Ezer baino lehen, elkartasun besarkada estu bat helarazi nahi diegu Mikel Egibar preso politikoari eta bere familia osoari momentu samin hauetan.
Mikel Egibarren familiak izan duen istripua aurtengo bederatzigarrena izan da eta, beste guztiak bezala, hau ez da ezbehar hutsa, baizik eta bulegoetatik diseinatutako euskal preso politikoen kontrako mendeku politika argi baten ondorio larria.
Euskal Herriak ozen aldarrikatu du behin baino gehiagotan euskal preso politikoen kontrako politika errepresiboekin amaitu beharra dagoela: bizi osorako kondenak eta ad hoc asmatutako dotrinak, Europatik ere baliogabetuak izan direnak; gaixotasun larri eta sendaezinak dituzten presoak espetxean mantentzeko erabakia, minimo etikoen kontrakoa ez ezik, euren legeen kontrakoa ere badena; eta sakabanaketa politika, elkartasunarekin amaitzea lortu ez duena, nahiz eta presoen lagun eta senitartekoak astero euren biziak arriskuan jartzera behartzen dituena.
Preso politikoen kontrako mendeku politiken iraupena PPren gobernuaren itxikeriaren isla argia dira. Sekula existitu behar izan ez diren salbuespen neurri horiek, oraindik orain herri oso bat salbuespen egoeran mantentzen ari direnaren seinale ditugu. Behingoz pausuak egitea euskal jendartearen aldarrikapen zabala da, nazioartetik egiten den aldarrikapen zabala da. Ordua da estatu biek aldarrikapen hauek entzun eta behingoz urratsak egin ditzaten.
LAB sindikatuak sakabanaketarekin eta salbuespen neurri guztiekin amaitzeko exijitzen dio PPren Madrileko gobernuari. Errezeta zaharretan tematurik jarraitzea, blokeo egoeran irautea ez da onuragarria, inorentzat ere ez. Iosu Uribetxebarria presoak esan bezala, gorrotoa eta krudeltasuna mugara arte eramateak ez du ezer konpontzen; sufrikarioa areagotzea ez da bidea.
Era berean, Gasteizeko gobenuari exijitzen diogu, senideak jazarri ordez, atzo bertan Donostiako ospitalean egin bezala, euskal herritarren aldarrikapenak jaso eta bere egin ditzala.
Amaitzeko, alderdi eta instituzioei orohar dei egiten diegu mendeku-espetxe politikarekin behingoz amaitzeko bidean behar diren konpromisoak har ditzaten.
Euskal Herrian, 2012ko abuztuaren 8an