2024-03-19
HomeEkintza SindikalaLegasako Arcelor Mittalen gertaturiko istripua saihets zitekeen

Legasako Arcelor Mittalen gertaturiko istripua saihets zitekeen

Iragan ostiralean Legasako Arcelor Mittalen gertatu zen lan istripuaren harira, ezer baino lehen, LAB sindikatuak bere elkartasun eta babes osoa adierazi nahi die istripua izan zuen langileari eta haren gertukoei, eta behar duten guztian laguntzeko prest dagoela ere adierazi nahi die.

Istripu larria izan zuen langileak, eskuan kalte larriak eragin dizkiona. Baina LABen ustez halakorik ez zen gertatu behar. Lan-erritmo altuek, prestakuntzan dauden gabeziek edo langilearen behin-behinekotasun egoerak eragin negatiboa dute, eta joan den ostiralekoa bezalako lan istripuak eragiten dituzte.

LABek istripuaren ikerketa zorrotza eskatzen du, eta multinazionalari kontratazio berriei prestakuntza hobea emateko eta lan-erritmo altuak bertan behera uzteko eskatzen dio, horretarako beharrezkoak diren baliabide pertsonal eta materialak jarriz. Izan ere, Legasako faktorian lan-karga handia duten arren, langile gutxi daude, multinazionalak urteetan enplegua ikaragarri suntsitu baitu.

Azkenik, LABek deitoratu behar du ezin izan zaiola lan-istripu larri honi behar bezalako erantzunik eman, gainerako sindikatuen ezezkoagatik. Nolanahi ere, LABek langileen laneko segurtasuna eta osasuna defendatzen jarraituko du, etekin ekonomikoaren gainetik.

AZKEN ALBISTEAK | ÚLTIMAS NOTICIAS

Azkoitiko lan-zentroko ABEEEa bertan behera uzteko eskatu diogu Sidenorreko zuzendaritzari

Pasa den martxoaren 8an jakinarazi zigun Sidenor enpresako zuzendaritzak Azkoitiko eta Reinosako lan-zentroetan produkzio eta organizazio arrazoiengatiko Aldi Baterako Enplegu Erregulazio Espediente (ABEEE) bat martxan jartzeko asmoa zuela. Martxoaren 14an izan genuen negoziazio batzordea sortzeko eta dokumentazioa jasotzeko bilera.
00:02:19

Ezkerraldeko eta Meatzaldeko langileentzat lan eta bizi baldintza duinak aldarrikatu ditu LABek

Gaur, LABek deituta, ehunka lagunek Sestaoko kaleak hartuko dituzte, Ezkerraldeko eta Meatzaldeko langileentzat etorkizun duina aldarrikatzeko. Langileon lan eta bizi baldintzak borrokatzeko. Izan ere, bada denbora bat EAJk eta PSOEk Ezkerraldea zein Meatzaldea desindustrializatzeko estrategia martxan jarri zutela: ehun industriala suntsitu eta, trukean, zerbitzuen sektorea ezarri, logistikaren eta biltegiratzearen mesedetan.

Aliantzen, aktibazioaren eta borrokaren garaia da Bizkaiko grafikagintza sektorean

Bizkaiko grafikagintzako hitzarmenaren negoziazio mahaia lehen aldiz bildu zenetik hamar hilabete igaro dira. Maiatzaren 23tik hona 10 bilera egin ditugu, azkena atzo, martxoaren 14an, eta ezin dugu esan akordioa orduan baino gertuago dagoenik.