Lakuako Hezkuntza Sailak kanpaina abiarazi du, eskoletako jantokiak tokian tokiko gaiez hornitzeko aukera emanez. LABek, ekimen hau propaganda kanpaina bati estuki lotzen zaiola salatu nahi du, Cristina Uriartek zuzentzen duen Hezkuntza Sailaren irudia garbitu nahi duena. Gogora dezagun Lehiaren Agintaritzak 18 milioitako isuna jarri zuela catering enpresek egindako iruzurrarengatik, diru publikoz ordaindu beharko ditugun 18 milioi euro. LABen ustez ez dago inolako asmorik egungo eredua aldatzeko, eta behin arazoa lasaituta, 2000. urteko jantokietako agindu baliogabetura itzuliko dira.
Propaganda kanpaina honi 2016ko otsailean ekin zioten. Orduan iragarri zuten Markinako jantokia bertoko produktuekin hasiko zela lanean. Horrela, berria ez den senideen aldarrikapenari eutsi zioten. Hala ere, egintza hau eredu aldaketatzat agertzen du Sailak.
Eskema berari eutsi zaio Gernikako Allende Salazar ikastetxeko esperientzia pilotuari ekitean. Hau ere hedabideetan agertu zen.
LABek, propagandatzat jotzen duen kanpaina hori salatzen du, esperientzia pilotuak Gasteizko Legebiltzarrean onartu zirelako 2014ko ekainean, duela bi urte hain zuzen. Haren bidez agintzen zitzaion Eusko Jaurlaritzari 2014/2015 ikasturterako gauzatu behar zela. Agindua ez zuten bete ordea, eta erakunde hauen agendatik desagertu zen. Senideei eragotzi egin zitzaien beren eredua aukeratu ahal izatea, eskola askotatik eskatzen zena.
2016ko otsailean catering enpresetako ekonomia-iruzurraren eskandalua ezagutarazi zen; 18 milioi eurotako isuna eragin diguna, guztion artean ordaindu beharko duguna.
Gauzak honela, Lakuak bere propaganda makina abiarazi du, Markinak, Aste Santua ostean, bertoko produktuekin, lan egin ahal izango duela adieraziz.
Salatu diren lau eskola-pilotuetatik, oraingoz, bik bakarrik daukate aukera hori eskuragarri: Markina eta Allende Salazar. Markinan 265 bazkaltiar daude eta Hezkuntza Saileko 3 langilek dihardute sukaldean lan-kontratudun gisa.Gernikan bazkaltiarrak 597 dira, eta plantillan 7 pertsona dituzte, denak Sailaren lan-kontratudunak ere.
Aipatu bi eskoletan, nahiz datorren ikasturterako proposatzen denean (Laukariz, zeinak 165 bazkaltiar dituen eta sailaren bi lan-kontratudun dituen) sukaldeak dauzkate bertan. Horrek adierazten digu sukaldea ezinbestekoa gertatzen dela bertako produktuak prestatzeko eta egokiro maneiatzeko. Hau guztia LABek behin eta berriz aldarrikatu du, eta Hezkuntza Saila berak, gaur egun berresten badu ere, erabili duen politika bera ezeztatzen du, ikastetxeetan zeuden sukaldeak ezabatu baititu eta garraio bidez banatutako janaria sartu.
Bestalde, gure ustez, neurri honi dauden 502 jantokietatik 4tan soilik ekiteak, izatekotan, adierazten digu neurri eznahiko batez ari garela, nahaste-maniobra huts batez ari garela berresten diguna.
Hala ez bada, geure buruei galdetu beharko genieke zer gertatu zen 2000. urtean jantokien agindua onartu ez zuten eskolekin, haren aurka azaldu baitziren bertako produktuak ezarri nahi zituztela adieraziz (Larrabetzu eta Altzaga Erandio)? Ez zizkieten baina diru-laguntzak kendu, hartu zuten erabakiarengatik, horrek eskolen arteko diskriminazioa eragiten zuela argudiatuta? Ez al zioten baina, ikasleei aukera berdintasuna bera ukatuz, lan baldintzetan bereizkeria eragiten zela esan?
Gainontzeko eskolek 4 eskola hauen tratamendu bera jasoko dute? LABen ustez hala izan beharko luke. Familia eta eskola guztiak berdin hartu beharko lirateke, bazterkeria egoerak saihestuz.
Bestela, pentsatu beharko dugu eredu baten aurka egin den maniobra politiko hutsaz ari garela, aitzakia ekonomikoetan oinarritzen den erabaki batez mozorrotua.
