Elkarretaratzea egin dugu Bilboko Erribera merkatuan, LAB, ELA, CCOO, UGT eta ESK sindikatuok deituta. Hain zuzen ere, iragarritako mobilizazioen harira egin dugu protesta, Elikagaigintza sektoreko langileen lan baldintza duinen defentsan, joan den astean Algortan eta Erandion egin bezala.
Blog Page 392
Epai bat irabazi diogu Vayven Amazoneko banaketa-enpresari #LortuDugu
LAB sindikatuak positibotzat jo du irabazitako epai judiziala. Epai horren arabera, VayvenAmazonen banaketa- enpresak Bizkaiko salgaien errepide bidezko garraioko hitzarmena aplikatu behar du.
Gaur arte, enpresa hori estatuko mezularitzako hitzarmena aplikatzen ari zen, non lan-baldintzak Bizkaiko garraio- hitzarmenekoak baino dezente okerragoak diren, lanaldian, dietetan eta soldatetan. LABetik egiaztatu ahal izan dugun kasu batzuetan ikusi dugu hilean 800 euro gutxiago kobratzen duten eta egunean 11 orduko lanaldi jarraituak egiten dituzten langileak daudela.
Hau ez da LABek demandatu duen eta Amazonentzat lan egiten duen lehen enpresa, eta Bizkaiko salgaien errepide bidezko garraioaren hitzarmena aplikatzera kondenatzen dutena.
LABek salatzen du Amazon-entzat lan egiten duten enpresek irabaziak handitzen dituztela beti langileen kontura. Borrokak merezi du.
Arabako Foru Aldundia aniztasun funtzionala duten pertsonentzako zerbitzu publikoen pribatizazio prozesuan sakontzen ari da
LABek mobilizazioa egin du gaur Gasteizko Probintzia plazan, Arabako Foru Aldundiaren egoitzaren aurrean. Bertan, salatu dute irailaren 27an, Arabako Batzar Nagusietako politika orokorreko eztabaidan, Ramiro Gonzalez Ahaldun Nagusiak iragarri zuela aniztasun funtzionala duten pertsonentzako 30 egoitza-plaza itunduko zituela.
Sanitas erakunde pribatuaren adinekoentzako San Martin egoitza-zentroarekin, hamabost plaza hitzartu dira. Hitzarmen honek, zerbitzu publikoen pribatizazio-prozesuan sakontzea dakar, emaitza ekonomikoak erabiltzaileen eskubideen eta langileen eskubideen gainetik jartzen duen merkataritza-enpresa batekin hitzartzen baitu. Esan beharra dago Arabako lurralde historikoan ez dagoela hirugarren adinekoen zentroetarako sektoreko hitzarmen kolektiborik.
Erabaki horrek bertan behera uzten du garatzen ari den arreta-eredua zeinen funtsa den pertsonengan oinarritutako plangintza, eta adinari buruzko irizpide bakar batera mugatzen da, pertsonak ezgaitzen dituena haien bizimoduari buruz erabakitzeko.
Beste behin ere, LABek gizarte-zerbitzuen publifikazioa aldarrikatzen du, arreta integrala bermatzeko eta lan- baldintzen prekarietatearekin amaitzeko.
Unibertsitateek eta botereak duten harremana aztergai, “Hego Euskal Herriko eliteak” ikerketa liburuan
Unibertsitateen eta boterearen harremana aztertzen duen “Hego Euskal Herriko eliteak. Boterearen azterketa” ikerketa liburua aurkeztu dute Ipar Hegoa eta Manu Robles Arangiz fundazioek, Donostian, Ibaetako campusean dagoen Carlos Santamaria zentroan.
Jon Diaz EHUko irakasleak zuzendu du lana, eta, Elitist Britain 2019 dokumentuan oinarrituta, elite, aginte eta goi mailako lanpostuetan dihardutenen unibertsitate prestakuntza aztertzen du.
5.500 erregistro bildu dira eta 10 arlotan sailkatu dira. Politikoak, Goi-karguak, Erakunde Publikoak, Kultura-Erakundeak, Komunikabideak eta Media, Enpresa Publikoak, Enpresa Pribatuak, Eragin Handiko Emakumeak, Artistak eta Mundu Sortzailea, eta amaitzeko Kirola. Norbanako bakoitzaren ibilbide akademikoa eta formazioa zehatz-mehatz aztertu dira.
Liburua deskargatzeko aukera dago Ipar Hegoa Fundazioaren webgunetik bertatik, lotura honetan.
Ez dugu Arcelor Mittal Sestaon txantaiarik onartuko
Arcelor Mittal multinazionalak prentsa bidez jakinarazi duen arren azaroaren 15an ekoizpena gelditzekoa asmoa duela, zuzendaritzak azaroaren 30an ekoizpena geldituko dutela jakinarazi du. LABek “Haien kontura” lelopean abiatu dugun kanpainan salatzen dugun moduan, gaur egungo testuinguruan, enpresak edozein egoera langileen bizkar jartzeko saiakera egiten ari dira.
Industrian arazoren bat eragiten duen edozein gertakari langileek ordaindu behar dutela dioen iritzi-egoera sortzen ari da, instituzio publikoek nabarmen sustatuta. Hornikuntza faltak, mikrotxipak, argindarraren prezioa… edozein arrazoi erabiltzen dute langileen eskubideak murrizteko. Bizitzaren kostuaren igoeraren aurrean, langileak pobretzeko estrategia abiatu dute, enpresen irabaziak handitzeko.
Argindarraren prezioa izugarri igotzen ari da. Era lotsagarrian pribatizatu ziren energia enpresak sekulako negozioa egiten ari dira. Argindarra garestitzearen ondorioak herritarrak jasaten ari gara. Arcelor Mittal Sestaon geldialdi bat egingo omen dute horregatik, hilabete amaieran 70 langile lanik gabe utziko dituena eta beste 50 urtarrilean martxan hasten ez bada. Hau da, bertako langileek bi aldiz ordaindu beharko dute igoera.
LABen iritziz, Arcelor Mittalen kasuan, argindarrarena aitzakia bat besterik ez da, kezko hesi bat. Arcelor Mittalen ez dago argindarrarekin inolako arazo larririk. 2021eko lehen sei hilabeteetan, Arcelor Mittalek 5.322 milioi euroko irabazi garbiak izan ditu eta bere akzioen kotizazioa %90 igo da. Hori bai, Arcelor Mittalek gobernuak eta langileak presionatzeko erabili du geldialdiaren karta.
Eskubideak urratu nahi ditu, Enpresa Batzordeak mantenu lanak egiteko sistema aldatzeari uko egin diolako. Enpresa Batzordearen ezezkoaren arrazoia, gainera, langileen lan osasuna arriskuan jartzen dela da. Ez al geunden guztiok lan istripuak eragoztearekin ados?
LABek Arcelor Mittalen langileen kontrako xantaia salatu nahi du: 120 aldi baterako langileen kaleratzearen mehatxua egin du eta langile edadetuenen aurrejubilazioa baimentzeari uko egin dio langileen artean zatiketa bultzatzeko. Lan hitzarmena adostu ezean urtarrilaren 1an agian lantokia martxan ez duela jarriko adierazi du multinazionalak.
Gogoratu nahi dugu, gainera, Arcelor Mittalek uztailean harro jakinarazi zuela 2025ean altzairu “berdea” ekoiztuko zuen lehen altzairutegia izango zela Arcelor Mittal Sestao, deskarbonizazio prozesuaren aitzindari. Horrela garatuko al du Eusko Jaurlaritzak bere “Basque Green Deal”? Diru publikoz ongi hornituta baina enpresei ezer exijitu gabe?
Horregatik, Eusko Jaurlaritzari eskatzen diogu ez dadila enpresa hauen jokoan sartu, azter dezala kasu bakoitza, begira ditzala enpresen kontu ekonomikoak eta utz diezaiola multinazionalen bozeramaile eta morroi akritiko izateari. Ez dezala hauspotu gezur handi hau, langileen lan baldintzak okertzeaz gain lantoki historiko honen etorkizuna auzitan jarri dezakeena.
LABek argi eta garbi esaten du: erronda hau ez dute langileek ordainduko. Arcelor Mittalek jarrera aldatu behar du, eta gutxieneko berdintasun baldintzetan hitzarmen kolektiboaren negoziazioari ekin behar zaio. Kaleratzerik gabe, hitzartutakoa betez eta mehatxu eta xantaiarik gabe.
Arabako Esku-hartze Sozialaren negoziazio mahaia berraktibatzeko proposamena jaso dugu, mobilizazioei esker
Arabako Esku-hartze Sozialaren sektoreak mobilizazioekin jarraitzen du, hitzarmen duin baten alde. Aldundiaren aurrean mobilizatu gara berriro, LAB, ELA, CCOO, ESK eta UGT sindikatuok deituta.
Hauxe da gaurko mobilizazioaren harira igorritako oharra:
MOBILIZAZIOEN HIRUGARREN EGUNA
ARABAKO ESKU-HARTZE SOZIALAREN SEKTOREKO BERRIAK
Urrian zehar, Arabako Esku-hartze Sozialaren sektorean ordezkaritza dugun ELA, CCOO, LAB, ESK eta UGT sindikatuok EAJ, PSE-EE, EHBILDU, ELKARREKIN PODEMOS eta PPrekin bildu gara.
Alderdi guzti hauek egoera aldatzearen aldeko borondate politikoa erakutsi dute eta funtsezkotzat jotzen duten sektore batekiko enpatia ere azaldu dute.
Urriaren 27ko elkarretaratzean, Emilio Sola Gizarte Politiketako diputatua bera gure pankartara hurbildu zen eta sektoreko langileak agurtu zituen, eurekin biltzeko eskua luzatuz. Urriaren 27an bertan eskatu genuen bilera hori, eta datorren azaroaren 9an bilera burutzeko erantzuna jaso dugu.
Sola jaunari joan den ekainaren 8an bere taldearekin bildu ginela gogoraraziko diogu, eta nola bilera horretan adierazi genion gure kezka, AISAk mahaian mantendutako jarrera ikusita, baita nola 7 bileraren ostean gauza bera entzuten jarraitzen genuela ere: “ez zela ikusten erakundeen aldetik III. Hitzarmena aurrera eramateko finantzaketa-bermerik”, alegia. Bazuten, nonbait, gero egiazko errealitatea bihurtuko zenaren berri, eta horrela ari dira bitartean hilabeteak pasatzen.
Hilaren 27an bertan, mahaia berraktibatzeko proposamen baten berri eman zigun AISAk. Sakon aztertu behar dugu, eta, horretarako, azaroaren 9an bertan negoziazio-mahaiaren beste bilera bat izatea zehaztu dugu.
Ordura arte, guk mobilizazioen planteamenduarekin jarraitzen dugu. Hurrengo elkarretaratzea azaroaren 10ean izango da, 10:00etan, Probintzia Plazan.
Lan Kode eta Gizarte Segurantzaren lege propioaren gure proposamena erregistratu dugu Nafarroako Parlamentuan
LAB sindikatutik Lan Kode eta Gizarte Segurantzaren lege propioaren proposamen integrala osatu berri dugu, eta gaur, Gasteizko Legebiltzarrean duela bi aste egin bezala, erregistratu dugu Nafarroako Parlamentuan, Igor Arroyo idazkari nagusi ondokoaren eskutik.
Proposamenak erreformei buelta ematea eta murrizketa gehiagori atea ixtea aldarrikatzen du, eta bizitza- eta lan-baldintzak aldatzeko neurri zehatzak jasotzen ditu; neurri zehatzak, errealak eta egingarriak egungo eskumenetatik abiatuta, eta, gainera, subiranotasunaren bidean aurrera egiten laguntzen dutenak.
Euskal Herrian ez daukagu kalitatezko enplegu berria sortzeko behar dugun baliabiderik
Enplegua errekuperazio zantzuak erakusten hasi da urrian. Adin tarte guztietan eta emakume zein gizonezkoen artean irailean baino langabezia gutxiago zenbatu da, irailean baino 1.623 langabe gutxiago dauzkagu egun. Urte arteko bilakaera aztertuz gainera, iaz data hauetan baino 26.822 langabe gutxiago daude Hego Euskal Herrian. Beraz, enplegua errekuperatzen ari dela esan dezakegu.
Zein da, ordea, errekuperatzen ari den enplegua? Aurreko asteko Biztanleria Aktiboaren Inkestaren datuak konfirmatu ditugu gaurkoan. Izan ere, iazko urtearekin alderatuz, 25 urte azpiko gazteak izan dira enplegua gehien errekuperatu dutenak, batez beste %15 jaitsi bada langabezia; gazteen kasuan %26 izan da aipatu jaitsiera. Gogoan izan behar dugu pandemia lehertu osteko lehen hilabeteetan gazteen enplegua izan zela gehien galdu zena alde handiarekin, eta egun ere, 2019ko datuekin alderatuz, gazteak dira langabezia datu okerragoak metatzen dituen kolektiboa.
Gazteen enplegua ari da errekuperatzen, beraz, sektore kalteberenen enplegua, prekarioa, behin-behinekoa. Aurtengo urrian egin diren kontratu guztietatik %92 behin-behinekoa izan da. Datuek beren kabuz hitz egiten dute.
Atzo jaso genuen berriaren arabera lan erreforma indargabetuko dute Espainiako Estatuan. Kalitatezko enplegua sortzeko ezinbesteko baldintza da hori, lan erreforma indargabetzea, eta arau berriak ezartzea. Titularretatik haratago, indargabetze hori nolakoa izango den, nolako enplegu araudia adostuko duten, patronalaren interesei aurre egiten ausartuko diren… ikusteke dago oraindik. Hainbatetan esan dugun moduan, lan erreforma indargabetzea ezinbesteko baldintza da kalitatezko enplegua sortzeko, baina ez bakarra.
Politika sozioekonomiko guztiek errotiko aldaketa eskatzen dute. Egun gertatzen ari den produkzio sistemaren krisia ikusi besterik ez dugu horretaz jabetzeko. Esku-lan merkea bilatuz eta kutsadura beste herrialde batzuetara esportatuz bertako industria beste herrialde batzuetara, Asiara batik bat, lekualdatu zuten. Orain, mikrotxip-ez gain hainbat lehengaien falta dugun honetan beste herrialde batzuetako produkzioari diogun menpekotasuna agerian geratzen ari da, Euskal Herriko eta mundu osoko produkzio sistema ez dela sostengarria. Are gehiago, sostengarria ez izateaz gain aberastasuna esku gutxi batzuetan metatzea errazten du, bertako eta beste herrialde batzuetako langileen kontura milioi askotako irabaziak izan dituzten enpresek erruz banatu baitituzte dibidenduak, eta orain, lehengai falta dutela argudiatuz euren burua kaltetu gisa aurkezten digute, langileen aurkako neurriak hartuz.
Egoera honetan Madrilera begira soilik jarraitu ahal dugu: lan erreforma indargabetzen duten, nolako erreforma adosten duten, aldaketarik badagoen politika ekonomikoetan… edota horrez gain, Euskal Herrian, bertako errealitateari erantzungo dion proposamenak eraikitzeari ekin. LABek bigarren honen aldeko hautua egiten du, Euskal Herriak behar duen Lan Harremanetarako eta Babes Sozialerako Euskal Esparruaren defentsan proposamenak eta urratsak eginez eta langileon lan eta bizi baldintzen duintzea lortzeko eztabaidak irekiz.
Ez dugu Kontseilu Ekonomiko eta Sozialaren saioan parte hartu, Nafarroako aurrekontuen lanketan benetako parte-hartze soziala ez dagoela salatzeko
Ohikoa den bezala, Gobernuak Nafarroako Aurrekontuen Legearen aurreproiektua KES Kontseilu Ekonomiko eta Sozialeko kideei bidali die hori lantzeko bilera baino hiru egun baliodun lehenago soilik. Eta, ziurrenera, ohikoa izaten ari den bezala, KESen bileraren ostean, Gobernuak dokumentu horixe bera igorriko du Parlamentura, batere aldaketarik egin gabe. Horregatik, LAB sindikatuak ez du gaurko saioan parte hartu.
LABek salatu nahi du KESen saioa eszenifikazio huts gisa hartu dela berriz: KESeko kideek ez dute denbora materialik saioa behar bezala prestatzeko eta ekarpen zehatz eta bideragarriak egiteko; eta Nafarroako Gobernuak KESen saioa izapide sinboliko huts moduan hartzen du. Eta gizarte eragileek zer esaten duten ere, zer ekartzen duten ere, KESera ailegatzen den zirriborro bera bidaliko dute Parlamentura.
Beraz, Nafarroako Gobernuak KES gutxiesten segitzen duela kontuan hartuta, LAB sindikatuak gaurko saioan ez parte hartzea erabaki du. Ildo horretan, Gobernuari eta Parlamentuko taldeei eskatzen diegu defizit demokratiko hori konpontzeko eta Nafarroako aurrekontuak lantzean parte-hartze soziala bermatzeko bide errealak ezar ditzaten.
Era berean, aditzera ematen dugu mobilizatzeko asmoa dugula, Nafarroako Aurrekontuek eskaera soziosindikal nagusiei erantzun diezaieten, hala nola, pentsiorik apalenen osagarriari (1.080 euroraino), Nafarroako batez bertzeko soldataren %60aren pareko izanen den gutxieneko soldata ezartzeari, enplegu publikoaren sustapen eta egonkortzeari, zaintza lanen sistema publiko komunitario bat ezartzeari, eta kapitalaren, ondasunen eta enpresa-irabazien errentei zerga handiagoa jarriko dizkien erreforma fiskalari.