Atzoko egunean, prentsa bidez, jakin genuen EAJk bi OPE deialdi egingo dituela 2014/2015 ikasturteetan zehar. Cristina Uriartek batetik, enpleguaren egonkortasun handiagoa bermatu eta bestetik, oso albiste ona dela hezkuntza sistema osoarentzat adierazi du.
1.-Egun hezkuntzako langileok bizi dugun egoera, azken urteotan hartutako neurri eta erabaki politikoen ondorioa da. Eta EAJ horien parte da. Egungo testuinguruari erreparatuz hau ere erabaki politiko bat dela uste dugu.
2.-Harrigarria da enpleguaren egonkortasunaz hitz egitea OPEak baliatuz, baina zertan ibili dira orain arte? Negoziazio mahaietara murrizketekin emandako atzerapausoak berreskuratzeari ekiteko inolako neurririk ez dute aurkeztu eta etorkizunari begira ere, inbertsiorik gabeko eskema batera mugatu izan dira. Hauteskundeen atarian egonik, eta legealdian, oraingoz, ezer gutxi egin dute eta zerbaitekin gozatu nahi dute jendea.
3.-Harrigarria eta lotsagarria da era berean astelehen honetan bertan, planifikazio batzordea burutu genuela eta ez zigutela honen berri eman, ez omen zekiten ezer, OPEak aurrekontuen arabera izango zirela agian. Eta bi egunetara lau haizetara zabaldu dute.
4.-Ope deialdiak langile batzuen egonkortasuna hobetuko badu ere, plan integral bat behar dugu. Eta hori zerbitzu publikoetan inbertsio gehiago egitetik etorriko da.