CGTk LABen aurka martxan jarritako prozeduraren harira sindikatu horren Pariseko kideen bisita izan dugu gaur Baionan. LABek ere hitzordu horretan present egon nahi izan du gure kexa azaldu eta CGTren jarrera askatasun sindikalaren aurkakoa dela salatzeko.
CGT sindikatuak epaitegiko bidera eraman gaitu TPE hauteskundeetan —2016ko Azaroaren 28tik Abenduak 12 arte dira— gure kandidadura ezeztatu eta anulatua izan dadin. Prozedura hau zabaldu ostean, Bordaleko Instanzia tribunalak, abuztuaren 4ean eman zuen bere erabakiaren berri. Hau da, epaileak, gure sindikatua “erregionalista” zela iritzita Akitania Berri euskalde mailan gure burua ezin dugula aurkeztu deliberatu zuen. Ez gatoz bat epailearen irakurketarekin beraz afera kasaziora eramatea erabaki dugu.
Gure iritziz, CGTren jarrera askatasun sindikalaren aurkakoa izateaz gain sindikatuen arteko oinarrizko errespetuari muzin egiten diola deritzogu. Epaileak CGTren argudioak kontutan hartu ez baditu ere, hauek jarrera diskriminatoria dugula leporatzen digute euskarari leku nagusia ematen diogulako eta elebitasuna erabiltzen dugulako. Bestalde gure sindikatuak balore errepublikarrak errespetatzen ez dituela eta izaera independentistari lehentasuna ematen diola argudiatu dute. CGTren aburuz, sindikatu baten proiektu politiko bat defendatu ordez langileen eskubideak defendatu beharko lituzke.
Epaile zein CGTren argudioak errefusatzen ditugu eta horregatik eskura ditugun bide guztiak erabiliko ditugu. Bide judizialaz gain, eraso larri honen aurrean eragile eta sindikatuen aldetik jasotako babesak askatasun sindikalaren aldeko dinamika martxan jartzeko aukerak zabal ditzake. Gure helburua argia da, LABen rola langileen alboan egotea deritzogu, langileen defentsan segitzeko eskubideari irmo eutsiko diogu.