Michelin España y Portugal S.A.ko zuzendaritzak gaur irailaren 31ra arte indarrean zen EEEa luzatzeko asmoa duela iragarri du, 2013ko urtarrilaren 31ra arte. Era berean, Lasarten EEEaren aplikazioa 15 lanegun gehiagotan eragin dezakeela esan du.
LABetik salatu nahi dugu, beste behin ere, enpresa bere produkzio gora-beherei aurre egiteko langileen soldatez baliatzen ari dela (EEEak soldata galera dakar), eta horri gainera gehitu behar zaio izoztua dutela bertako langileek. Halaber, langileen soldatez gain, diru publikoaz ere baliatzen ari direla salatu nahi dugu, eta hori guztia gertatzen ari dela, Michelinen irabaziak handiak diren bitartean:
- 2011n Michelinek Estatu mailan 191 milioi euroko irabaziak izan zituen (zergen ordainketa eginda).
- 2011ko ekitaldian Michelin taldeak 1.492 milioi euroko irabaziak izan zituen.
- 2012ko lehen seihilekoan Michelin taldeak 915 milioi euro irabazi ditu, aurreko urtean garai berean baino %37 gehiago.
Bankuak eta multinazional handiak egiten ari diren moduan, Michelin ere diru publikoaz baliatzen ari da, eta hori onartu ez ezik erraztu ere egiten ari dute hainbat gobernuk, onartutako erreformez bidez.