2026-07-09
Blog Page 910

Aurtengo ildo beretik doazen aurrekontuak aurkeztu ditu Gobernuak Kontseilu Ekonomiko eta Sozialean

admin
-
0

Gaur bildu den Kontseilu Ekonomiko eta Sozialean 2018ko aurrekontu egitasmoa jorratu da. Berriro ere, iaz egondako metodologia bera errepikatu da: sei egun (hiru lan-egun) lehenago bidali digute egitasmoa eta hortaz ez da egon azterketa sakonik egiteko denborarik. Eta berriro ere, Kontseilu Ekonomiko eta Soziala tramite hutsa izan da, egitasmoa Parlamentura bideratzeko. Eremu batzuetan norabaiteko parte hartze soziala izan duten planetako ekintzak jasotzen diren arren, oro har ez da egon aurrekontu parte hartzaileak egiteko inolako prozedurarik.

Mamiari dagokionez, eta azterketa sakonago baten faltan, hiru egiturazko mugapenek bere horretan jarraitzen dutela  dakusagu: batetik, Madrilek ezarritako mugapenak; bigarrenik, UPNko Gobernuek eragindako zorra; eta hirugarrenik, lan  errentetan oinarritutako fiskalitate ez nahikoa. Egia da egungo Gobernuari oinordetzan datozkiola hiru mugapen hauek,  baina LABen iritziz, Gobernua ez da behar bezalako erabakiak hartzen ari horiei aurre egiteko, neurri handi batean Geroa Bairen jarrera kontserbadorearen ondorioz. Aldaketa politiko-instituzionaletik sakoneko aldaketa sozialera igarotzeko, ezinbestekoa da instituzioak eta jendartea oro har aktibatzea Nafarroaren burujabetzaren alde; zorraren auditoria bururaino eramatea; eta Kapitalaren errentek nahiz enpresek gehiago ordain dezaten erreforma fiskal sakona egitea.

Kopuru orokorrei dagokionez, aurrekontua %2,4 hazi da aurreko urtearekin alderatuta, %4,1 finantzieroa ez den gastuari  erreparatuta, baina hazkunde hori Barne Produktu Gordin nominalaren hazkundea baino txikiagoa da (%4,4). Alegia,  aurrekontuak ekonomia baino gutxiago hazten dira eta, gainera, langileriak ordaindutako zergetan oinarritzen dira, soldatek Barne Produktu Gordinean duten pisua jaisten den bitartean. Beste hitz batzuekin esateko: Patronala oso eroso dago, etekin margen handi batekin, nafar langileriak jasotzen dituen prestazio eta zerbitzu publikoak gure maila ekonomikoak ahalbidetzen duena baino kaskarragoak diren bitartean. Izan ere, gogoan hartu beharra dago ongizate sozialean, osasungintzan eta hezkuntzan inbertitutako Barne Produktu Gordinaren portzentaiari dagokionez, Nafarroa Europako azken postuetan dagoela. Datu baikorrena, iaz jada nabarmen hazi zen Eskubide Sozialen Arloaren hazkundea berria da, baina aldiz, hezkuntzan eta osasungintzan egindako inbertsioa jaitsi egin da Barne Produktu Gordinarekin  alderatuta.

 

 

 

ALESAko langileek kobratu gabeko soldatak eta Aldi Baterako Enplegu Erregulazio Espediente bat martxan jarri izana salatzen dute

admin
-
0
ALESAko langileek, Aleaciones Especiales S.A, gaur egun bizi duten egoeraren berri eman dute. 2010. urtean Lamiakotik Gatikara lekualdaketa burutu zutenetik, enpresaren kudeaketa eskasa eguneroko ogia izan da; gaur egun bizi duten egoera adibide: hilabeteak diru saririk jaso gabe eta egoera konponduko ez duen Aldi Baterako Enplegu Erregulazio Espediente bat martxan.

Hauxe da ALESAko langileen ordezkaritza sindikalak argitaratutako oharra:

Langileon ordezkaritzatik etengabe eskatu zaio enpresako Zuzendaritzari bideragarritasun ekonomikorako plan bat aurkez dezala, espedientea inposatzeko arrazoiak azaldu ditzala eta ekoizpenaren eta langileon etorkizuna bermatu. Zuzendaritzaren erantzuna dagokion ardurari ihes egitea izan da eta aurkeztutako proposamen bakarra, langileok sortu ez dugun egoera gure eskubideen murrizketekin eta soldata jaitsierarekin ordaintzea izan da. Ez dute inolako borondaterik erakutsi bizi dugun egoera lazgarria bideratzeko eta horren adibide argia, Aldundiarekin ditugun harreman apurrak langileon aldetik egindako eskariekin lortu izana da.

Egun, Zuzendaritza desagertu egin da eta horregatik, gure aburuz gelditzen den aukera bakarra hau aldatu eta bideragarritasun plana aurkeztea da: esperientzia duten langileak garelako, lan karga egon badagoelako, enpresa berria eta makinaria oraingoa delako eta argi eta garbi, likidezi arazoa Zuzendaritzatik egindako kudeaketa negargarriaren ondorio zuzen eta bakarra delako.

Bestetik, Eusko Jaurlaritza eta Aldundia konponbidearen parte izan behar direla ere uste dugu, ALESAk diru publikoa jaso duelako mailegu bidez eta beraz, duten ardurari muzin ez egitea eskatzen diegu, bideragarritasun plana egiten dela bermatuz.

ALESAk badu etorkizuna eta berau defendatzeko prest gaude.
 

 

 

Urbil merkataritza gunean zabaldu ditugu gure proposamenak

admin
-
0
Urbil merkataritza gunean zabaldu ditugu gure proposamenak

Ekimen Ibiltaria Donostian ibili da asteburuan, eta gaur Usurbil eta Lasartera iritsi da, “Lan duina, bizi duina” aldarrikapena zabaltzeko. Goizean, Urbil merkataritza gunean izan gara, bertako langileekin egoteko, prekarietatea eta lan eskubideei buruzko gure irakurketa plazaratzeko.

Usurbilen goizean egon eta gero, Lasarten izango gara arratsaldean. Ekimen Ibiltariaren Infogunea egokituko dugu Okendo plazan, 18:00etatik 19:30era.

"Lan duina, bizi duina" dinamika Hernanira joango da bihar, eta, bertan, ekitaldi berezi bat gauzatuko dugu: Sobietar iraultzaren mendeurrena gogoratuko dugu. Hain zuzen ere, Hernaniko Biteri kultur etxean egingo dugu ekitaldia, “…sortuko dira besteak 1917-2017” leloarekin. 12:00etan hasiko da, eta LABeko idazkari nagusi indoko Igor Arroyok hartuko du hitza.
 

 

 

Xabier Ugartemendia: “Lan istripuen arazoa ez da lan arazo huts bat, arazo soziala ere bada”

admin
-
0
Xabier Ugartemendia: “Lan istripuen arazoa ez da lan arazo huts bat, arazo soziala ere bada”


Cementos Lemonako langileek bi orduko lanuztea eta manifestazioa egin dituzte gaur, eta Lemoako herriak erantzun ona eman dio deialdiari, zenbait taberna eta denda itxi baitituzte. Protesta urriaren 31n lantegian lan-istripuz hildako langilearen heriotza salatzeko egin dute, eta bertan parte hartu du LABeko Negoziazio Kolektiboa eta Ekintza Sindikaleko idazkari Xabier Ugartemendiak. "50 langile baino gehiago hil dira aurten lan istriopuz. Egoera tamalgarri hau patronalak eta botere politiko eta instituizonalek ezarri nahi diguten ereduaren ondorio da", nabarmendu du.

Patronalak eta botere politiko eta instituzionalek ezarritako ereduak prekarietatea dakar, baina, Xabier Ugartemendiak azpimarratutakoaren arabera, "pobreziaz gain, lan istripuak ere". Hala, LABeko ordezkariaren hitzetan, "lan iistripuen arazoa ez da lan arazo huts bat, arazo sozial bat ere bada. Horregatik, gizarte osoaren aktibazioa behar dugu honi aurre egiteko".

Ugartemendiak goraipatu ditu Lemoako herriak emandako erantzuna eta elkartasuna: "Patronalak zein administrazioan aldaketa eragiteko, gizartearen aktibazioa beharrezkoa dela argi du LABek", berretsi du. 

Enpresa batzordeko kideek ere hartu dute hitza gaurko mobilizazioan: "Lanuzte hau egin dugu herri mailan salatzeko lan istripuak ez direlako lantegietan geratu behar diren arazoak bakarrik. Denok garaarazoaren parte".

Langileen ordezkarien hitzetan, "ikusten dugu arazoa egiturazkoa dela, ez bakarrik istripu zehatz horietara mugatzen den arazoa. Horregatik herriaren inplikazioa eskatzen dugu erantzunean. Alde batetik, arazoa ikusteko eta, beste alde batetik, arazo horren aurrean zerbait egin behar dela adierazteko. Azken hilabeteotan inguruarekin lotutako hirugarren istripu hilgarria da. Duela bi aste Lemoako herritar bat hil zen Zeberion eta duela hilabete batzuk beste langile bat hil zen Bediako lantegi batean. Horregatik, ikusi dugu aproposa Lemoan egitea mobilizazio hau".
 

 

 

Grebara deitu dute Haurreskolak Partzuergoko langileek

admin
-
0
Grebara deitu dute Haurreskolak Partzuergoko langileek

EAEko unibertsitatez kanpoko hezkuntza publikoko sektore ezberdinak protestan ari dira joan den ikasturteaz geroztik, lan baldintzak hobetzeko aldarriarekin, LAB, ELA eta STEILAS sindikatuon ekimenez. Bada, azaroan zehar, sektore bat hasiko da borrokan astero, eta Haurreskolak Partzuergoko langileen txanda izango da egunotan. Hain zuzen ere, ostegunerako grebara deitu dute, eta agerraldi bat egin dute egingo dituzten jarduera guztien berri emateko.

Haurreskolak Patzuergoko borroka astea diseinatu dugu, honako jarduerekin:

– Bihar, hilak 7rako: gure eskaerekin bidalketa masiboa egingo diegu Hezkuntza sailburua den, Cristina Uriarteri, eta Haurreskolak Partzuergoko gerentea den, Maite Larrañagari.

– 8an: Gure ikasleen adinak eta haurreskolen funtzionamenduak ez dutenez uzten kontzentrazioak edota ekimen bateratuak egiteko aukerarik, ebakuazio simulazioak egingo ditugu haurreskola guztietan.

– 9an: GREBA. Eibarren, Haurreskolak Partzuergoaren egoitza parean, kotxe karabana eta elkarretaratzea egingo dugu.

– Astean zehar, borroka paisaia mantenduko dugu,… eta 10ean, bereziki, Haurreskoletan amantalak eskegita (kanpoan edo barruan), beltzez jantzi edota larrialdietako txalekoa jantzi…. Eta abenduaren 12an sektore guztietan greba deitu dugu.

Sindikatuon ustez, ezinbestekoa da Eusko Jaurlaritza azken urte luzeetan inposatzen ari den murrizketak eta hezkuntza politika errotik aldatzea eta honek guztiak eraginda egungo hezkuntza publikoan sufritzen ari garen egoerari buelta ematea.

Hezkuntza Sailari eta Haurreskolak Partzuergoari dei egiten diegu sektorea aintzat hartu eta benetako negoziazio prozesu bat abian jarri dezala, lan-baldintzak hobetu eta egungo Haurreskolak Partzuergoak dituen behar eta erronkei modu egokian erantzuteko.

Erantzunik gabe
Pasa den ikasturtean EAEko unibertsitatez kanpoko hezkuntza publikoko sektore ezberdinetan eta bereziki Haurreskoletan jarraipen handiko greba eta mobilizazioak burutu genituen, ikastetxeak, langileak, haurrak eta familiak azken urteetan pairatzen ari garen egoera larria salatu eta egoerari buelta emateko ezinbestekotzat jotzen ditugun neurriak plazaratu asmoz.

Eusko Jaurlaritzak eta Haurreskolak Partzuergoak, ordea, oraindik ez diete gure aldarrikapenei erantzunik eman. Sektore ezberdinetako Negoziazio Mahaiak deitzeko ariketa formala egin duen arren, egoera larri honi buelta emateko inolako neurri zehatzik ez du ezarri mahai gainean.

Azken hilabeteetan plazaratu moduan, LAB, STEILAS eta ELA sindikatuon ustez ondorengoak dira Haurreskolak Partzuergoari dagokionez, kontutan hartuta 2009tik lan hitzarmena eta soldata izoztuta ditugula, egungo egoerari irtenbidea ematen hasteko adostu beharreko neurriak:

-Kudeaketako eta Hezitzaile langileen Lanpostuen Zerrenda eta egonkortasuna bultzatu. Haurreskolak Partzuergoko langileon behin-behinekotasun tasa % 41ekoa da, kudeaketa langileena %100ekoa.
-Geletako ratioak berdintasunean oinarritutako irizpideekin aplikatu.
-Ordezkapenak bertaratze orriarekin ez baldintzatu.
-Lizentzia, baimenak eta txanda egunak ordezkatu. Egin ezean lankideen lan karga handitzen da eta zerbitzuaren kalitatea, berriz, kaskartu.
-Haurreskola txikietan familia guztiei 8 orduko zerbitzua eskaintzea.
-Koordinazio liberazio orduak irekita dauden gela kopurua izatea erreferentzia.
-Koordinatzaile ordeak plusa proportzionalki jasotzea (hilabete batera heldu ezean).
-Erretiroa erraztu, errelebo kontratuarekin akordio batera heldu. Gaurko errelebo kontratuen araudiaren aplikazioa 2018ko abenduaren 31n amaitzen da.
-Bajak lehen egunetik %100ean ordaindu.
-Eroste ahalmena berreskuratu.
-Dekretu bidezko ordezkoen araudirik ez! .
-Haurreskolen doakotasuna.

Eta hezkuntza publikoko gainontzeko sektoreen aldarrikapenekin bat eginez:
-Hezkuntza inbertsioa handitzea (gutxienez Europar Batasuneko bataz bestekoa, progresiboki %6ra iritsiz).
-LOMCE Euskal Herriko gure ikastetxeetatik ateratzea eta honen moldaketa hutsa den Heziberri bertan behera uztea.
-Hezkuntzaren merkantilizazioa alde batera uztea, egungo desorekak gaindituz hezkuntza garapen pertsonal eta sozial integralerako tresna izan dadin (kohesio soziala, integrazioa, aniztasuna, berdintasuna, hezkidetza oinarri).
-Ikasle euskaldun eleaniztunak sortuko dituen euskarazko murgiltze eredua garatzea.
-Balizko Hezkuntza legearen aurrean sindikatu, hezkuntza eragile eta herritarron parte hartzea eta iritzia aintzakotzat hartzea.

Orain arte Eusko Jaurlaritzak eta Haurreskolak Partzuergoak ez dute proposamen hauen inguruko benetako negoziazio asmorik agertu. Hau dela eta Hezkuntza Sailak eta Haurreskolak Partzuergoak greba eta mobilizazio dinamika mantentzea beste biderik ez digute uzten.

Irailetik aurrera mobilizazio ugari burutu ditugu eta gaur Haurreskolak Partzuergoko hezitzaile eta langileok hasiera emango diegu, Unibertsitatez kanpoko Irakaskuntza publikoan burutuko diren borroka asteei.
 

 

 

Eskubide zibil eta politiko guztiak defendatzeko konpromisoa hartu dugu Bilbon

admin
-
0
Eskubide zibil eta politiko guztiak defendatzeko konpromisoa hartu dugu Bilbon

Milaka pertsona bildu dira gaur Bilbon, Kataluniari elkartasuna adierazteko eta atxilotuen askatasuna eskatzeko. Hainbat eragilek deitu dugu manifestazioa, Katalunian bizi den egoera larriak eskatuta. LABeko idazkari nagusia Bilbon izan da. Bere hitzetan, "Katalunian gertatzen ari dena guri ere eragingo digu". Sindikatuko ordezkariak EAJ kritikatu du, gaurko protesta ez babesteagatik: "PP, PSOE, Ciudadanos bloke antidemokratiko horren aurrean, guztioi zegokigun gaur mobilizatzea. EAJ hemen ez egoteak zer pentsatu ematen digu".

Hauxe da gaurko manifestazioaren bukaeran irakurritako manifestua, Zuriñe Hidalgo abeslaria eta Ramon Zallo katedradunaren eskutik:

Kataluniako gertakari larriek Estatu guztiari eragiten diotenez, eta, beraz, baita Euskal Herriari ere, gaur deialdi honekin bat egin dugun indar politiko, sozial eta sindikalok jakinarazi nahi dugu honako konpromisoak hartu ditugula:

1) Estatua herri katalanaren eta bere erakunde demokratikoen aurka agertzen ari den jarrera autoritario eta errepresiboari erantzunez, gure elkartasuna adierazten diegu Kataluniako herritarrei; hitz ematen dugu PP-PSOE-Ciudadanos ententearen joera autoritario eta antidemokratikoari aurre egingo diogula; 155. artikuluaren aplikazioa mugarri historiko bat izan da. Geure gain hartzen dugu herritarren erantzun bakezko eta demokratikoa bultzatzeko ardura, Katalunian Estatuak egiten dituen urrats errepresiboen aurka.

Aipatutako hiru alderdi politikoek, PP, PSOE eta Ciudadanosek alegia, Estatu-fronte zeharo autoritarioa osatu dute, eta demokrazia arrasto oro suntsitzeko prest daude, hasteko Katalunian eta gero beste edozein lurraldetan, edozein herriren aurka, baldin eta ez bazaie men egiten eurek ezartzen dituzten printzipioei: monarkia, inboluzioa eta Estatuaren batasun banaezina. Horregatik ari dira PPko buru batzuk mehatxua botatzen, 155. artikulua beste nonbait ere aplikatzeko prest daudela esanez.

155. artikulua aplikatuta Kataluniako gobernua kargutik kendu dute, era ez legitimoan, eta haren eginkizunak Espainiako Gobernuak usurpatu ditu. Gainera, Rajoyk parlamentua desegin du, hau da, herritar katalanen subirania demokratikoaren gordailua. Bestalde, arrazoi politiko hutsak medio espetxeratu egin dituzte Jordi Cuixart eta Jordi Sanchez aktibista sozialak eta Kataluniako Governeko zortzi kontseilari. Giltzapean sartzeko mehatxua bota dute, era berean, herri katalanak demokratikoki hautatu dituen arduradun politikoren aurka, eta horien artean daude Governeko beste kideak eta Parlamenteko Mahaiko ordezkariak; hauen artean, Generalitateko eta parlamentuko presidenteak. Erabakiok gauzatzen dituzten fiskaltzak eta epaileek botere politikoaren luzapen soil gisa jokatzen dute, aldarri batek eraginda: “A por ellos”.

Noski, eskalada errepresibo hau ez da Kataluniara mugatzen; aitzitik, askatasun demokratikoak Estatu guztian zehar murriztuko ditu, eta Euskal Herriari ere eraso egingo diote. PPk, PSOEk eta Ciudadanosek erabaki dute Estatuan politikak aintzat hartu beharreko mugak gero eta estuagoak izango direla. Honek eragin zuzena du estatus politikoa berritzeko eztabaidan. Autogobernua hobetzeko aukera Estatuak markatzen duena da.

Horregatik, estatu antidemokratiko baten erabakiak ikusirik, ezin da onartu Euskal Herrian PP, PSOE eta Ciudadanosekin normaltasun instituzionala edota lehen mailako akordio politikoak mantentzerik. 155. artikuluko salbuespenezko neurriak demokraziaren eta erabakitzeko eskubidearen aurkako erasoa dira bete-betean, eta hori ezin da geratu euskal politikaren eremuan tamainako erantzunik gabe.

2) Bigarrenik, aske utzi behar dituzte Kataluniako jendartearen ordezkari diren Jordi Sanchez eta Jordi Cuixart, ANCko eta Omnium Culturaleko buruak. Prozesu sozialek, baita aldarrikapen nazionala aurrera daramatenek ere, egituratze soziala behar dute, eta demokrazia batean onartu ezinekoa da egitura horietako militante direnak kriminalizatzea.

Era berean, aske utzi behar dituzte aste honetan espetxeratu dituzten Governeko zortzi ordezkariak. Gure elkartasuna eta babesa dute. Eta espetxeratzeko arriskuan dauden Governeko beste kideak eta Parlamenteko Mahaiko ordezkariek ere bai. Espetxean sartu dituzte eta espetxean sartu nahi dituzte herritarren agindu demokratikoa gauzatzeko ekintza politikoa garatzen ari direlako. Hain zuzen, Kataluniako prozesu demokratikoari emandako babesa berretsi nahi dugu; hango instituzioen gehiengoek hartutako erabakiei errespetua zor zaie. Kataluniak bere bideari jarraitu behar dio.

3) Hitz ematen dugu gabeziaz jositako demokrazia honi aurre egingo diogula, eta eskubide zibil eta politiko guztiak defendituko ditugula. Zehatzago, erabakitzeko eskubidea aldarrikatzen dugu Kataluniarentzat eta Euskal Herriko lurraldeentzat. Arazoaren gakoa horixe da hain zuzen: Estatuak erreibindikazio horri ez dio bide demokratikorik eman nahi. Ez dute onartzen: Ez espainiar Estatuak, ezta PPk, PSOEk eta Ciudadanosek ere. Gu subjektu politiko legitimatu bat gara, eta muga bakarra euskal herritarren ariketa demokratikoa izan behar da. Demokrazia erabakitzeko eskubidea da, Katalunian nahiz Euskal Herrian.

Visca Catalunya!
Gora Demokrazia!

 

 

 

Ostalaritza eta alojamenduetako hitzarmenen aldeko borrokara dei egin dugu Donostian

admin
-
0
Ostalaritza eta alojamenduetako hitzarmenen aldeko borrokara dei egin dugu Donostian


"Lan duina, bizi duina" Ekimen Ibiltaria Donostiara iritsi zen atzo, eta Gipuzkoako hiriburuko Parte Zaharrean izan gara gaur, ostalaritza eta alojamenduetako langileen lan eskubideen defentsan eta sektorearen prekarietatea salatzeko. Kalean izan gara, egoera honen berri emateko eta sindikatuaren aldarrikapenak zabaltzeko. Hala, kalejira bat egin dugu Parte Zaharrean barrena, egoera ikusgarri egiteko.

Ostalaritzako negoziazio kolektiboari dagokionez, Gipuzkoan patronalen aldetik estrategia globala ikusten ari gara negoziazio mahaietan, edukien blokeoarena hain zuzen ere. Atzera pausoak bilatzen ari dira eta horregatik ez dira hitzarmenak sinatzen.

 
Zehazkiago, Gipuzkoako ostalaritzan, sektorea bi azpisektore handitan zatituta dago. Alde batetik, hotel eta alojamenduena eta bestetik, ostalaritza eta jatetxeak (kolektibitateak).
                               
Gaur egun, blokeatuta dago hotel eta alojamenduen hitzarmenaren negoziazioa, patronalak uko egiten baitio sektorean goraka doan externalizazioari. Gure ustez estrukturalak diren zerbitzuak kanporatuta dituzten hotelak daude, hala nola garbiketa, harrera, jatetxea edo gelen garbiketa.
 
Hotel eta alojamenduetako egoera larria bada, ez da gutxiagorako ostalaritza eta jatetxeetan:
 
•Hitzarmen kolektiboa 2010etik berriztu gabe
•7 urte daramatzagu soldata eta laneko eskubideak izoztuta.
•Gainera, sektore honetako enpleguan iruzurrean oinarritutako praktiken portzentaia handia dago, aldi baterako kontratuekin lanaldi luzeak mozorrotzen direlarik.
•Lanaldi partzialeko kontratazioan gehiegikeriak, ustezko autonomoak
•Prestakuntzako kontratu ugari, azpikontratazioa…
 
Egoera honi gehitu beharko litzaioke UGT eta CCOO egiten ari den ofentsiba negoziazio kolektiboa estatalizatzeko. Honek dakarrena da kolektibitateetako kontratazio berrietan lanaldiak luzatzeak (77 ordu Gipuzkoan) eta 7.427 eurotako soldata galera lankide beteranoekiko.
 

 
Hortaz, esan dezakegu Gipuzkoako ostalaritzako negoziazio kolektiboaren egoera dramatikoa dela eta ez du ematen konponbide negoziatua egongo denik. Antolaketa eta borrokaren bidez lortu beharko ditugu langile bezala ditugun neurriak.
 
Gaurko eguna probestu nahiko genuke Donostian industria turistikoaren B aldea salatzeko, hain modan egon dena autengo udan.
 
LABek iritziz honakoak dira jarduera hau uzten ari den ondorioak. Lehenik eta behin turistifikazioa. Ondorio nagusiak dira hiriaren izaera aldatzea, bere dimentsio politikoan zein alderdi sozial eta kulturalean, eta etxebizitzaren alorrean sortzen diren ondorio larriak.
 
Interes korporatibo, finantziero eta higiezinenak dira fenómeno hauetatik onura jasotzen dutena. Eta ikusten ari gara turismoaren ustezko onura ekonomikoak ez direla klase herritarretara heltzen.
 
Enpleguari dagokionez, detektatu dugu industria turistikoa indartsu dagoela, pernoktazioak gora egiten dute, bisitari, diru-sarrera eta establezimenduen errentagarritasunak ere. Gainera, industria turistikoa, turismoaren benetako hazkundearen azpitik ari da enplegua sortzen eta sortzen dena prekarioa, aldi baterakoa, partziala eta soldata baxuduna da. Ostalaritzan zerbitzu anitzetako enpresak sortzen ari dira (pisuko zerbitzariak), “kellyak” bezala ezagunagoak direnak. Gainera, lanaldi partzialeko enpleguak daude, iruzur iturri bihurtu den kontratua, formalki partzialak diren arren, benetan 8 edo 10 ordutako lanaldiak izkutatzen dituztenak.
 
Iruzurra dakarren beste bide bat, “malgutasuna” handitzea helburu duena, “ustezko autonomoen” fenomenoa da. Honek berarekin dakarrena da “mileuristak”, kontziliaziorako ezinezkoak diren ordutegiak, enpleguan segurtasun falta, estazionalitatea eta prekarietatea eta iruzurra.

 
Maila sozialean, fenomeno honek ondorio nabarmenak sortzen ditu gure herri eta hirietan hala nola: jatorrizko biztanleria beste leku batzutara joatea; funts putreek erabilera turistikorako etxebizitzak erosten ditu alokairu eta erosketarako prezioak aldatuz; osasun, kultura edo hezkuntzako azpiegituren gabezia modan jartzen diren auzoetan; gertuko merkataritzan aldaketak merkataritza-kateen ondorioz eta aldaketak bizikidetzan (zarata, zikinkeria, ongizatea galtzea…).
 
Hainbat konponbide dago turistifikazioa gelditzeko:
•Pisuen alokairuaren prezioa kontrolatu.
•Sektore turistikoa arautzea, alokairu turistikora bideratutako hirigintza-sektorea gutxitzeko, alokairu komertzialeko eskaintza erraztuz eta hotel berriak eraikitzeko lizentziak kontrolatuz. Esaterako, berriki 22 lizentzia eskaini dira hotel berriak eraikitzeko Donostian.
•Udalek turismoari egindako zergapetzean protagonismo handiagoa izateko presionatu.
•Gaueko aisiko lokalak arautzea bizilagunekin bizikidetza errazteko.
•Etxebizitza planak hobetu baliabide gutxien duten herritarren alokairurako sarbidea bermatzeko: New Yorken, alberge baten bizi den helduen %16ak enplegua dauka.
•Zerga turistikoa bultzatzeko aukera aztertu.
 

 

 

 

Komunikatu sindikala Katalunian gertatzen ari denaren harira

admin
-
0

Estatu Espainola osatzen duten nazio ezberdinetako klase sindikalgintzak, bere iritzia plazaratu nahi du iritzi publikora Katalunian azken egunotan gertatzen ari diren gertakizunen harira.

Estatu Espainola osatzen duten nazio ezberdinetako klase sindikalgintzak, bere iritzia plazaratu nahi du iritzi publikora Katalunian azken egunotan gertatzen ari diren gertakizunen harira.

Lehenik eta behin Kataluniako erakundeek hartu dituzten erabakien zilegitasun demokratikoa aitortu nahi dugu, Kataluniako parlamentuak babesturikoak diren heinean, Kataluniako herriaren burujabetza ordezkatzen duen espazioa eta demokratikoki aukeratua den neurrian.

Estatu Espainolak konstituzioaren 155. Artikulua aplikatu izana gogor gaitzetsi nahi dugu. Zilegi eta demokratikoki aukeratua izan den gobernu bat kargu gabetu du eta Kataluniako auto-gobernua eta berauen erakundeak indargabetu ditu, demokraziaren kontrako estatu kolpe bezala kalifikatzen dugun mugimendu batekin.

Kataluniako herriaren kontrako errepresio eta jazarpen judiziala salatzen ditugu. Jazarpen eta errepresio hau ANC eta OMNIUNeko lehendakariekin atxiloketez gain Kataluniako lehendakari ordearen eta gobernuko zortzi kontseilarirekin gauzatu da, aldi berean Gobernuko lehendakaria den Carles Puigdemonten eta gainontzeko gobernu kideen kontrako zitazio judizialarekin eta baita Urriaren 1eko jazarpen poliziala sare sozialetan salatu duten pertsonen atxiloketekin gauzatu dena. Inolako mugarik ikusten ez zaion gorakada errepresibo baten aurrean aurkitzen gara, onodorio politiko oso arriskutsuak izan ditzakeena, ez baita herrien erabakitzeko eskubidea bakarrik zalantzan jartzen, adierazpen askatasuna eta biltzeko askatasuna bezalako oinarrizko eskubideak ere zalantzan jarriz. Hori gutxi ez balitz, paradoxikoki neurri guzti hauek Europako gobernu ustelenak hartu ditu, 78ko erregimenaren eta monarkia anakronikoaren morroi diren gainontzeko alderdien laguntza ezin hobearekin.

Kataluniako herriari azken 10 urteetan, pairatzen ari diren gatazka politiko honen aurrean irtenbide adostu bat bilatzeari etengabe uko egin dion gobernu bat aurre egiten ari dion momentu honetan gure babesa adierazi nahi diogu, Ez da gatazkari irtenbide politikoa bilatzeko inolako ahaleginik egin. Arrazoi horregatik Kataluniako parlamentuak eta Espainiako gorteek onarturiko eta Kataluniako herriak erreferendumean berretsitako Estatutuari Epaitegi konstituzionalean helegitea jarri zitzaion, eta horregatik ukatu egin zaio Kataluniako herriari erreferendum adostu bat egiteko aukera, Kataluniako herriak bere erabakitzeko eskubidea gauzatu ez zezan hain zuzen ere.
Pasa den Urriaren 1ean 2.286.217 pertsonek Erreferendumean parte hartu zuten (Zentsuaren %43). Baiezkoak 2.044.038 bozka lortu zituen (bozen %90,2) eta ezezko bozak 177.547 izan ziren (%7,8), aldiz bozka zuriak 44913 (%2). Bozka hauek gehiago izan zitezkeen baldin eta Katalunian zehar zeuden 2300 bozkalekuetako 400-dik hautestontziak eraman izan ez balituzte, eta baldin eta 1066 zauritu eragin zituen indarkeria masiboa erabili izan ez balute.

Gertakizun hauen aurrean Espainiar Estatuko Gobernuak elkarrizketari eta akordioari, irtenbide adostu eta demokratiko bat bilatzeari, eta erakunde nahiz Kataluniako herritarren aldarrikapenei, ateak ixten dizkie, neurri errepresiboak martxan jartzen eta botere judiziala haien helburu politiko partidisten zerbitzura jarriz.

Bukatzen joateko azpian sinatzen dugun sindikatuok Kataluniako herriak modu baketsu, libre eta demokratikoan hartzen dituen erabakiak babesteko gure konpromisoa berresten dugu, elkartasuna herrien arteko xamurtasuna dela ulertzen dugulako, eta klase sindikatuak garen neurrian, ulertzen dugulako ezinezkoa dela aldaketa sozial eraldatzaile martxan jarri 78ko erregimena apurtu gabe. Horregatik guztiagatik bakoitzak bere eremuan eta dauzkagun indar guztiekin prozesu honetan Kataluniako herria babesten jarraituko dugu.

Azkenik Espainiako Estatuari Kataluniako herriaren gehiengoaren borondatea eta herri bezala dagozkion eskubideak errespeta dezan exijitzen dugu. Aldi berean Atxiloturiko ANC eta OMNIUN-eko lehendakariak nahiz gobernuko kide diren preso politiko guztiak askatzea exijitzen diogu.

Sinatzaileak; CUT Galiza, CUT Aragon, CSI Asturies, ELA Euskal Herria, COS Països Catalans, Intersindical CSC, LAB Euskal Herria, Confederación Intersindical, Intersindical Valenciana, SAT Andalucia, IAC Catalunya, Confederación Intersindical Galega, STEI Balears, STEILAS, FSOC Canarias, ESK Euskal Herria.

 

 

 

Estatuaren izaera antidemokratikoa salatuko dugu bihar hainbat eragileok

admin
-
0
Estatuaren izaera antidemokratikoa salatuko dugu bihar hainbat eragileok

Atxikimendu gehiago batu ditu biharko manifestazioak, eta gaur agerraldia egin dugu Bilbon, horien berri emateko. Hain zuzen ere, hainbat eragile politiko, sozial eta sindikalok deitutako protesta 17:00 abiatuko da larunbatean, Bilboko La Casillatik, "155.ari ez. Demokrazia eta erabakitzeko eskubidea" leloarekin. LAB, EH Bildu, ELA, ESK, STEILAS, CNT, Etxalde, EHNE eta Gure Esku Dago eragileok aste hasieran iragarri genuen manifestazioa, eta gaurkoan beste zenbait eragilek ere parte hartuko dutela jakinarazi dute.

Deitzaileekin batera, hauexek dira biharko manifestazioari atxikimendua erakutsi dioten eragileak:

Podemos, Ezker Anitza, Ipes, Eguzki, Berri Otxoak, Bilgune Feminista, Getariako Txikota Elkarte Soziala, Komite Internazionalista, Hitz & Hitz, Independentistak, Emakumeen Mundu Martxa, Bizkaiko Emakume Asanblada, Ernai, Erabakizaleak, Brujas y Diversas eta Askapena, besteak beste.

Hauxe da gaurko agerraldian irakurritako oharra:

– "155. artikuluari ez. Demokrazia eta Erabakitzeko Eskubidea" leloarekin manifestazioa deitzen dugun eragileok hurrengo larunbatean Bilboko kaleetan egingo den mobilizazioaren garrantzia azpimarratu nahi dugu, orain inoiz baino gehiago. Aurreko astelehenean manifestaziora deitu genuenean, argi adierazi genuen 155. artikulua indarrean jartzeko erabilitako neurriak Kataluniaren, hango autogobernuaren eta demokraziaren beraren aurkako eraso larria zirela. Atzo, gainera, Espainiako estatuak egindako erasoaren bortizkeria areagotzen ikusi genuen, Kataluniako Governeko kideen aurkako espetxeratze aginduekin.

– Aurreko astelehenean egoera larria bazen, oraindik eta larriagoa da orain esku artean daukagun egoera. Kataluniako herritarrek demokratikoki aukeratutako ordezkariak espetxeratu egin dituzte, beren herritarrei iritzia emateko aukera emateagatik. Hautestontziak jartzeagatik. Politika egiteagatik. Demokrazia azken muturreraino defendatzeagatik. Argi eta garbi esan beharra daukagu. Atzo espetxeratutako Kataluniako Governeko kideak eta aurretik espetxean dituzten Jordi Sanchez eta Jordi Cuixart ekintzaile sozialak preso politikoak dira.
– Honek guztiak agerian utzi du, beste behin, Espainiako estatuaren izaera antidemokratikoa eta autoritarioa. Espainiako estatuak ez du inolako berme demokratikorik eskaintzen bertan bizi diren herrientzat eta herritarrentzat. Espainiako estatuan, esan bezala, preso politikoak daude. Soilik politika egiteagatik herritarrek modu demokratikoan hautatutako pertsonak espetxeratuta dituzte. Espainiako estatuak ez du onartzen beren etorkizun politiko, ekonomiko eta soziala erabaki nahi duten herriak eta herritarrak egotea, eta horren alde lan egitea. Eta bere erantzuna bortizkeriara mugatzen da. Espainiako estatuak uko egin dio herriak eta herritarrak seduzitzeari, eta indarra baino ez zaio geratzen, atzo Governeko kideen espetxeratzearekin ondo baino hobeto ikusi zen bezala.

– Baina Espainiako estatua egiten ari den eraso antidemokratikoa ez da Katalunian bakarrik geratuko. PPren ordezkari politiko batek baino gehiagok adierazi duen bezala, demokrazia eta erabakitzeko eskubidea praktikan jarriko duten ororen kontra egingo dute. Estatuaren mezua argia da: daukazuenarekin konforma zaitezte, bestela autogobernu murrizketa edota espetxea ezagutuko dituzue. Argi hitz egin dezagun: turkiar erako demokrazia ezartzen ari dira Espainian, eta geratzeko etorri da. Horixe da, hain justu, 155. Artikuluaren helburuetako bat.

– Egoera honen aurrean, asko daukagu jokoan euskal herritarrok. Gure autogobernua eta gure etorkizun politiko, ekonomiko eta soziala daukagu jokoan. Egoera larria da, Espainiako estatuak erabakia duelako inboluzio antidemokratiko honekin jarraitzea. Gure herrian, gure autogobernuan eta herri eta herritar bezala ditugun eskubideen defentsan sinesten dugunok ezin gara etxean geratu. Horregatik, Euskal Herriko demokrata guztiak larunbatean egingo den manifestazioan parte hartzera deitzen ditugu. Larunbatean, Espainiako estatuaren izaera antidemokratiko eta autoritarioari aurre egingo dion Euskal Herriko harresi demokratikoa eraikitzen hasteko aukera paregabea daukagu.

– Amaitzeko, aurreko astelehenean adierazi genizuen gure deialdia irekia zela eta bestelako eragileei bat egiteko deia egiten geniela. Gaur hemen daude bat egin duten eragileetako ordezkari batzuk ere bai.
 

 

 
1...909910911...1,633Page 910 of 1,633

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus