Donostiako Miramar Jauregian, pentsioen inguruko bi jardunaldi aurreikusi dituzte gaur eta biharko, EHUko Udako Ikastaroetan. Hori dela eta, LABen ordezkaritza bat presente egon da gaurko jardunaldian, baita pentsionistek deitutako mobilizazioan ere.
Azken hilabeteotan Euskal Herriko kaleetara atera diren milaka pentsionistek, agenda politikoa eta soziala mugitzeaz gain, unibertsitatekoari ere eragin diote.
Gaur eta biharko, Donostiako Miramar Jauregian, pentsioen inguruko bi jardunaldi aurreikusi dituzte EHUko Udako Ikastaroetan eta adierazi behar dugun lehena gure harridura da hizlarien artean ez dagoelako afektaturik, ez dago euskal pentsionistarik. Eta asko dute hauek esateko, azken hilabeteetan Euskal Herriko kaleetan erakusten ari diren moduan.
Politikoek, teknikoek, aholkulariek, pentsio funts pribatu eta osagarriak kudeatzen dituztenek hartuko dute parte, baita Madrilgo CCOOek ordezkari batek ere, baina ez Euskal Herriko pentsionista ez pentsionista elkarteek, milaka pertsona mobilizatu eta milaka sinadura jaso dituztenean euren bidezko aldarrikapenekin, jardunaldietan entzungo ez direnak. Kezkatzekoa dela uste dugu.
Jardunaldietako helburuen artean “konpetentzien eremua gaiaren inguruan eta bere balizko aldaketak” egon arren, LABetik ulertzen dugu horixe izan beharko litzatekeela eztabaidarekin eta landu beharreko proposamenen ardatzetako bat. Euskal instituzioek euren gain hartuko balute pentsioen inguruko gai oro, diru-sarrera zein gastuei dagokienez, Babes eta Gizarte Segurantzako Sistema Publiko eta Propioa arautu eta berau kudeatzea, suposatu ahalko luke lantzea nola egingo dugun posible Euskal Herritik egungo pentsiodunez gain, jendartearen ia %25 suposatzen dutenak, jendarte guztiari eragingo dion arazo bati konponbidea ematea. Denok izango baikara pentsionistak momenturen baten.
Kezkatu egiten gaitu balizko irteera bezala sistema pribatu osagarriak planteatzeak eta pentsioen etorkizunari ikuspegi publiko eta iraunkor batetik ekin behar zaiela uste dugu, egungo zein etorkizunerko pertsona guztiei gutxienezko duintasuna izango duen pentsioa izango dutela bermatuko diena. Euren bizitzako azken urteak pentsionista pobre izan gabe bizi ahal izatea ahalbidetuko dien sistema zehaztu behar da, zoritxarrez horrela gertatzen baita gaur egun. Gehiengoa dira pobreziaren atalasetik beherako pentsioa jasotzen dutenak, Europa Karta Sozialaren arabera gutxienez 1.080 eurotako pentsioan kokatuko litzatekeena. Hemen eta orain posible da hori.
Ez dugu ahaztu behar eztabaida honetan emakumeek oso egiteko garrantzitsua dutela, hauek baitira pentsio okerrenak jasotzen dituztenak eta hilabete amaierara heltzea ahalbidetuko liekeen 1.080 eurotako gutxienezko pentsioa emateari alderdi politiko batzuk errepikatzen dituzten ezezkoek kaltetzen dituztenak.