2026-01-21
Blog Page 398

Lan heriotzen sarraskiak eraikuntza sektorea kolpatu du oraingoan; bi langile hil dira Urnietan eta Amurrion

Aritz Sorzabal
-
0
Lan heriotzen sarraskiak eraikuntza sektorea kolpatu du oraingoan; bi langile hil dira Urnietan eta Amurrion

Beste langile bat hil egin da ostiralaren etorrerarekin, Urnietan oraingo honetan, bertako kiroldegiaren eraberritze lanetan. Lehen informazioen arabera, hormigoi kamioiarekin lanean ari zela izan du istripua 59 urteko langileak. Goizean ere, bigarren langile bat hil da, Amurrion kasu honetan, eraikuntzan ere. 54 urte zituen hildakoak, eta altueratik erorita zendu da.

Gure elkartasun eta babes osoa adierazi nahi diegu hildako langileen familia, gertuko eta lankideei, baita lan heriotzen sarraskiaren ondorioz hil diren langile guztien senideei ere.

Aurten, gutxienez, 51 langilek galdu dute bizia lanean Euskal Herrian. Kasu honetan, eraikuntza sektorean izan dira lan istripu hilgarriak, industriarekin batera historikoki sektore arriskutsuenetako bat kontsideratu izan dena. Baina, LAB sindikatuak argi utzi nahi du lan heriotzen odolustea egiturazko arazo bat dela, ez sektoreka aztertu daitekeen arazo huts bat. Izan ere, lan heriotzak nonahi gertatzen dira, eraikuntzan oraingoan, baina ardogintzan, arrantzan, basogintzan, lanerako joan-etorrietan, modu ez traumatikoan eta lan gaixotasunen ondorioz ere baditugu zorigaiztoko adibideak, bai aurten eta baita azken urteetan ere. Eta ez da zori kontua, prekaritatea da.

Zentzu honetan, sektore guztietan hedatuta dagoen sarraskiarekin bukatzeko, premiazko neurriak exijitzen ditugu berriro. Langile guztiak gaude arrisku bizian. Administrazioek arazo hau agenda politikoan kokatu behar dute behingoz, lehentasunez. Beste alde batera begiratzeari utzi behar diote. Ezin dugu horrela jarraitu. Langile klasea nazkatuta dago.

Urnietako lan heriotzaren kasuan, asteartean, 13:00etan, Urnietako udaletxearen aurrean mobilizatuko gara euskal gehiengo sindikaletik lan istripu hilgarria salatzeko.

Bi urte hizkuntza-eskubideak urratzen

Aritz Sorzabal
-
0
Bi urte hizkuntza-eskubideak urratzen

Nafarroako Gobernuak euskaldunen eskubideen aurka egiten duen azkenaurreko murrizketaren aurkako elkarretaratze jendetsua egin dugu Iruñean, Sarasate pasealekuan, PSNren egoitzaren aitzinean.

Hain zuzen ere, bi urte baino gehiago igaro dira Nafarroako administrazio publikoetan euskararen erabilera arautzen duen dekretuaren zenbait artikulu epai bidez baliogabetu zituztenetik; dekretu hura aurreko gobernuak egin zuen. Baliogabetutako artikuluak, funtsean, komunikazio, abisu eta errotulazioetan elebitasuna arautzen dutenak dira, bai eta eremu mistoko, eremu ez-euskalduneko eta zerbitzu zentraletako lanpostuetarako lehiaketa-oposizioetan euskararen ezagutza merezimendu gisa baloratzea ere.

Errealitatean, UGT, SPA, SMN, SATSE eta Afapna sindikatuek babesten duten erabaki hori dela medio, Nafarroako herritarren hizkuntza-eskubideek hamarkada batzuk atzera egin dute, eta merezimendu gisa puntuatu gabe uzten da Nafarroako bi hizkuntza ofizialetako baten ezagutza; aldiz, alemanaren, frantsesaren eta ingelesaren ezagutza puntuatu egiten da. Era berean, praktikan, ezinezkoa da herritarrek Administraziora euskaraz jotzea, hala egin nahi badute.

Zentzugabekeria horren konponbidea ez zen, berez, zaila. Aski zen dekretuaren idazketa egokitzea, horren bidez segurtasun juridiko nahikoa emateko. Hala iragarri zuen Maria Chivite Gobernuko presidente berriak 2020. urtearen hasieran, urte horretako udazkenerako idazketa berria egongo zela ziurtatuz. Baina, 2021eko urrian gaude, eta ez dago dekretu berriaren arrastorik, nahiz eta aldian-aldian iragartzen den haren aurkezpena berehalakoa izango dela.

Argi dago PSNren taktika zein den: gobernuko kideen (Geroa Bai, Podemos eta IU) konplizitatearekin, denbora pasatzen uztea, eta, bien bitartean, pasatzen den egun bakoitzean Nafarroako herritarren zati handi baten eskubideak urratzen ari dira.

LABek herritar guztien hizkuntza-eskubideak errespetatzeko eskatzen jarraitzen du; jarraitzen dugu eskatzen Administrazioak berma dezala pertsona guztiek Nafarroako geografiako edozein lekutan bi hizkuntza koofizialetako edozeinetan hitz egiteko eta arreta jasotzeko duten eskubidea. Horretarako, Administrazioan euskara erabiltzeari buruzko dekretu berri bat eskatzen dugu, lehiaketa guztietan euskara merezimendutzat hartuko dela bermatze aldera; horrekin batera, euskara eskakizuna duten lanpostu gehiago definitzeko ere eskatzen dugu, gisa horretan, zirkuitu elebidunak ezarri eta hala nahi duten herritarrei euskaraz erantzun ahal izateko.

Gerente aldaketarekin, aukera berriak zabaltzen dira Haurreskolak Partzuergoan

Aritz Sorzabal
-
0
Gerente aldaketarekin, aukera berriak zabaltzen dira Haurreskolak Partzuergoan

Komunikabideen bidez jakin dugu Elena Aizpuruk ordezkatuko duela Zorione Etxezarraga Haurreskolak Partzuergoko gerentzian. LABetik uste dugu garai berria irekitzen dela hezkuntza zerbitzu honetan, eta lanean jarraituko dugu proiektuak euskal gizartearen beharrei erantzun diezaien eta langileen eskubideak berma daitezen.

LAB sindikatuko kideok uste dugu Zorione Etxezarraga gerentearen kargugabetzeak Haurreskolak Partzuergoaren fase berri bati erantzuten diola. Era berean, EAEko Hezkuntza Sailak eskatu zuen diagnosia jaso du, eta horrek zerbitzua hobetzeko aldaketak ekar ditzake.

Azken aldian, komunikabideetan Jokin Bildarratz sailburuari entzun diogu Haurreskolak Partzuergoa eskolaratze goiztiarraren erreferentziazko baliabidea bilakatu nahi duela. Gure partetik, norabide horretan kokatuko gaituzten erabakiak langileokin eta hezkuntza-komunitatearekin adostuz hartzeko eskatzen diogu Jokin Bildarratz berari eta, izendatu dutela hedabideen bidez jakin izan dugun gerente berriari, Elena Aizpururi.

Beraz, langileon ilusioa berpiztu eta proiektua eraldatu behar dugu. Norabide horretan eta azkenengo urteetan egindako ibilbideari jarraiki, diagnosia egin duen ikerlariari, LAB Sindikatuko kideok argi esan genion gure proiektuak zer behar duen, azkenengo urteetan jaiotza tasa pairatzen ari den jaitsiera eta kontziliazio neurri berriek gurean duten eragina ahaztu gabe. Eta noski, haurrak erdigunean jarriz.

-Aukera berdintasunean oinarritutako kalitateko hezkuntza ziklo hau Hezkuntza Sailaren barruan integratzea, 0-3 zikloa berreskuratuz, 0-6 etaparen logika pedagogikoan oinarrituta.

-Korronte pedagogiko berriei egokitu ahal izateko, beharrezkoa den inbertsio eta finantziazioa.

-Unibertsaltasuna, inklusibitatea, feminismoa, euskara, euskal kultura eta doakotasuna ardatz izatea.

-Herri eta auzo bakoitzak merezi duen zaintzan oinarritutako hezkuntza eskaintza.

-Haurren hezkuntza ibilbidea marraztuko duen eskolen mapa barruan kokatzea.

Lan hitzarmena eta langileon egonkortasunaren aldeko borroka ahaztu gabe, aukera dugu amesten dugun Haur Hezkuntza eraikitzen jarraitzeko.

Hezkuntza legearen inguruko eztaibaidan ere gure alea jartzen jarraituko dugu, urteetako borrokaren ondorioz, 0-3 zikloa ere aintzat hartua izan dadin.

Aukera berri baten aurrean gaude, herri honek behar eta merezi duen hezkuntza eraikitzeko lanean eta borrokan jarraituko dugu, borrokak merezi duelako.

Garbiñe Aranburu: “Aietek bake eta elkarbizitzarako ibilbide orria markatu zuen; aurreratu da, baina asko dago egiteko”

Aritz Sorzabal
-
0
Garbiñe Aranburu: “Aietek bake eta elkarbizitzarako ibilbide orria markatu zuen; aurreratu da, baina asko dago egiteko”

Bakea eraikitzeko oztopo eta aukerei buruzko nazioarteko topaketarekin egin dugu bat, Aieteko Konferentziaren 10. urtemugan. Hain zuzen ere, “Aiete hamar urte, irakaspenak eta erronkak” nazioarteko topaketa abian da, eta osteguna eta larunbata bitartean gauzatuko da, partaide garen Foro Sozial Iraunkorraren, Bake Bidearen, Conciliation Resources-en eta Berghof Fundazioaren eskutik.

Lehen egunean, Donostiako Aieteko jauregian antolatutako solasaldietan, LAB sindikatuko idazkari nagusi Garbiñe Aranburu izan da, gonbidatutako beste eragiletako ordezkariekin batera. Bere hitzetan, “Aietek bake eta elkarbizitzarako ibilbide orria markatu zuen; aurreratu da, baina asko dago egiteko. Eremu sindikalean era pairatu izan dugu gatazka, eta LABek bere ekarpena egiten jarraituko du elkarbizitza demokratikoa eraikitzeko, Foro Sozialean egin moduan”.

Donostian eta Baionan

2021eko urriaren 17an hamar urte beteko dira Euskal Herriko Gatazka Konpontzeko Nazioarteko Konferentzia, Aieteko Konferentzia izenez ezaguna dena, egin zenetik. Konferentzia hori bide-orri zabalago baten baitan kokatzen zen, eta Euskal Herrian bakea lortzeko agertoki berri baterako bidea ireki zuen. Zentzu honetan, egunotan antolatutako Nazioarteko jardunaldien helburua euskal bake prozesuaren irakaspenak balioestea, bakearen eraikitze prozesuari dagozkion oztopoak eta aukerak aztertzea eta gatazkak konpontzeko erronka globalez hausnartzea da, eta LAB sindikatuak bertan hartuko du parte, prozesu honetan guztian ekarpena egin dugun eragileetako bat izanik.

Aieteko jauregian egindako irekiera solasaldien ostean, jardunaldiek ostiralean izango dute jarraipena Donostiako Kursaalen, eta larunbatean Baionako Arte Eskolan.

Hauteskunde sindikal libreak eskatu ditugu Saltoki Logistika Araban, enpresaren xantaien eta manipulazioen aurrean

Aritz Sorzabal
-
0
Hauteskunde sindikal libreak eskatu ditugu Saltoki Logistika Araban, enpresaren xantaien eta manipulazioen aurrean

Joan den irailaren 21ean, LABek lehenengo hauteskunde sindikalak sustatu zituen Saltoki Logistika Araba enpresan. 84 langile daude bertan. Data horretatik aurrera, enpresak maniobra batzuk hasi zituen hauteskunde-prozesua eta hauteskunde sindikalen emaitzak oztopatzeko.

Horrela, Saltoki Logistika Arabaren zuzendaritzak mehatxu egin die langile batzuei, enpresaren aldeko hautagaitza aurkeztu ahal izateko abalak lortzeko.

Era berean, enpresa kontratua amaitzen zaien behin-behineko langileak kaleratzen ari da, eta horien ordez ABLE bateko langileak ari da jartzen.

Egoera horren aurrean, LABek argi eta garbi esaten du Saltokiko langileek eskubidea dutela hauteskunde sindikal libreak egiteko eta datozen lau urteetan enpresaren aurrean ordezkatuko dituztenak inolako derrigortzerik gabe aukeratzeko. Horregatik, xantaia eta presioak amaitzea eskatzen dugu, baita aldi baterako langileen kaleratzeak gelditzea ere.

LABek etorkizunean enpresan gerta daitezkeen egoera antidemokratiko guztiak salatzen jarraituko du, hauteskunde sindikalak askatasun osoz, derrigortzerik eta mehatxurik gabe egin ahal izateko helburu bakarrarekin.

Ildo horretan, iragarri nahi dugu sindikatu honek dituen baliabide sindikal eta juridiko guztiak aktibatuko ditugula, ez enpresa honetan ez beste inon hauteskunde sindikal libreak izateko eskubidea zapaldu ez dadin.

Bodegas Eguiako gure delegatua izan dugu gogoan Eltziegon, eta lan heriotzen odolustea salatu dugu

Aritz Sorzabal
-
0
Bodegas Eguiako gure delegatua izan dugu gogoan Eltziegon, eta lan heriotzen odolustea salatu dugu

Eltziegoko herriko plazan mobilizatu gara, euskal gehiengo sindikalak deituta, azken lan heriotza salatzeko. Hain zuzen ere, joan den ostiralean, Bodegas Eguiako 56 urteko langile eta gure delegatua zendu zen, errobot-makina bat gainera erori eta harrapatuta gelditu ondoren.

Aurten, gutxienez, 49 langile hil dira Euskal Herrian. Sarraski honen aurrean erakundeek ez dutela inolako neurririk hartzen salatu dugu elkarretaratzean.

Santurtziko Serantes Kultur Aretoko langileei esku-hartze sozialeko hitzarmena aplikatzea lortu dugu #LortuDugu

Aritz Sorzabal
-
0
Santurtziko Serantes Kultur Aretoko langileei esku-hartze sozialeko hitzarmena aplikatzea lortu dugu #LortuDugu

Euren lan baldintzen defentsan mobilizazioei esker, Santurziko Serantes Kultur Aretoko (SKA) langileek dagokien hitzarmena aplikatzea lortu dute, esku-hartze sozialekoa, hain zuzen ere. Orain arte, Langileen Estatutua aplikatzen zieten. COVID-a aitzaki, murrizketak ezarri zizkieten, euren lana oraindik eta gehiago prekarizatuz.

SKA Santurtziko udalaren zerbitzua izan arren, azpikontratatutako enpresa batek kudeatzen du. Hau da bertako udal gobernuaren egiteko era, lan baldintzak okertzea eta kultur eskaintza murriztea.

Langileen aldarrikapen nagusienetako bat esku-hartze sozialeko lan hitzarmenaren aplikazioa zen. Orain arte, Langileen Estatutoa aplikatzen zitzaien. Mobilizazioei esker lortu dugu, borrokak merezi duela argi utziz.

Migrazio politika arrazistak hil egiten du

Aritz Sorzabal
-
0
Migrazio politika arrazistak hil egiten du

Gaur Ziburun, goizaldeko 05:30ak aldera, hiru gazte hil dira eta laugarren bat larriki zauritua izan da. Pertsona horiek migrazio-bidean zeuden, Ziburu eta Donibane-Lohizune lotzen dituen trenbidearen ertzean lo egiten. Horietako biri buruz ezagutu ahal izan dugu Aljeriatik zetozela eta 28 eta 36 urte zituztela.

2021ean, gutxienez zazpi hildako izan dira. Heriotza hauek ez dira gertakari isolatu bat. Hendaia-Baiona tartean gertatzen dira bereziki, militarizatua dagoen muga batean, egunero etnia- eta arraza-profilaren araberako kontrol selektiboak egiten diren muga batean. Ez da urriaren 12ko efemeride bat, baizik eta migrazio-politika arrazista batzuen ondorio sistematiko bat, LAB sindikatutik salatu eta arbuiatzen ditugu.

Migrazioaren eta neo-kolonialismoaren arteko loturak egon badaude. Prozesu beraren parte gisa, harresi den Europak Hego eta Ipar Euskal Herriko administrazioen konplizitatearekin batera bazterketa prozesu hori erreproduzitzen du; aldi berean, milaka langile migraturen oinarrizko eskubideak urratzen ditu; herriak eta lurraldeak arpilatzen eta kolonizatzen ditu. Lurralde horiek dira pertsona hauetako askoren jatorrizko herriak, eta migrazio-proiektuak bizirauteko eta bizi-baldintza hobeak bilatzeko estrategia gisa abiatzen dituzte.

Epaiketa irabazi dugu Elecnor-en #LortuDugu

Aritz Sorzabal
-
0
Epaiketa irabazi dugu Elecnor-en #LortuDugu

Movistarreko azpikontrata den Gasteizko Elecnor enpresan, lan sindikala oztopatzeko asmoz, sail sindikala osatzea ukatu zion enpresak LABi. Horretarako, trikimailu bat erabili zuen 2020an: sekzio sindikala osatzeko Espainiako estatuko langile guztien %10 eskatzen zion.

LABek argi zuen eskaera hori zentzugabea zela. Arabako langileak hartu behar zirela kontuan defendatzen zuen, eta auzitara jo zuen. EAEko Justizia Auzitegi Gorenak arrazoia eman zion LABi lehen epaiketan. Enpresak errekurritu egin zuen epaia, eta orain, Espainiako Auzitegi Gorenak lehen epaia berretsi eta arrazoia eman digu: LABek sail sindikala osatzeko eskubidea du.

Enpresaren jarrerak azalpen argia du: mendekua. Sekulako irabaziak dituen enpresari lan baldintzak duintzea eskatzeko borrokan egon baitziren langileak, 43 egun luzatu zen greba egin zuten, besteak beste. Grebari esker lan baldintzak hobetzea lortu zuten, eta oraingoan, beste garaipen bat da, juridikoa, kasu honetan.

LABek tresna guztiak jarriko ditu enpresetan antolatzen jarraituko du eta lan baldintzak hobetzeko borrokatzen.

1...397398399...1,586Page 398 of 1,586

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus