EAEko zerbitzu publikoek bizi duten egoera larriaren aurrean, greba eta mobilizazio eguna egin dugu sektore publiko osoan, sindikatuok deituta. Manifestazioak egin ditugu hiriburuetan, eta, Bilbon, Garbiñe Aranburu idazkari nagusiak zerbitzu publikoen defentsa egin du, mobilizazioa hasi aurretik: zerbitzu publikoak defendatzea sektore publikoan kalitatezko enplegua defendatzea da”.
Garbiñe Aranbururen hitzetan, “kalitatezko enplegu publikoa sortu behar da. Prekaritateari amaiera emateko ordua iritsi da sektore publikoan. Sektore publikoaren behin behineko enpleguaren kontsolidazioa eta egonkortasuna eskatzeko atera gara kalera bereziki, eta, horretarako, interinitate egoera horretan, abusu egoera horretan, urteak eta urteak eman dituzten langileen egoera kontutan hartuta, hautaketa prozesuak abian jarri behar direla diogu; hau da egonkortasun prozesuak aldarrikatzen ditugunean esaten duguna”.
Hain zuzen ere, LABeko idazkari nagusiak lege propio bat behar dela aldarrikatu du, “kontsolidazio prozesu horiek lege berme guztiekin egin daitezen. Era berean, nabarmendu nahi dugu ezin dela erantzun orokor bat eman; lekuan lekuko egoerak aztertu behar dira. Administrazio guztietan ematen den errealitatea desberdina da. Lekuan lekuko egoerari erantzungo dioten prozesu adostuak behar ditugu, eta hori negoziazio kolektiboan adostu behar dela aldarrikatzen dugu”.
Hiriburuetako mobilizazioekin batera, goizean lantokietan eta herrietan ere zabaldu ditugu gure aldarriak, aurreko asteetan egindako mobilizazio dinamika biribiltzeko. Greba deialdiak jarraipen zabala izan du, eta oso orokortua izan da behin-behinekotasuna pairatzen duten langileen artean.
