LABeko kideok, abenduaren 1ean, gure lan esparruan eta bizitzan 24 orduz euskara hutsean aritzeko erronka hartu dugu, abenduaren 3an Euskararen Nazioarteko Eguna ospatzen dela eta. Euskara LAB sindikatuaren hizkuntza dela erabaki genuen 2000. urteko Biltzar Nagusian eta harrez gero, etengabean ari da LAB sindikatua helburu hori betetzeko ahaleginean.
Euskara lan-munduko hizkuntza izan dadin EUSLAB egitasmo estrategikoa onartu eta martxan jarri genuen LABen. Interbentzio estrategiko horrek bi lerro barnebiltzen ditu. Batetik, LAB sindikatuaren barruko hizkuntza euskara izateko SINEUS egitasmoa, eta lan munduan euskararen normalizazioa lortzeko LANEUS egitasmoa.
LABeko kideok, SINEUS egitasmoaren barruan eta Euskararen Nazioarteko Egunarekin bat eginez, hainbat egoitza eta sail sindikaletran adostu dugu abenduaren 1ean kide guztiok 24 orduz euskara hutsean arituko garela. Erronka zaila bezain itxaropentsua esku artean hartu duguna, izan ere, oraindik orain, oso zeregin zaila baita euskararen lurraldean euskaraz bizitzea, eta are zailagoa euskaraz lan egitea.
Ilusioa eta gure kemen guztia jarriko dugu gure erronka benetan gauza dadin. Euskal Herrian 365 egunez euskaraz bizi nahi dugu eta!
LAB sindikatuak beste urte betez berretsi egiten du euskarern normalizazioarekiko sindikatu gisa hartutako konpromisoa, eta lan horretan aurrera jarraitzeko determizazio irmoa erakusten du, alegia, langileon hizkuntza eskubideak azaleratu eta defendatzeko hautua egiten dugu.
Langileok eskubidea dugu euskara jakiteko.
Langileok eskubidea dugu lan euskaraz egiteko.
Langileok eskubidea dugu lan harremanak euskaraz burutzeko.
KALEAN, ZEIN LANEAN, EUSKARAZ ASKATASUNEAN!