"Prekarietateari ateak itxi!". Horixe da Ernaik, larunbaterako, Bilbon, antolatu duen manifestazioaren leloa. LABek bat egin du deialdiarekin, eta gazte erakundeko bozeramaile Asier Zamoranorekin hitz egin dugu mobilizazioaren arrazoiak bertatik bertara ezagutzeko.
Otsailak 16an, 17.30ean, patronalaren sinbolo den Iberdrola dorre paretik abiatuko da Ernai gazte antolakundeak deitutako mobilizazio nazionala, "Prekarietateari ateak itxi!" leloarekin. Ernaiko bozeramaile Asier Zamoranorekin hitz egin dugu mobilizazioaren nondik norakoak ezagutzeko.
-Prekarietatea gero eta hedatuagoa dago lan munduan, baita eguneroko bizitzan ere. Nola bizi dute gazteek egoera hori? Zer nolako ondorioak ditu?
Betidanik lotu izan dugu prekarietatea lan munduko baldintzekin, baina azken urteetako bilakaerak egoera hori zeharo aldatu du. Azken hamarkadako krisiak prekarietatea bizitzako beste esparruetara hedatu du, eta lan baldintza kaxkarretatik harago, ezegonkortasuna eta heldulekurik gabe geratzea ekarri du gure bizitzetara. Azken finean, emantzipatu eta bizi-proiektu duina garatzeko ezintasunaren inguruan hitz egiten ari gara.
-Zein da prekarietatearekin amaitzeko bidea? Nola itxi ahal zaio atea prekarietateari?
Alde batetik, gure bizitzetan prekarietatea inposatu eta kronifikatu nahi dutenen ardura mahai gainean jartzea ezinbestekoa da. Patronala, azpikontratak, higiezin agentziak… Horiek guztiek erantzukizun zuzena dute gazteon egungo egoera prekarioagatik, eta euren papera eta jarduna salatu behar dugu. Baina horrekin batera, prekarietatearen aurkako neurri eta proposamen eraginkorrak planteatu eta borrokatzea ezinbestekoa izango da. Azken aste eta hilabeteetan borroka eredugarriak ikusi ditugu gure herrian: Huerta de Peralta, La Navaleko langileak, pentsionisten mobilizazioak… Horiek guztiek erakusten dute borrokak eta mobilizatzeak merezi duela eta posiblea dela egoerari buelta ematea.
-Bilboko Iberdrolaren dorretik abiatuko da larunbateko manifestazioa. Zergatik aukeratu duzue gune hori?
Iberdrola sistema esplotatzaile eta bidegabe oso baten sinbolo argia da, kapitalaren irudia. Boterearen eta eliteen eredua erakusten duena. Duela gutxi jakin izan dugu, gainera, munduko 26 pertsona aberatsenek aberastasun osoaren erdia metatzen dutela.
-Prekarietatearen aurkako borrokak kolektiboa izan behar duela defendatzen duzue. Bide horretan, zein urrats egin ditu eta egingo ditu, manifestazioaren ondoren ere, Ernaik?
Indibidualizaziorako joera duen gizarte honetan, borroka kolektiboa funstezkoa da prekarietatearen kontrako dinamika indartzeko. Zentzu horretan, badira gazte eremuan norabide berean lan egiten dauden hainbat eragile eta mugimendu. Horiekin guztiekin konfluentziarako puntuak eta espazioak topatzea izango da gure erronka handiena. Ernaitik bide hori abiatu dugu jada azken hilabeteetan, harreman ezberdinak garatuz eragile eta sektore horiekin; ziur gaude datozen hilabeteetan lan horren eamitzak jasoko ditugula. Alde batetik, larrialdi egoeraren salaketatik borrokarako aldarrikapen eta proposamen zehatzetara jauzi egiteko. Eta bestetik, mobilizazio berriak planteatu eta gazteria lehen lerrora ekartzeko.