2026-06-19
Blog Page 14

10 egunean 6.500 sinadura bildu ditugu irakasleentzako murgiltze ikastaroak mantentzearen alde

Zubiate(e)ko Aritz
-
0
10 egunean 6.500 sinadura bildu ditugu irakasleentzako murgiltze ikastaroak mantentzearen alde

Eusko Jaurlaritzaren Bilboko Hezkuntza Ordezkaritzan elkarretaratzea egin dugu LAB, STEILAS eta ELA sindikatuok, eta bildutako sinadurak Hezkuntza Sailari helarazi dizkiogu. Era berean, maiatzaren 14rako mobilizazioak iragarri ditugu ikastetxeetan. Bestalde, euskaraz bizitzeko eta lan egiteko eskubidearen alde maiatzaren 9rako deitutako manifestazioan parte hartzeko deia ere egin diegu hezkuntzako langileei.

Hiru sindikatuok sinadura bilketa bat jarri genuen abian apirilaren 21ean, apirilaren 30ean amaitu zena; hamar egunotan 6.500 sinaduratik gora bildu ditugu. Horrek agerian uzten du irakasleek murgiltze ikastaroak beharrezkotzat jotzen dituztela eta hauek mantentzearen alde daudela.

Elkarretaratzea egin duten bitartean, sinadura horiek aurkeztu dizkiogu Hezkuntza Sailari. Mobilizazioan hezkuntza sailari egiten dizkioten eskaera zehatzak gogorarazi ditugu:

  • Irakasleentzako euskarazko murgiltze ikastaroak mantentzea (R bidez eskainitakoak barne) langileen ordezkarien gehiengoarekin murgiltze ikastaroen diagnostikoa, indartzea eta dimentsionamendua adostu bitartean.
  • Euskaran eta euskal kulturan ardaztutako formakuntzan egun dagoen beharra aitortzea eta ikastaroak ez murriztea ikastetxeetako mikro formakuntzetara.
  • Murgiltze bidezko formakuntza honen irismena eta eragina hobetzeko neurriak langileen ordezkariekin jorratzea eta adostea.
  • Formakuntza molde hori bermatzeko, gutxienez orain arteko baliabideei eta inbertsioari eustea.
  • Euskaran ardaztutako formakuntza gaur egungo beharretara egokitzea eta indartzea, sindikatuekin negoziatuta.

Abian jarritako dinamikari jarraipena emanez, ikastetxeetan mobilizazio egun bat deitu dugu datorren maiatzaren 14rako. Irakasle talde osoari dei egiten diogu egun horretan antolatu eta mobilizatu daitezen.

Hiru sindikatuon ustez, ezinbestekoa da euskararen ezagutzan, soziolinguistikan eta euskal kulturan eta horien guztien transmisioan trebatutako irakasleak izatea eta hauek etengabe formatzea. Hori izan baita urteetan IRALEko R ikastaroen helburua.

Hezkuntza Sailak, ordea, sindikatuekiko gardentasunik gabe eta aldebakarrez IRALEren R modalitateko ikastaroak 2026-27 ikasturtetik aurrera bertan behera uzteko erabakia hartu du.

Euskal Herrirako euskaran ardaztutako hezkuntza sistema burujabea defendatzen dugu sindikatuok, euskararen ezagutza eta erabilera bermatuko dituena eta euskal hiztun osoak heziko dituena, gizarte kohesionatu euskaldun baten alde. Horretarako, irakasleentzako euskaran eta euskal kulturan ardaztutako prestakuntza funtsezkotzat jotzen dugu, irakasleak baitira ikasleen eta hezkuntza-sistemaren lorpenen eragile nagusiak.

Hori esanda, sindikatuok uste dugu neurri eta baliabide berriak behar direla, baina horiek ezin dituztela daudenak ordezkatu, baizik eta daudenak osatu eta indartu behar direla.

Azkenik, datorren maiatzaren 9rako euskaraz lan egin eta bizitzeko eskubidearen alde deitu dugun manifestazioan parte hartzera ere deitu dugu hezkuntzako langileria osoa.

LABek Osakidetzako akordio arautzailea aldarrikatzen du

Zubiate(e)ko Aritz
-
0
LABek Osakidetzako akordio arautzailea aldarrikatzen du

LABek adierazi du Osakidetzako langile guztien lan-baldintzak hobetu behar direla zerbitzu publikoa hobetzeko, eta horretarako markoa EAEko mahai sektoriala dela, eta ez Madrilek ezarritakoa. Sindikatuak salatu du mahai sektorialetan medikuen grebaren eta hura konpontzeko irtenbideen inguruan ez dela hitz egin, eta gaia saihestu egiten dela.

Osakidetzak 20 urte betetzera doan lan-baldintzen akordio arautzailea du, eta premiaz berritu behar da, kolektibo desberdinen izaera eta ezaugarriei erreparatuta, langileen lan-baldintzak eta erabiltzaileei eskaintzen zaien zerbitzua hobetzeko. Zerbitzua propioa eta baliabide publikoekin ematea aldarrikatu du LABek. Halaber, pribatizazioaren aurkako neurriak hartzea eta zerbitzu guztiak publifikatzeko plana premiazkoa dela azpimarratu du.

Lan-akordioan badago zer eguneratu: ordainsariez gain, lanaldian egin behar diren itinerantziak ordaindu behar dira, osagarriak berrikusi, kategoriaren eta unitatearen araberako ratioak ezarri, funtzioak eta txandak berrikusi, langileen kolektiboen eta erabiltzaileen hizkuntza-eskubideak bermatu, irizpide antolatzaile eta laboral berberak aplikatu ESI guztietan, aparteko orduen jarraipena eta konpentsazioak berrikusi, autokontzertazioak mugatu, gazte-berritze plana adostu eta lan-osasuna hobetu, besteak beste.

Eusko Jaurlaritzak azpimarratu du gatazkaren konponbidea Monica Garciak zuzentzen duen ministerioaren esku dagoela, eta Esparru Estatutuaren benetako negoziazioa eskatu du.

LABek, aldiz, Alberto Martinez Eusko Jaurlaritzako Osasun sailburuarii eskatu dio erantzukizuna har dezala eta 20 urte betetzera doan lan-akordioa osotasunean berritzeko apustua egin dezala.

Martinezek adierazi badu ere grebek sortutako itxarote-zerrendak murrizteko errefortzua handitzea eta pazienteentzako aukerak zabaltzea erabaki duela, LABek salatu du neurri hori ez dela berria eta pribatizazioan sakontzen duela, pazienteen arreta ospitale kontzertatuetan ematea baitakar.

Gauzak horrela, Martinezi deia egin dio mahai sektorialean akordio arautzailearen negoziazio osoa hasteko. LABek jakinarazi duenez, negoziazio kolektiboa baliatzen ez bada, aliantzak bilatu eta ekintza sindikala aktibatuko du. 

Greba eguna Gasteizko Shuton enpresan

Zubiate(e)ko Aritz
-
0
Greba eguna Gasteizko Shuton enpresan

Gaur, maiatzak 5, Shuton, S.L.U enpresako langileak lehen greba eguna egiten ari dira Goiainen, enpresari lan baldintza duinak eta hitzarmen justua exijitzeko. Bost hilabete baino gehiago igaro dira negoziazioak hasi zirenetik, eta, besteak beste, enpresa honek ez du oraindik langileentzako lan-baldintza duinak bermatuko dituen proposamenik egin.

Hori dela eta, negoziatzeko hainbat saiakera egin ondoren, eta enpresak egoera desblokeatzeko inolako borondaterik erakutsi ez duenez, langileek lan-txanda guztietarako bi greba-egun egitea erabaki zuten batzarrean, hasiera batean, maiatzaren 5ean eta 12an.

Lehen egunean ia langile guztiek egin dute bat grebarekin, bai bulegoetan, bai produkzioan, eta produkzioa eten egin da txanda guztietan.

Shutonen hitzarmen duina orain!
Borroka da bide bakarra!

LABek manifestaziora deitu du maiatzaren 16an Gimeno kontseilariaren kargu-uztea exijitzeko

Zubiate(e)ko Aritz
-
0
LABek manifestaziora deitu du maiatzaren 16an Gimeno kontseilariaren kargu-uztea exijitzeko

Hezkuntza arloko langileen artean, aste gutxiren buruan, ia 2.000 atxikimendu bildu ditu “Nafarroako hezkuntzak okerrera egitearen erantzule nagusia” Gimeno dela eta horregatik “kargugabetu egin behar dela” adierazten duen manifestuak.

2025eko ekainean, duela ia urtebete, LABek kanpaina bati ekin zion, Carlos Gimeno Hezkuntza kontseilariak bere ardurapeko alor guztietan egiten ari den kudeaketa negargarria azaleratzeko. Hezkuntza-komunitate osoaren atsekabea ikusirik, hasi ikasle eta familietatik eta Nafarroako hezkuntza-sisteman parte hartzen duten profesional mota guzti-guztietaraino, arrazoiak soberan zeuden.

Bada, ordutik hona egoerak okerrera egin du. Oro har, nahikoa litzateke esatea LABek gogoan dituen gobernu guztietatik protesta, mobilizazio eta greba gehien egin dizkioten kontseilaria bihurtu dela, edo urteko aurrekontu orokorretan hezkuntzara bideratzen duen inbertsioaren pisua geroz eta txikiagoa dela gainerako kontu-sailekin alderatuta.

Baina kontua ez da hor gelditu eta azken hilabeteetan zentzu berean jarraitu du:

  • LH dualaren antolamendu gabezia erabatekoaz harro agertu da.
  • Zerbitzuak pribatizatzeko ahaleginean sakondu du, NHEBZ alde batera uzten duten hitzarmenak sinatuz.
  • 0-3an, oraindik ere ez dio erantzun ziklo osoa publifikatzeko joan den urrian LABek egin zion eskaerari.
  • Dozena bat linea baino gehiago itxiko dituela eta zenbait langile baztertuko dituela iragarri du.
  • D ereduaren hedapena kosta ahala kosta oztopatzen jarraitzen du, horrela euskararen normalizazioa galaraziz.
  • Ikastoletako eta ikastetxe itunduetako langileen beharrei erantzuteko hiruko mahaia deitu gabe jarraitzen du.
  • Estatutu berriaren proiektuan langile publikoentzat txertatu dituen neurriekin, bere departamentuko langileak urte askoan Nafarroako Gobernu osoko langilerik behartsuenak izatera kondenatu ditu.

Azken puntu horren harira, LABek gogorarazi nahi du hainbat batzar informatibo hasi dituela Nafarroako Administrazio Publikoetako Langileen Estatutu berriak, gaur egun idatzita dagoen bezala aplikatzen bada, izango dituen ondorioei buruz. Gainera, datorren maiatzaren 28an 4 orduko lanuztea egingo du sindikatuak, testu hori Parlamentura eraman ez dezaten eskatzeko, eta lanbide karrera beste lege batean garatu dadin, negoziazio erreal eta serioago baten bidez.

Hala, hezkuntza-komunitate osoaren haserrea inoizko mailarik gorenean dago. Hori ikusirik, LABek manifestu bat idatzi eta zabaldu du kontseilaria kargutik kentzeko eskatuz. Bada, bi hilabetetan bakarrik, hezkuntza arloan lan egiten duten 1.856 langilek baino gehiagok sinatu dute. Horrek LAB norabide zuzenean doala baieztatzen du, eta baita hezkuntza komunitatearen nahiz Nafarroako jendartearen zati handi baten sentimendua jasotzen jakin duela.

Gainera, bide beretik jarraitzeko indarra eman dio LABi. Alde batetik, atxikimenduak biltzen jarraitzen du, eta oraindik sinatu ez duenari horretarako gonbita luzatzen dio. Era berean, haserre orokortu hori mobilizazio masibo baten bidez islatu nahi du, eta datorren maiatzaren 16rako manifestazioa antolatu du, “Kalitatezko hezkuntzaren alde, Gimeno kanpora!” lelopean. Martxa 12:00etan abiatuko da Iruñeko Basotxotik eta Nafarroako Jauregian bukatuko da. Mobilizazio hori nafar jendarteak nahieran dabilen kontseilari harroputz eta autoritarioarekiko sentitzen duen haserrearen eta gogaitasunaren bozgorailu ahalik eta indartsuena izatea nahi du LABek. Ezin du Nafarroako hezkuntzaren arduradun nagusia izaten jarraitu!

Beraz, hezkuntza komunitate osoari, eta baita Nafarroako hezkuntzaren egoera eskasarekin kezkatuta dauden herritar guztiei ere, deia luzatzen die LABek maiatzaren 16an kaleak hartu eta “Gimeno kanpora!” oihuaz bete ditzaten.

Denon Bizitzak Erdigunean dinamikak zaintzaren inguruan antolatutako jardunaldietan parte hartzeko deia egiten du LABek

Zubiate(e)ko Aritz
-
0
Denon Bizitzak Erdigunean dinamikak zaintzaren inguruan antolatutako jardunaldietan parte hartzeko deia egiten du LABek

Aspalditik martxan duen zaintza sistema publiko eta komunitarioaren aldeko borroka ildoaren barruan, Denon Bizitzak Erdigunean dinamikak jardunaldi nazionalak egingo ditu datorren larunbatean, maiatzaren 10ean, Bilboko Unamuno institutuan. “Zaintza Sistema Publiko eta Komunitarioaren bidean, Euskal Herria eraldatzen” izenburupean, orain arteko bideaz eta aurrera begirako erronkez arituko dira bertan. Dinamikaren hurrengo inflexio puntua izango da, Herri Akordioan biltzen diren Euskal Herriko hainbat eragile eta norbanakok antolatutakoa. LABek jardunaldietan parte-hartzeko deia egin eta izen-ematearen garrantzia azpimarratu nahi du (lotura honetan duzue horretarako aukera).

Euskal Herriko Mugimendu Feministak urteak daramatza zaintza eta lan banaketa sexuala politizatzen eta agendan kokatzen. 2023an mugarri garrantzitsua jarri zuen: Greba Feminista Orokorra egin zuen. Ordura arte Mugimendu Feministak bere kabuz lantzen zuen lan ildoa, herritar orok eta herri gisa erantzun beharreko problematika bihurtu zuen, gaia kolektibizatuz eta sozializatuz, nahiz egungo zaintza erregimen sostengaezinaren irakurketa konpartitu bat eginez.

Inflexio puntua izan zen greba bera, baina, batez ere, greba horren antolakuntza prozesua. Zaintza eraldatzearen garrantzia, greba borroka tresna gisa birpentsatzea… eta beste hainbat ertz landu zituen Mugimendu Feministak. Bide horretan, Herri Akordioa deituriko aldarrikapen taula bat adostu zuen Euskal Herriko hainbat eragile sozial eta sindikalekin, eta hori izan da bere zoru komuna, baita zerumuga ere.

Argi izan ditu hasieratik zeintzuk izan diren bere eskakizunak, aldarrikapenak eta interpelazioak eta zeintzuk diren gaur egungo urgentziak. Greba Feminista Orokorraren ostean euskal gobernuak interpelatu zituen eta hauek entzungor egin zuten. Ez du aurrerapenik ikusi, are gehiago; zaintza lanak pribatizatzen eta enpresen mesedetan lan egiten jarraitu dute, zaintza negozio bihurtuz emakume*, eta batez ere, emakume* migratu eta arrazializatuen kontura. Horren aurrean, bere bidea jarraituko duela argi utzi nahi izan du.

Aliantzak josteko dinamika jarri zuen martxan, eta horretan aritu da gaur egunera arte; Euskal Herriko askotariko eragileekin elkartu da, zaintzaren problematika sozializatzeko eta bakoitzak bere eragin esparrutik, gaiari heltzeko intentzioz lan egiteko.

Etxeko eta zaintza langileak izan dira eta dira borroka honen ezinbesteko subjektu; 2023ko grebarako kontsentsu eta marra gorri inportanteak markatu zituzten, eta ozen aldarrikatu ziren greban haien lan baldintza duinak ere, atzerritartasun legea deuseztatzeko eskaerarekin batera. Sindikatuak ere aliatu ezinbestekoak izan dira azken bi urte eta erdian, eta negoziazio kolektiborako oinarriak aurkeztu zituen iazko martxoan. Euskalgintzatik, antirrazismotik, gazte eremutik, ekofeminismotik, transfeminismotik eta beste hamaika eremuetatik eragiten duten eragileekin aritu da lanean.

Argi dago aurrera urrats garrantzitsuak egin dituztela, eta horretan jarraitu nahi dute, badakitelako zaintza eraldatuz sistema bera eraldatzeko aukera dutela. Bide horretan, zehaztua dute hurrengo hitzordua: maiatzaren 10ean jardunaldi nazionalak egingo dituzte.

Bertan, orain arteko lorpenez, etorkizuneko erronkez eta aurrerapausoez arituko dira.

Hona hemen jardunaldien egitaraua:

9:30. Izen ematea

10:00. Testuinguruaren kokapena

11:00. Ongi Etorri Errefuxiatuak-ek antolaturiko errolda soziala babesteko giza katean parte hartuko dute.

12:30. Konpromisoen aurkezpena eta aurrera begirako erronkak

13:30. Agerraldia

14:00. Bazkaria

15:00-17:00. Konpromisoen ezaugarritzea eta itxiera

Euskal Zaintza Sistema Publiko eta Komunitariora bidean, garrantzitsua da norabidea marrazteko ardura herritar orok hartzea. Horregatik, jardunaldiak herritik, herriarekin eta herriarentzat antolatu dituzte, eragin esparru askotatik, zaintzaren borroka honetan eragile eta sektore bakoitzak konpromiso eta ardurak hartu behar baititu.

Zaintza eraldatzeko borrokaren parte izan diren eta diren eragile eta norbanako guztiok elkartzea nahi dute. Horregatik, maiatzaren 10eko jardunaldietara Euskal Herriko eragile sozial, politiko eta sindikalak daude gonbidatuak, Mugimendu Feministako talde eta kideak, zaintzaren sektorean lanean dabiltzanak, erabiltzaileak eta haien ingurukoak, eta, oro har, zaintza eraldatzeko bidean ekarpena egin nahi duten herritar guztiak.

“Euskal Zaintza Sistema Publiko eta Komunitariora bidean, jarrai dezagun elkarrekin zaintza sistema eraldatzen, sistema bera eta Euskal Herria eraldatzeko!”, adierazi dute.

LABek exijitu dio Toquerori, Tuterako alkateari, zentzua berreskuratzeko eta legez kontrako zentsuragatik dimititzeko

Zubiate(e)ko Aritz
-
0
LABek exijitu dio Toquerori, Tuterako alkateari, zentzua berreskuratzeko eta legez kontrako zentsuragatik dimititzeko

Sindikatuaren historia laburbiltzen duen 1974tik etorkizunera LAB zabaltzen erakusketak Tuterako La Rua gizarte etxean egon behar zuen ikusgai 2025eko urriaren 1etik 10era, baina Alejandro Toquero UPNko alkateak ixteko agindua eman zuen. Orain, Nafarroako Administrazio Auzitegiak onartu du LAB sindikatuak aurkeztutako helegitea, baimendutako erakusketaren aldi baterako etetea baliogabetuz, aplikatutako zentsura legez kanpokotzat joz.

LAB sindikatuak ulertzen du Alejandro Toquero jaunari sindikatu hau ez gustatzea, baita Toquerok eta bere alderdiak, UPNk, sindikatu honek Erriberan duen presentzia eta eragin gero eta handiagoa begi txarrez ikustea ere, baina etsaitasun horrek ez du justifikatzen adierazpen askatasunaren aurkako bere eraso obsesiboa, balore demokratikoen guztiz kontrakoa dena jarrera jauntxoen jarrera erakusten duena. Izan ere, Toquero Jaunak, Errege Eguna erabili zuen opari gisa, eta Trumpen erara, erakusketaren debekua eta LAB sindikatuari ezarritako zigorra iragartzeko.

Tuteratik eta Iruñetik, Langileen Nazioarteko Egunean, LAB sindikatuak erantzuna eman zion, Nafarroako Administrazio Auzitegiaren ebazpenaren berri emanez. Auzitegiak aintzat hartu du sindikatuaren gora jotzeko helegitea, eta baliogabetu egin du Toquerok agindutako erakusketaren aldi baterako etetea, esanez: «helegileari arrazoia ematen zaio, sindikatu helegileari posta elektroniko bidez jakinarazitako itxiera agindua egitatezko bidea baita, jarduketa erabat materiala eta babes juridikorik gabeko gisa ulertuta, argi eta garbi eskumenik ez zuen organo batek eman baitzuen eta erabaki hori babesten zuen administrazio-prozedurarik ez zen izapidetu, eta, beraz, erabat deuseza den jardun material baten aurrean gaude».

Gainera, Auzitegiak aipatzen du «ez dagoela arrazoi nahikorik erabakia hartzeko, proportzionaltasunaren, eraginkortasunaren eta kostu txikienaren printzipioak kontuan hartzen dituena»; eta aitortzen du Toquero jaunak «kalte konponezina eragin diola helegileari, une horretatik aurrera amaiera eman behar izan ziona erakusketari», eta, azkenik aipatzen du ere, «helegileari eragindako babesgabetasuna, zeinek Auzitegira jo besterik ezin izan zuen inpugnatzeko eta argudiatzeko bere interes legitimoen defentsan».

Toquero jaunaren legez kontrako zentsurak, Nafarroako Administrazio Auzitegiaren ebazpenak egiaztatu berri duen bezala, karguan jarraitzeko gaitasun eza nabarmena erakusten du. Bere ikuskizunaren bufoi bihurtuta, LABek zentzua berreskuratzeko eta dimisioa aurkezteko exijitu dio. Era berean, gogorarazi dio Tuterako biztanleek beren hirian ikusi ahal izango dutela LABen erakusketa.

Alejandro Toquero bezalako jauntxoek erakusten dute UPNren eskuak Nafarroako gidaritza instituzionaletik urrun egotearen garrantzia, nafar langileon bizitzei buruzko erabakiak hartzeko inolako aukerarik izan ez dezaten.

Saif Abukeshek eta Thiago Ávila aske. Global Sumud Flotillaren aurkako errepresiorik ez

Zubiate(e)ko Aritz
-
0
Saif Abukeshek eta Thiago Ávila aske. Global Sumud Flotillaren aurkako errepresiorik ez

Komunikatu hau sinatzen dugun sindikatuok Israelek nazioarteko uretan Global Sumud Flotillaren aurka egindako erasoak salatzen ditugu, zeinak oso larritzat jotzen ditugun, giza eskubideak eta nazioarteko legedia urratzen dituztelako. Era berean, Thiago Ávila aktibista brasildarraren eta jatorri palestinarra duen Saif Abukeshek kataluniarraren atxiloketa salatzen dugu.

Saif Abukeshek Intersindical Alternativa de Catalunya sindikatuko kidea da. Aktibista nahiz sindikalista, eta Israelek Palestinako herriaren aurka ezarritako genozidioa, okupazioa nahiz apartheida salatzen dituen ahots konprometitu eta etengabeenetako bat da. Halaber, Palestinako justiziaren aldeko Europako Sare Sindikaleko kide aktiboa da. Bestalde, Thiago Ávila Global Sumud Flotillaren aurpegi ezagunenetako bat da.

Lerro hauen bidez, Saif eta Thiago atxilotu nahiz Israelera eraman dituztela eta atxilotuta daudenetik tratu txarrak jasan dituztela salatzen dugu. Israelek egiten dituen salaketek kontrakoa dioten arren, ez dira kriminalak; aktibista solidarioak baino ez dira, apirilaren 12an, Gazara korridore humanitario bat irekitzeko eta Israelgo Estatuak ezarritako blokeo kriminala salatzeko helburuarekin, Bartzelonatik abiatu zirenak.

Aurre egin behar duten egoera kritikoa ikusita, eta Israelek haien aurka egindako salaketen larritasuna kontuan hartuta, komunikatua sinatzen dugun sindikatuok atxilotuen berehalako askatasuna eskatzen dugu, eta ahalik eta lasterren etxera itzultzeko eskubidea izan dezatela. Dagokien erakundeei eskatzen diegu Saif eta Thiago aske gera daitezen beraien eskuetan dagoen guztia egin dezatela.

Azkenik, komunikatua sinatzen dugun sindikatuok honako hau jakinarazi nahi diogu iritzi publikoari:

  • Saif Abukeshek eta Thiago Ávila berehala aska ditzatela, eta haien eskubideak eta osotasun fisikoa bermatu daitezela.
  • Global Sumud Flotillako aktibisten aurkako jazarpena amai dadila.
  • Gazaren gaineko blokeo kriminalaren amaiera.
  • Israelgo gerraren estrategiarekin edozein konplizitate amai dadila.
  • Kolonizazioaren eta okupazioaren behin-betiko amaiera eta Palestinak nazioartean aitortua izango den estatu bat izateko duen eskubidea bermatzea.

Sinatzaileak: LAB; CIG; CCOO; CGT; Confederación Intersindical; CNT; COS; CSI Asturies; CUT Aragón; CUT Galiza; ELA; ESK; Federación Sindical Canaria; FSOC; IAC; Intersindical, Alternativa SOC; Intersindical Canaria (Tenerife); Intersindical Catalana; Intersindical Valenciana; MTC Canarias; OSTA; SAT; Sindicato Gremios Unidos (Canarias); SOA; Solidaridad Obrera; STEI; STEILAS; UGT.

[ARGAZKI GALERIA]: Birbanaketa politikak eta langileen aldeko neurriak aldarrikatu ditugu Euskal Herri osoan egindako 26 manifestaziotan

Zubiate(e)ko Aritz
-
0
[ARGAZKI GALERIA]: Birbanaketa politikak eta langileen aldeko neurriak aldarrikatu ditugu Euskal Herri osoan egindako 26 manifestaziotan

Eskualdez eskualde mobilizatu gara Maiatzaren Lehenean, etxebizitza eskubidearen, kalitatezko zerbitzu publikoen eta soldata nahiz pentsio duinen aldarrikapenak ardatz hartuta.

Langileok eragin leloa izan da LABek aurtengo Langileen Nazioarteko Egunerako hautatu duena. Izan ere, gerrak eta ezengonkortasun ekonomikoak jotako nazioarteko testuinguruaren ondorioak langileon bizkar jarri nahi dituzten honetan, behar-beharrezkoa da bizitza duina izateko ezinbesteko neurriak bermatu, eta enplegua, zaintza lanak eta ondasuna banatzeko politikak abian jartzea.

Gauzak horrela, gaurko mobilizazioetan hiru aldarrikapen nagusi haizatu ditugu: zerbitzu publikoak indartzea (kalitatezko hezkuntza, osasun zerbitzua eta zaintza langileen eskura jartzeko); etxebizitza eskubidearen defentsa espekulazioaren kontra eta pentsio nahiz soldata duinak, bizitzaren garestitzeari aurre egiteko. Horrekin batera, langileak euskaraz lan egin eta bizitzeko eskubidearen alde mobilizatzera deitu ditu Donostiako manifestazioan parte hartu duen Garbiñe Aranburu LABeko koordinatzaile orokorrak, eta enpleguaren defentsan borrokan diren langileak ere gogoan izan ditu.

Gerra inperialisten eta kapitalisten aurkako mezu argia utzi nahi izan dugu aurtengoan. Oligopolioek “eskandaluzko irabaziak” dituztela adierazi du Aranburuk: “Iberdrolak 2025ean inoizko irabazirik handienak izan ditu; Repsolen irabaziak %154 igo dira aurtengo lehen hiruhilekoan, eta bitartean, bizitza garestitzen eta langileok pobretzen ari gara; ez dugu gerraren aitzakian enplegu-galerarik onartuko, ez lan-baldintzak okertzerik; ez zerbitzu publikoak ahultzerik”.

Hain zuzen ere, bizimodu duin baterako 1.500 eurok gutxieneko soldata propioa aldarrikatu, eta gogor kritikatu du Aranburuk Pradalesen gobernua, martxoko greba orokorrari emaniko erantzunagatik: “Elkarrizketa sozialeko mahaian iragarritako akordioak agerian uzten ditu Pradalesek dituen hipotekak termino sozialetan Confebaskekin, eta termino nazionaletan PSErekin”. Lehendakariari egotzi dio “Confebask zuritzea; sindikalismo otzana hauspotzea eta klase-sindikalismo soberanista zigortzea”.

Langileen aldeko neurriak hartzea faxismoari eta oldarraldi erreakzionarioari ateak ixteko modua da, eta arrakala matxista, arrazista eta belaunaldi arrakalei aurre egitekoa.

Ildo beretik, Euskal Herrikoak ez ezik, munduko langileak ere gogoan izan ditugu; hala, Kubak pairatzen duen blokeoa arbuiatu dugu, saharar herriaren autodeterminazioa eskatu, eta, nola ez, apartheidaren eta genozidioaren krudelkeriaren aurrean Palestinari elkartasuna erakutsi diogu beste behin ere, Israelgo estatu kriminalak Flotillaren kontra egingiko erasoa salatu dugularik. Injerentzien aurka herrien burujabetza eta herritarren ongizatea defendatzen ditugu LABen.

Sindikalismo borrokalari, independentista, feminista eta antirrazista jorratzen segitzeko konpromisoa berresteko eguna izan da. Azken horri dagokionez, koordinatzaile orokorrak iragarri du LAB inplikatu egingo dela langile migranteen erregularizazio prozesuetan, bere ekarpena eginez.

Euskal langileei antolakuntza eta borrokarako deia ere egin diegu gaurkoan, euskal sindikalismo eraldatzailea sustatzen jarraitzeko konpromisoa berrestearekin batera.

Garbiñe Aranburu: “Inor atzean ez uztea da faxismoaren eta oldarraldi atzerakoiaren aurrean eman dezakegun erantzunik hoberena”

Zubiate(e)ko Aritz
-
0
Garbiñe Aranburu: “Inor atzean ez uztea da faxismoaren eta oldarraldi atzerakoiaren aurrean eman dezakegun erantzunik hoberena”

Gaur, Maiatzaren Lehena, LABek hainbat mobilizazio egin ditu Euskal Herri osoan zehar. Garbiñe Aranburu koordinatzaile orokorra Donostian izan da, eta jarraian irakur daiteke amaierako ekitaldian egin duen hitzartzea:

“Gora Maiatzaren Lehena!

Langileok eragin da aurtengo leloa. Eragiten ari gara. Gaur berriro Euskal Herri osoan kalean gara, eskualdez eskualde. Aipamen berezia Ipar Euskal Herriko gure kideei. Urteetako lan nekaezinak emaitzak eman ditu, eta intersindikaleko sindikatuekin batera Baionan eta Maulen ere mobilizatu gara.

Eragiten ari gara; soldatak hobetu eta gutxieneko soldata propioaren aldeko Greba Orokorra egin dugu, euskararen alde aktibatu gara, gerra inperialisten aurka hor gaude. Hor dago LAB, bizitza duinaren defentsan jo ta su, nekerik gabe. Jo ta ke irabazi arte!

Beste urte batez, ezin aipatu gabe utzi preso, iheslari eta deportatuak. Trabak gainditu, salbuespen neurriekin amaitu beharra dago. Guzti-guztiak etxean nahi zaituztegu!

Maiatzaren lehenean, munduko herri langileei begiratzen diegu. Elkartasuna da herrien arteko xamurtasuna. Horregatik:

-Gaur Kuban dago LAB, blokeo kriminalari ezetz esateko! Kubara, milaka kilo elkartasun eraman dugu. 6 tonatik gora osasun material, bizitzari eusteko.

-Gaur Sahararekin gaude! Saharako herriaren autodeterminazio eskubideari bai esateko!

-Eta, noski, gaur Palestinatik inoiz baino gertuago gaude. Joan den urrian Euskal Herria geratu egin genuen! Elkartasun Flotillan doa LAB; estatu kriminalaren erasoen gainetik, lurrez, airez eta itsasoz, bide guztietatik, genozidioa geldiarazi behar dugu.

Injerentziaren aurrean, guk herrien burujabetza eta herritarren ongizatea defendatuko ditugu beti. Euskal langileriak argi eta garbi esaten du: gerra inperialistatik ez! Gora herriak eta gora munduko langileria!

Langileok ez dugu gerraren faktura ordainduko: ez dugu gerraren aitzakian enplegu-galerarik onartuko; ez lan baldintzak okertzea; ez bizitza garestitzea; ez zerbitzu publikoak ahultzea.

Munduan energia iturrien kontrola gerrak eragiten ari da, langileok pobretzen ari da eta oligopolio energetikoa eskandaluzko irabaziak eskuratzen. Aste honetan bertan Iberdrolak 2025ean irabazi errekorrak izan dituela argitaratu du. Hirdokarburoen garestitzea langileok nozitzen dugu. Repsolen irabaziak %154 igo dira aurtengo lehen hiru hilabeteetan. Lotsagabe batzuk dira. Bada garaia kapital handien poltsikoetan eskua sartzeko. Aberastasuna eta boterea gutxi batzuen eskuetan kontzentratzea ez dugu onartzen, eta ez dugu onartuko!

Euskal Herriak ezetz esan zion NATOri, eta berriz altxa dugu ahotsa gerrari ezetz esateko. Europako Batasunaren noraezari ez. Proiektu sozialik gabeko Europa, Trumpen burutazioen mende dagoena. Konponbidea ez da berrarmatzea, ezta ekonomiaren militarizazioa ere; ezta hemen, Euskal Herrian, ere.

Beste industria politika bat eskatzen dugu, parte hartze soziala industriaren trantsizio ekosozialari ekiteko. Genozidioarekin negozioa egiteari ez, gerrekin negozioa egiteari ez. Ez gure izenean.

Langileen aldeko politikak behar ditugu. Enplegua, zaintza lanak eta ondasuna banatzeko politikak.

Zerbitzu publikoak sendotu behar dira, hezkuntza, osasuna eta zaintza eskubidea bermatzeko. Zaintza eraldatzea eskatzeko Greba Feminista Orokorrean parte hartze aktiboa izan genuen. Helburu horretan mugimendu feministarekin eskuz esku lanean jarraitzen dugu.

Euskararen kontrako oldarraldiak tamainako erantzuna behar du. Euskaraz lan egiteko eta bizitzeko eskubidea dugulako, ofizialtasuna eta bermeak behar ditugulako. Langile euskaltzale guzti-guztiok kalera aterako gara maiatzaren 9an. Gure hizkuntzaren defentsan ez da motzean dugun hitzordu bakarra; ekainaren 13an, Iruñean, euskaltzaleon martxa. Badugu plana!

Euskara bezala, etxebizitza eskubidea ere oso garesti jarri jarri digute. Etxebizitzaren gaineko espekulazioarekin amaitu beharra dago. Sindikalismoak langileen bizi baldintzen kontrako eraso oro borrokatu behar du. Eta lehen aldiz maizterren greba antolatu dugu. Bizitza duinaren alde, aitzindariak gara berriro ere, eta harro gaude!

Enpleguaren defentsan irmo ari gara hainbat tokitan; ezin ditugu hemen guztiak aipatu. Baina gaur begirada Aiaraldean dugu; eskualde osoa borrokan, a ze duintasuna. Jaso dezatela gure babesa eta txalo bero bat.

Ezin aipatu gabe utzi beste bi adibide eredugarri: bata, martxoaren 17ko greba orokorra, aberastasuna banatu, soldatak hobetu eta gutxieneko soldata hemen erabakitzearen alde; bigarrena, pentsiodunen borroka nekaezina, pentsio duinen alde. Soldatak eta pentsioak hobetzea ezinbestekoa da bizitzaren garestitzeari aurre egiteko.

Langile guztiei bizitza duina ziurtatzeko aldarrikapenak dira. Guk ez dugu inor bazterrean utziko. Horixe da faxismoaren eta oldarraldi atzerakoiaren aurrean eman dezakegun erantzunik hoberena. Lanean ari gara arrakala matxista, arrazista, eta belaunaldi arrakalak borrokatzeko, eta ez egin zalantzarik. Berandu baino lehen lortuko dugu!

Lortuko dugu, eta lortzen ari gara. LABek ere bultzatu duen erregularizazio masiboari bide eman dion dekretua garaipen soziala da. Mugimendu migratu antolatuak lortu du justizia sozialekoa den urratsa. Erregularizazio prozesuak errazteko, laguntzeko eta inplikatzeko prest gaude; sindikatua busti egingo da. Baita arrazismo laboralen kontra ere. Patronalari eta gobernuei esaten diegu ez dugula onartuko langile migratuak erabili eta bota daitekeen esku lan merkea izaterik.

Negoziazio kolektiboan ere lortzen ari gara. Grebaren emaitzak hasi dira loratzen. Patronalaren borondatearen kontra, baina negoziazio kolektiboan nabari da grebaren indarra. Urteetan blokeatua egon ondoren, 1500€-ko gutxieneko soldata bermatu eta beste hainbat hobekuntza jasotzen dituen hitzarmena Bizkaiko Grafikagintzan. Edo estatalizatua zegoen kolektibitateetan lehen lan hitzarmena.

Greba Orokorraz hitz egin, eta azpimarratzekoa gazteek greban izan duten inplikazioa. Herri honetako gazteria ez da indibidualista, ez da politizatu gabea, ez pasiboa.

Greban, Korrikan, Topagunean….. Gazteria bizirik eta martxan dago. Segi hortzak erakusten bizitza osorako prekaritatera kondenatu nahi zaituztetenei, eta gogoan izan: hemen gaituzue, bidelagun gaituzue. Euskal gazteria aurrera!

Gutxieneko soldata propioa neurri beharrezkoa, bidezkoa eta bideragarria da. Patronalak eta gobernuek gure proposamenak mespretxatu dituzte, baina borrokak aurrera jarraitzen du. Grebaren indar erakustaldiak bizirik mantentzen du aldarrikapen hori. Indar eta zilegitasun handiagoa eman digu.

Ez da erraza izango. Grebari emandako erantzuna gaizki deitutako Elkarrizketa Sozialaren Mahaian akordio berri bat aurkeztea izan da. Lan eta soldata baldintzak hobetzeko aurrerapausorik gabeko akordioa eta autogobernua zabaltzeko anbiziorik gabekoa.

Akordio hori ezin da ulertu Pradalesen gobernuak dituen hipotekak kontuan hartu gabe; Confebaskekin, maila sozialean, eta PSErekin, maila nazionalean.

Jada inork gutxik sinesten du Pradalesen egiteko modu berrietan. Akordioak Jaurlaritzaren izaera autoritario eta antidemokratikoan sakontzen du. eta hiru helburu nagusi ditu:

-Confebask zuritzea . Negoziazioari uko egiten dion patronala presionatu egin behar da, babes politiko eta ekonomikoa kendu egin behar zaio.

-Sindikalismo otzana hauspotzea. Lau sosen truke erosi dituzte!

-Klase-sindikalismo subiranista zigortzea. Patronalaren aliatu izatetik patronalaren menpeko izatera pasa den gobernuak ez du langileen aldeko politikak egiteko anbiziorik; ez du euskal esparrua eratzeko eskumenak zabaltzeko anbiziorik. Eta gu oztopo bilakatu gara; isilarazi egin nahi gaituzte.

Entzun gaitzatela. Ez dute lortuko! Jai dute. Ez gaituzte kikilduko. Gure apustuan berresten gara. Borroka da bide bakarra.

Sindikalismo borrokalari, independentista, feminista eta antirrazista garatzen jarraituko dugu. Langileen errealitateari hobekien erantzuten dion sindikatua gara. LAB zabaltzen jarrai dezagun; zenbat eta indar gehiago, orduan eta aukera handiagoak sindikalismo eraldatzailea aldarrikatu ez ezik, praktikara eramateko.

Aldarrikapen eta borroka eguna da gaurkoa. Baina izan dezala gozamenetik ere. Bihartik aurrera berriro borrokan elkar rekin topo egingo dugu.

Gora langileon borroka! Gora Euskal Herria askatuta!”

1...131415...1,627Page 14 of 1,627

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus