LAB, ELA, ESK, STEILAS, EHNE eta HIRU sindikatuok elkarretaratzea egin dugu gaur Donostian, Adegiren egoitzaren aurrean, “Prekarietatea hiltzailea, lan istripu gehiagorik ez” leloarekin. Hain zuzen ere, ostiralean hildako Elgoibarko Betelu enpresako langilearen heriotza salatu dugu. Istripua otsailaren 6an izan zen, Azkoitiako Ibarmia enpresan, hildako langilea bertan baitzegoen azpikontratatua. Aranburuk gogora ekarri du Gipuzkoako ahaldun nagusi Markel Olanok lan istripua izan zen egun berean bisitatu zuela Ibarmia, eta eredugarritzat jo zuela. Bada, ordu batzuk geroago gertatu zen lan heriotza. "Instalazioetan lan egiten ari diren langileen lan osasun baldintzak errespetatzeko gai ez den enpresa bat, guretzat, ez da inolaz ere eredugarria, eta instituzioentzat ere ez luke izan beharko", adierazi du LABeko ordezkariak.
Garbiñe Aranburuk nabarmendu du Ibarmiako zuzendari orokorra Adegiko presidenteordea ere badela. "Bere enpresan azpikontrata batean lanean ari zen langilearen lan osasun baldintzak errespetatzeko ardura zuen, eta ez zuen bete. Hala, Adegiri interpelazio zuzena egin nahiko genioke: enpresa eredu berriaz hitz egiten digute behin eta berriz; guk, ordea, ez dugu enpresa eredu berririk ikusten, ez dugu inolako salaketarik entzun istripu honen inguruan, ez dute ezer esan. Ikusten dugu zaharretik asko dagoela hemen, betiko eredutik asko dagoela; asko prekarietatetik, asko prebentzio neurri faltatik".
Azkoitiako lan istripuaz gain, Aranburuk azken orduetan jakinarazitako beste bi lan heriotza salatu ditu: Petronorreko langilearena eta gaur goizean A-1 autobidean lanean ari zen beharginarena; Muskizen bata, Agurainen bestea. “Ezaugarri bera ematen da hiru kasuetan: azpikontratetako langileak dira. Aurreko urteko balantzea egin genuenean, lan istripuen herena azpikontratetan ematen dela esan genuen. Hori oso adierrazgarria da, prekarietatearen isla delako”, berretsi du.
Hala, gehiengo sindikalak egoera hauek salatzen jarraituko duela azpimarratu du. "Heriotz hauek ekidin daitezke, eta onartezina da ekidin daitezkeen heriotzak ekiditeko neurririk ez hartzea. Inplikazio handiagoa behar da institzuoen aldetik, ez da nahikoa adierazpen instituzional batzuk onartzearekin, baldin eta ez baldin badira erantzule nagusiak seinalatzen eta interpelazio zuzen bat egiten patronalaren aurrean. Prebentzio neurri ezak eta prekarietateak hiltzen dute, eta bi ezaugarri horiek patronalaren erantzukizuna dira. Hortaz, instituzioek beste ardura batekin jokatu beharko lukete", erantsi du LABeko ordezkariak.
Bihar, elkarretaratzea Gasteizen
Bihar asteazkena, otsailak 15, beste elkarretaratze bat egingo du gehiengo sindikalak, gaur goizean Agurainen izandako lan heriotza dela eta. Hain zuzen ere, A-1 autobidean lanean ari zen gizon bat hil da, furgoneta batek harrapatuta. Elkarretaratzea 12:30ean izango da, Gasteizko Probintzia plazan, “Prekarietatea hiltzailea, lan istripu gehiagorik ez” leloarekin.