Gazteen prekarizazioaren datuak argiak dira: 25 urte baino gutxiagoko langileen ia erdiak ez dira iristen 1.600 euroko soldatara, eta adin tarte horretako gazteek diru sarreren %78 bideratzen dute alokairura. Aldaketarako aukerak daudela sinetsita, azaroaren 11n lantokiak hustu eta kaleak betetzeko deia egin dugu Ernaik eta LABek.
Pobretzearen eta prekarizazioaren aurrean, antolakuntzarako eta borrokarako deia egin dugu gaur Ernai gazte antolakundeak eta LAB sindikatuak Bilbon, eta euskal gazteriari azaroaren 11ko greba orokorrean aktiboki parte hartzeko eskatu diogu.
Bizitza izugarri garestitu da, eta gorakada handia izan dute elikagaien, erregaien eta energiaren prezioak. Bizitza garestitu bai, baina soldatak ez dira neurri berean igo, eta, horrez gain, miseriazko soldaten geroz eta zati handiagoa bideratzen dute langileek etxebizitzara. Langileak pobretzeko eta euren arteko arrakala matxistak eta arrazistak sakontzeko elementu nagusiak dira, beraz, soldatak eta etxebizitzak, eta modu berezituan pairatzen dute egoera hori gazteek.
Soldatei dagokienez, adibidez, Hego Euskal Herriko errealitatera egokitutako gutxieneko soldatak 1.600 eurokoa izan beharko lukeela uste dugu LABen, eta, atalasea kopuru horretan jarriz gero, argia da emaitza: 25 urte baino gutxiago dituzten eta lanean ari diren ia erdiak (%48,25) ez dira iristen bizitza duina garatzeko gutxienekoa den kopuru horretara.
Gainera, lan baldintzak urteekin zertxobait hobetu badira ere, soldaten bilakaerak ez du, inondik ere, etxebizitzaren prezioen hein berean egin gora. Hala, gazteek euren diru sarreren kantitate geroz eta handiagoa bideratzen dute etxebizitzara, eta, era berean, etxebizitza bat lortzeko behar duten denbora beste adin tarteetan baino handiagoa da. Babes ofizialeko etxebizitza sozialak ordaintzeko, adibidez, batez beste 19 urte behar dira; 25 urtez azpikoen kasuan, berriz, 30 urte. Etxebizitza libreen kasuan, horiek eskuratzeko batez besteko tartea 35 urte dira; 25 urtetik behera, aldiz, 53 urte.
Gazteen portzentaje handi bat alokairuan bizi da, eta diru sarreren zati handi bat hartzen du alokairua ordaintzeak gazteen kasuan, eta zati hori urtetik urtera handiagoa dea. Egun, 25 urtetik beherako gazteek diru sarreren %78 bideratzen dute alokairua ordaintzera.
Datuak argiak dira. Soldatak eta etxebizitza adin arrakala iraunarazteko elementuak dira egun. Horregatik, azaroaren 11ko greba orokorrerako deia berretsi diegu Ernaik eta LABek gazte guztiei. Azken asteetan buru-belarri ari gara bi antolakundeak greba prestatzen, eta Euskal Herriko ehunka herri eta auzotan elkarguneak, batzarrak eta asanbladak egin ditugu. Datozen egunetan lan hori areagotuko dugu, eta azaroaren 11n lantokiak eta heziguneak hustu eta kaleak beteko ditugu.
Azaroaren 11n pobretzeari eta errentismoari aurre egiteko egiturazko neurriak eskatuko dizkiegu instituzioei eta patronalari: alde batetik, Hego Euskal Herrian gutxieneko soldata propioa ezartzeko; gutxienez, 1.500 eurokoa. Horrekin batera, soldata guztiak duindu daitezela ere eskatuko dugu, langileen arteko arrakalekin amaitzeko; hala nola, adin arrakalarekin. Bestetik, etxebizitzari dagokionez, errentismoarekin eta negozioarekin amaitzeko egiturazko neurriak exijituko ditugu Ernaik eta LABek: alokairu kontratu mugagabeak; alokairuen prezioak jaistea eta merkatuan esku hartzea; etxegabetzeekin amaitzea; putre funtsak desjabetzea eta Euskal Herritik kanporatzea; espekulazioa debekatzea; eta parke publikoa defendatu eta handitzea.
Neurriok Euskal Herrian bertan hartzeko baldintzak badaudela uste dugu bi antolakundeok, eta Euskal Herrian etxebizitzaren auziari bertako behar eta baldintza propioetatik erantzuteko, burujabetza gehiagoren beharra dagoela aldarrikatzen dugu. Etxebizitza politika horiek, Euskal Herrian diseinatzeaz gain, norabide sozialistan diseinatuak behar dute, zentroan ideia bat izanda: etxebizitza duin baterako sarrera oinarrizko eskubidea dela. Beraz, norabide horretan diseinatutako politikekin, etxebizitzak negoziorako eta espekulaziorako bitarteko izateari utzi behar dio.
Eraldaketarako aukerak eta baldintzak Euskal Herrian
Egungo testuinguru ezegonkorra ere aipatu dugu agerraldian. Sistema kapitalista zisheteropatriarkala, bere aurpegi autoritario eta basatiena erakusten ari da, eta ukaezina da hori sostengatzeko indartzen ari den oldarraldi erreakzionario eta faxista. Talka bat bizi dugu, bizi baldintza duinen eta oinarrizko eskubideen agendaren eta ultraeskuinaren agenda erreakzionarioaren artekoa.
Testuinguru horretan, ordea, Euskal Herrian badira aukerak eta baldintzak beste norabide batean indar egiteko, lan eta bizi baldintza duinen aldeko borroka erdigunean jarrita eraldaketa sozialean eta nazionalean aurrera egiteko. Horren erakusle da ezker independentismoa sendo dagoela, eta badirela baldintzak kapitalaren interesen kontra lantokietan, kalean eta instituzioetan borrokatzeko.
Ernai, gazteek bizi duten testuinguruaren jakitun, Urrats bat aurrera kanpaina aurkeztu du, eta Euskal Herriko gazte oro duintasunez bizitzeko ezinbestekoak diren auziak mahaigaineratu ditu. Orain, Euskal Herriko milaka gazterekin osatuko du diagnostikoa.
Bestetik, etxebizitzaren eremuan egiten ari den ekintza sindikalean urrats berriak egin ditu LABek. Hainbat gatazka kolektibo piztu ditugu, baita mobilizazioak areagotu ere. Hain justu, etxebizitza eskubidearen aldeko mobilizazioak indartu, eta horrek greba orokorrerako baldintzak sortu ditu. Euskal Herritik Euskal Herrirako greba orokorraren aldeko lanean inplikatu da LAB, etxebizitza eta soldata duinen alde ahalik eta erantzun zabalena emateko asmoz.
Aurrerantzean ere euskal herritar oro duintasunez bizi dadin antolatzen eta lanean jarraitzeko konpromisoa adierazi dugu bi eragileok.
Gazteen argazki sozioekonomikoa
Aurkeztutako datuak LABek eta Ernaik elkarrekin ondutako Gazteen argazki sozioekonomikoa txostenean daude sakonduta. Jarraian kontsulta daiteke:
