LAB sindikatuak beste behin planto egingo dio Espainiak Amerikako lurraldeak usurpatu izana gogoratu eta ospatzen duen egunari. Urriaren 12an ez dugu ezer ospatzeko eta asko aldarrikatzeko. Honela, sindikatuko kideok lanean eta Euskal Estatu demokratiko eta sozial baten aldeko mobilizazioetan izan gara gaurkoan.
Bizi dugun egoera honetan, subirautza ekonomiko eta politikoa premiazkoa dugu. Gure herria ukatzen duen jai-egutegiaren aurrean eta gure herriari desberdintasunak eta sufrimendua ekartzen dizkioten politika antisozialen aurrean, planto egin eta burujabetza eskatzea tokatzen zaigu.
Ez dugu onartzen espainiar Estatuak inposatutako egutegia, eta urriak 12a lan eta borroka eguna izan da LABentzat. Hala, gaur, urriak 12, Sestaon izan gara Euskal Estatu demokratiko eta sozialaren alde Independentistak sareak deitutako mobilizazioan eta Sortu eta Ernairekin batera Burujabetza aldarrikatuz Gasteizen egin dugun elkarretaratzean.
