Euskal Herriko Eskubide Sozialen Karta osatzen dugun eragileok agerraldi bat egin dugu gaur Bilbon, bizitzaren jasangarritasuna erdigunean jarriko duen jendarte eredua eraiki nahi dugula aldarrikatzeko. LABeko idazkari nagusi Garbiñe Aranburuk hartu du hitza, eta inposatu zaigun eredu ekonomiko eta soziala errotik aldatu beharra dagoela nabarmendu du. Mobilizaziorako deia ere egin dugu eragile sindikal eta sozialetako ordezkariok: giza kate bat egingo dugu ekainaren 8an, Bilbon, 11:00etan, Gran Viatik abiatuta.
Desoreka sozialak handitu eta sortzen den aberastasuna gero eta esku gutxiagotan pilatzen da. Kapitalak, gero eta botere gehiago eta gero eta errenta gehiago pilatzen du. Sortzen den aberastasuna birbanatzeko inolako erabakirik eta norabide horretan doan politika publikorik ere ez dago.
Aberastasuna birbanatzeko bi bide daude, ez batean ez bestean hartzen diren erabakiek ez diote helburu horri erantzuten:
-Lan harremenetan soldata eta lan baldintzak duintzea. Eta ez da hau azken urteetan hartu den bidea. Enplegu berririk apenas sortzen da edo oso prekarioa da eta dagoena prekarizatzen da.
-Aurrekontu eta zerga politika. Politika publikoen bidez bestelako babes sozial eta zerbitzu publiko sistema bat eraikiz. Soldatek BPGn duten pisua jaitsi egin da 2008 eta 2015 bitartean, %50,8tik %47,8ra.
Hain zuzen ere, gaurko agerraldian bigarren horri buruz aritu dira. Garbiñe Aranbururen hitzetan, "kontua da ze zerga politika egiten den, nondik biltzen den diru gehiago eta zertarako erabiltzen den diru hori. Zerga politikaren erreformaren beharraz entzun dugu egun hauetan, eta guk, noski, behar hori berresten dugu. Eztabaida hori mahai gainean egotea neurri handi batean sindikatu eta eragile sozialok egin dugun presioari esker da. Baina, eztabaida horren mugak ezin ditu patronalak ipini".
LABeko idazkari nagusiak adierazitakoaren arabera, "gaiak duen garrantziagatik, eta proposamen zehatzak izan baditugulako, eragile sindikal eta sozialok eztabaida horretan parte hartu behar dugula eskatzen dugu eta horretarako aukera eskaini behar zaigu. Bukatu behar da patronalaren neurrirako zerga politikarekin".
Aranburuk egoeraren erradiografia egin du, baita aldatu beharrekoak zehaztu ere:
-Zerga politika berrikusi behar da eta egun duguna baina progresibitate handiagoa izan behar du. Egun lanaren gaineko errentengan erortzen da zama gehien. Gehien duenak ordaindu behar du gehiago.
-Kontsumoaren gaineko zuzeneko zergak (BEZ) igo izan dira azken urteetan eta hori erabat bidegabea da, hori progresibitatearen aurka doa eta desberdintasun sozialak areagotu eta pobrezian sakontzen du.
-Enpresek dituzten irabazien arabera gehiago ordaindu behar dute. Bukatu behar da egun dagoen pikareskarako tartearekin. Enpresek kenkarien bidez, ezarritako tipoa baino gutxiago ordaintzen dute.
-Zerga iruzurrarekin amaitzeko determinazioa eta erabaki politikoa behar da. Horrek eskatzen duena da bitarteko tekniko, ekonomiko eta baita giza baliabide gehiago jarri behar dela horretarako. RGIan egon daitekeen iruzur tartea txikikeri izugarria da zerga iruzurrarekin alderatuz.
-Foru aldundiek eta bestelako zerga politika bat egiteko aukera eta tartea izan badute. Kontzertu ekonomikoak edota konbenioak ematen dituen aukerak herritarren gehiengoaren zerbitzura jarri behar dira. Noski patronalak ez du hori gustoko Eta horrekin batera, kontuan izanik zerga guztiak ezin dituztela arautu, burujabetza fiskala aldarrikatzen dugu.