu horretan 16 hilabeteko prozesu negoziatzaile luzean zehar defendatzen aritu garen edukiak hitzarmenean txertatu daitezen negoziatzen jarraitzeari eman zitzaion baiezkoa, eta enpresako zuzendaritzak erakutsitako borondate eskasari buelta emateko presio egiteko neurriak adostu genituen.

Batzarraren emaitzak eskuetan, uztailak 3 ostiralean bertan, enpresa-batzordeak, gehiengoz, langileon eskaera zuzendaritzari komunikatu eta lehenbailen negoziatzera eseritzeko eskaera egin zion, asteartea, uztailak 7, data bezala proposatuz. Irmoki salatu nahi dugu zuzendaritzak erakutsitako jarrera, benetan kezkagarria baita. Erantzun argirik eman gabe eta “agenda” konplikatuari erreferentzia eginik mahai negoziatzailea biltzeari muzin egin dio. Are gehiago, jakinik, jarrera horrek langileok batzarrean adostu genuen plangintza mobilizatzailea martxan jartzera eramango gintuela. Ez du bildu nahi izan proposatutako egunean eta beste proposamenik ere ez du egin. Horregatik galdera luzatu nahi diogu: ez ahal zaio zuzendaritza honi urgentziazkoa iruditzen, langileok hala eskatu ondoren, negoziatzen jarraitzea? Edo batzarreko emaitza gustatu ez eta berdin zaizkio negoziatzeko borondate faltak eragin ditzakeen eszenatoki gatazkatsuak?

Gure ustetan prozesu osoan zehar Zuzendaritzaren helburua langileok behin eta berriz mahaigaineratu ditugun aldarrikapen zeinbaiti aterabiderik ematen ez dien hitzarmena inposatzea da. Kontestu horretan kokatzen dira lehen ere publikoki salatu ditugun hainbat trikimailu: estatu mailako ABEEEaz egiten dabilen erabilera interesatua (Lan ikuskaritzan salatu duguna) edo aurrez egitekoak ginen langile asanblada galaraztea. Batzarrarren emaitzaren aurrean ordea, uste dugu zuzendaritza behartuta dagoela hitzarmen duin bat negoziatzen jarraitzera. Soldata igoera duinak, egutegian aldaketak adostuak izatea, bajak osagarritzen dituen sorospen kutxaren biziraupena, errelebo kontratua egingo dela bermatzea…

Beraz, Olaberriako ArcelorMittaleko LABek publikoki dei egin nahi dio zuzendaritzari hitzarmena negoziatzen jarraitu dezan, langileok batzarrean erabakitakoari kasu eginez eta aldarrikatu ditugun edukiei aterabidea emateko borondatearekin. Aldi berean, batzarrean adostutako aldarrikapenak bururaino eramateko konpromisoa adierazi nahi dugu eta langileei borrokara batu eta mobilizazioetan parte hartzeko eskua luzatu nahi diegu.

Osakidetzako EPEaren filtrazioak ikertzeko kasuak abiadura hartu duela eta guk eskatutako jarduerak aurrera dozela ikusteak pozten gaitu

admin
-
0
Osakidetzako EPEaren filtrazioak ikertzeko kasuak abiadura hartu duela eta guk eskatutako jarduerak aurrera dozela ikusteak pozten gaitu

Ana Jesus Zulueta epaileak auto bat kaleratu du LAB sindikatuak neurokirurgia epaimahaiburua inputatzeko, 24 pertsona lekuko gisa deklaratzen hasteko eta 2020ko ekainaren 9an eskatutako hainbat ofizio hasteko egindako eskaerak babesteko. Halaber, irekita uzten du Osakidetzaren zuzendaritza zaharra inputatzeko aukera, zilegi ez den elkarteagatik, kontratazioan iruzur egiteagatik eta sekretuak jakinarazteagatik, auto honetan erabakitako eginbideak egin arte.

LABek lekuko gisa eskatutako lekukotzak 24 dira guztira, eta epaileak deklarazioa hartzea erabaki du:

-José Muñiz Fernandez jauna, Osakidetzak Oviedoko fakultateari eskatutako azterketa psikometrikoaren egilea. Eginbide hori egokitzat jotzen da bere koordinaziopean idatzitako txostenak argitzeko.

-LAB sindikatuak egindako estatistika-azterlanaren arduraduna, anestesia kategoriatik haragoko filtrazioak ikusteko aukera eman zuena, emaitza anomaloak zituzten kategoriak 19ra igoz.

-Anestesia, angiologia eta traumatologia probetako 6 oposiziogile.

-Digestio-aparatuko irregulartasunen salatzaile bat.

-Kirurgia plastikoko irregulartasunen salatzaile bat.
-Mikrobiologiako irregulartasunen salatzaile 1.

-Angiologiako 7 kide, Maria Reyes Vega izan ezik, inputatuta baitago eta deklarazioa hartu baitzioten.

-Traumatologia epaimahaiko 3 kide.

-Kirurgia plastikoko epaimahaiko 2 kide.

-Urologia epaimahaiko kide 1.

Era berean, Ana Jesus Zuluetak emandako autoak LABek Covadonga Fernández Maiztegi neurokirurgiako epaimahaiko presidentearentzat eskatutako inputazioa babesten du, neurokirurgiako proban oposiziogileen anonimotasuna hautsi baitzen.

Autoak egokitzat jotzen ditu, LABek eskatuta, ofizio hauek:

-Epaitegira bidaltzea urologia epaitegiaren akta guztiak, Osakidetzaren espedientean jasota ez daudenak, bai eta kontsultak eta erantzunak ere, batez ere ariketak jendaurrean irakurtzeko aukerari dagokionez, zuzenketa anonimotasunaren eskubidea urra baitaiteke, eta, hala badagokio, nork erantzun zien planteatutako galderei.

-Giza Baliabideen Zuzendaritzak (Juan Carlos Soto) Angel Loma-Osorio doktorearekin egindako bilera egiaztatzeko eskaera. Bilera hori Osakidetzaren espedientean aipatzen da, eta egin zen Lomak filtrazio-salaketa argitaratu ondoren. Bilera horren ondorioz, Angel Loma-Osoriok eta Izaskun Obietak uko egin zioten epaimahaiko kide izaten jarraitzeari.

-Epaimahaiko kideek azterketak egin baino egun batzuk lehenago (2018ko maiatzaren 27an) Astoria hotelean egindako bileragatik traumatologiako epaimahaiko kideei espedienterik ireki zaien ala ez argitzea, epaimahaiburuaren eta idazkariaren bizkar. Erantzuna baiezkoa bada, espediente osoa bidaltzeko eskatu.

-Kirurgia plastikoko oposiziogile baten oposiziotik kanpo uzteko espediente osoa, bai eta oposiziogile horrek egindako azterketak epaitegira bidaltzea ere, lortutako nota eta Kirurgia Plastikoko epaimahaiaren eta Osakidetzaren arteko komunikazio guztiak zehaztuta.

-Neurokirurgia kategoriaren espediente osoa eta epaimahaikideen arteko komunikazioak, kategoria horretan ere oposiziogileen anonimotasuna hautsi ote zen argitzeko.

LABek herri-akusazio gisa defendatzen jarraitzen du Osakidetzako filtrazioak aspalditik datozela, eta saihesten ez saiatzeaz gain, Osakidetzako zuzendaritzak eskura zituen baliabide guztiak erabili zituela azterketak egin aurretik lanpostuak nahierara banatzeko sistema hori hobetzeko, eta filtrazioak aurkitu ondoren, haiek ezkutatzen eta argitzea oztopatzen saiatu zela.

Lurgoien enpresako langileen egoera eta langileak kaleratzeko asmoa salatu ditugu

admin
-
0
Lurgoien enpresako langileen egoera eta langileak kaleratzeko asmoa salatu ditugu

LABek Lurgoien S.A. enpresako langileak jasaten ari diren egoera salatu du, eta enpresak 35 langileak kaleratu nahi izatearen aurka agertu da erabat. Gure salaketa enpresaren egoitzara eraman dugu gaur, Donostiara, elkarretaratze baten bitartez.

Lurgoien enpresako langileak babesik gabe daude erabat. Enpresak hilabete batzuk daramatza lanik eman gabe. Maiatzeko eta ekaineko nominak eta udako aparteko ordainsaria zor dizkie. Eta, azkenik, ekainaren 15ean jakinarazi zien Enplegu-Erregulazioko Espedientea (kaleratze kolektiboa) egiteko asmoa zuela, data horretatik aurrera beste berririk izan gabe.

Egoera horren ondorioz, egiten ari ziren edo esleituta zituzten hainbat kontratu eta obra deuseztatu dira. Lurgoien Balzola taldeko kidea da, eta duela hilabete batzuk Bizkaiko langileentzako Enplegu-Erregulazioko Espedientea aurkeztu zuen.

Gure ustez, enpresa itxiera-egoera hori justifikatzen duen egoera bat sortzen ari da, kontratu horiek nahita galduz. Argi dugu Lurgoien enpresak lana bazuela eta bideragarria zela, baina Balzola taldearen finantza-egoerak itxiera-egoerara eraman du.

LABek zor diren nominak ordaintzea, enpresaren planen berri berehala ematea eta enpresaren itxiera saihestuko duen bideragarritasun-plan bat eskatu dio taldeari.

Bere langileen egoera ez dela harrotzeko modukoa gogoratu diogu Eusko Jaurlaritzari Lakuan

admin
-
0
Bere langileen egoera ez dela harrotzeko modukoa gogoratu diogu Eusko Jaurlaritzari Lakuan

Eusko Jaurlaritzako LABek kontzentrazioa egin du Lakuan, Gobernuaren 2016-2020 legegintzaldiaren akabera dela eta. Hala, pandemiak Eusko Jaurlaritzaren jarrera negargarria areagotu besterik ez duela egin salatu dugu.

COVID 19 krisiak areagotu baino ez ditu egin gobernuak legegintzaldian izandako jarreraren ezaugarriak: sindikatuokiko eta langileokiko errespetu eza eta negoziazioaren ukazioa. Izan ere, prentsaz jaso izan ditugu negoziazio mahai izan behar zuten batzarretarako deialdiak, baita alde bakarrez hartutako erabakien edukiak ere. 

Finean, gobernu honek negoziazio plantak eta antzerkeriak egiten dituen informazio hutsezko mahai bihurtu du sindikatuon esparrua. Seguru asko, Eusko Jaurlaritzan langilegoak duen egoera ez delako harrotzeko modukoa: Langilegoaren erdia baino gehiago behin-behinekoa da; eros-ahalmenaren %15 ostu zaigu; 10 urte baino gehiago daramatzagu lan-hitzarmena negoziatu barik; eta, langilegoaren batez besteko adina 60 urtekoa izanik, Gobernuak ez du plangintzarik garatu ezta erretiroa laguntzeko hobaririk eta pizgarririk ezarri ere.

Siemens Gamesak Agoitzeko lantegia ixteko dituen asmoak gelditu eta nafar jendarteari larunbateko manifestazioan parte hartzeko deia egiten diogu

admin
-
0
Siemens Gamesak Agoitzeko lantegia ixteko dituen asmoak gelditu eta nafar jendarteari larunbateko manifestazioan parte hartzeko deia egiten diogu

Asteazkenean egin zen Siemens Gamesa multinazionalak Agoitzeko lantegia ixteko EEEaren lehen bilera. Itxierak 239 familia utziko ditu kalean. Bilerarekin batera, 24 ordutako lanuztea egin zuten langileek multinazionalari argi eta garbi esateko ez dutela lantegiaren itxiera onartuko.

Agoitzeko lantegia errentagarria eta bideragarria da, bileran multinazionalari adierazi zitzaion moduan. Kosteak apaltzea beste helbururik ez duen deslokalizazio bat da, lantegia itxiz eta ekoizpena eskulan merkeagoa duten Portugal eta Tangerreko beste lantegi batzuetara bideratzeko. LABek tresna guztiak erabiliko ditu bidegabekeria hau gelditzeko, greba, mobilizazioak eta ekimen judizialak. Itzelezko kaltea ekarriko luke Agoitzeko lantegiaren itxierak, ez soilik langileentzat, baita honezkero oso zigortuta dagoen eskualdearentzat.  

Bere egunean, enpresaren kontrola galduz Gamesa Siemensi saldu izana txalotu zutenen erantzukizun politikoaren ordua da. LABetik dei egiten diogu gure militantzia osoari eta baita nafar jendarteari ere enpresa-batzordeak datorren larunbatean deitu duen manifestazioan parte hartzera. Uztailaren 11an izango da, 18:00etan, autobus geltoki zaharretik abiatuta. Itxiera hau gelditu egin daiteke. Guztion artean lortuko dugu. 

Lan-Ikuskaritzak behin betiko arrazoia eman digu eta behartu egin du Osakidetza lanaldiaren barruan norbere garbiketarako denbora ematera

admin
-
0
Lan-Ikuskaritzak behin betiko arrazoia eman digu eta behartu egin du Osakidetza lanaldiaren barruan norbere garbiketarako denbora ematera

Joan den apirilean, Garbialdi enpresako LABeko gure lankideek salaketa jarri zuten Lan Ikuskaritzan enpresaren (kontrata) eta Bilbo-Basurtu ESIaren (kontratatzailea) aurka, Arrisku Biologikoei buruzko 664/1997 Errege Dekretua ez aplikatzeagatik. LABek 2018an jada lan-ikuskaritzara eraman zuen salaketa, egoitzetako langileei arrisku horien eraginpean zeudela aitor ziezaieten.

Maiatzean, ikuskaritzak arrazoia eman zigun eta, ondorioz, Osakidetza bere erakunde guztietan eta kategoria guztietarako neurri batzuk hartzera behartzen zuen.Osakidetzak alegazioak aurkeztu ondoren, lan-ikuskaritzak ezetsi egin ditu, eta behin betiko behartu du Osakidetza berehala neurriak hartzera bere ESI guztietan eta kategoria guztietarako, Arrisku Biologikoei buruzko Errege Dekretua betetzeko eta langile guztiei 10 minutu aplikatzeko, bazkaldu aurretik eta lanetik irtetean garbitu ahal izateko; hala ere, Osakidetzak alegazioak eta oztopoak aurkeztu ditu, “aplika dadila soilik Laborategiko langileei, eta eskuak garbitzearekin nahikoa dela” argudiatuz, Covid-19aren eraginpean dauden milaka langile kanpoan utziz. Ikuskaritzak Osakidetzari berehala eskatzen dion beste neurri bat da langileek armairuak izatea, norberaren arropa eta kutsatutako arropa bereizi ahal izateko.

Errekerimendu horrekin, berriz ere frogatu dugu Osakidetzan lan egiten duten langileen babesgabetasuna, eta ente publikoak eta kontratatutako enpresa pribatuek ez dutela aitortzen osasun-arloan lan egiten duten pertsonek, bai enpresetako pertsonek, bai Garbialdikoek, bai Osakidetzako langileek, duten esposizio-maila.

Beste behin ere, legea bera betetzeko eskatu behar izan dugu, ikuskaritzainstantzietan edo auzitegietan salaketak jarrita, eta argi utzi behar izan dugu Osakidetzako zuzendaritzak abandonaturik utzi dituela langileak pandemiaren une gogor eta zailetan. Agintariek txalo egin eta kameren aurrean laudorioak egiten zizkiguten bitartean, ospitale eta osasun zentroetan bakarrik eta babesik gabe utzi gaituzte.

Ratioen inguruan hartutako konpromisoak bete ditzatela eskatu diegu alderdi politikoei

admin
-
0
Ratioen inguruan hartutako konpromisoak bete ditzatela eskatu diegu alderdi politikoei

Mobilizazioa egin dugu Bizkaiko Foru Aldundiaren aurrean, “Oinarrizko zerbitzuekin ez da negoziorik egiten. Zerbitzu publikoak, publiko!” leloarekin. Behin eta berriz salatu dugun bezala, gizarte-zerbitzu guztien egoera kezkagarria da, bai asistentziari dagokionez, bai lan-baldintzei dagokionez.

Pandemiak agerian utzi du zerbitzu horiek berebiziko garrantzia dutela, eta egoera are gehiago larritu du. Agerian utzi du kudeaketa pribatuko gizarte-zerbitzuen egungo eredua, non lehentasuna ematen baitzaie onura ekonomikoei zerbitzuaren kalitateari eta zer baldintzatan ematen den. Bertan, EAJko kargudun ohiei lotutako bezero-sare garrantzitsu baten onura eta interes izugarriak tartean daude, hirugarren adinekoen egoitza-zentroetako enpresa kudeatzaileen sare garrantzitsuak islatzen duen bezala.

LAB sindikatuarentzat erabatekoa da zaintza-sistema birformulatzeko beharra, bai zaintzaren ikuspegitik, bai lan-baldintzenetik, bai zaintza-sistemara sarbidetik eta sistemaren kudeaketatik, eta baita zaintza-sistema publiko, unibertsal, kalitatezko eta doakoaren sistema integrala eraikitzearena ere, langileek egiten duten funtsezko funtzioa aitortuz.

Gizarte-zerbitzuak birformulatzeko beharrezkoa den dinamika horren barruan, 14.000 sinaduratik gora bildu genituen gizarte-zerbitzu guztietarako arautze egoki baten beharra bermatzen zutenak. Honetan, arreta-ratio nahikoak sartu beharko ziren, kopuruz, kategoriaka eta aurrez aurrekoak, zerbitzuen antolaketa erabiltzaileen beharretara eta langileen lan-eskubideetara egokituta egongo zela ziurtatuz, eta lan-osasuna bermatuz.

Ildo horretan, Eusko Legebiltzarrak 2016an Eusko Jaurlaritzari eskatu zion eguneratu zitzala gizarte-prestazioak eta zerbitzuak arautzen dituzten dekretuak, ratioak eta langileei dagozkien beste gai batzuk zehazten dituztenak. Ratioak zehazterakoan erabiltzaileen, ordezkarien eta lan-kontratuko langileen partaidetza teknikoa izatea eskatu zuen, eta kalitatezko zerbitzu publikoak eta langileen lan-baldintza duinak bermatzea.

Hala ere, Eusko Jaurlaritzak hirugarren adinekoentzako egoitza-zentroetarako dekretu bat onartu zuen 2019ko abuztuan, langileen eta erabiltzaileen parte-hartzerik gabe. Aurkeztutako alegazioak ere ez zituen kontuan hartu. Dekretuan ezarritako arreta-ratioek ez dute langile kopurua handitzen, eta ez du aurrez aurreko ratiorik ezartzen, kategorien arabera, erabiltzaileen benetako profilak kontuan hartuta. Enplegu eta Gizarte politiketako Sailaren txosten juridikoak berak adierazten zuen ez zegoela justifikaziorik eta objektibaziorik ezarritako ratioak ezartzeko.

2019 amaieran, Eusko Legebiltzarrak berak eskatu zion Eusko Jaurlaritzari dekretua berrikusteko, funtsezko gaietan kalitatezko arreta bermatzeko, besteak beste, arretarako ratio egokiekin.

Ezarritako arreta-ratio horiek eragotzi egiten dute erabiltzaileen eta langileen eskubideak betetzea, eta lan-arrisku larriak izatera kondenatzen dituzte, lan-erritmo eta -karga handiak dituztelako.

LAB sindikatutik uztailaren 12ko hauteskundeetatik sortuko den legebiltzar berriari eta alderdi politikoei eskatzen diogu bete ditzala legebiltzarrean bertan hartutako konpromisoak. Txaloak gainditzeko garaia da. Eusko Jaurlaritzari eskatzen diogu bermatu ditzala erabiltzaileek pertsonengan zentratutako esku-hartzea jasotzeko eta langileen eskubideak lan-baldintza ezin hobeetan bermatzeko dituzten eskubideak, lan-arriskurik eta prekarietate-faktorerik gabe. Hori da zaintza-sistema publikoa, unibertsala, doakoa eta kalitatezkoa bermatzeko oinarria.

1...538539540...1,614Page 539 of 1,614

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLĂŤTICA DE PRIVACIDAD

www.lab.eus