Gaur Gipuzkoako metalgintzako negoziazio mahaiaren 9. bilera izan da. LABek aurreko bileran mahai gainean jarritako puntuei ADEGIk ezezkoa eman die. ADEGIk ezetz esan dio, beraz, hitzarmenaren gutxieneko izaera mantentzeari, lortutako akordioek benetako balioa izan dezaten enpresariei erreformak ematen dien aldebakartasuna kentzeari, hitzarmen berri bat negoziatu arte aurrekoa indarrean mantentzeari eta Estatuko negoziazioaren aurrean herrialdeko hitzarmenak blindatzeari.
ADEGIk berean berresten dela erantzun du, hau da, bere plataforman lan erreformako puntuak mantenduko dituela esaten du.
Egoera honen aurrean LABek beste sindikatu guztiei deia luzatu die herrialdeko hitzarmena blindatzea ekarriko duten akordioetara iristeko. ADEGIri aurre egin behar zaio, Negoziazio Kolektiborako Euskal Esparrua defendatuz.
Hau izango da LABen lana datozen asteetarako. Negoziazioaren une garrantzitsu baten aurrean gaude, patronalak aurkeztutako proposamenak urteetan borroka bidez lortutako lan baldintzak eta eskubideak arriskuan jartzen baititu. Sindikatuen arteko elkarlana funtzeskoa da egoera honi aurre egiteko. Patronala bereari eusten jarraitzen badu, langileok kalera ateratzeko beharra izango dugu.