EAEko Auzitegi Nagusiak berriro jo du bidegabetzat PCB-ITPko langileei inposatu zitzaien ABEEEa, sozialeko epaitegiaren lehen instantziako epaia berretsiz. Azken epai honek berretsi egiten du LAB bere jarreran, hasiera batetik adierazi genuelako enpresak 2020 amaieran ezarritako ABEEEa guztiz arbitrarioa eta legez kanpokoa zela. Orain, honakoa galdetzen diogu gure buruari. 2020ko irailean ABEEE bat beharrezkoa ez bazen, beharrezkoa al zen 83 familiarentzako EEE bat 2020ko azaroan? LABentzat ezezkoa da erantzuna.
Aipatu EEEaren hasieratik esan izan dugun moduan, enpresak ez zeukan inolako arrazoirik kaleratzeak egiteko, PCB-ITPren egoera koiunturala zelako; zuzendaritzak egindako trikimailu legal batzuekin exajeratu eta larritua. Datorren asteartean, apirilaren 27an, izango da EEEaren kontrako epaiketa eta LABen argi daukagu EEE hori gaurko ABEEE baino are bidegabeagoa dela.
Gainera, balioa eman nahi diogu PCB-ITPko langileak egiten ari diren borroka eredugarriari, egungo lantegi zein taldearen zuzendaritza egiten ari den eraso guztien aurrean. Zuzendaritzak, langileen kontura miloitako irabaziak pilatzen jarraitzeko erakutsi duen diruzalekeria neurrigabean, ez du inolako zalantzarik izan nagusikeriaz eta modu desproportzionatuan jokatzeko, lan-eskubide oinarrizkoenak ere urratuz.
Eusko Jaurlaritzaren jarrera tamalgarria ere ez dugu ahaztu nahi. Langileak greban egon diren bitartean egin duen gauza bakarra izan da Ertzaintza bidaltzea hauek jipolitzera, Arantza Tapia buru duen Industria Saila hasiera batetik multinazionalaren aginduetara kokatzen zen bitartean. Gustatuko litzaiguke jakitea nola baloratzen duten epai hau.
Gertatu den guztiagatik, eta 83 kaleratutakoak berriro lanean hasi arte egin beharko dugun borroka guztiagatik, inoiz baino ozenago esan nahi dugu gaur PCBn ez dagoela inor soberan.