2026-05-03
Blog Page 267

Aniztasun funtzionalaren sektoreko hainbat enpresatako beharginek bi greba-egun deitu dituzte, hitzarmenen blokeoa dela-eta

Zubiate(e)ko Aritz
-
0
Aniztasun funtzionalaren sektoreko hainbat enpresatako beharginek bi greba-egun deitu dituzte, hitzarmenen blokeoa dela-eta

Gaude (LAB), Madres Mercedarias (LAB-ESK), ASPACE (ELA) eta Gorabideko (LAB-ELA-ESK) enpresa batzordeek greba deitu dute eta elkarrekin kalera aterako dira maiatzaren 8an eta 9an, beren enpresa hitzarmenak eguneratzeko negoziazioen desblokeoa eskatzeko asmoz. Gutxienez KPIa eta metatutako atzerapenak aitortu diezaieten exigitzen dute.

Denek eskaintzen diete zerbitzu publikoa aniztasun funtzionala duten pertsonei. Zerbitzu horiek Euskadiko Gizarte Zerbitzuen Legean jasota daude, eta Bizkaiko Foru Aldundia da horien arduraduna. Gaur egun, zerbitzua erakunde pribatuek kudeatzen dute, Bizkaiko Aldundiarekin egindako hitzarmenak eta dirulaguntzak tarteko.

“Pandemian funtsezko langiletzat hartu gintuzten, baina gaur egun Gaude, Gorabide, ASPACE eta Madres Mercedarias erakundeek, Bizkaiko Aldundiarekin batera, gure enpresa-hitzarmenen negoziazioa blokeatu dute eta gure lanpostuak mehatxatu ere egiten dituzte, Madre Mercedariasen kasuan bezala”, azaldu dute.

Tantaz tanta, Gaude, Gorabide, ASPACE eta Madres Mercedarias enpresetako langileek marea bat sortu nahi dute, egoeraren arduradunei honako hau adierazteko:

– Bizkaiko Foru Aldundia eta haren arduradun gorena, Unai Rementeria, gure lan-baldintzen okertzearen erantzule egiten ditugu, eta zuzenean Elixabete Etxanobe ordezkoa eta Sergio Murillo, Gizarte Ekintza Saileko arduradun goren gisa, interpelatzen ditugu.

– Gaude, Gorabide, ASPACE eta Madres Mercedarias enpresei erantzukizuna beren gain hartzeko eta gure enpresa-hitzarmenak desblokeatzeko eskatzen diegu.

Egoera honen aurrean, marea osatzen dutenek beren borrokak batu dituzte eta maiatzaren 8an eta 9an greba deitu dute elkarrekin, eta batuta aterako dira kalera. Hona hemen baterako mobilizazioak:

  • Maiatzaren 8an.
    Bilboko hainbat lekutatiklau bloketan aterako dira, 12:00etan Moyua plazan elkartu eta Bizkaiko Foru Aldundira elkarrekin joateko manifestazioa egiteko.

    Lau blokeak honako hauek dira:
    – GORABIDE 10:00etan EITBren egoitzatik
    – GAUDE 11:00etan Bilboko udaletxetik
    – ASPACE 10:30ean Aspacetik (Julio Urquijo, 17)
    – MESEDEETAKO AMAK 11:00etan EDE Fundaziotik (Simon Bolivar, 8)
  • Maiatzaren 9an
    Elkarretaratzea 10: 00etan Itsas Museoaren aurrean, protesta FEVASera eramateko. Gainera, borroka bateratuko bi egun horiez gain, batzordeen mobilizazio propioak egingo dituzte: – GORABIDEk grebak egingo ditu maiatzaren 6tik 14ra
    – GAUDEk hilaren 22tik aurrera greba mugagabea deitu du.
    – MADRES MERCEDARIASek greba berriak planteatuko ditu itxieraren mehatxuak bere horretan jarraituz gero
    – ASPACEk egungo blokeoaren aurrean greba-egun gehiago egitea ere baloratu du.

    Amaitzeko, mobilizazioak babesteko deia egin nahi izan diote jendarteari, eta argi utzi nahi izan dute borrokan eta mobilizatzen jarraituko dutela hitzarmenak desblokeatu arte.

Inviza ospitaleko langileek lan uzteak eta greba egunak deitu dituzte hitzarmenaren negoziazioaren blokeoa salatzeko

Zubiate(e)ko Aritz
-
0
Inviza ospitaleko langileek lan uzteak eta greba egunak deitu dituzte hitzarmenaren negoziazioaren blokeoa salatzeko

Asunción ospitalea izenez ezaguna den zentroko zuzendaritzari eskatu diote jarreraz aldatu eta langileen erosahalmena bermatu eta lan orduak murriztuko dituen hitzarmena negoziatzea

Tolosako Invizako (Asunción ospitala bezala ezaguna dena) hitzarmenak ez aurrera ez atzera jarraitzen du. 2022ko Martxoan eratu zen negoziazio mahaia, denbora aurrera doa eta zuzendaritzak ez ditu murrizketak besterik proposatzen. Horregatik, langileek, lan uzteak eta greba egunak egitea erabaki dute.

Gogoratu dezagun Tolosako Invizako langileek zerbitzu publikoa eskaintzen dutela, beste eskualde batzuetan Osakidetzak egiten duena. Urteak daramatzate lan baldintza duinak borrokatzen, eta hitzarmenaren kasuan, lan jardunari begira, administrazioko azpikontrata askotan astean 35 ordu lan egiten dutenez, hori da erreferentzia hitzarmen berri honetarako. Soldata igoerari dagokionez, KPIaren erreferentzia duten igoerak eskatzen dituzte, onargaitza baita negoziazio honen ondoren langileak lehen baino pobreago izatea.

Gaur bihar eta etzi egunean bina orduko lanuzteak egingo dituzte. Maiatzaren 8an, 9an, 17an, 18an, 19an, 22an, 23an, 29an, 30ean eta 31n, berriz, egun osoko grebak. Hala, lanuzte eta greba egun bakoitzean elkarretaratzeak egingo dituzte klinikan, 12:00etan.

Atzo arratsaldean kotxe karabana egin zuten herrian eta inguruan beren egoeraren berri emateko, eta hilaren 9an, 17an, 23an eta 31n ere hala egingo dute.

ADEGIk Gipuzkoako metalgintzako negoziazioa hasteko lehen urratsa eman du

Zubiate(e)ko Aritz
-
0
ADEGIk Gipuzkoako metalgintzako negoziazioa hasteko lehen urratsa eman du

Gipuzkoako metalgintzako hitzarmenaren negoziazio mahaia bildu da gaur 7. aldiz, eta patronalak, behingoz, negoziaziorako proposamen oso bat ekarri du. Urratsa positibotzat jo dugu, egindako presioaren emaitza baita, baina oraindik ere borrokan jarraitu behar da sektoreko langileen beharrak asetuko dituen hitzarmena lortzeko.

Jarraian ageri dira ADEGIk gaurko mahaira eramandako proposamenak jasotzen dituen puntuak:

  • Iraupena: 2023-2026
  • Soldata igoera:
    • Tauletan
      • 2023: %5
      • 2024: Aurreko urteko KPI + %0’7.
      • 2025: Aurreko urteko KPI.
      • 2026: Aurreko urteko KPI.
    • Errealetan
      • Tauletan ezarritako igoeraren %85.
  • Bajen osagarriak: Lan istripu eta gaixotasun profesionaletan soldataren %100 (In Itinere kasuak izan ezik).
  • Jardunaldi murrizketa: 2 orduko jaitsiera 2025ean, hau da, 1.695 orduko lanaldia.
  • Euskararen sustapena: 50 langiletik gorako enpresetan, alde batek hala nahi ezkero, beharrezkoa izango da euskararen sustapena lantzea.
  • Subrogazioa: Azpikontratatutako langile guztiek subrogazioa bermatuta.
  • Lizentziak: Guraso bakarrek 24 orduko mediku baimena eta lizentzien lehen eguna zehazteko proposamena.
  • Jazarpen protokoloa
  • Moldaketa legalak: Aldi baterako kontratuen iraupena 12 hilabetera luzatu.

Neurri batean, LAB sindikatuak egindako presioari esker lortu dugu ADEGIk proposamen bat mahai gainean jartzea, eta urratsa positiboa da. Hala ere, onartezina da ADEGIk mahaira ekarritako lehenengo proposamena behin betikotzat jotzea. Bidea hasi besterik egin ez dela eta bide luzea egiteko aukera dagoela pentsatzen dugu, eta sektoreko langileon beharrak betetzen dituen hitzarmen baten alde borrokan jarraitu behar dugu. Hori dela eta, beste sindikatuei borrokarako deia luzatzen diegu.

Negoziazio mahaiaren hurrengo bilera maiatzaren 11n izango da.

Laminaciones Arreguin lan hitzarmen berria #LortuDugu

Zubiate(e)ko Aritz
-
0
Laminaciones Arreguin lan hitzarmen berria #LortuDugu

14 urtez lan hitzarmenik gabe egon ondoren eta azkena sinatu zenetik 17 urte eta hainbat negoziazio saiakera igarota, enpresak eta batzordeak Laminaciones Arreguiko Arabako lantegietan lan hitzarmen berri bat izateko akordioa lortu dute.

Langileen batzarrak enpresak egindako azken proposamena onartzea erabaki zuen. Akordioaren edukiak hauek dira:

  • 5 urteko indarraldia (2022 – 2026).
  • Hitzarmena blindatzea (inaplikazioa eta ultraaktibitatea).
  • Guztira %12,5eko igoera finkoak, 2 urtean behin metatutako KPIaren berrikuspenarekin, %90a bermatuz.
  • Ekoizpen primen gehikuntza.
  • Lanaldiaren murrizketa.
  • Ordaindutako baimenen egokitzapena eta hobekuntza.
  • Jasotzeke dauden gaietan Arabako Metalaren Hitzarmenari erreferentzia.
  • Eskala bikoitza osatzen zuten kategoriak ezabatzea.
  • Mugikortasun funtzionala arautzea.

LABek azpimarratu nahi du hitzarmena ez dela gustatuko litzaiokeena; izan ere, soldatak eguneratzea ez dago KPIren %100arekin lotuta, eta itundutako mugikortasuna gehiegizkoa iruditzen zaio sindikatuari. Baina enpresan hamarkada bat baino gehiagoz bizi izan den errealitatea kontuan hartu behar dugu. Azken hitzarmena sinatu zutenean 400 langile baino gehiago geunden lanean eta orain 100 pertsonara ez garela iristen gogoratu behar dugu. Horrez gain, azken 14 urteetan kaleratzeak egiteko 3 Enplegu Erregulazio Espediente, banakako kaleratze prozesu bat eta 6 Aldi Baterako Enplegu Erregulazio Espediente, azkena gaur egun indarrean eta prozesu judizialean dagoena, izan dituztela nabarmendu behar da. Gainera, Celsa taldea konkurtso-prozesuan dagoela gehitu behar dugu, eta horrek negoziazioa ongi burutzeko aukerak zailtzen zituen.

Horregatik, lortutako akordioaren balioa nabarmendu nahi dugu, 14 urteren ondoren, Laminaciones Arreguin lan egiten duten pertsonek soldatak izoztuta izateari utziko baitiote, besteak beste. Era berean, LAB sindikatuak izandako papera nabarmentzekoa da, azken hauteskunde sindikaletan emandako gehiengoa kudeatzen jakin baitu, plantillaren alde, negoziazioen pisua eramanez eta, bai atal sindikalaren aldetik, bai aholkularitzaren aldetik, bai sindikatuaren egituratik bertatik, ahalik eta ondoen erantzunez 14 urteren ondoren izandako egoera larriaren aurrean.

Langileekiko erantzukizunagatik, batzarrarekiko errespetuagatik eta Laminaciones Arreguiren egoeragatik (14 urteko soldata izoztea, Covid-19aren krisia, altzairuaren krisia energia-kostuengatik, Ukrainako gerra, Celsa Taldearen konkurtso-prozesua, etab.), hitzarmena babestu egin behar genuen, Laminaciones Arregui Arabako enpresa handienetako bat izatera itzul dadin.

Azkenik, eskerrak eman nahi dizkiegu langile guztiei, eta bereziki LABeko afiliazioari, prozesu osoan zehar erakutsitako borrokagatik eta konpromisoagatik.

Antolakuntza eta borrokaren aldeko mezua eraman dugu Euskal Herri osoko kaleetara

Zubiate(e)ko Aritz
-
0
Antolakuntza eta borrokaren aldeko mezua eraman dugu Euskal Herri osoko kaleetara

Maiatzaren Lehena da gaur, eta esparru guztiak lehiatzearen aldeko mezuak ardaztu ditu gaur egin ditugun mobilizazioak; lantokietan, kalean zein erakundeetan borrokatzearen aldeko deia egin dugu. 10.000 lagunek baino gehiagok egin dute bat LAB sindikatuaren deialdiekin.

Baiona, Bilbo, Donostia, Eibar, Gasteiz, Iruñea, Maule eta Tuteran. Milaka langile bildu gara Euskal Herri osoan, ipar zein hego, egindako mobilizazioetan, antolakuntza eta borrokaren aldeko aldarrikapenarekin bat eginez.

“Egiteko beste mundu bat! Repartir para transformar” leloarekin egin ditugu manifestazioak. Eta piztuta dauden sektore eta enpresetako borrokek euren tartea izan dute bertan, eta ugariak izan dira sektore feminizatuetakoei egindakoak keinuak ere, Greba Orokor Feministan parte hartzeko deiarekin batera. Etxebizitza eskubidea eta langile migranteen aldarrikapenak ere oso presente izan dira.

Bilbon egin du bere hitzartzea Igor Arroyo koordinatzaile orokorrak, sindikatuaren aldarrikapenak agenda politikoaren erdigunean jartzeko deia eginez, hala nola, astean 30 orduko lanaldia eta 1.400 euroko gutxieneko soldata; zaintza-, osasun-, hezkuntza- eta etxebizitza-sistema publikoak; 1.080 euroko gutxieneko pentsioa eta erreforma fiskala, kapitalak zergak behingoz ordaintzea. Ipar Euskal Herriaren kasuan, pairatzen dugun bazterketa sindikalaren aurrean gure proiektuaren zilegitasuna eta sendotasuna aldarrikatu ditugu, bertan egon delarik Garbiñe Aranburu koordinatzaile orokorra, Ipar Euskal Herrian duela 20 urte baino gehiago hasitako bidea babesteko.

Aldarrikapenaz gain, ospakizunak ere izan du gaurkoan tartea, mobilizazioen ondoren Bilbon, Iruñean edo Baionan antolatu ditugun espazio informaletan. Hauetan, LABen komunitatea indartzeko aukera izan du sindikatuko kidegoak, jan-edanaz eta musikaz gozatu ahal izan duelarik.

Igor Arroyo: “Esparru guztiak lehiatuko ditugu”

Zubiate(e)ko Aritz
-
0
Igor Arroyo: “Esparru guztiak lehiatuko ditugu”

LAB sindikatuko koordinatzaile orokorrak lantokietan, kalean eta erakundeetan borrokatzearen aldeko deia egin du Maiatzaren Lehenean

Igor-Arroyoren-hitzartzeaDeskargatu

Gaur, LAB, Euskal Herriko sindikatu nazionala, Euskal Herri osoan mobilizatu da. Igor Arroyo koordinatzaile orokorrak egin du eguneko diskurtsoa, Bilbon egindako manifestazioaren ostean. Bizkaiko hiriburuan ez ezik, Baionan, Gasteizen, Donostian, Iruñeak, Maulen, Eibarren eta Tuteran ere atera da kalera sindikatua. Aipagarria da Lapurdiko hiriburuaren kasua; izan ere, intersindikalean bizi duen bazterketa egoerari aurre eginez, manifestazio bateratuan bere tokia aldarrikatuz hasi du mobilizazioa LABek, ondoren bere ekitaldi propioa egin duelarik amaieran. Euskal Herritik kanpo ere, LABen ordezkaritza bat parte hartzen ari da, urtero legez, Kubako CTC sindikatuak antolatutako ekitaldietan.

Presoak gogoan izanez hasi du hitzartzea Arroyok: “Euskal preso guztiak Euskal Herrira ekartzea lortu du herri honek. Eta hurrengo erronkari helduko diogu orain: Euskal preso guztiak etxera!”

Munduko Federazio Sindikaleko kideei ere egin die keinu koordinatzaile nagusiak, independentismoa eta internazionalismoa elkar lotuta ulertzen baititu LABek: “Mundu berri bat nahi dugu, non herri guztiak libre eta pareko izango diren; Mundu berri bat non pertsona guztiak libre eta pareko izango diren”.

“Horregatik, gaur, munduko txoko desberdinetatik Euskal Herrira datozen langile horiek antolatu eta defendatzeko gure erronka berresten dugu. Gure konpromiso antirrazista berresten dugu”, adierazi du Igor Arroyok.

LABen bozeramaleak nabarmendu du langile klasea lan- eta bizi-baldintzetan murrizketa berriak jasaten ari dela. Krisia, pandemia edota gerra aitzakiatzat hartu eta langile klasearen kaltetan “kapitalaren diru-gosea” asetzeko murrizketak lirateke horiek guztiak, adierazi duenez.

Hala ere, Euskal Herriko langileek aurrerapausoa eman dutela nabarmendu du Arroyok. Izan ere, sindikatuak duela urtebete esan zuen borroka-fase berri bat ireki behar zela. “Eta gaur, esan dezakegu borroka-fase hori ireki dela”, baieztatu du. Datuek ere hala berresten dute, estatu espainiarrean egin diren greben erdia baino gehiago Hego Euskal Herrian egin baitira. Horien atzean dauden pertsonak, ahalduntze-prozesuak, antolaketa eta ekintza sindikala goratu ditu koordinatzaile orokorrak: “LABeko jendeak badaki aldaketak ez direla Elkarrizketa Sozialerako Mahai batetik etorriko, borrokatik baizik. Aldaketak ez direla Madrildik etorriko, Euskal Herritik baizik. Euskal Herrian eta sektore bakoitzean dauden gehiengo sindikalak errespetatu behar direla”.

Euskal sindikalismo berria

“Esan genuen sindikalismoa birpentsatu beharra zegoela, sektore prekarizatuengana gerturatu behar zela. Eta horretan ari gara”, azaldu du Arroyok. Sindikalismo sozialaren bidea ere urratzen dihardu LABek, eta, horrekin lotuta, mugimendu feministak deitutako Greba Orokor Feministarekin bat egin du.

Lan baldintzak hobetzeaz harago, eredua bera lehiatu nahi du LABek, Madrilen eta Parisen posible ez diren aldaketak Euskal Herrian gauzatzeko asmoz. Euskal Errepublika eraiki nahi duen esparru sindikal, sozial eta politikoa artikulatzeko helburua lortzeko lanean jarraituko du, beraz.

“Langile klasea herri honetako gehiengo soziala gara. Baina politika publikoak ez dira errealitate hori kontuan hartuta egiten”, gogorarazi du Igor Arroyok. Patronalaren lobbyek politika ekonomikoak etengabe baldintzatzen dituzten honetan, langile klasearen boterea baliatzeko premia nabarmendu du: “Areagotu dezagun banaketa hirukoitzaren aldeko presioa: enpleguaren, zaintzaren eta aberastasunaren banaketa”.

Langile borroka espazio guztietara

Hala, agenda politikoaren erdigunean jarri beharreko hainbat gai zerrendatu ditu, hala nola astean 30 orduko lanaldia, 1.400 euroko gutxieneko soldata nahiz 1.080 euroko gutxieneko pentsioa, zaintza-, osasun-, hezkuntza- eta etxebizitza- sistema publikoak eta “kapitalak zergak behingoz ordaintzea” ahalbidetuko duen erreforma fiskala.

Bide horretan, esparru guztiak lehiatzearen garrantzia aipatu du: “Borroka dezagun lantokietan. Borroka dezagun kalean, eta borroka dezagun erakundeetan ere”.

“Beste mundu bat egin nahi dugu, beste mundu bat egiten ari gara”, aipatu du amaitzeko, aurtengo deialdiaren leloari erreferentzia eginez, eta ekintza bakoitzak balioa duela nabarmendu nahi izan du, guztion ekarpena baita garrantzitsua.

Garbiñe Aranburu: “Mobilizazioa indartu eta grebara jotzea beharrezkoa dela azpimarratu dugu Gipuzkoako metalgintzako intersindikalean”

Zubiate(e)ko Aritz
-
0
Garbiñe Aranburu: “Mobilizazioa indartu eta grebara jotzea beharrezkoa dela azpimarratu dugu Gipuzkoako metalgintzako intersindikalean”

LAB sindikatuko koordinatzaile orokorra Radio Euskadin elkarrizketatu dute goizean, Maiatzaren Lehenaren bezperan, hain justu ere.

Biharko hitzorduei begira sindikatuak egin duen deialdia izan du, besteak beste, mintzagai. Izan ere, Madrilen eta Parisen ezinezko den hori Euskal Herrian egin nahi du LAB sindikatuak, eta Egiteko beste mundu bat aldarrikatuko du Euskal Herriko zortzi herri eta hiritan.

Gipuzkoako metalgintzako negoziazioei buruz galdetuta, koordinatzaile orokorrak adierazi du gaur-gaurkoz Adegik ez duela aintzat hartzeko moduko proposamenik jarri mahai gainean. Hori dela eta, intersindikalarekin batera mobilizazioak aurrera eraman eta borroka egiteko garrantzia azpimarratu du, bake sozialaren izenean patronalarekin aliantzak egitea erabat arbuiatuta.

Horrez gain, osasungintzaren gaiari ere heldu dio, aipatu duelarik Sagardui sailburua gezurretan ari dela osasun zerbitzu publikoa desegiten ari ez dela dioenean; izan ere, pribatizazionanzko joera ukaezina dela dio Aranburuk eta, hain zuzen ere, herritarren kezka nagusietakoa da gaur egun, azkenaldiko mobilizazioek erakutsi duten bezala.

Elkarrizketa esteka honetan entzun daiteke osorik: https://www.eitb.eus/es/noticias/economia/detalle/9187527/lab-defiende-confrontacion-para-lograr-mejoras-laborales-y-llama-a-salir-a-calle-este-primero-de-mayo/

Langileon osasunak eta bizitzak enpresarien irabaziek baino gehiago balio dutela erakusteko kaleak bete ditugu

Zubiate(e)ko Aritz
-
0
Langileon osasunak eta bizitzak enpresarien irabaziek baino gehiago balio dutela erakusteko kaleak bete ditugu

Lan Osasunaren Nazioarteko Eguna da gaur, apirilak 28. Bada, Iruñean eta Baionan mobilizazioak egin ditugu. Prebentzioari jarri beharreko arreta azpimarratzeaz bat, jakinarazi dugu LABek areagotu egingo duela ekintza sindikala gai honen bueltan.

Atzo Bilbon egin bezala, gaur Nafarroako eta Lapurdiko hiriburuetan mobilizatu da LAB, Lan Osasunari behar duen garrantzia eman dakion eskatzeko, urtero legez. Gogoan izan behar da aurten Euskal Herrian 18 hildako utzi dituela dagoeneko patronal zein instituzioen arduragabekeriak. Iaz, berriz, 69 izan ziren guztira.

Nafarroako delegatuen batzarra jendetsua izan da goizean, eta bertan Inko Iriarte Lan Osasuneko idazkariak eta Igor Arroyo koordinatzaile orokorrak Lan Osasunaren arloan egun bizi dugun egoeraren nahiz etorkizuneko asmoen berri eman dute. Jarraian, mobilizazioan atera dira delegatu guztiak, eta beste behin ere oihukatu dute ez dela onargarria batzuen irabazien truke langileon osasuna nahiz bizitza jokoan jartzea.

Hala, besteak beste amiantoarekin lan egitearen ondorioz kaltetutako zein bizia galdutako lankideak gogoan izan dituzte, eta halakorik ez errepikatzeko aldarria zabaldu dute, aintzat hartuta laneko gaixotasun zein istripuak, gehien-gehienak, prebentzio neurri eraginkorrekin saihestu daitezkeela.

Baionan, berriz, gainerako sindikatuekin batera mobilizatu da LAB, prekaritatean hil egiten duela salatzeko.

Hezkuntza Sailak mahai sindikala deitu izana positiboki baloratzen dugu

Zubiate(e)ko Aritz
-
0
Hezkuntza Sailak mahai sindikala deitu izana positiboki baloratzen dugu

LABek Euskal Eskola Publiko Komunitarioa defendatzen du, sare bakar, burujabe, euskaldun eta deszentralizatuan antolatuko dena. Hori ezin da egun batetik bestera egin, trantsizio bat egin behar da eta konfluentzia da bidea.

Bide hori egiteko, Hezkuntzak eraldaketa sakonak eskatzen ditu eta zentzu horretan, EAEn Hezkuntza lege baten eztabaida ireki izana positiboa dela esan eta lege on bat ateratzeko apustuan murgildu da sindikatua.

Lege Aurreproiektuarekin, ereduari dagokionez, hainbat desadostasun eta hobetu beharreko aspektu identifikatu eta hobetzeko ekarpenak egin zituen LABek. Baina, batez ere, bi hutsune nagusi izan ditu prozesu honek bere hastapenean. Batetik, eremu politikoan eraiki daitezkeen adostasunez gain, ez dela egon hezkuntza komunitatearen parte diren sindikatuekin eztabaida eta adostasunak bultzatzeko inolako gunerik. Bestetik, hezkuntzan egin beharreko eraldaketetan ezinbestekoak dira langileak, eta beren lan baldintzen inguruan ez da ezer jaso. Horregatik, LABek Mahai Sindikal baten beharra azpimarratu izan du.

Sindikatuak argi izan du presiorik gabe hutsune horiek zuzendu eta lege on bat ateratzea ezinezkoa zela. Hainbat greba eta mobilizazio egon dira, eta horrek aukera berriak ireki ditu.

LABek gehiengoa du Eskola Publikoan, baita Ikastoletan ere. Azken hilabeteetan lan eskerga egin du eta lan horrek bere fruituak eman ditu. Hezkuntza eremu osoko (Eskola Publikoa, Gizarte Ekimena, Ikastolak, Azpikontratak) langileen lan baldintzak hobetzeko, Hezkuntza Sailarekin oinarrizko adostasun bat lortu du. Abiapuntua jarri du, eta bere bokazioa adostasun horiek zabaltzea da, ondoren negoziazio mahai bakoitzean garatu daitezen.

Horretarako Mahai Sindikal bat deituko da. Atzo bertan jaso zuen LABek Hezkuntza Sailetik deialdia, eta bertan parte hartuko duela baieztatu du.

1...266267268...1,613Page 267 of 1,613

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus