LABek larunbat honetarako Sestaon Arcelor Mittal Sestao enpresako langile batzordeak deitutako manifestaziora joateko deialdia egiten die langileei. Manifestazioa 12:00etan abiatuko da, Kasko plazatik. 

Lantokiaren etorkizuna jokoan dagoen honetan, gogoratu nahi dugu zuzeneko langileez gain, askoz gehiago direla kaltetuak, bai azpikontratatutako langileak, bai Arcelor Mittal Sestaorentzat lana egiten duten hornitzaileetako langileak. Guztira, 1.000 langile baino gehiagoren etorkizuna dago jokoan. Kolpe latza krisiak gogor zigortutako Ezkerraldearentzat.

Txantaia eta mehatxua erabiltzen duten multinazionalen aurrean, ezin gara haien menpean dauden instituzioen zain gelditu. Soilik herritarren mobilizazio eta borrokak lor dezake multinazionalaren txantaia ez gailentzea, herritarrak, gizarte osoa delako kaltetua.

Sestaon bizi den egoera, altzairugintza sektorean bizi den egoera larriaren adibide bat gehiago da. Herritarrak mobilizatzeko garaia da Euskal Herriko altzairugintza baitago jokoan.