Hezkuntza Saila eta EHUko garbiketako kontratetako langileek mobilizazioak egin dituzte gaur Leioa, Donostia eta Gasteizen, hitzarmen duin baten alde, LAB, ELA, UGT, ESK eta CCOO sindikatuok deituta. "Ikastetxee eta unibertsitateko garbikuntza kontraten hitzarmena negoziatzen hasi ginenetik bi urte eta erdi igaro dira jada; eta egoerak hasieran bezain blokeatuta jarraitzen du. Ez dago hitzarmenik eta ez dirudi hurrengo hilabetetan akordiorik lortuko denik. Patronalak egoera erabat blokeatuta dauka eta gainera, jarrera probokatzaile bat mantentzen du, bere langileenganako erabateko errespetu falta erakutsiz", adierazi dute langileek.
Hauxe da sindikatuok argitaratu dugun oharra:
Urteetan zehar, garbiketako langileak behargin ikusezinak izan gara, gure uniformeaz horniturik, gela, jolastoki, komun eta jangelak garbitu ditugunak, betiere ahalik eta zarata gutxien egiten. Langile nekaezinak, urtez urte gure lan-eskubideen narriadura jasan behar izan dugunak, Hezkuntza Saila eta kontraten onespenaz. Azkenengo bi urtetan, garbiketako zerbitzuen enpresa esleipendunek pliegoak %20raino beheratu dituzte, eta beherakada hori langileen eskubideak murriztearen kontu baino ez dute gauzatu. Soldaten izoztea inposatzeaz aparte, ez dituzte bajan dauden langileak ordezkatzen, gutariko bakoitzak jasaten dugun lan karga handituz, gero eta gehiago lan egin behar dugu, kaleratzeen ondorioz gutxiago geratzen garelako, behin behineko kontratuak kateatzen ditugu, lanaldi partzialak (langileen %40a lanaldi partziala daukagu) eta ozta-ozta 600 eurotara heltzen diren soldatak. Gutariko askok, gainera, egunerokotasun honi ondoezak jota aurre egin behar diogu: bizkarreko mina, artritisa, herniak eta lunbalgiak. Gurea bezalako lan fisikoetan gaitz komunak, baina, oraindik ere gaixotasun profesional gisa aitortu nahi ez dituztenak.
Hitzarmena izoztuta dago, KPIak gora egiten jarraitzen du (%10a 2010etik) eta dagoeneko zazpi urte igaro dira gure soldatak eguneratu behar izan zituztenetik, baina enpresek, egia esanda, ez daude horretarako prest. Eta hau guztia gutxi balitz, soldataren edozein igoera, absentismo-indizearekin lotu nahi dute. Soldaten eguneratzea absentzia indizeari lotzea onartzen baldin badugu, gure osasuna zaintzeko eskubidearen aurkako eraso gordina baimentzen egongo ginateke. Gure gorputza zaintzeko eskubidea dugu, are gehiago mediku batek hala agintzen duenean. Osasunaren eta soldata dezente baten arteko hautua egitera behartuko gintuzkete.
Ez dugu astakeria honen aurrean amore emango eta horregatik zutunik jarraitzen dugu eta, oraindik ere, ez diogu guretzat eta gure familientzat duina izango den bizitza bati uko egiten.
Taula-joko honen fitxarik ahulentzat hartu gaituzte, eta lan erreforma baliatzen dute baina erakutsiko diegu zeinen okertuak dauden. Nekatuta gaude eta ez dugu onartuko, inondik inora, gure eskubideak murrizten jarrai dezaten. Ikastetxeetako garbiketa burutzen dugu, hauen garapen egokirako ezinbestekoa den funtzioa, eta ez dugu etengabeko prekarizazio prozesu honen aurrean sorgor begietsiko. Horregatik, urrian, zenbait MOBILIZAZIOie hasiera emango diegu, grebarekin amaituko liratekenak, patronalak bere pretentsio makabroetan etsitzen ez badu.
