Biztanleria Aktiboaren Inkestaren arabera, aurtengo hirugarren hiruhilekoan 28.800 pertsona gehiago zeuden lanean Hego Euskal Herrian, gehienak emakumeak. Bilakaera horrek konfinamendua amaitu ondoren sortutako errebote-efektua eta aurreko hiruhilekoan enpleguak jasandako kolpe gogorra jasotzen ditu, geldialdi ekonomikoak 43.200 lanpostu suntsitzea eragin baitzuen.
Beraz, uztailetik irailera bitartean, aurreko hiru hilabeteetan galdutako enpleguaren bi heren berreskuratu dira. Hala ere, oraindik duela urtebete baino 20.500 pertsona gutxiago daude lanean (-%1,7).
Egungo krisiaren lan-ondorioak gehien pairatzen dituen jendarte-sektorea gazteria da zalantzarik gabe. Azken urtean, gazteen enpleguaren %20 baino gehiago suntsitu da, eta langabezia-tasa %39tik gora igo da.
Bestalde, kontuan izan behar dugu Biztanleria Aktiboaren Inkestak mugak dituela hilabete hauetan lan- merkatuan gertatzen ari den guztia jasotzeko; izan ere, inkestaren metodologiak okupatutzat jotzen ditu enplegu-etenaldiaren eraginpean dauden pertsonak, Enplegua Aldi Baterako Erregulatzeko Txosten (EABET) baten bidez.
Zehazki, Hego Euskal Herrian 44.280 pertsona egon dira, batez beste, aldi baterako lan-erregulazioko espediente baten eraginpean urteko hirugarren hiruhilekoan. Hala ere, irailaren amaierarako 30.480 pertsonatik behera zegoen kopuru hori.
AEBETen erabilera masiboak lehen boladan izandako kaleratze kopuruari eustea ahalbidetu du; baina horrek ez du eragozten Covid-19k lan-jardueran izan duen eragina inkestako datuen arabera ondoriozta zitekeena baino handiagoa izan dela baieztatzea.
Izan ere, lanaldi osoko lanpostu baliokideetan neurtutako enpleguak %6,5eko urte arteko beherakada izan du EAEn. Datu horrek pandemiak enpleguan dituen ondorioen inguruko ideia bat ematen digu, gutxienez benetan lan egindako orduen ikuspegitik. Nastat-ek oraindik ez du Nafarroa Garaiari buruzko informaziorik aurreratu.
Nolanahi ere, komeni da ohartzea oraindik ere erresistentzia-fasean gaudela birusaren aurrean; beraz, orain lehentasuna da birusaren hedapena saihestea, bizitzak salbatzea eta ekoizpen-sarea gehiago suntsitzea eragoztea.
Testuinguru korapilatsu horretan garatu behar dugu gure lan sindikala, beste hiru epidemiaren aurrean, horiek ere larriagotzen baitira: langabezia, prekarietatea eta soldata-murrizketak.