2025-12-28
Blog Page 20

Sindikatu deitzaileek jarraipen handia aurreikusten dute biharko Palestinaren aldeko lanuzte orokorrean

Zubiate(e)ko Aritz
-
0
Sindikatu deitzaileek jarraipen handia aurreikusten dute biharko Palestinaren aldeko lanuzte orokorrean

LAB, CCOO, UGT, ESK, STEILAS, CGT, Etxalde, EHNE-Nafarroa, Solidari eta HIRU sindikatuek biharko deitutako lanuzte orokorrak jarraipen handia izango duela aurreikusten dute.

Nahiz eta Gazan adostutako su-etenak Palestinako biztanleriaren egoera arindu duen, deialdia egin dutenek nabarmendu dute oso garrantzitsua dela Israeli presioa egiten jarraitzea Palestinan genozidioa, okupazioa eta kolonizazioa behin betiko bertan behera uzteko eta herri palestinarrak askatasunean bizitzeko duen eskubidea bermatzeko.

Lanuztearen erreferentziazko ordutegia 11:00etatik 14:00etara izango da, eta 15:00ak arte luzatuko da ordu horretan lanaldia amaitzen duten jardueretan. Gaueko txandan 03:00etatik 06:00etara egingo da geldialdia, eta arratsaldekoan 19:00etatik 22:00etara.

Enpresa bakoitzeko ordezkaritza sindikalak lanuztearekin bat egiteko eskatu die langileei, eta dozenaka mobilizazio antolatu dira Mercedes, Volkswagen Nafarroa, Michelin Gasteiz eta Lasarte, Laminaciones Arregi, Sidenor Basauri, Arteche, Aludium, Gestamp, ZIV, CAF Zamudio eta Acciona Irunberri enpresetan. Plantillari lanuztearekin bat egiteari buruz galdetu ohi dioten enpresetako bozketen emaitzek (Beasain eta Irungo CAF, Beasaingo Indar, Itsasondoko Jaso, Getariako Indaux, Garai eta Oñatiko Natra Zahor, Azpeitiko Biele, Leitzako Sarrio Papel edo Lakuntzako Aceros Moldeados) gehiengoaren babesa islatzen dute, % 70etik gorakoa kasu batzuetan.

Zerbitzu publikoetan, abusuzko gutxieneko zerbitzuak ezarri dira, gure ustez, inpugnatu egin ditugu, eta ebazpenaren zain gaude. Horrela, lanuzteak eta mobilizazioak aurreikusten dira Eusko Jaurlaritzan, Nafarroako Gobernuan, Osakidetzan, Osasunbidean, EiTBn, Guggenheim Museoan, Portu Agintaritzan, justizia administrazioan, hiru aldundietan eta udal nagusietan. Kasu horietan guztietan, azpikontratetako langileek parte hartuko dutela iragarri dute. Garraio publikoan, hezkuntza publikoan eta ikastoletan jarduera gutxieneko zerbitzuetara mugatzea aurreikusten da, eta eskoletako dozenaka jantoki itxiko dira.

12:30ean manifestazioak egingo dira lau hiriburuetan:

• Bilbo: Jesusen Bihotza.

• Donostia: Boulevard.

• Gasteiz: Andre Maria Zuria.

• Iruñea: Golem.

Hiriburu bakoitzean zutabeak antolatu dira, auzo eta poligono desberdinetatik abiatuta dagokien manifestazioaren abiapuntuan bat egingo dutenak. Ordezkari sindikalez gain, komunitate palestinarreko ordezkaritza bat joango da eta azken ekitaldian parte hartuko du.

19:30ean Gernika-Palestinak mobilizazio deszentralizatuak antolatu ditu udalerri bakoitzean. Iruñean, Tuteran eta Lizarran manifestazio sindikal bana egingo da.

Lanuzte eta mobilizazio eguneko aldarrikapenak honako hauek dira:

  • Langile klase osoak Palestinako herriarekin duen elkartasuna adieraztea. AEBko Gobernuaren laguntzarekin Israel herri palestinarraren aurka egiten ari den genozidioa eta gizateriaren aurkako krimenak salatzea.
  • Palestinako lurraldea Zisjordanian etengabe kolonizatzen ari direla eta horrek Palestinako langileen lan- eta bizi-baldintzetan dituen ondorio larriak salatzea.
  • Gazako genozidioaren berehalako amaiera aldarrikatzea eta Palestinaren okupazioarekin eta kolonizazioarekin amaituko duen eta herri palestinarrak askatasunean bizitzeko duen eskubidea bermatuko duen konponbide integral bat eskatzea.
  • Patronalari eta bertako zein nazioarteko erakundeei eskatzea eten dezatela Israelgo Estatuarekiko merkataritza-harreman oro. Ezin da negozioa egiten jarraitu genozidio baten kontura.
  • Europar Batasunaren eta Israelen arteko Elkartze Akordioa bere osotasunean etetea.

Palestinarekiko elkartasuna eta asteazkeneko lanuzterako deia eskualdez eskualde zabaldu ditu LABek

Zubiate(e)ko Aritz
-
0
Palestinarekiko elkartasuna eta asteazkeneko lanuzterako deia eskualdez eskualde zabaldu ditu LABek

Azken asteetan eskualdeetako ordezkarien batzarrak egin ditu LABek eskualdez eskualde. Ikasturteko erronka nagusiez aritu dira sindikatuko kideak batzar horietan, eta, horrez gain, Palestinari elkartasuna helarazteko ere baliatu dute hitzordua, baita urriaren 15eko lanuzte eta mobilizazio egunerako deia egiteko ere.

Izan ere, Hamasek eta Israelgo Gobernuak su-eten akordioa sinatu dute, bai, eta LABek erabateko errespetuz hartzen ditu eta hartuko ditu Palestina ordezkatzen duten eragileek unean une hartzen dituzten erabakiak. Hala ere, elkartasun internazionalistaren ikuspegitik, Israelgo Gobernuak su-etena gauzatu dezan maila guztietan presio egiten jarraitu beharra dagoela uste du sindikatuak, batetik, eta Palestina hamarkada luzez pairatzen ari den kolonizazio eta genozidioa amaitu behar dela, bestetik, eta Palestinaren autodeterminazio eskubidea gauzatu.

Hain zuzen, bi aldarrikapen horiei bultzada eman nahi die urriaren 15eko lanuzte orokorrak. Ozen aldarrikatuko du euskal langileriak: “Genozidioa eten! Kolonizazioa eten! Autodeterminazioa Palestinar Herriarentzat!”

Bilbo
Donostia
Donostia
Gasteiz-Lautada-Errioxa
Nafarroa
Nafarroa
Goierri-Buruntza
Durangaldea
Aiaraldea
Busturialdea-Lea-Artibai
Oarso-Bidasoa
Hego Uribe-Arratia
Eskumaldea
Debaldea

Akordiorik gabe amaitu da Maderas de Llodio-ko EEE-ren kontsulta epea

Zubiate(e)ko Aritz
-
0
Akordiorik gabe amaitu da Maderas de Llodio-ko EEE-ren kontsulta epea

Joan den urriaren 9an amaitu zen Garnicako zuzendaritzak aurkeztutako Enplegu Erregulazio Espedientearen (EEE) kontsulta epea. Prozesu osoan zehar, alderdi sozialetik elkarrizketarako borondate osoz jardun dugu, bost proposamen desberdin aurkeztuz, ekoizpenaren %40 mantentzeko eta, horrela, deslokalizazioa eta 39 langileren kaleratzea ekiditeko.

Hala ere, enpresako zuzendaritzak ez du negoziatzeko benetako borondaterik erakutsi. Aurkeztutako proposamenak benetan aztertzea ukatu du, hasieratik jarrera itxia mantenduz. Mahai gainean jarri duen eskaintza bakarra izan da kaleratze kopuruari lau pertsona murriztea eta kalte-ordainak pixka bat handitzea, baina ekoizpenaren %40aren deslokalizazioa eta kaleratzeak bere horretan mantenduz.

Horregatik, proposamen hori onartezina zen, Maderas de Llodioren eta bertan lan egiten dugun pertsona guztien etorkizuna arriskuan jartzen jarraitzen zuelako.

Batzordetik, eta langileen asanbladari helarazi ondoren, berriro ere baieztatu nahi dugu lanpostuak eta ekoizpena bermatuko dituzten irtenbideak bilatzen jarraitzeko konpromisoan berresten garela. Denbora dago oraindik. Garnicako zuzendaritzari eskatzen diogu, bere erabakia berpentsatu dezala eta ez dezala ERE-a aurkeztu.

Bestalde, gure haserrea adierazi nahi diegu erakundeei. Onartezina iruditzen zaigu, egoera larri honen aurrean, ez Arabako Foru Aldundiak ezta Eusko Jaurlaritzak ere ez dutela inolako inplikaziorik erakutsi. Eskualdean ibilbide luzea duen industria-enpresa bati buruz ari gara, zeinak eragin zuzena duen enpleguan, ekoizpen-sarean eta lehen sektorean ere. Hala eta guztiz ere, erantzun instituzionala hutsaren parekoa izan da.

Batzordeak berak jarri behar izan du harremanetan erakundeekin. Arabako Foru Aldundiaren kasuan, ez dira behin ere gurekin bildu gertatzen ari dena lehen eskutik ezagutzeko, ezta beraien eskura dituzten tresnak eskaintzeko ere, enplegua babesteko eta bitartekaritza egiteko. Eta Eusko Jaurlaritzaren kasuan, alderdi sozialak eskatutako lehen bilera baten ondoren, ez da jarraipenik izan, ezta bilera berririk ere, guk horrela eskatu diegu arren.

Oso gertakari larria iruditzen zaigu, langile klasea, enpresen erabakien aurrean are ahulago uzten duelako. Erakundeek beren erantzukizunak bere gain har ditzatela exijitzen dugu, argi eta garbi kokatu daitezela industria eta lanpostuak babesteko, eta demagogia eta hitz hutsak alde batera utz ditzatela.

Berriro ere, bihotzez eskertu nahi diogu Laudioko eta eskualde osoko herritarrei jasotzen ari garen babes eta elkartasun adierazpen ugariak. Egoera hau ez da arazo indibidual bat, kolektiboa baizik, eta horren jakitun izatea funtsezkoa da Aiaraldeako gure etorkizuna defendatzeko.

Horregatik, duela bi aste egin genuen bezala, berriro baieztatzen dugu gure tresnarik onenak borroka eta mobilizazioa direla. Ildo horretan jarraituko dugu, greban, gure lanpostu bakoitza eta Maderas de Llodioren etorkizuna defendatzen. Eta egoera hau gelditzeko behar diren tresna juridiko eta sindikal guztiak erabiliko ditugu.

Azkenik, bi mezu oso argi helarazi nahi ditugu:

  1. Enpresari, bere jarrera berrikus dezan eta EREa erretiratu dezan.
  2. Erakundeei, jardun dezaten berehala. Ez dago aitzakiarik gehiago.

Borroka da bide bakarra!
Gora Maderas de Llodio-ko langileak!
Aiaraldea defenda dezagun!

Ez zen matxinada izan, eskubideen aldarrikapena baizik

Zubiate(e)ko Aritz
-
0
Ez zen matxinada izan, eskubideen aldarrikapena baizik

Beti Aingeru itsasontzian gertatutakoa ez zen “matxinada” izan, baizik eta arrantzaleek euren eskubideak aldarrikatzeko egindako ekintza legitimoa, arrantza sektorean lan-esplotazio eta arrazismo kasu berri baten aurrean.

Lehen sektorea Euskal Herrian historikoki garrantzitsua izan da. Hala ere, lur zein itsasoko langileek oraindik ere lan-baldintza prekarioak eta diskriminatzaileak dituzte: lanaldi neurrigabeak, lan egindako denborarekin bat ez datozen soldatak, lan-osasunean eragin handia duten klima eta ingurumen-baldintzetako esposizioa, eta patronalari gehiegizko “malgutasuna” eskaintzen dion aldi baterako kontratazio-eredu bat, askotan xantaiarako eta mehatxurako tresna bihurtzen dena.

Baxurako arrantzaren sektoreak ez du oraindik hitzarmen kolektibo propiorik, eta horrek baldintzak arautu gabe uzten ditu. Azken urteotan, patronalak gero eta gehiago “normalizatu” du itsasoan emandako denboraren luzapena, atseden egunen kaltetan. Gainera, ez dago jarraipen eraginkorrik arrantzaleek dituzten benetako baldintzei buruz. Askotan, armadoreen mehatxupean eta eskubideen urraketa egoeretan aurkitzen dira.

Hau ez da kasualitatea. Sektore prekarizatua eta oso arrazializatua da. Gaur egun, euskal arrantzak neurri handi batean jatorri senegaldarreko arrantzaleei esker eusten dio. Badira patronalari mesede egiten dioten egiturazko baldintzak, langile horiek ustiatzen dituztenak. Enpresei ez zaie interesatzen arrantzaleek beren eskubideak ezagutzea, ezta eskubide horiek defendatzeko sindikatuetan antolatzea ere. Langileen ezjakintasunaz, beldurraz eta denboraldien arteko sakabanaketaz baliatzen dira.

Beti Aingeru Pasaiako ontziko armadorearekin gertatu dena ez da matxinada izan. Guardia Zibilaren txostenean ere ez da horrela jaso. Komunikabide batzuen bidez nahita zabaldu den errelato honek patronalari mesede egiten dio eta langile horien aurkako imajinario arrazista eta estigmatizatua elikatzen du.

Beti Aingeru itsasontzian gertatutakoa langileek beren eskubideak aldarrikatu izana izan da, besterik ez. 37 egun eman zituzten etxera itzuli gabe, eta etxean bi eguneko atseden labur baten ondoren, beste 26 egunez egon ziren itsasoan; hori ez da ohikoa baxurako itsasontzietan. Gainera, armadorearen aldetik mehatxuak, irainak eta eraso fisikoak (hala nola objektuen jaurtitzea) pairatu zituzten.

Guzti hau ez da kasualitatea eta izen bat du: lan-esplotazioa eta arrazismoa. LAB sindikatutik salatu egiten dugu, eta berehala eskatzen dugu arrantzale hauen eskubide guztiak errespetatu daitezela.

Horrelako egoerak jasaten dituzten arrantzaleei publikoki salatzeko gomendatzen diegu. LAB sindikatutik argi daukagu: antolakuntza eta borrokaren bitartez soilik lortuko dugu arrantza sektorean ematen diren eskubideen urraketa eta arrazismoari aurre egitea.

Era berean, administrazio publikoei eskatzen diegu ez daitezela konplize bihurtu, eta itsasoan lan egiten duten pertsonen eskubideen betetzea kontrolatu eta eskubide horiek urratzen dituzten armadoreak zigortu ditzatela.

LAN-ESPLOTAZIO ETA ARRAZISMOARI EZ.

EZ ARRANTZAN ETA EZ INON. 

Pasaiako etxez etxeko langileek greban jarraituko dute, lan eta bizi baldintzak prekaritatetik atera arte

Zubiate(e)ko Aritz
-
0
Pasaiako etxez etxeko langileek greban jarraituko dute, lan eta bizi baldintzak prekaritatetik atera arte

Pasaiako Udaleko Etxe Etxeko Laguntza Zerbitzuko langileek agerraldia egin dute gaur, salatzeko udalak, hilabeteetako negoziazioen ondoren, langileen egungo prekaritate egoera betikotzen duen plegua atera duela, langileentzat inolako hobekuntzarik ez dakarrena. Aurki 50 egun egingo dituzte greban langileek, eta hala jarraitzeko borondatea berretsi dute gaur, euren lan eta bizi baldintzak prekaritatetik ateratzea lortzen duten arte.

Hemen, gaur irakurritako oharra:

Hilabeteetako negoziazioaren ondoren, udalak berriro hobekuntzarik gabeko plegua aterako duela esan digu, langileen %50eko soldata arrakala areagotuz. Hainbat hilabetetako elkarrizketa ondoren udalarekin, eta Pasaiako etxez etxeko laguntza zerbitzua ematen duten langileak prekarietatetik ateratzeko promesaren ondoren, aurreko asteko udal plenoan udalaren hitzetean, Pasaiako Udalak datorren lehiaketaren plegua argitaratuko duela, inolako hobekuntzarik gabe langileentzat.

Pasaiako Udalak herritarrei eskaintzen dien Etxez etxeko Laguntza Zerbitzuak zerbitzu publikoa izan beharko luke. Baina, gaur egun, udalak funtsezko zerbitzu hori, enpresa pribatu bati azpikontratatzen dio. Horren ondorioz, emakume langileok oso lan-baldintza eskasak ditugu eta diskriminatuta gaude antzeko zereginak egiten dituzten gainerako langileekin alderatuta. Langilegoaren %75ak lan kontratu partzialak ditugu. Ondorioz, ondoko udalean gure lan berdina egiten duen langile publikoekin alderatuta, soldata-arrakala, %50ekoa da.

Azken hilabeteotan bilerak egin ditugu udalarekin, eta hark, lan-baldintzak duintzeko borondatea duela agindu digu eta bide horretan, gure hitzarmena hobetzeko baliabide ekonomikoak agindu zizkigun. Baina, zoritxarrez, hori gauzatzeko erabaki politikoak hartu behar direnean, dena kea dela egiaztatu ahal izan dugu.

Onartezina da zerbitzu hori emateko ardura duen udalak zerbitzu hori kudeatzeko lehiaketa bat argitaratzea, diskriminazio- eta prekarietate-egoera hori iraunaraziz. Argi dago, zaintza esparrua, enpresa pribatuen eskuetan utzirik, zerbitzuaren kaliteatea kaltetzen dela eta langileen lan baldintzak okertzen direla.

Pasaiako Udaleko Etxez Etxeko Laguntza Zerbitzuko langileok salatu nahi dugu erabaki honekin Udalak berriro, prekarietatean jarraitzera eta diskriminazio egoera batean mantentzera kondenatzen gaituela. Udalak erabaki honekin, genero arrakala betikotzen du.

Etxez etxeko Laguntza Zerbitzuko langileok soldata prekarioa kobratzen jarraituko dugu, 2025ean ez dugu ordainsari-igoerarik izango eta ez ditugu gure lan-baldintzak hobetuko. Hori da errealitatea, udalak hartutako erabakiaren ondorio zuzena. Genero arrakala areagotzeko erabakia hartu du.

Udalari eskatzen diogu bere gain har dezala zerbitzu hori ematean dagokion erantzukizuna, eta jar ditzala gure lan-baldintzak duintzeko behar diren bitartekoak. Har ditzala dagozkion erabaki politikoak, enpresen etekinen logikatik ateratzeko eta zaintza erdigunean jarriz, zerbitzuaren publifikazio bidean.

Ez digute balio zainketen sektore feminizatuko langileok pairatzen dugun prekarietate-egoera iragartzeko esloganek. Egoera hau ezabatuko duten erabaki politikoak eskatzen ditugu. Pasaiako Etxez Etxeko Laguntza Zerbitzuko langileok, laister 50 greba egun batuko ditugu eta greban jarraituko dugu gure aldarrikapenak lortu eta gure lan eta bizi baldintzak prekarietatetik ateratzea lortu arte.

Zaintza esparrua ezinbestekoa delako, zaintzarekin negoziorik ez.

Urriaren 15ean egun osoko lanuztea! Genozidioarekin negoziorik ez! Hezkuntzako langileok Palestinarekin!

Bergara(e)ko Ibon
-
0
Urriaren 15ean egun osoko lanuztea! Genozidioarekin negoziorik ez! Hezkuntzako langileok Palestinarekin!

LAB eta STEILASek, Hezkuntza komunitatea osatzen duten langile, familia eta ikasleekin Hego Euskal Herriko hezkuntza sistema osoan egun ,osoko lanuztera deituz agerraldia egin dute Gasteizko Foru Enparantzan.

Hezkuntza komunitatea osatzen duten langileen, familien eta ikasleen babesarekin batera agertu dira prentsa aurrera. Urriaren 15erako Hego Euskal Herrian lanuzte orokorrerako deialdia egin zuten LAB, CCOO, UGT, ESK, STEILAS, CGT, Etxalde eta HIRU sindikatuek, baina, hezkuntzan dauden berezitasunak kontuan hartuta, lanuzte hori egun osokoa bihurtzea erabaki dute LABek eta STEILASek.

Kolektibo guzti hauek deitu dituzte egun osoko lanuztera, haur eskoletatik hasi eta unibertsitateetaraino: hezkuntzan zerbitzua ematen duten eta azpikontratatuak diren garraio eta jantokiko begirale, sukaldari eta garbitzaileak, baita Hezkuntza Saileko sukaldari eta garbitzaileak eta atezainak. Haurreskolak Partzuergo Publikoko langile, Nafar Gobernuko Hezkuntzako langileak eta 0-3ko langileak, Ikastola eta Gizarte ekimeneko langileak eta azpikontratatutako pertsonala. Eskola publikoko zein Gizarte Ekimeneko edota Ikastoletan aritzen diren Heziketa Bereziko hezitzaile, atezain, haur hezitzaile edota irakasleak. EHUko eta NUPeko atezain, administrari, azpikontratatutako garbitzaile, ikerlari edota irakasleak.

Bart, Hamasek eta Israelek su-eten akordioa sinatu berri dutela adierazi dute. Su-etena gauzatuko balitz (aurrez Israelen ez betetzeak hamaika izan baitira), Gazako herritarren sufrimendua arinduko lukeela uste dute bi sindikatuek eta hori berri on bezala baloratu dute. Hala ere, Palestinar Herriaren aurkako genozidio eta kolonizazioarekin behin betiko amaitu arte presio egiten jarraitu beharra azpimarratu dute.

Egoera hau izanik, urriaren 15erako Palestinarekin elkartasunez deitua dagoen lanuzte orokorra mantentzen dute, eta egun osokoa izango da Hego Euskal Herriko hezkuntza sistema osoan.

Hezkuntza komunitateko kideek Israelek Palestinako Herriaren aurka egindako eraso basatia salatu izan dute lehen momentutik, eta horren aurrean hainbatetan mobilizatu dira. Zentzu horretan, urriak 15ean Araba, Bizkaia, Gipuzkoa eta Nafarroa Garaiko kaleak hartzeko deia luzatu dute, 12.30tan hiriburuetan deituta dauden manifestazioen bidez zein herri edo eskualdeetan gauzatuko diren elkarretaratze eta mobilizazioetan ere. Izan ere, gaur egun gertatzen ari dena genozidio bat dela ez du inork zalantzan jartzen, Israelgo Estatuak berak edo hura sostengatzen duten gobernu eta interes ekonomikoek salbu.

Aldarrikapenak:

  • Langile klase osoaren elkartasuna adieraztea Palestinako herriari.
  • Israel, AEBetako Gobernuaren babesarekin, Palestinako herriaren aurka egiten ari den genozidioa eta gizateriaren aurkako krimenak salatzea.
  • Palestinako Zisjordania lurraldearen etengabeko kolonizazioa, eta horrek Palestinako langile klasearen lan- eta bizi- baldintzetan dituen ondorio larriak salatzea.
  • Gazan genozidioararen berehalako amaiera ematea eta Palestinaren okupazio nahiz kolonizazioari amaiera emango dion irtenbide integrala aldarrikatzea, palestinar herriak askatasunean bizitzeko duen eskubidea bermatuz.
  • Hezkuntzako langileak garen heinean, hildako adin txikikoen basakeria salatzea.
  • Patronalari eta bai bertako nahiz nazioarteko instituzioei Israelgo Estatuarekin merkataritza harreman oro bertan behera utz dezatela exijitzea.
  • Ez da onargarria genozidio baten kontura negozioak egiten jarraitzea. Europar Batasunaren eta Israelgo Estatuaren arteko Elkartze Hitzarmena bere osotasunean eten dezaten eskatzea.

Amaitzeko, urriaren 25ean “Gure haurrak ere badira” ekimenak Bilbon deitutako manifestazio nazionalean parte hartzera deitzen dute.


Genozidioarekin negoziorik ez! Hezkuntzako langileok Palestinarekin!

Gazako su-etenaz: Israelen erasoak berehala eten eta kolonizazioarekin behin betiko amaitzea eskatzeko, urriaren 15ean kalera

Zubiate(e)ko Aritz
-
0
Gazako su-etenaz: Israelen erasoak berehala eten eta kolonizazioarekin behin betiko amaitzea eskatzeko, urriaren 15ean kalera

Hamasek eta Israelgo Gobernuak su-eten akordioa sinatu zuten bart. Orain arte bezala, LABek erabateko errespetuz hartzen ditu eta hartuko ditu Palestinar Herria ordezkatzen duten eragileek unean une hartzen dituzten erabakiak. Elkartasun internazionalistaren ikuspegitik bi dira nabarmendu nahi ditugun ideiak:

Lehenik eta behin, su-etena gauzatzeak arindu egingo luke Gazako herritarren sufrimendua eta hori berri ona da, zalantzarik gabe. Hala ere, aurrez egindako akordioak Israelgo Gobernuak nola urratu dituen ikusita, su-etena gauzatu dezan presio egiten jarraitu beharra dago maila guztietan. Exijitzen dugu Gazako herritarren aurkako eraso oro eten, eta, gosete nahiz hondamendi egoerari aurre egiteko beharrezkoak diren baliabide guztiak berehala bideratzea.

Bigarrenik, behin betiko amaitu behar da Palestinar Herriak hamarkada luzez pairatzen duen kolonizazio eta genozidioa, eta autodeterminazio eskubidea egikaritu, hala eskatze dugu LABetik. Helburu horrekin Israeli ahalik eta presio handiena egiten jarraitu beharra dago, azken urteotan egindako ibilbidean atzerapausorik onartu gabe.

Bi eskari horiei bultzada emateko, alegia, su-etena gauzatu dadin eta Palestinaren kolonizazioarekin amaitu dadin, mobilizatzen jarraitzea ezinbestekoa da. Horregatik, gaurkoan bultzada berri eman nahi diogu urriaren 15eko lanuzte orokorrari. Urriaren 15ean Euskal Herriaren eta euskal langileriaren ahotsa ozen entzungo da nazioartean: Genozidioa eten! Kolonizazioa eten! Autodeterminazioa Palestinar Herriarentzat!

Bigarren istripua Sestaoko Arcelor Mittal-en

Zubiate(e)ko Aritz
-
0
Bigarren istripua Sestaoko Arcelor Mittal-en

Astearteko ezbeharraren ondoren, atzo beste istripu larri bat gertatu zen ArcelorMittal Sestaon.

Garabi autopropultsatu baten laguntzaz pieza handi bat askatzen ari zen langile bat aldakaren parean zanpatu zuen garabiak, egitura finko baten kontra harrapatuta geratu denean pieza gidaritik askatu ostean. Askotan errepikatzen den lana da, baina sekula ez da aztertu eta ez da inoiz planteatu atzo gertatu zena saihesteko arriskurik ez dakarren sistemarik.

Langilea ospitalera eraman zuten, jasandako zauriak zenbaterainokoak izan diren oraindik ez dakiguean.

LAB sindikatutik aspaldi daramagu salatzen enpresak ez duela konpromisorik laneko segurtasunari dagokionez. Horren adibide garbia da produkzio zuzendaritzak makinak martxan jartzeko agindua eman izana langilea eraman behar zuen anbulantzia oraindik instalazio barruan zegoenean.

Berriz ere ikusten dugu patronalaren kezka bakarra ekoizpena dela, dirua egiten jarraitzea, langileen eskubideak alboratu eta langileen segurtasunari dagoklionez, legez betetzera behartuta dauden dokumentuak betetzera mugatzen baitu bere zeregina. 

Greba egin dute Ipar Euskal Herriko funtzio publikoan eta medikuntza sozialean, baliabide eta baldintza duinen alde

Zubiate(e)ko Aritz
-
0
Greba egin dute Ipar Euskal Herriko funtzio publikoan eta medikuntza sozialean, baliabide eta baldintza duinen alde

Funtzio publikoan eta medikuntza sozialean aritzen diren langileek greba eta mobilizazio eguna izan dute Ipar Euskal Herrian. Oinarrizko eta beharrezko zerbitzu bat emanagatik, azken urteetako politika antisozialek euren lan baldintzak zein zerbitzua bera nabarmen kaltetu dituztela salatu dute.

CGT, FSU, LAB eta Solidaires eta LAB sindikatuek antolatu dute greba ta mobilizazio eguna, eta “mugimendu hori bermatzeko” LABek egindako lana nabarmendu du Xan Briary LABen Baionako ospitaleko ordezkariak eta erizainak. Departamenduko Kontseilua, lizeo bat eta Baionako ospitalean lotu dituzten mobilizazio batean. “Zerbitzu publikoen zutabeak ere sinbolizatu nahi genituen. Izan ere, arazo berberak ditugu hiru zutabe hauetan. Guk defendatzen dugu osasungitza eta medikuntza sozialeko zerbitzu publiko unibertsala eta kalitatezkoa guztientzat, eta horretarako bildu gara gaur”, azaldu du Briaryk..

1...192021...1,583Page 20 of 1,583

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus