2026-11-16
HomeZerbitzu PublikoakZerbitzu SoziokomunitarioaUdalak interpelatzen jarraituko dugu Etxez Etxeko Laguntza Zerbitzuan hobekuntzak lortzeko

Udalak interpelatzen jarraituko dugu Etxez Etxeko Laguntza Zerbitzuan hobekuntzak lortzeko

Atzo, hilak 28, bigarrenez elkartu da Bizkaiko etxez-etxeko laguntza zerbitzuaren hitzarmen kolektiboa negoziatzen ari den mahaia. Zerbitzu hau udalen eskuduntza da eta ekimen pribatuak kudeatzen du. Aldez aurretik patronalari bi proposamen igorri bazaizkio ere ez ditu haintzat hartu. LAB ez da geldirik egongo eta zerbitzuaren titularrak direnak, udalak alegia, interpelatuz jarraituko du.

Aldez aurretik, sindikatuek bi plataforma igorri zizkioten patronalari. Horietako bat CCOOena, eta bestea ELA, LAB eta UGT sindikatuena. Bigarren hauek osatzen dute mahaiaren gehiengoa.

Patronalaren bozeramaile batek ez ditu plataformak aintzat hartu eta Bizkaian ematen den etxez-etxeko laguntza zerbitzuaaren sektorea aztertzera mugatu da. Hark esan duenez, udalek azken 5 urteotan eskaini dituzten orduak, %20an baino gehiagotan urritu dira. LAB bat dator azterketarekin eta %25ean kokatzen du murrizketa. Honez gain, ordu bakoitzari dagokion tarifa izoztu egin da, edo gutxitu. Enpresek argudiatzen dute zailtasunak dituztela zerbitzuak eragin kostuak estaltzeko.

LAB sindikatuaren ustez, erabateko arduragabetasunez jokatzen ari dira zaintzaren krisialdiko egoera honetan. Ohiko oinarrizko jarduerei aurre egiteko zailtasunez diharduten pertsonen eskaria gero eta handiagoa da orain. Horrela soilik uler daiteke egoera, biztanleriak dituen premien aurkako jendarteko politikak babesten eta ezartzen dituztenen logika erabiliz.

Honek elkar loturik dauden bi egoera sortzen ditu. Arretari dagokionez, gero eta jende gehiagori urritu zaio babes maila. Lanorduak berriz, urritu egiten dira, eta zerbitzuaren kalitatea ere bai. Lanorduak urritu arren, eginkizun gehiago betetzen dira lanaldian. Horren ondorioz, herritarren babesgabetasuna handitu egiten da, langile kopuruari eta kalitateari dagokionez.

Lan arloari dagokionez, aspalditik oinarrizko zerbitzua betetzen ari direnak, etxeko laguntzaileak, ia guztiak emakumeak dira eta, urtez urte, enplegua eta lan eskubideak galdu dituzte, behin-behinekotasuna jasan dute, kaleratzeak bizi izan dituzte, lanaldi partzialetan lan egin behar izan dute, soldatak izoztu zaizkie eta zerbitzuaren prestazioa erabat desarautu dela nozitu dute.

LAB sindikatua egoeraz egiten duen analisian berresten da eta sektoreko langileekin batera, sindikatu legez egiten ari den dinamikan zerbitzuaren titularrak direnak, udalak alegia, interpelatuz jarraituko du. Batetik, sinadurak bilduz eta bestetik udaletan mozioak aurkeztuz, lan egindako orduak berma daitezen eta lan baldintzak hobetu. Horrela, funtsezko zerbitzu hau behar dutenei eskaini behar zaien laguntza hobetzea nahiko genuke.
 

 

 


AZKEN ALBISTEAK | ÚLTIMAS NOTICIAS

Leioako Foru Egoitzako langileak grebara doaz lankide falta eta baldintzen okertzea salatzeko

Azaroaren 16an deitu dute greba; izan ere, zuzendaritzak planteatutako langile-kopurua ez da nahikoa, lan-baldintzak okertu egin dira eta zuzendaritzak ez du zentroaren benetako beharrei erantzungo dien lanpostu-zerrenda negoziatu nahi.

Mobilizazioaren indarrak mugitzera behartu du Osakidetza, baina proposamenak oraindik ez dira nahikoa

LAB, SATSE, ELA, CCOO eta UGT sindikatuok balioetsi dugu urriaren 30eko greban profesionalek emandako erantzun irmoak Mahai Sektorialean posizioak mugitzen hastera behartu duela Osakidetzako...

Nafarroako Industria Foru Lege berriak inbertitzaile pribatuak lehenesten dituela kritikatzen dugu, baina ontzat jotzen ditugu jabetza publikoa, deslokalizazioa eta lanaldiarekiko aurrerapenak

Parlamentuak atzo onartutako Industria Foru Lege berriak inbertsio pribatua erraztera bideratuta dago, pizgarri, sinplifikazio administratibo eta kanpoko inbertitzaileak erakartzera bideratutako bestelako neurrien bidez. Hala...