Abuztuaren 28ko 22:00etatik abuztuaren 30eko 22:00etara egingo dute greba Moevek Gipuzkoan dituen 16 gasolindegietako 150 langileek. Enpresa batzordea LABeko 5 ordezkarik eta ELAko 3k osatzen dute.
Langileek hainbat hilabete daramatzate enpresaren barne ituna negoziatzen eta enpresak langileen lan-baldintzak duintzeko behar adina aurrerapauso eman ez dituenez, bi greba ziklo egin dituzte, uztailaren 30tik abuztuaren 2ra lehena eta bigarrena abuztuaren 14tik 16ra. Greba ziklo horien jarraipena ia erabatekoa izan da eta, honek indartu egiten ditu langileen aldarrikapenak enpresaren aurrean.
Ordea, enpresak entzungor egin die langileen aldarrikapenei eta, beraz, hirugarren greba zikloa iragarri dute langileek. Oraingoan, arestian esan bezala, abuztuaren hondarretan.
Datozen egunotan jakinaraziko dute greba egunetako mobilizazio nagusiak non eta noiz egingo dituzten.