Igorren kokatuta dagoen Ormazabal-Velatia taldeko Tecnichapako langileek Velatiako zuzendaritza Hitzarmen Kolektiboa adostera behartzea lortu dute.

Urriaren 20an Tecnichapako Langile Batzordeak (LABekoak dira 8 ordezkariak) greba mugagabea deitu zuen enpresak ez zituelako langileen aldarrikapenak negoziatu nahi. 160 langilek egiten dute lan bertan.

Langileek aurkeztu zuten plataformako edukiak negoziatu beharrean, Covidak eragindako egoeraz baliatu eta Taldeko beste enpresa batean lortutako akordioa inposatu nahi izan zuen: langileentzako eskubide galerak zekartzan akordio horrek, malgutasuna areagotzen zuelako eta aparteko orduak egonkortzen zituelako.

Langileek xantaiari aurre egin eta greba egiteko erabakiak Velatiako zuzendaritza mugiarazi du, eta akordioa ekarri. Zehazki, greba mugagabea hasi behar zen egunean (26 gauean) akordioa lortu genuen.

Akordioak langileen aldarrikapenak jasotzen ditu soldata igoerari dagokionean, eta enpresak inoiz onartu ez duen kategoriak ezartzeko garaian irizpide objektiboak ezarri dira, betidanik Tecnichapako langileek eskatu izan duten zerbait. Enpresaren proposamenak greba bertan behera uztea ekarri du, baina argi utzi eta gero etorkizunean ez dugula inposaketarik ez eta negoziaketa gaien inguruko betorik onartuko.

LABek Tecnichapako langile guztiak zoriondu nahi ditu pandemia giroan beste hainbat enpresek egin bezala Velatiak irabaziak handitzeko sortu nahi izan duen beldurrari aurre egin diotelako.

LABek akordioa ona dela baloratzen du. Proposatzen ziren murrizketak desagertzen direlako eta enpresaren jarrera aldatu arazi delako. LABentzat Tecnichapako langileen borrokak frogatzen du “shock” egoera baliatuz patronalak hedatu nahi duen beldurraren aurrean borrokatzeak merezi duela eta lan baldintzak hobetzeko aukera badagoela.