2024-03-29
HomeIndustriaMetalgintzaArabako metalgintzako mahai negoziatzailea eratuta, hitzarmen duin bat aldarrikatu dugu

Arabako metalgintzako mahai negoziatzailea eratuta, hitzarmen duin bat aldarrikatu dugu

Gaur, azaroak 16, Arabako Metalgintzako Mahai Negoziatzailea eratu da. Hori dela-eta, LABek hitzarmen duin bat aldarrikatzen du, enplegu duina sortuko duena eta langileen lan baldintzak hobetuko dituena.

Gaurko bileran, mahaiaren eraketa besterik ez da egin eta bertan SEA patronalak eta LAB, ELA, UGT eta CCOO sindikatuok parte hartu dugu. Aurreko Arabako Industria Siderometalurgikoko Hitzarmena eragin mugatukoa zen (soilik UGTk eta CCOOk sinatu baitzuten, langileen %33a ordezkaritza edukita) eta iazko abenduaren 31an bukatu zen iraunaldia; beraz, sinatzaileek mahaira deitu dute ia 11 hilabete pasatu direnean.

Edonola ere, LAB gertu dago negoziazio horri ekiteko, aberastasuna banatzeko asmoz. Izan ere, enplegua sortzea dugu helburu, baina ez gazteen eta emakumeen diskriminazioan oinarrituta, ezta enplegu prekarioan ere, baizik eta enplegu duina, bai kontratazioan, bai lan baldintzetan ere.

Horrekin batera, gure ustez, funtsezkoa da Herrialdeko Hitzarmena erabateko eraginekoa izatea eta sektoreko gutxieneko lan baldintzak finkatzea. Horiek hala, bertan lan baldintza duinak jasoz gero, sektoreko langile guztiengan eragin zuzena edukiko du, hitzarmen propioa edukita ala ez.

Beraz, patronalak ezertxo ere ez digula oparituko jakinda, LABek tinko ekingo dio prozesu negoziatzaileari, esparru guztietan hitzarmen duina lortzeko.

 

 

 

AZKEN ALBISTEAK | ÚLTIMAS NOTICIAS

0-3 urtekoen zikloko sindikatuak berriz mobilizatu dira, Hezkuntza Departamentuari eskatzeko behingoz har dezan alor honetako ardura

Nafarroako 0-3 hezkuntza zikloko sindikatu guztiek (LAB, ELA, STEILAS, AFAPNA, UGT eta CCOO) elkarretaratzea egin dute gaur Iruñean, Hezkuntza Departamentuaren egoitza nagusiaren parean, Gobernuak ziklo honi dagokionez erakusten duen jarrera axolagabea salatzeko. Ildo berean, apirilaren 11n manifestazioa eginen dutela iragarri dute, Departamentuaren egoitzatik 17:30ean abiatuko dena.

Grebak Arabako aisialdi hezitzailea eta animazio soziokulturalean apirilaren 2a eta 4an, hitzarmenaren negoziazioan akordiorik ez dagoelako

Agerraldia egin dute gaur Gasteizen sektoreko langileek bi greba egunak iragartzeko. Hitzarmen duinik ez badago, zerbitzurik ez dela egongo adierazi dute.

Iruñeko eremu urdinean jarduera ia geldirik egon da grebaren hiru egunetan

Enpresa Batzordeak (LAB, ELA, UGT eta CCOO) astelehenetik egiten ari den grebaren balorazio positiboa egin du, eta ohartarazi du Dornierrek ez badu aurrerapausorik ematen lan baldintzak hobetuko dituen hitzarmenaren negoziazioan, mobilizazioekin jarraituko dutela.