2025-12-31
Blog Page 960

Ainhoa Etxaide: “Tresna berri bat dugu borrokarako”

admin
-
0
Ainhoa Etxaide: “Tresna berri bat dugu borrokarako”


LABeko idazkari nagusiak eta Ekintza Sindikala eta Negoziazio Kolektiboko idazkari Garbiñe Aranburuk, ELAko ordezkariekin batera, agerraldia egin dute gaur Bilbon, asteartean adostutako Akordio Interprofesionalaren balorazioa egiteko. Etxaidek akordioaren balioa azpimarratu du, bertako hitzarmenak Estatutik datozenetatik blindatuko dituelako, baina arazo politikoa ez duela konpondu ohartarazi du: "Tresna berri bat dugu borrokarako, negoziazio kolektiboaren bidez lan munduaren egoera aldatzeko. Eta hor jarri nahi dugu guk arreta, hori da gure ustez garrantzitsuena. Baina, arazoari bere osotasunean begiratzen badiogu, estatalizazioaren arriskua ez dugu ekidin, negoziazio kolektiboa blokeatua jarraitzen du eta funtsean dagoen arazo politikoa ez da konpondu. Akordio hau beharrezkoa da, baina ez da nahikoa".

"Langileentzat gauzak aldatuko dira, patronalaren jarrera aldatuarazteko gai garen neurrian eta instituzioei langileen aldarrikapenei erantzun positiboak ematera behartzen baditugu". LABeko idazkari nagusi Ainhoa Etxaideren hitzak dira hauek, Bilbon gaur egindako agerraldian adierazitakoak. 

Hain zuzen ere, asteartean sinatutako Akordio Interprofesionalaren ostean emango dituzten urratsen berri eman du, ELAko ordezkariekin batera, LABeko Ekintza Sindikala eta Negoziazio Kolektiboko idazkari Garbiñe Aranburu alboan izan duela. Etxaidek nabarmendu du "borrokaren emaitza" izango dela edozein lorpen: "Hitzarmenen aldeko ekintza sindikala indartzen badugu lortuko dugu. Ekintza sindikala negoziazioak dauden lekuetan, ekintza sindikalak negoziazio prozesuak irekitzeko. Guk berebiziko garrantzia ematen diogu ELA eta LABek akordio hau eta ondorengo egoera antzera ikustea eta ulertzea. Estatalizazioaren eta blokeoaren aurrean erabaki bateratuak hartzea da benetako edukiak izango dituzten hitzarmen aldeko borrokan bat egiteko abiapuntua. Beraz, tresna bat gehiago dugu, baita borrokan elkar ulertzeko eta bategiko borondatea ere".

Hurrengo urratsak zeintzuk izango diren zehaztu du: "Lan harremanetarako euskal esparrua eraikitzea da gure helburua. Akordio hau babesteko eta negoziazio kolektiborako euskal esparrua blindatzeko urrats instituzionalak eskatuko ditugu". Era berean, akordioa Nafarroan ere egiteko bidea arakatuko dugula jakinarazi du, eta hitzarmen kolektiboaren aldeko borrokan tematuko garela berretsi, "batera ahal dugun neurrian, prekarietateari aurre egiteko bidea hor dagoelako".

Hauxe da ELA eta LABek gaurko osatu duten adierazpen bateratua, Akordio Interprofesionalaren harira:

ELAk eta LABek balorazio baikorra egiten dugu egiturazko Akordio Interprofesionalari dagokionez, euskal hitzarmenei lehentasuna ematen dielako Estatutik datozen hitzarmenen aurrean:

. Sinatutako akordioak Zapateroren lan erreformaren eragina mugatzen du, euskal hitzarmenek Estatutik datozen hitzarmenen aldetik jaso ohi duten inbasioari dagokionez. ELA eta LABetik gogoratu eta salatu nahi dugu Espainiako patronala –Confebask bertako partaide da– eta CCOO eta UGT sindikatuak aipatutako erreforma baliatzen ari direla negoziazio kolektiboa estatalizatzeko eta euskal esparruan dauden lan baldintzak okertzeko.

. Gainera, akordioak ez die baldintzarik ezartzen sindikatuei. Egiturazko akordio bat da negoziazio kolektiborako.

. ELAk eta LABek ondo hartu dugu Confebasken iritzi aldaketa. Uste dugu Confebasken jarrera aldaketaren atzean beldurra dagoela, beste patronal batzuek bere ordezkaritza monopolioa zalantzan jar dezaketelakoan, administrazio desberdinetatik jasotzen duen finantzazio publikoan izango lukeen eraginarekin. Izan ere, egoera pribilegiatua du, gobernuek ordezkaritza egiaztatzera behartzen ez duten bitartean.
Hala ere, aipatutakoa aipatuta, akats larria litzateke akordioarekin negoziazio kolektiboaren arazoa bideratuta dagoela pentsatzea. Ez da horrela, ezta gutxiagorik ere. Sinatutakoa egiturazko akordio bat da; ez du edukietaz hitz egiten, eta ELAk eta LABek gatazka handi bat dugu patronalarekin, edukien arloan.

. Hain zuzen ere, hitzarmenen edukiei dagokienez, Confebaskek bere neurrira egindako bi lan erreformei esker abantaila ateratzen jarraitu nahi du, lan baldintzak prekarizatzeko helburuarekin.

. Akordioak ez du lehentasunezko aplikazioa bermatzen hitzarmenaren iraunaldia amaituta duten arlotan –hau nabarmentzea garrantzitsua iruditzen zaigu–. Estatalizazioa xantai gisa erabiltzeari ez dio uko egin Confebaskek. Hitzarmenen negoziazioetan erakutsitako blokeo jarrera eta pasibotasunarekin, Confebaskek ondo baino hobeto daki dena duela irabazteko, hitzarmenei iraunaldia bukatzen zaielako, Estatutik datozen hitzarmenen mesederako –ultraktiboak ez badira–.

ELA eta LAB

. Erreformak –amaitu ez direnak–, patronalaren blokeo jarrera eta gobernuen aldetik patronalak berak duen babesa.

. Borrokari uko egin gabe, gaurtik aurrera tresna gehiago ditugu Euskal Autonomia Erkidegoko negoziazio kolektiboa Euskal Autonomia Erkidegoan bertan erabakitzeko.

EDUKIA KONPONDU BEHAR DUGU, ETA EDUKIA POLITIKOA DA

. Urtarrilaren 17an sinatutako akordio beraren eraginkortasuna zalantzan jar daiteke. Legeak estatalizazioari eman zion lehentasuna, eta gaur egun zenbait hitzarmen daude auzibidean, patronalaren ekimenez, Estatuko hitzarmenak aplika daitezen helburuarekin. Zentzu honetan, argi eta garbi esan daiteke Estatuak zenbait eskubide zalantzan jartzen dituela, bere joko arauen bitartez; askatasun sindikala eta euskal esparruan negoziazio kolektiboa gauzatzeko eskubideak, kasu.

. Lan Harremanetarako eta Babes Sozialerako Euskal Esparrua defendatzen dugun neurrian, ELAk eta LABek nahi dugu euskal langileei eragiten dieten erabakiak hemen hartzea, Hego Euskal Herrian; eta, noski, gauza bera eskatzen dugu eragiten gaituzten hitzarmen kolektiboekin, euskal gehiengoei zor zaien errespetuagatik. Gehiengo sindikal zabal bat dago hala izatea eskatzen duena, bi sindikatuon ordezkaritzatik harago. Errespetu kontua da.

. Azkenik, Eusko Jaurlaritzari exijitzen diogu joan den uztailaren 22an, Elkarrizketa Sozialaren mahaian –oker izendatutako mahaian–, hartutako akordioak bertan behera utz ditzala.

Bukatzeko, konpromiso hauek hartu ditugu ELAk eta LABek:

. Modu aktiboan lan egingo dugu, lan erreformen ondorio kaltegarriak saihesteko.

. Negoziazio kolektiboa bultzatuko dugu Euskal Autonomia Erkidegoko sektore eta lantokietan, prekarietateari aurre egiteko eduki aldarrikatzaileen bitartez.

. Lan Harremanetarako eta Babes Sozialerako Euskal Esparrua defendatuko dugu.

 

 

 

Murrizketak mantentzen dira, Mahai Orokorraren tramite hutsezko bileraren ondoren

admin
-
0

EAEko Funtzio Publikoaren Mahai Orokorraren bilera atzo egin zen. LABek hiru ondorio nabarmendu nahi ditu: murrizketak mantendu egiten dira, enpleguaren arazo larriari ez zaio heltzen, eta negoziazio kolektiboari eta eremu sindikali begirunerik ez dago.

MURRIZKETAK MANTENDU EGITEN DIRA

Hona hemen Administrazioak ezarritako gai zerrendak emandakoa:

2017rako soldata igoera «gutxienez» %1a:
Bestalde, sozietate merkantiletako langileei 2010etik kentzen ari zaien %5a itzultzeko, epaitegiak agintzen ari zaienera mugatzeko asmoa azaldu dute, hau da, atzera-eragina 2015eko uztailera.

Kontutan edukita urteko KPIaren bilakaera EAEn %1’5 eta Estatuan %1’6a igo dela, 2010ean ezarritako %5aren murrizketa eta gainontzeko urteetan izandako murrizketak eta igoera txikitxo bat, erosahalmena berreskuratzetik oso urrun gelditzen da proposamena. Sozietate merkantiletako langileei 2010etik kendutako guztia itzultzeko ere, ez dago legezko trabarik.

2012ko aparteko pagaren itzulera, ekainean falta den erdiaren erdia, eta datorren urteko urtarrilean faltako zen azken laurdena:
LABen iritziz ez dago inolako legezko trabarik langileoi zor zaigun pagaren zati osoa dagoeneko ordaintzeko. Arazoa erabat politikoa da, eta gure soldatekin jolasten jarraitzen du Eusko Jaurlaritzak.

Aldi Baterako Ezintasun Osagarriak lehen egunetik %100era igotzeko salbuespenak:
Murrizketa soilik azken 24 hilabeteetan bajarik hartu ez duenari, eta urtean behin, 60 urtetik gorakoentzat kenduko zen. Bestelako aukerak aztertzeko prestutasuna eta genero bortizkeriaren kasuei ere zabaltzea.

Kasu honetan ere ez dago arrazoirik Jaurlaritzak langile guztiei lehen egunetik %100a ez itzultzeko. Langilearen eskubideen ikuspegitik zein administrazioen erabiltzaileenetik (eskoletan, arreta sozial eta sanitarioetan, publikoarekin harremanetan… langilea lanera gaixorik joateagatik kutsatuak ez izateko).

Lanaldia bere horretan mantentzeko konpromisoa: Administrazioak 35 orduko lan-astea juridikoki zein politikoki defendatzeko konpromisoa hartu du.

Ez da gutxi, baina Jaurlaritzak urratu duen akordio bakarra da (langileon borrokak behartuta) eusteko konpromisoa hartu duena.

Lan sindikalerako diru-laguntzak, 2013 urteari dagozkionak:
Sindikatuok geure gutxieneko lana aurrera eraman ahal izateko zor zaiguna, oraindik ere lau urteko atzerapenarekin jasotzea ez da onargarria.

ENPLEGUAREN ARAZO LARRIARI EZ ZAIO HELTZEN

Horren arazo larriaren aurrean, are gehiago Europako sententzia famatuek derrigortzen duten kontratazioen erregulazioen eta egonkortasunaren aurrean, Eusko Jaurlaritzak ez du gai zerrendan sartu ere egin. Sindikatuon kritiken aurrean jarritako aitzakiak sinesgaitzak izan dira: «epaitegiek ez dutela behartzen, eta sententzia ezberdinak daudela; mahai sektorialetan lantzeko kontuak direla; EPEak egiten ari garela…»

LABek, negoziaziorako gai zentraltzat hartzen duelarik, hurrengo bilerarako lehen gai bezala lantzea exijitu du, eta proposamen bat aurkeztuko du gaiari lehenbailehen heldu behar zaiolako. Jaurlaritzak aurreikusten dituen erretiroez gain, kontuan hartu behar dira ere ratioak, behin-behinekotasuna, azpikontratazioa, ordezkapenak lehen egunetik… lanpostu gehiago behar dira, eta daudenak egonkortu. Hala ere ziur gaude sindikatu guztiok eskatu badugu ere, hurrengo bilerako gai zerrendan ere ez dela jasota egongo.

NEGOZIAZIOARI ETA EREMU SINDIKALARI BEGIRUNE EZA

Urtero salatzen dugun arazoa da, Eusko Jaurlaritzarentzat Mahai Orokorraren bilerak aurrekontuen testuinguruan gainditu beharreko tramite hutsa dela. Bereziki adierazgarria eta salagarria da bileraren aurretik dagoeneko prentsaurrekoa eman izana, eta bileraren bitartean medio batek Administrazioak aurreikusitako hainbat ondorio argitaratu izana.

Administrazioak sindikatuekin erdietsitako akordioak urratu egiten ditu, eta gainera lasai asko halaxe onartu du gaurko bileran, azpikontratazioak gelditzeko gaia eztabaidatzerakoan.

Jaurlaritzak egindako murrizketa guztiak aldez aurretik Mahai Orokorrean sinatutako akordioen urraketak izan dira.

Akordioak betetzea Madrilgo eta Gasteizko legeek eta parlamentuek mugatu egiten dituela errepikatu du behin eta berriz Jaurlaritzako ordezkariak.

Arestian aipatutako murrizketa guztiak itzultzeko ez dago traba legal edo juridiko bat ere, ez dago zertan tribunalen zain egon beharrik.

Maila berean, balizko akordioak ere Madrilgo eta Gasteizko parlamentuek onartu beharreko aurrekontuen menpe daudela ohartarazi du Jaurlaritzak.
LABek beti aldarrikatu izan du hain zuzen ere negoziazioak aurrekontuak prestatzen ari direnean egin behar direla, parlamentura bidali beharreko egitasmoan akordioak jasota egotearren: soldata igoerak, murrizketen itzulera, lanpostuen horniketak… Aurten ere tramite huts bezala hartu du Jaurlaritzak. Aurrekontuak berak prestatzen ditu, baina baloiak beste teilatuetara bota nahi ditu.

Ildo beretik ere, murrizketak itzultzeko asmoa epaitegiek derrigortzen dutenera mugatzen da Administrazioa.

Bat ez bagatoz ere, uler genezake Jaurlaritzak epaitegien aginduak ez betetzeari uko egitea. Kontrakoa da arazoa, epaitegiek jada ez dute debekatzen murrizketak itzultzea. Nafarroan murrizketak atzera bueltatzen ari dira, eta EAEn ere posible da, borondate politiko kontua da.
 

 

 

Gipuzkoako esku hartze sozialeko bigarren lan hitzarmena sinatu dugu

admin
-
0

Lan erreformaren kontrako blindajea, ordainsarien %5eko igoera eta lan orduen jaitsiera lortu dugu, asteko 35 orduak lortu arte. Bi urtetako negoziazio luze baten ostean, gaur egindako bileran, Hedatzenek, bere gain hartu ditu sindikatuen eskariak eta hartara, LAB, ELA, CCOO eta Hedatzenek akordio batera heldu gara.

Akordio honek 2.300 langile baino gehiagori eragiten dio. LABek akordioa oso positibotzat ematen du arrazoi hauengatik:

• Lehenik eta behin, lan erreformatik blindatzeko klausulak sinatu ditugu: Hitzarmenaren ultraktibitatea bermatzen da,malgutasunikez, derrigorrezko arbitrajea baztertzen da eta herrialdeko esparrua finkatzen da.
• Beste alde batetik, mutualitateak kentzea gaixotasun arruntetan eta absentismoaren jarraipenean, ultraktibitatea, 82,3. artikuloaren ez aplikatzea, mugikortasun geografikoa ez aplikatzea, etab.
• Horiez gainera, ordainsarien igoera, lanorduen jatsiera asteko 35 orduak lortu arte, oporren egunak gehitzea; aitatasun, amatasun, kontziliaketa eta berdintasunean hobekuntzak, subrogazioan berme gehiago, etab…

Patronalren aldetik Hedatzen izan dugu eta, ikus daitekeenez, borondatea badago herrialdeko hitzarmenak sinatu daitezke eta eduki garrantzitsuekin. Honek sektoreko langile guztien lan baldintzak duinak izatea bermatzen du, baita gatazkarik ez egotea enpresetan.

Azkenik, eskerrak eman bai gure delegatu baita afiliatuei ere, egindako mobilizazio, batzar eta abarretan parte hartu eta hau posible egiteagatik.
 

 

 

Zuzendaritza, Ingemarren balizko itxieraren errudun

admin
-
0

Usurbilgo enpresa hartzekodunen lehiaketan sartu da, talde bereko beste bi lantegirekin batera. LABek eta ELAk Ingemar taldeko administratzaileari eta akziodunei leporatu die egoeraren ardura, azken hauei kapital gehikuntza onetsi arren gauzatu ez dutelako.

Hau da Usurbilgo Ingemar lantegiko enpresa batzordeak gaur kaleratu duen agiria:

INGEMAR-Usurbilgo lantegia hartzekodunen konkurtsoan sartu da, talde bereko beste bi lantegiekin batera (INGEMARGA, S.A. eta CORPORACION INGEMAR). Horren zergatia zera da: akziodunek kapital-gehikuntza onetsi zuten, baina azkenean ez da gauzatu. Hasieran milioi bat euroko kapital-gehikuntza egin behar zen, bideragarritasun-plana abiarazteko, eta gero beste hiru milioi euroko ekarpen bat plana gauzatzeko. Borondatezko konkurtso horretarako eskaria Lugon aurkeztu da, 26/2017 Ohiko Konkurtso Prozeduraren bidez, zeren INGEMARGA, S.A.ren egoitza Lugon dago, eta enpresa filial hori da pasiborik handiena duena.

Ingemar, S.A.ko langileen ustez, egoera horren errudunak dira, batetik, INGEMAR TALDEKO administratzaile bakarra, Jose Longarela, kudeaketa txarra egin duelako, eta ekarpena bermatu ez duelako; eta bestetik, akziodunak, kapital-gehikuntza onetsi arren gauzatu ez dutelako.

Bideragarritasun Planaren arabera, kapital-gehikuntza ezinbesteko baldintza zen, hala adostu baitzuten Taldeko Zuzendaritzak eta langileek, Usurbilgo Udalaren, euskal erakundeen eta bankuen laguntzaz (Sabadell eta Kutxabank).

2017ko urtarrilaren 16an, astelehena, lehen bilera egin zen konkurtso-administratzailearekin, eta Enpresa Batzordeak azaldu zion, lehenik eta behin langileen kezka geroaz, eta bigarren, konkurtsoa jardunean jarraitzeko modukoa izateko eskaria; hau da, ea taldeko Zuzendaritzak hitzarmen bat aurkezten duen, inbertsiogile bati sarbidea emateko, eta ea konpromisoa hartzen duen, lantegia jardunean iraunarazteko, azaroan Zuzendaritzarekin lorturiko akordioak betez.

Bestalde, Enpresa Batzordeak dei egiten die herri-erakundeei (Gipuzkoako Foru Aldundiari, Eusko Jaurlaritzari eta Usurbilgo Udalari), orain arte jokatu duten bezala jokatzen jarraitzeko, eta hortaz inbertsiogile bat erakartzen laguntzeko, INGEMAR, S.A. lantegiaren bideragarritasuna ziurtatze aldera; hala jaso baitzen Taldeko Zuzendaritzaren eta langile-ordezkarien arteko akordioan. Horren menpean daude 51 langileren lana eta 26 langileren aurre-erretiroak.

INGEMAR, S.A. TALDEAk Usurbilgo lantegian du egoitza soziala, baita Usurbilen ekoitzi ere hainbat urtetatik hona balio erantsi handieneko produktua. Lantegi hori errentagarria da argi eta garbi, falta den gauza bakarra horretan sinestea da, eta abiarazteko adinako kapitala ekartzea. 75 familiaren geroa horren menpean dago, eta langileok azken mugaraino eramango dugu gure borroka helburu hori lortu arte.

 

 

 

Lan gatazka kolektiboa salatu dugu AZTI-Tecnalian, kategoria igoeretarako deialdian antzemandako irregulartasun larriengatik

admin
-
0

LAB eta ELA sindikatuek ekimen publikoko Fundazioan erdietsitako akordio kolektiboak betetzea eta erakundeko gatazkak amaitzea eskatu dugu.

Kategoria igoerak arautzen dituen akordio kolektiboko atal garrantzitsu batzuk ez betetzea erabaki du AZTI Fundazioko Zuzendaritzak. Milagarren gatazka kolektiboa da hau Fundazioan, 2005ean zuzendari nagusia aldatu zenetik.

Horrenbeste gatazka 2015 urtean AZTI Fundazioari eman zitzaion Kudeaketa Aurreratuaren Euskal Sariaren aurka egon litekeen arren, kontutan izan behar da Confebask dagoela Euskalit-en presidenteordetzan eta, hain zuzen ere, lan-eskubideen babesa ezin dela haren ezaugarri nagusitzat hartu.
 

 

 

Helegitea jarri dugu Sidenorreko Aldi Baterako Enplegu Erregulazio Espedientearen aurka

admin
-
0

LABek helegitea jarri dio Audientzi Nazionalean Aldi Baterako Enplegu Erregulazioa eta Lanera Egokitzeko Plana onartzen dituen eta enpresak UGT, CCOO eta USO sindikatuekin sinatutako akordioari. Gure ustez, legez kontrakoa izan daiteke askatasun sindikala urratzen duela ulertzen dugulako eta, zehazkiago, negoziazio kolektiborako eskubidea.

Gure iritziz, enpresak, sindikatu hauen ezinbesteko laguntzarekin, espedientea era maltzurrean eta gehiegikeriaz erabili du Lanera Egokitzeko Planean jasotzen diren lan baldintza prekariagoak ezartzeko asmoz. Soldata gehiago kobratzearen truke, aurretik lan baldintza hauek onartu behar dira lantegi ezberdinetan. Xantaia hau, sindikalki defendaezina izateaz gain, legez kontrakoa ere izan daitekeela uste dugu.

Honek demanda hau jartzera eraman gaitu, Sidenorreko langile guztien eskubideak defendatzeko, enpresak erabilitako prozesuaren egokitasuna zein proportzionaltasuna exijitzeko eta, bereziki, txantai eta mehatxurik gabeko benetako negoziazio kolektiboaren eskubidea berma dadin.
 

 

 

Michelinetik kaleratutako langile bati Europako jurisprudentzia ezarri ondoren, kalitatezko enplegu finkoa eskatzen dugu

admin
-
0

EAEko Auzitegi Nagusiak Europar Batasuneko Justizia Auzitegiaren jurisprudentzia aplikatu dio Gasteizko Michelin enpresan aldi baterako lanean zegoen langile bati. Horren ondorioz, bere kontratua bukatutzat ematean, indemnizazioa lan egindako urte bakoitzeko 12 egunekoa izatetik, 20 egunekoa izatera pasa da. LABek hori baliatu nahi du Michelini kalitatezko enplegu finkoa exijitzeko.

Michelinek langileari kontratu ebentuala produkzio-gorabeherengatik egin zion eta duela ia urtebete, eta enpresak jakinarazi zion langileari kontratua bukatutzat ematen zuela, 12 eguneko kalte-ordaina ordainduta. LAB sindikatuak horren kontrako demanda aurkeztu zuen eta Gasteizko epaitegiak aipatu ez bazuen ere, helegitea aurkeztu ondoren, EAEko Auzitegi Nagusiak ebatzi du Europar Batasuneko Justizia Auzitegiaren jurisprudentzia berria aplikatu ahal zaiola. Beraz, kalte-ordaina lan egindako urte bakoitzeko 20 egunekoa
izan behar dela erabaki du, epaia irmoa izanik.

Euskal Herriko eremu industrialean jurisprudentzia hori aplikatzen duen sententzia aitzindarietako bat izan daitekeelakoan gaude. Gainera, ezin dugu ahaztu Michelinen bertan hamarnaka langile eta langile ohi egoera berean egon daitezkeela. Beraz, LABek dei egiten dio enpresari hemendik aurrera jurisprudentzia hori zuzenean aplikatzeko, bitarteko, produkzio-gorabeherengatiko eta obrako kontratuetan, bai oraingo langileei baita azken urtean egoera horretan egon diren langile ohi guztiei.

Horren kontura ere, LABek uste du epai hau oinarri hartuta, ebentualitatea eta iruzurrezko kontratazioa ezabatu eta kalitatezko enplegu finkoa bultzatu behar dela, bai Michelinen baita beste enpresetan ere.

Azkenik, langileei eta langile ohiei deia luzatzen diegu aktibatzeko eta beraien eskubideak borrokatzeko, bai enpresan baita epaitegietan ere.

 

 

 

Ez dugu borrokaren kriminalizazioa onartuko

admin
-
0
Ez dugu borrokaren kriminalizazioa onartuko


Berriro hasiko da Laudioko JEZ enpresako gure delegatu baten eta beste bi pertsonaren aurkako epaiketa. Honen aurrean, bere salaketa indartsuena egin nahi du LABek. Sindikatuaren iritziz epaiketa hauen helburu bakarra da boterearen erabakien kontrako mobilizazioa jazarri eta kondenatzea. Horregatik duela bi hilabete bezala, LABek bat egiten du epaiketa hauen kontrako deialdi guztiekin.

Ia hiru urteren ondoren, hiru pertsona hauek behartuak izango dira berriro epaitegira jotzera, lehen agerralditik bi hilabete pasatu direnean. Beste bi hilabete gehiago ustezko justizia honen mehatxuarekin, alde batetik begiak itxi edo zigor hutsalak jartzen dizkietenak komisioak kobratu, guztion dirua xahutu edota gutxiengo pribilegiatu baten alde egiten dutenei. Horrela lanpostu ona bermatzen dute euren karguak uzten dituztenerako. Bien bitartean, arduradun hauek eta defendatzen dituztenei aurre egiten dietenak jazarri eta kondenatzen dituzte, prekarietate eta miseriarik gorrienera kondenatzen
gaituztelarik.

Iñaki, beste bi auziperatuak eta aurretik epaitutako beste pertsona batzuk libre geratu behar dira eta inoiz ez lukete epaitegi baten aurrera agertu beharko. Guztia beste batzuk egindako ekintza batzuengatik erantzuteko, multinazional handien eta munduko botere finantzieroaren interesak ordezkatzen dituzten nazioarteko erakundeen buruen exijentziak zehaztasun osoz jarraitu eta bete zituztenak, jendartearen gehiengoaren ahotsa entzun barik.

Horregatik gaur, duela bi hilabete bezala, LABek bat egiten du epaiketa hauen kontrako deialdi guztiekin. Epaiketa hauen helburu bakarra da boterearen erabakien kontrako mobilizazioa jazarri eta kondenatzea. Horregatik animatu nahi ditugu inposatutako politika hauek eta hauek sortzen dituzten egoerak baztertzen dituzten guztiak bi deialdiotan parte hartzera. Batetik, JEZeko enpresa-batzordeak deitu duen kontzentrazioa Laudion datorren urtarrilaren 20an 19:30ean Laudioko Herriko Plazan. Bestetik, LAB sindikatuak deitutako elkarretaratzea urtarrilaren 27an, epaiketaren eguna, 09:15etan Bilboko Buenos Aires kaleko epaitegietan.

 

 

 

Euskotreneko tren gidariek greban jarraitzen dute

admin
-
0

Amara eta Arasoko lan egoitzetako kaltetutako Langileen Batzordeak proposatu eta onartu ditu lan uzteak. LABek eta Independenteek deitu eta babestu dute. helburua da Tren Agente finkoen kopurua handitzea lortzea, kolektiboak irailaren 12a baino lehen zituen lan baldintzei eta jardueraren garapenari eusteko.

2016ko abenduaren 30ean, Amara eta Arasoko Langileen Batzordeak erabaki zuen greba deitzea Amara eta Arasoko egoitzetan (Gipuzkoa) jarraian agertzen diren egun eta orduetan:

• Urtarrilaren 19an: 19:00etatik 0:00etara.
• Urtarrilaren 20an: 24 orduko lanuztea.
• Urtarrilaren 24an eta 26an; otsailaren 13, 15 eta 17an: 06:25etatik 08:35etara eta 17:25etatik 19:35etara.
• Otsailaren 25ean: 16:00etatik 22:00etara.
• Urtarrilaren 28an; otsailaren 11n: 11:55etatik 16:05etara.
• Urtarrilaren 30ean; otsailaren 1, 3, 21, eta 23an: 6:55etatik 9:05etara eta 17:55etatik 20:05etara.
• Otsailaren 7, 9 eta 27an: 07:25etatik 09:35etara eta 18:25etatik 20:35etara.

Amara eta Arasoko lan egoitzetako kaltetutako Langileen Batzordeak proposatu eta onartu du greba hau. LABek eta Independenteek deitu eta babestu dute.

Greba hau deitzera eraman gaituen arrazoietako bat izan da Zuzendaritzak ezarri zuen lanpostu finkoen ugaritzea (Hendaia-Lasarte eta Amara-Zumaia ibilbideen artean frekuentzia berriak ezarri izanak eragindakoa), ez dela nahikoa Tren Agenteen kolektiboak irailaren 12a baino lehen zituen lan baldintzei eta jardueraren garapenari eusteko.

Bigarren arrazoia da, Zuzendaritzak ezetz esaten jarraitzen duela Arasorako lan egoitza aldaketak kaltetutako langilegoarentzat garraio plan bat berehala ezartzeari.

Hirugarren arrazoia izan da Zuzendaritzak negoziazioetan agertutako jarrera immobilista, arazoetako asko zerbitzuaren fidagarritasunarena, errekonozimendurako trenena edo langileentzako garraioarena, esaterako konponduko zituzten Alde Sozialaren proposamenei sistematikoki entzungor eginez.

Laugarren arrazoia izan da, uztailean, Zuzendaritzak negoziazioak hautsi zituela zerbitzu koadroak inposatuz. Koadro hauek irailaren 12an sartu ziren indarrean.

Eta azkenik, Zuzendaritzak auzitegietara eraman ditu Greba Batzordea osatzen zuten langileak, sindikatuak eta Batzorde Iraunkorra, inoiz egin ez ziren lanuzteengatik, bertan behera utzi baitziren.

Finean, grebaren helburua da Tren Agente finkoen kopurua handitzea lortzea, kolektiboak irailaren 12a baino lehen zituen lan baldintzei eta jardueraren garapenari eusteko, Arasoko lan egoitzako langileek beraien lanpostuetara joan ahal izateko zerbitzu publikoak erabiltzeko aukera izan dezatela, eta Zuzendaritzak bertan behera utz dezala jarritako salaketa.
 

 

 
1...959960961...1,583Page 960 of 1,583

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus