Abiadura Handiko Trenaren lanetan, larunbatean, hildako langilea izan dugu gaur gogoan, euskal gehiengo sindikalak deituta. Hala, sindikatuok mobilizazio gehiago iragarri ditugu. Hain zuzen ere, ostiralean elkarretaratze bat egingo dugu Bilbon, 11:00etan, Eusko Jaurlaritzaren aurrean. Hego Euskal Herrian aurten, gutxienez, lanean 50 langile hil direla salatuko dugu.
LABek enpresetan langileen partaidetza ekarriko lukeen eredu bat ondo ikusiko luke, beti ere era integral batean egingo balitz, hurrengo parametroei jarraituz:
1.- Langileek ere enpresek hartzen dituzten erabakietan era erreal batean parte hartzeko aukera izatea; langileen parte-hartzea ezin da mugatu informazioa jasotzera.
2.- Enpresaren irabaziak banatzerakoan langileak ere banaketa horren parte izatea, soldatetatik harago.
3.- Akzioen bidez langileen partaidetza enpresaren jabegoan kolektiboa izatea, hau da, langile guztiena, eta negoziazio kolektiboari lotuta.
4.- Inposatzen ari zaigun prekarietate, ukazio eta aldebakarreko eredutik aldentzea.
Parlamentuko plenoan eztabaidatuko den ez legezko proposamena ez da nahikoa sindikatu honentzat. LABek ezartzen dituen lehen bi parametroak betetzeko ez du inongo mekanismo bermatzailerik jartzen, hirugarren parametroa ez da betetzen (langileen partaidetza indibiduala planteatzen du), eta laugarrena ez du aipatzen.
Sinesten dugu Arizmendiarretaren Lagunen Elkarteak duen borondate ona eredu parte-hartzaile eta inklusibo bat sortu eta martxan jartzeko, eta aintzat hartzen dugu oraingo enpresa eredu ukatzaile eta aldebakarrekoa zalantzan jartzeko eztabaida ireki izana, baina uste dugu ez dagoela patronalik ez botere politikorik eredu hau sustatzeko, eredu hau inplementatzeko prest.
Patronalak prekarietatea hedatzea beste helbururik ez du, eta erakundeen babes osoa du saiakera horretan; bihar eztabaidatu eta onartu daitekeen proposamenak dituen gabeziak ikusita, prekarietatea hedatzen jarraitzeko erabili dezake, langileen zatiketa eta indibidualizazioan sakonduz.
Egoera ahulean edo babesgabean dauden pertsonak artatzeko zerbitzu publikoak ematen dituen UTE Pauma enpresako langileek lanuzteak eta elkarretaratzeak hasi dituzte gaur, beren lanpostuen defentsan.
Hauxe da langileek igorri duten oharra, gaur Berriozarren egindako mobilizazioaren harira:
Paumako zuzendaritzak, “Pauma Centro Puente” aldi baterako enpresa elkarteko 16 langileetako 6 langileren kontratu ilegalak zuzentzeari uko egin izanak gaur eta bihar hiru orduko lanuzteak eta ostiralean beste 6 orduko lanuztea egitera behartu gaitu.
Gure ustez konponbide erraza duen egoera larri bati irtenbidea bilatzeko asmoarekin, uztailaren 12an kaltetutako langile batzuk eta ondoren langileen ordezkariak Paumako zuzendaritzarekin harremanetan jarri ginen. Ordutik, enpresak langileen ordezkariarekin bilera bakar bat ere izateari uko egin dio.
Lizarra eta Tuterako jendarte eta lan munduan sartzeko laguntzeko, haurtzaro-nerabezaro eta genero-indarkeriaren biktimen arreta integralerako zerbitzu publikoetan, Paumako zuzendaritzak langileen kontratazio ilegala erabiltzen duela salatu nahi dugu.
Honetaz gain, Nafarroan hainbeste zerbitzu publiko kudeatzen duen Pauma bezalako enpresa batek kontratazioan hain erraz izatea iruzur egitea eskandalagarria da.
Paumako zuzendaritza arrastoan sartzen ez bada eta iruzurrean dituen lan edo zerbitzu jakin baterako kontratuak ez baditu behin betiko bilakatzen, gutxi barru, fundazio publikoak subrogatzen gaituenean, gure sei lankide hauen kontratuak kolokan izango dira.
Hauek izanen dira hurrengo egunetako mobilizazioak:
– Irailak 27, ortzeguna: lanuzteak 12:00etatik 15:00etara, eta elkarretaratzea 13:00etan.
– Irailak 28, ortziralea: lanuzteak 10:00etatik 15:00etara, eta elkarretaratzea 10:30ean.
LABeko Gipuzkoako helduen egoitzetako langileek auto karabana bat egin dute Goierritik zehar eta, amaieran, elkarretaratze bat egin dute Ordiziako plazan, "Gipuzkoako helduen egoitzetako hitzarmena orain" leloarekin. Hain zuzen ere, urtebete igaro da Gipuzkoako helduen egoitzetako lan hitzarmen berria negoziatzeko mahaiak azken bilera egin zuenetik, eta ordutik ez dugu inolako harremanik izan, ez patronalekin ezta Gipuzkoako Foru Aldundiarekin ere. Hori dela eta, mobilizazioei ekin diegu irailean, eta horren baitan kokatzen dira gaurko protestak.
Ziurtasun neurri nahikorik ez dagoela argudiatzea ez da onargarria. Are gehiago itunpeko sarean zerbitzu hau indarrean dagoenean 2 urteko haurrentzat. Bere eskumen eta betebeharra da garraioa ziurtasun neurri egokienekin hornitzea, eta beharrezkoak diren neurri guztiak berehala martxan jartzea exijitzen diogu.
Guk argi dugu, justizia sozialean eta aukera berdintasunean eraikitako hezkuntza burujabea iruteko urratsak ematen jarraituko dugula, herri honek behar duen eskola publiko komunitarioaren bidean.
LABeko idazkari nagusi Garbiñe Aranburu elkarrizketatu dute gaur Onda Vasca irratian, eta gaurkotasunarekin lotutako hainbat gairi buruz sindikatuak egiten duen irakurketa plazaratu du.
Euskal Herriko Eskubide Sozialen Kartak agerraldi bat egin du Bilbon, urriaren 1eko pentsio duinen aldeko mobilizazioetan parte hartzeko deia egin eta pentsio ez kontributiboen inguruan egiten duten irakurketa plazaratzeko.
Hauxe da Euskal Herriko Eskubide Sozialen Karta osatzen dugun eragileok egindako irakurketa:
Euskal Herriko Eskubide Sozialen Karta osatzen dugun eragile sozial eta sindikalok, Euskal Herriko pentsiodunen mugimenduak datorren astelehena, urriak 1, Pertsona Nagusien Egunerako deitua duten mobilizazioan parte hartzera dei egiten dugu.
Pentsio publikoen sistema bermatzea, langile guztion ardura delako eta oinarrizkoa delako aberastasuna ekitatiboki banatzeko eta euskal jendarte justu eta solidarioa osatzeko.
Guztiz sinetsita gaude, helburu honetan lortzen ditugun helburuak, gure borrokarako ahalmenaren bestekoak izango direla, arrazoi horregatik, euskal jendarteari kalera ateratzeko deia egiten diogu, mobilizaziorako deia egiten diegu.
Gure konpromisoa pentsio duinak izatea izan da, eta izaten jarraitzen du, eta Euskal Herriko pentsiodunen mugimenduaren aldarrikapenekin bat eginez, gizarte eta osasun zerbitzu publiko eta unibertsalak izatea.
Aberastasunaren banaketa ekitatiboa, aldarrikapen hauen guztien erdigunean dago, KPIaren araberako pentsioen rebalorizazioa, gutxienez 1.080 euroko pentsioak, 2011 eta 2013ko pentsioen erreformaren derogazioa, 1.200 euroko Lanbidearteko Gutxieneko Soldata, soldaten eros-ahalmena berreskuratzea eta prekarietartea areagotu duten lan erreformen derogazioa, soldata arrakalarekin bukatzea, bai emakume eta gizonen pentsioen artekoan ere, lanaren banaketa eta gizarte eta osasun zerbitzu publiko unibertsala sortzea.
Euskal erakundeei, haien esku dagoen guztia egin dezatela exijitzen diegu Euskal Herrian pertsona pentsiodunen eskubideak bermatuak egon daitezen, eta pobreziarekin eta desberdintasunekin bukatzeko, asteleheneko mobilizazioan mahai gaineratzen diren neurri eraginkorrak har ditzatela aurrekontu eta fiskalitate politiken bitartez.
LAB, ELA, CGT, ESK eta STEILAS sindikatuok gure egiten dugu AHTren kontrako martxa deitzeko egin den irakurketa, eta azpimarratu nahi dugu proiektu honek ez duela inolako onurarik ekarriko lan arloan, ezta langileendako ere. Horregatik, Abiadura Handiko Trenaren (AHT) Nafar Korridorearen lanen jarraipena salatu nahi dugu eta lan horietara eginen den martxan parte hartzeko deialdiarekin bat egiten dugu, irailaren 29an, larunbatarekin, eta goizeko 11etan Martzilla ondotik hasiko dena.
Hauxe da larunbateko martxari begira egindako adierazpena:
Espainiako Gobernua gaur egungo Nafarroako Gobernuaren laguntza beharrezkoarekin Abiadura Handiko Trenaren plataformaren lanen eraikuntzarekin aurrera jarraitzen du Nafarroan.
Duela gutxi, Azkoien eta Erriberriren arteko plataformaren eraikuntzarako lanak hasi dituzte, 10 kilometroko luzerarekin. ADIF, Sustapen Ministerioaren menpeko enpresa publikoak, PPren eskuetan orduan, bidetarte hau AZVI enpresari esleitu dio 30 milioi eurotan.
Era berean, Villafranca eta Azkoien arteko 5 kilometroko bidetartea OHL enpresari esleitu dio 55 milioi eurotan. Bidetarte honetan Aragon ibaiaren gainetik joanen litzatekeen 800 metrotako biaduktuak eraginen lukeen kaltea nabarmentzekoa da.
Bi enpresa hauek inputatuak edo ikertuak daude Partido Popularraren legez kanpoko finantziazioagatik.
Honetaz gain, ADIFek Erriberri eta Tafallaren arteko bidetarteak konkurtsora atera ditu. Ia 15 kilometroko lehiaketa eta prezioa 120 milioi eurokoa da.
Hau da, hemendik gutxira AHTren nafar korridorearen lehen fasearen plataformaren lanen erdia baino gehiago, Castejon eta Campanas artekoa, lanean edo eraikita izanen dugu.
Euskal Y-aren lanekin gertaturikoak erakusten digu proiektuaren zati garrantzitsu bat eginda dagoenean, proiektuarekiko aurkaritza ahuldu egiten dela eta argudio hau gailentzen da: proiektu honek zentzu handirik ez dauka, baina plangintzaturikoa bukatu beharko da, hainbeste diru gastatu ondoren, lanekin ez jarraitzea xahukeria bailitzake. Egintza burutuen politika.
Hori dela eta, orain da lanak gelditu eta burugabekeria honekin bukatzeko unea.
Arrazoirik ez dira falta: lurraldeari kalte larria dakarkio, bidaiari kopuru nahikorik ez luke inondik inora, biztanleen gutxiengo batek erabiliko luke, ez luke salerosgairik eramanen, trenaren izaera publiko eta sozialaren deuseztapena suposatzen du eta gaur egun zerbitzu minimo bat ematen duten geltokien desagerpena ekarriko luke: Altsasu, Tafalla eta Castejonen esaterako.
Europar Batasuneko Kontuen Auzitegiak kaleraturiko txostenetan Estatu espainiarrean abiadura handiko lerroen eraikuntzak suposatzen duten zarrastelkeria kuestionatu eta salatu egiten du argiki, hala nola, astakeriatzat jotzen du lan publiko bat eraikitzea bere errentagarritasun sozial edo ekonomikoa baloratzen duen txostenik edo ikerketarik egin gabe.
Horrela bada, hurrengo foru hauteskundeetarako alderdi politikoak beren aukerak zehazten ari direnean, Tren Sozialaren edo AHTren aldeko jarrera, garapen sozio-ekonomikoaren eredu bezala, hurrengo Gobernuaren osaketarako diskurtsoen arteko ardatza izan behar du, hots, Aldaketaren Gobernua, aurrerakoia eta ezkerrekoa, ala Gobernu klasista-elitista, garapen-basa zalea eta eskuinekoa. Laburbilduz, Aldaketaren Gobernu batek ezin du oinarria izan AHTren garapena, diru publikoaren xahuketa galanta dena, sozialki haustailea, eta ingurumena txikitzen duena.
Inposaketaren eta ustelkeriaren aurrean ozen eta argi diogu: AHTrik Ez, TREN PUBLIKO ETA SOZIALA BAI.
Honegatik guztiagatik, martxa honetara etor zaitezten animatzen zaituztegu, berehalako paralizazioa eskatzeko eta emaniko esleipenak edo izapidetzen daudenak ezeztatzea eskatzeko.
Sei emakume erail ditu indarkeria matxistak aurten Euskal Herrian. Azkena Maguette Mbeugou izan da, 25 urteko emakumea. Bilbon erail du bere bikotekide ohiak. Hala, erailketa hau salatzeko mobilizaziora deitu du Euskal Herriko Emakumeon Mundu Martxak.
-Irailak 26, asteazkena, manifestazioa Bilbon, 20:00etan, Atxuriko Enkartazio plazatik abiatuta.
-Irailak 27, osteguna, mobilizazioak Donostian (19:30, Bulebarra), Gasteizen (20:00, Andre Mari Zuria enparantza) eta Iruñean (20:00, udaletxeko plaza).
