LAB eta ELA Confebasken aurrean azaldu gara gaur gu ilegalizatzeko erakutsitako asmoak salatzera. Confebaskek ELA eta LAB jokoz kanpo nahi gaitu. Bilatzen duten pobrezia eta prekarietatearen garai berrian borrokarik ez egotea funtsezkoa da haientzat, baina ez dute lortuko, ez diegu utzuki. Zilegitasuna Euskal Herriko langileek ematen digute. Egiten dugun sindikalgintza ereduaren indarra eta babesa euskal langileek erabakitzen dute.
AINHOA ETXAIDEren interbentzioaren audioa
Etxaidek bere interbentzioaren hasieran sindikatu izatearen harrotasuna azaltzearekin batera sindikatuon papera aldarrikatu du. “200.000 langabetutik gora daudenean (…), gazteak kanpora joatera behartuak daudenean (…) edota emakumeoi miseriazko soldaten truke lan egitera behartzen gaituztenean…” sindikatuon lana erabakiorra da Etxaideren hitzetan.
Sindikatu baten egitekoa langileak defendatzea eta langileei borrokatzeko tresnak ematea dela esan du eta Confebasken asmoen atzean hori deusestea badago eta bide horretan LAB eta ELA traba kontsideratzen baditu “pozten gera. Hori da gure asmoa” esan du.
Confebasken asmoen aurrean Jaurlaritzaren eta CCOO eta UGT sindikatuen jarraren salatu du Etxaidek, zeinak “Confebaskek ELA eta LAB jokoz" uzteko nahiaren aurrean babesa eman dioten gehiengo sindikala alde batera utziz mahaia osatu izanak argi uzten du hori.
“Bidea ankerra bada, okerragoa da helburua” Etxaiderentzat, egiten ari diren politika antisozialen aplikazioa erraztuz Europako gobernuek egin dutena babesten dute. Bide horretan kokatu du lehenengo Madrilen eta gero gure eremuan atzo eman zuten urratsa: “azken 6 urteetan egin dutena ontzat ematea eta hartutako bidea sendotzeko paktuak egiteari ekitea”.
“Iruzurra”. Honela kalifikatu du LABeko idazkari nagusiak Jaurlaritza, Confebask eta CCOO eta UGT sindikatuen arteko bilera, “gezurra da bertan erabakirik hartuko denik. Ezer berririk ez behintzat politika instituzionaletatik kanpo”.
“Kutxanbaken pribatizazioak bezalaxe, honetan ere gidoi bat idatzi dute eta txintxo ari da bakoitza bere papera betetzen” LABeko idazkariaren esanetan, “orain krisiari amaiera eman behar zaiola erabaki dute eta azken atala antzeztea erabaki dute”.
Omen fase berria irekitzen dela diote, ontzat ematen da egin diren erreformak eta murrizketak (hori da CCOO eta UGTk atzo madrilen eta hemen egindakoa) eta garai berria gatazkarik gabekoa nahi dute eta logika horretan kokatu du Etxaidek Confebasken eskakizuna.
Krisiaren kudeaketan “ez dugula parte hartu” adierazi du eta “sekula ez dugula krisi honetan gertatutakoa ontzat emango” ere, “bere ondorien gainean itunak eraikiz”. “Eskubideen basamortu bat utzi du krisiak” eta sindikatuon erronka eskubide berreskuratzean eta bizi baldintzak duinak ziurtatzea ekarriko duen prozesu sozialaren suspertzean kokatu ditu LABeko idazkari nagusiak.
Etxaiderentzat LAB eta ELA sindikatuei zilegitasuna eta egiten duten sindikalgintza ereduari indarra eta babesa Euskal Herriko langileek ematen diote. Eta bide horri jarraituz aldarrikapen batekin amaitu du bere interbentzioa: “Beti izan gara eta izango gara sindikatu soziopolitikoak. Helburu oso argia dugu: politika eta ekonomia herritarron zerbitzura jartzea”.