Gaur kontzentrazioa egin dugu Bilbon, Zabalburuko Carrefour Marketeko saltokiaren atarian, Koldo Fernandezi babesa emateko eta bere lanpostua berronartzea eskatzeko.
Koldok jazarpena jasan du bere lantokian, zuzendaritzak jazarri du. Urte askotan zehar jasan du jazarpena. Arrazoia, antolatu eta langileen eskubideen alde borrokatzea, enpresa batzuk nahi ez dutena eta bide guztietatik eragotzi nahi dutena. Berdin die horretarako gezurretan ibili eta manipulatzen ibiltzeak.
Lehenik eta behin Koldok hitz egin du eta ondoren, Xabier Ugartemendiak, LAB sindikatuko Zerbitzu Pribatuen Federazioaren arduradunak.
KOLDO FERNÁNDEZen adierazpenak
Koldo Fernandez naiz. 55 urte ditut. 37 daramatzat Carrefourren lanean, azken 28ak nire lankideen ordezkari bezala LAB sindikatuaren eskutik. Urte guzti hauetan, gure eskubideen eta langile guztientzako lan-baldintza duinen alde egin dut borrokan nire lankideekin batera.
Abuztuaren 1an espedientea zabaldu zidaten bezero bati erosketa ez kobratzearren. Hori ez zen horrela izan. Astebete beranduago, enplegu-suspentsioa luzatu zidaten eta abuztuaren 27an, kaleratze gutuna eman zidaten. Urte luzez jazarri naute eta zoritxarrez, zigortu nindutenean sortu zitzaizkigun susmoak egia bitarte dira. Paretik kendu nahi ninduten eta kaleratuz egin dute. Horretarako gezurrak eta akusazio faltsuak erabili dituzte.
Carrefourren iritziz, soberan dauden sindikatuak eta euren langileen eskubideak. Langile otzan eta esanekoak nahi dituzte, euren aginduak beteko dituztenak. Gertatzen dena da gu ez gaudela horretarako prest. Eskubideak ditugu, duintasuna daukagu eta buru-belarri saiatuko gara hauen defentsan. Horregatik hasi ginen egunero mobilizazioak egiten zigorraren berri izan genuenean. Berton egin genituen kontzentrazioak, Zabalburuko dendan, Atxurikoan eta Sestaokoan. Eta berronartzea lortu arte jarraituko dugu mobilizatzen. Justizia kontua da. Bat ukitzen badute, guztiok ikutuko gaituzte. Konbentzituta gaude langileon batasun, antolaketa eta borroka dela bide bakarra errespeta gaitzaten eta gure lan-eskubideak berma daitezen.
XABIER UGARTEMENDIAren adierazpenak
Askatasun sindikalari eta langile guztioi egindako erasoa da hau. Alde batetik, Carrefour Marketeko langileen kontra, enpresako erreferente bat galtzen baitute. Berarekin arazoak partekatu eta eskubideen alde borrokatzen ziren. Lankide guztien eskubideen alde. Bestalde, Carrefour Marketeko langileen kontrako erasoa ere bada, hauek ere herri honetako langileak baitira.
Sindikatuan argi dugu ez dugula askatasun sindikalaren aurkako erasorik onartuko. Herri honetako langileok eskubidea dugu antolatu eta etorkizun hobe baten alde borrokatzeko, eskrupulorik ez duten enpresari batzuei gustatu ez arren eta antolatu eta eskubideen alde borrokatzen diren langileak paretik kentzeko gogoa duten arren.
Gaur hemen gaude, Koldoren berronartzea exijitu eta jazarpen sindikaleko kasu berri bat salatuz. Eta horrela egingo dugu gure eskubideak zapaltzen diren bitartean. Bat ukitzen badute, guztiok ukitzen gaituzte.
Bihar kontzentrazioa egingo dugu 12:00etan Sestaoko Carrefourren, Ibarzaharra poligonoan.
