Gaur, hilak 18, fiskalitateari buruzko txostena aurkeztuko du LABek komunikabideen aurrean. “Burujabetza eta justizia soziala” izenburudun txostenean Europa eta Hego Euskal Herriko politika fiskalaren azterketa egiten da. Fiskalitatea aberastasunaren banaketan eragiteko bide garrantzitsuenetako bat da, zentzu honetan Ainhoa Etxaide, LABeko Idazkari Nagusiak adierazi du fiskalitatea aldatzea borondate kontua dela.
Maiatzaren Lehenean esan genuen moduan prekarietatearen aurkako borroka gure agendaren erdigunean kokatu dugu. Egoera aztertu eta dinamika oso bat jarri dugu martxan. “Hain zuzen ere prekarietatearen atzean bi arrazoi daude, alde batetik lan munduaren egoera eta bestetik fiskalitatea. Sortzen den aberastasuna ez banatzeko antolatuak eta diseinatuak daude” azaldu du Etxaidek. Beraz prekarietatea gainditu nahi badugu bi borroka nagusi ditugu: lan eskubideak berreskuratzea lan mundua berrantolatuz eta politikak aldatzea benetako erreforma fiskala eginez.
LABeko Idazkari Nagusiaren hitzetan “ez da bidezkoa eta ezta bideragarria ere langileok bikoitza ordaintzea”. Langileen esku geroz eta bitarteko gutxiago dago, beraz diru bilketaren joera txikitzera joango da. “Honen aurrean egitura fiskala aldatzea aldarrikatzen dugu, besteak beste progresibitatea aplikatuz eta zerga zuzenen pisua handituz”. Aberastasuna banatzeko helburuarekin presio fiskala handitu eta iruzur fiskalari aurre egitea ezinbesteko ikusten dugu.
Guzti hau bideragarria da Europako bataz bestekotik hurrun bait gaude. Ez hori bakarrik, kontzertuak ematen dituen aukerak baliatuz, posible ere bada. Etxaideren iritziz “borondate kontua da. Beraz borondate politikoa ez dagonean erabakien aldaketa behartu egin beharko dugu”. Zentzu honetan mobilizazioa indartzera goaz eta horretarako hitzorduak ez dira faltako. Maiatzaren 28an Bilbon egingo dugun mobilizazio nazionalean aberastasunaren banaketa aldarrikatuko dugu.