Berriz ere, Osakidetzaren EPE prozesuaren amaigabeko irregulartasunen aurrean gaude, EPE bat, bide batez esan behar da, denboran luzatzen dena 2011n egiten zuten izangaien desesperaziorako.

Administrari laguntzaile kategoriako formakuntza neurtzeko irizpideak aldatu zirela jakin genuenean, Osakidetzako Zuzendaritzari azalpenak eskatu genizkion. Jaso genuen erantzunak pilota Epaimahaiaren (PSE-ren gobernuak izendatu zuena eta ordezkari sindikalik ez daukana) teilatuan uzten du eta ez digu ezer argitzen. Presioei eta gai publiko egiteari esker, Epaimahaiak prentsan ohar bat argitaratzera behartuta ikusi du bere burua, esateko dena legearen arabera egin dela, erreklamazioen gaineko erabakiek modu logiko batean aldatu dituztela zerrendak, eta izangaien espedienteen “azterketa zehatza” egitea erabaki dutela. Zoritzarrez, diru publikoarekin ordaindutako oharrak ez dio mamiari heltzen.

Oso normala da behin-behineko eta behin betiko zerrenden artean aldaketak izatea, baina inongo erreklamaziorik egin ez zuten dozenaka izangaiek formakuntzako 10 puntu galtzea ez da hain arrunta. Gorako helegiteen erantzunaren zain egon gabe, Epaimahaiak berak eta Osakidetzak zehatz-mehatz zein diren aldaturiko irizpideak esatea premiazkotzat jotzen dugu.

Dena legala bada, ez du zertan arazorik izan irizpide horien berri publikoki emateko. Bestela, administrazioak ez duela garden jokatzen pentsatzen jarraitzeko arrazoi gehiago baino dizkigute emango. Zoritzarrez, adibideak ez dira falta. Osakidetzan bertan, oraindik ez dugu ahaztu 1990ko EPEko putxerazoa.

Gauzak horrela, LABek gardentasuna aldarrikatzen jarraituko du, hala nola zerbitzu publikoen eredu berria Euskal Herrian, euskalduna, eraginkorra eta pertsonen eskubideen defentsa lehenesten duena.