2026-02-13
Blog Page 722

Gasteizko Legebiltzarreko taldeekin bildu gara, enplegu kontsolidazio prozesuak eta zorraren aitortza aurrekontuetan jaso dadin

admin
-
0
Gasteizko Legebiltzarreko taldeekin bildu gara, enplegu kontsolidazio prozesuak eta zorraren aitortza aurrekontuetan jaso dadin

Legebiltzarreko talde guztiekin gure aldarrikapenak konpartitu ditugu eta aurrekontuak onartzerakoan kontuan hartu ditzaten eskatu diegu. Izan ere, oposizioko taldeen artean harrera ona izan dute, eta, hori hala izanik, espero dugu aurrekontuen eztabaidan pisua izatea. Legebiltzarretik murrizketekin amaitzeko borondatea erakutsi izan dute zenbait alderdik; iritsi da momentua borondate hori ekintzetara itzuli dadin.

Eusko Jaurlaritzak negoziazio kolektiborako borondaterik erakusten ez duela ez da honezkero inolako berrikuntzarik Mahai Orokorraren baitan dauden langileen artean. Oso garbi gelditu zen azkeneko bileran, non LAB sindikatuak negoziazio proposamen zehatzak egin zituen soldata eta egonkortasunaren gaietan. Gobernuak zuzenean akordiorik ez zegoela ebatsi zuen eta zuzenean egindako proposamena aurrekontuetara eramango zuela esan ziguten.

Esan eta egin. Gobernuak aurkeztu duen aurrekontu proposamenean sindikatu guztiok ez-nahiko bezala definitu genuen proposamena zuzenean txertatu dute. Gobernuak ez ditu jaso ez enpleguaren egonkortasunerako neurri zehatzak ez eta langileekin dagoen zorraren aitortza.

Ez da guretzat sorpresa izan. Aspaldian ikusten ari gara gure negoziazio mahaiak antzu bihurtzen ari direla. Gobernuak esaten du ziurtasun juridikoa beharrezkoa duela baina gero ez du inolaz ere daukan gaitasun legegile osoa erabili nahi. Gure ustez Aurrekontuen Legean normaltasunez jaso daitezke enplegua kontsolidatzeko gure administrazioek behar dituzten neurriak, baita langileekin dagoen zorraren aitortza ere.

Horretara joan gara gaur Legebiltzarrera. Alderdi politiko guztiei proposamen bera egin diegu: Legebiltzarrak daukan gaitasun legegilea erabilita, aurrekontuetan langile publikoek beharrezkoak dituzten neurri zehatzak jaso behar dira. Murrizketen aroarekin amaitu behar da eta horretarako ezinbestekoak diren bi neurri aurrekontuetan txertatzea eskatu dugu:

• Enpleguaren eta langileen egonkortasuna lortzeko kontsolidazio prozesuak bertan egiteko tresnak.
• Langileekin dagoen soldataren %13,3ko zorraren aitortza egitea.

Legebiltzarreko talde guztiekin aldarrikapen hauek konpartitu ditugu eta aurrekontuak onartzerakoan kontuan hartu ditzaten eskatu diegu. Izan ere, oposizioko taldeen artean harrera ona izan dute gure aldarrikapenek, eta, hori hala izanik, espero dugu aurrekontuen eztabaidan pisua izatea. Legebiltzarretik murrizketekin amaitzeko borondatea erakutsi izan dute zenbait alderdik; iritsi da momentua borondate hori ekintzetara itzuli dadin.

Euskal Herrian zerbitzu eta lan baldintza publikoak lege propioen bidez adostu daitezke, baina bitarte horretan aurrekontuen legeek ere lagundu dezakete. Aukera bideragarria dela argi gelditzen da Jaurlaritza eusten duten alderdi beraiek kudeatzen dituzten beste erakunde nagusietan. Halere ez dugu gauza handiegirik espero. Oso garbi daukagu soilik mobilizazioaren bidez lortuko dugula benetako negoziazio dinamika bat abiatzea. Hala ere, politikariei interpelazio zuzena egitea ere beharrezkotzat jotzen dugu, beraien bozkarekin langile publikoon etorkizuna baldintzatzen dutela argi gelditu behar zaie.

 

 

 

Langabeziaren jaitsiera fikzio hutsa da hirugarren hiruhilekoan: Hego Euskal Herrian, 7.400 enplegu neto suntsitu dituzte

admin
-
0
Biztanleria Aktiboaren Inkestaren arabera, hirugarren hiruhilekoari dagokionez, lan okupazioa Hego Euskal Herrian 1.205.300 pertsona kopurura jaitsi da, hau da, aurreko hiruhilekoan baino 7.400 gutxiagora.

Egoera profesionalei dagokienez, bere kabuz lan egiten dutenen (-5.200) eta sektore pribatuan soldatapean ari direnen (-5.500) artean izan du eragin gehien enpleguaren galerak. Beste kolektibo batzuetan egondako hobekuntza txikia ez da nahikoa izan galera orekatzeko.

Gainera, emakumeak kolpatu ditu bereziki enpleguaren bilakaera ezkorrak, kopuru netoei erreparatuta, emakumeen okupazioa %2,6 jaitsi baita hiru hilabetetan. Honek esan nahi du, aurreko hiruhilekoarekin alderatuta, 15.400 emakume gutxiago daudela soldatapeko lan batekin.

Biztanleria aktiboaren jaitsiera nabarmenak mozorrotu du lan merkatuak hartutako zorigaiztoko bidea. Hain zuzen ere, enplegua modu aktiboan bilatzen ari ziren pertsona askok eta askok bilaketari uko egin diotelako eman da langabeziaren jaitsiera; honek mozorrotu du okupazioaren jaitsiera.

Soldatapeko biztanleriaren artean dagoen behin behinekotasun tasari dagokionez, besteentzako lan egiten duten lau pertsonetatik bati eragiten dio gaur egun, baina, emakumeen kasuan, kopuru hori handiagoa da; %27,4koa, hain justu.

Biztanleria Aktiboaren Inkestaren arabera, soldatapeko biztanleriak 26.600 pertsonetan egin du gora azken urtean, baina soldatapeko hamar enpleguetatik zazpi behin behinekoak dira.

Prekarietatea eta prekarietatearen gehiegizko erabilera enpresen estrategia bilakatuta da, lan kostuak merketzeko eta malgutasun gehiago izateko lan taldeak egokitzeko orduan. Hori kontutan hartuta ulertzen da zergatik Hego Euskal Herrian langabezia eta enplegu prekarioen artean 385.000 pertsona dauden harrapatuta, behin behineko kontratu ezegonkorren eta langabeziaren artean, edo langabe egoera kronikoan.
 

 

 

Elkarkideren enpresa batzordeak bertze proposamen bat egin dio zuzendaritzari, hitzarmenaren negoziazioa desblokea dadin

admin
-
0
Elkarkideren enpresa batzordeak bertze proposamen bat egin dio zuzendaritzari, hitzarmenaren negoziazioa desblokea dadin

Enpresak Batzordea deitu zuen joan den ortziralerako, urriak 19 zituela. Dena den, bileran mugatu zen hark egindako proposamen ezagunaren, eznahikoaren eta eskasaren berri ematera. Hortaz, esan dezakegu ez zuela aldatu jarrera, eta ez zuela negoziazioa askatzen lagunduko lukeen inolako berrikuntzarik ekarri. Hala, enpresa batzordeak, langileek bizi duten egoera kaskarra dela-eta, hitzarmen honek egoera iraultzen hasteko duen garrantzia ikusita, bertze proposamen bat egin dio zuzendaritzari egoera iraul dadin.

Proposamena horrelaxe laburbil daiteke: 4 urteko indarraldia lukeen hitzarmen batean (2017-2020); langile ororentzat, 2018ko urtarrilaz geroztik, KPIren araberako soldata-igoera batean; egurats gorrian nahiz tailerretan lan egin ohi duten pertsonei dagokienez, Enplegu Zentro-Berezietako plusak berreskuratu (hitzarmena sinatu zenetik gauzatuko direnak); lehen hiru egunetan %100ean Ezintasun Iragankorreko osagarria; eta langile orori urrituko zaio malgutasuna 20 ordutara.

Batzordeak lanuzte partzial guztiak eta urrian eta azaroan deitu manifestazioak bertan behera uzteko konpromisoa agertu du. Adierazi du ere hitzarmena azaroa amaitu baino lehen sinatzeko asmoa duela.

Era berean salatu nahi dugu orain arte Estellerrian enpresako langileak egiten zuten buzoneo lana azpikontratatu duela Elkarkidek, enpresako langileen grebarako eskubidea oztopatzeko asmoz eta greban dauden langileen ordezkapen ilegala dela uste dugu.

Azkenik, langileen soldata apalak izanik, horietako askori Lanbide arteko Gutxiengo Soldata egokitzen zaiela, hiritarren laguntza eskatu nahi dugu borroka hau ito ez dadin soldata txikitan; helburu horretan, kontu korronte bat eratu dugu ekarpen ekonomikoak egiteko: ES06 3035 0183 67 1831046111

Elkarkideko langileen urriaren 5ean bi orduko lanuztea egin eta gero eta urriaren 11n egun osoko greba egin zuten. Eta urriaren 22tik lanuzte partzial gehiago egin dituzte, egun hauetan: urriaren 22, 23, 24, 25, 26, 29, 30 eta 31n, eta azaroaren2, 5, 7, 8, eta 9an.

 

 

 

Areetan mobilizatu gara, “komenientziako denda” berri baten irekiera dela eta

admin
-
0
Areetan mobilizatu gara, “komenientziako denda” berri baten irekiera dela eta

Areetako Supercor dendaren aurrean mobilizatu gara gaur, urteko egun guztietan eta ordutegi zabalarekin irekita egoteko zabaldu baititu ateak. Elkarretaratzearekin, irekiera mugagabedunen merkataritza ereduaren aurka egin dugu protesta, azken asteetan egin dugun bezala, "komenientziako denda" hauek ugaritzen ari baitira, esplotazioa eta prekarietatea hedatuz.
 

 

 

EAEko ikastetxe publikoetako jangeletako langileak borrokan hitzarmenaren alde

admin
-
0
EAEko ikastetxe publikoetako jangeletako langileak borrokan hitzarmenaren alde

Kontzentrazioa egin dugu gaur Eusko Jaurlaritzaren Hezkuntza Sailaren aurrean Bilbo, Gran Via 85ean, eskola jangeletako hitzarmen duina eskatzeko. Gainera, ikasturte hasierarekin bat, EAEko eskola-jangeletako langileen asanbladak deitzen hasi da LAB, hitzarmen kolektiboaren egoera konpartitzeko.

Hitzarmen honetan patronala kezkatuago dago laneko absentismoagatik langileen lan-kargengatik baino. Azpikontratetako langileek Hezkuntzako murrizketak jasan behar dituzte soldata berdinagatik funtzio gehiago hartuz euren gain, euren lanaren aitortzarik jaso gabe gainera.

Euren aldarrikapenak argiak dira: Hezkuntzako langile laboralekin soldata parekatzea, ratioak hobetzea, zentroaren antzinakotasuna ezartzea, funtzioak berraztertzea, urteko lanaldia euren egutegietara egokitzea, aldizkako langile finkoen kontratazioa, langile guztiak euskalduntzea.
 

 

 

Itxiera egunik ez dutela onartuko ohartarazi dute Volkswageneko langileek

admin
-
0
Itxiera egunik ez dutela onartuko ohartarazi dute Volkswageneko langileek

Dieselaren iruzurrari aurre egiteko, LABek lantokiz lantoki mobilizazioak egiteko deia luzatu du; iruzurrak eragin zuzena izan dezakeen lantokietan, bereziki. Hala, Volkswagenen atari nagusian egin dugu gaur elkarretaratzea, Iruñeko Landabenen, enpresak iragarri dituen zazpi eguneko itxiera salatzeko. Volkswageneko eta azpikontratetako langileek pairatuko dute enpresaren aurreikuspen falta, dieselaren krisia aitzakia baliatuta. Horregatik, itxiera egunik ez dugula onartuko nabarmendu dugu protestan.
 
Dieselaren krisiak eraginda motor falta dagoela argudiatuz, Volkswagen Navarra enpresak aldi baterako enpregu erregulazio espediente (ERTE) bat aplikatu zuen irailean eta orain, datozen asteetarako 7 eguneko itxiera iragarri du. Horren aurrean, LAB sindikatuak gaur goizean enpresa atean kontzentrazioa egin du VW Navarrako langileekin zein azpikontratetako langileekin.

Azken asteetan, iritzi publikoan dieselaren krisia delakoa behin eta berriz entzuten ari garen honetan, LAB sindikatuak ohartarazi nahi du egoera honek automobilgintza sektorean zein honi lotutako sektoreetan lan egiten duten langileek pairatzen ari diren neurri bidegabeen gainean. Enpresariak kaleratzeak, ERTEak, lan erritmoen bizitzeak zein bestelako neurriak aplikatzen ari dira.

Ildo horretan, gogora ekarri nahi izan dugu VW Navarran irailean aurrera eraman zen ERTE prozesua edota datozen asteetan enpresak iragarri dituen itxiera egunak. Egoera honek VW Navarrako langileei ez ezik, enpresa hornitzaile zein azpikontratetan lan egiten dutenengan eragin zuzena izanen du.

LAB-ek, Euskal Herrian inoiz egondako lan karga, ekoizpen eta salmenta handienak dauden honetan, langileen babeserako neurriak har daitezela exigitzen du eta, horretarako, VW Navarrako zein azpikontratetako langileak mobilizatzera deitzen ditu.
 

 

 

[IRITZIA] “Sindikatu korporatiboek ez dute Osasunbidean ordainsarien arrakala txikitu nahi, ez eta langile finko eta kontratatuen arteko baldintzak berdindu nahi ere”

admin
-
0
LABeko Osasunbideko arduradun Txomin Gonzalezek iritzi artikulu bat idatzi du, non nabarmentzen duen LABen erreferentzia betidanik izan dela kolektibo guztietako soldatak hobetzea eta soldatarik hoberenak duten langileekiko hauen soldata-arrakala txikiagotzea.

LABek erabaki zuen Nafarroako funts gehigarrien banaketa sinatuko zuela, adierazi genituen bi baldintzak jasotzen zirelako: alde batetik, ezartze orokorra zuelako, eta bestetik, denbora gehien pairatu behar izan dituzten kolektiboek (2003. urtean eman zen %8ko igoeratik salbuetsitako langileak, 2004. urteaz geroztik administrarien sustapenetik at daudenak,…) nozitu dituzten irainak eta bidegabekeriak zuzendu direlako. Baita gauez, jaiegunetan, txandaka,… aritzeagatik jasotzen diren sariak nabarmenki hobetu direlako ere. Izaera orokorreko neurri horrek mailen arte-ko aldeak deuseztatzen ditu.

Administrazioari ohartarazi genion funtsen banaketaren negoziazioari ekinen geniola, ez baikenuen, Estatutik, baldintzatu zuten sindikatuen esku utzi nahi, gainerako kolektiboei, Erizaintzako Zaintza Osagarrien Teknikariei, Laborategiko Teknikari Espezialistei, maila guztietako lanbide-ikasketan (behin-behineko langileak barne) egin bidegabekeriak konpon zitezela eskatzen iraunen genuelako. Honez gain, eutsiko diogu UPN/PSN/PP gobernatzen ari zirenean galdu genuen eros-ahalmena, %13,4a, berreskura dadila

Ez gatoz bat SAErekin, kritikatzen duenean gainerako kolektiboak ahantzi ditugula. LABek bost greba orokor egin zituen langile ororen lan baldintzak babeste aldera. SAEk nahiz beste sindikatu “profesionalek” ezikusiarena egin zuten. Sindicato Médicoak esan zuenez, “no vamos a movilizarnos contra los recortes pero esperamos que el gobierno de UPN nos lo recompense cuando vayan mejor las cosas”.

Ez dugu ulertzen ere zer dela-eta SAE sentitzen den iraindua: agian gaizkien ordaintzen zaien taldeei soldata-prekarioa hobetzen zaielako, 15 urteko bidegabekerien ondoren?

LABen erreferentzia betidanik izan da kolektibo guztietako soldatak hobetzea eta soldatarik hoberenak duten langileekiko hauen soldata-arrakala txikiagotzea. Bitxia da 2018. urtean 390.566 € banatzea, soldata apalenak dituen kolektibo horren 1.500 pertsonen artean (200 euro urteko), aurka egin beharreko bidegabekeriatzat jotzea, eta aldiz, SAE, SATSE eta SM txintik ez esatea, medikuntzako eta erizaintzako 3000 finkoen artean, lanbide-ikasketaren kontzeptuan, 2018. urtean, 15 milioi € baino gehiago banatu izanaz (5.000 € urteko).

Gainerako kolektiboei ezartzen ez zaien lanbide-ikasketa hori horren maltzurki diseinatu zen, legea indarrean sartu ondoren (2007. urtean erizaintzakoa eta 1997. urtean medikuntzakoa) plaza lortu zuten medikuntzako pertsonalari eta erizaintzako diplomatuari kalte egiten diela, lan egindako aldia behin-behinekotzat onartzen ez zaielako. Gogoratu, sustatzeko merezimenduak kontuan hartzen direla, plaza jabetzan lortzen duzun unetik; horrela, behin-behineko gisa betetzen duzun eginkizuna eta lanak ez dute ezertarako balio. Beste bidegabekeria horren aurka ez dira inoiz mobilizatu sindikatu korporatibo hauek (SATSE, SAE, SM,…).

LAB aurrerantzean ere borrokatuko da lanbide-ikasketa langile finko eta behin-behineko orori egokitu dakion, haren ezarpena zuzenduz, behin-behineko gisa lan egindako aldiek guztiontzat balio bera izan dezaten sustatu ahal izateko.
Bat etorri nahi genuke erakunde gehiagorekin, aldarrikapen honetan zein besteetan, baina argi gera bedi: ez dugu kolektiboak suntsitu eta zatitu nahi duten inongo sindikaturik espero. LABen irudikoz, Osasunbideko langile guztiak ezinbestekoak dira.

 

 

 

Mobilizaziora deitu du Emakumeon Mundu Martxak, azken erailketa matxista salatzeko

admin
-
0
Mobilizaziora deitu du Emakumeon Mundu Martxak, azken erailketa matxista salatzeko

Iruñean elkarretaratzea egingo dute gaur (Udal plaza, 20:00) eta Bilbon (Arriaga, 19:00), Donostian (Bulebar, 19:00) eta Gasteizen (Andra Mari Zuria, 19:30) bihar.

Hauxe da Euskal Herriko Emakumeon Mundu Martxaren oharra:

Beste erailketa matxista baten berri izan genuen atzo, Yolanda Jaén Gomez, 50 urteko emakumea erail berri du bere bikoteak Iruñean, bere etxeari su emanda. Zazpigarrena dugu aurten Euskal Herrian: gogoan zaituztegu!

Joan den asteartean jaso genuen berria, gizon batek, Iruñeko kale nagusian, bere etxeari su eman eta zauritu askoren artean, bere bikotekidea, erredura larriekin Zaragozako Miguel Servet ospitalera bidali zuen. Aste bete ospitalean egon eta gero, 50 urteko emakumea, Zaragozako ospitalean hil egin da. Oraingoan emakumearen bizitza ez ezik, indarkeria matxistak zaurituak izan diren beste bizilagunen bizitzak ere arriskuan jarri ditu. Hau gertatu behar al da, denon arazoa dela azaleratzeko?

Gizonak aurrekariak ditu genero indarkeriagatik, eta emakumearekiko urruntze agindu bat ere bazuen. Honek, beste behin ere, indarkeriaren aurkako neurrien hutsuneak azaleratzen ditu! Sistema patriarkalaren beste pieza nagusienetako bat dugun indarkeri instituzionalak, emakumeok indarkeria matxistarekiko dugun babesgunea handitzen du (Are gehiago, zapalkuntza ardatz gehiago haien gain jasan behar ditugun emakumeak), emaitza, kasu honetan, larriena izanda.

Mugimendu Feministak lan kolosala egin du indarkeria matxistari hitzak jartzen eta jendartea sentsibilizatzen. Hala zabaldu dugu emakumeon aurkako indarkeriak ez du mugarik, bizi garen sistema kapitalista patriarkalaren funtzionamenduaren ezinbesteko tresna delako, eredu honek sortzen dituen pertsonen arteko botere harremanak betikotzeko tresna. Garrantzitsua da ulertzea indarkeria matxista, bestelako biolentzia ardatz batzuekin elkarlotzen dela, arrazismoa edo klasea, kasu.

Ez dira modu isolatuan eta bakartuan ematen diren erasoak; gure sistemaren muinean erreproduzitzen den indarkeria da: kultura aparatuan, komunikabideetan, estatuan, lan merkatuan, familian edota hezkuntza sisteman. Honen aurrean, agente sozial, politiko eta instituzional guztien ardura pertsonal eta kolektiboa ezinbestekoa da. Apustu ausartak eta neurri sakonak beharrezkoak dira. Garaia da hitzetatik praktikara pasatzeko.

Emakumeen Mundu Martxatik gogor salatzen dugu Bilboko erailketa eta Irailaren 26 eta 27ean egingo diren mobilizazioetan parte hartzeko deia egiten dugu! Honekin batera autodefentsa feministarako deia egiten dugu, gure bizitzak direlako jokoan daudenak. Feministok erantzuteko prest gaude! Martxan jarraituko dugu, elkarrekin, borrokan denak aske izan arte!!!!
 

 

 

Dieselaren iruzurrak kaleratzeak ekarri eta prekarietatea areagotu dezakeela ohartarazi dugu

admin
-
0
Dieselaren iruzurrak kaleratzeak ekarri eta prekarietatea areagotu dezakeela ohartarazi dugu

LAB sindikatuak prentsaurrekoa eman du gaur Iruñean dieselaren iruzur berriaren inguruan. LABeko Industria federazioko kide Maider Caminos eta Zorion Ortigosak azaldu dute dieselaren iruzur berriak kaleratzeak eta prekarietate gehiago ekartzen ahal dituela, eta diru publikoa esku pribatuetara eraman dezakeela. Esplikatu dute zein egoeratan dauden eta zer ondorio egon daitezkeen Volkswagen eta Mercedes enpresa handietan eta haien inguruko gerrikoetan, eta langileei dei egin diete dieselaren iruzurraren kontra mobiliza daitezen. Prentsaurrekoan, iruzur honek kalteturiko 25 enpresa egon dira ordezkatuta.

Maider Caminosen hitzartzea, LABeko Industria Federazioko arduraduna Nafarroan:

Eskariaren egokitzapenaren aurrean (gasolina motorren salmentaren hazkundea eta diesel motorren salmentaren beherakada), langileak babestu beharrean, enpresariak horrelako neurriak hartzen ari dira: lan baldintzen malgutasuna, ebentualen kaleratzea, ERTEak, presioak lan erritmoak bizitzeko…

Gogoratu nahi dugu lan kargak, eskariak eta ekoizpen erritmoak Euskal Herrian inoiz egondako altuenak direla. Ez dago murrizketetarako inolako aitzakiarik.

Landabenen, Volkswagenek, 2018rako 297.000 auto egiteko aurreikuspena zuen. Irailean aplikatu zuen ERTE-aren eraginez, kopuru hori 285.000ra jaitsi da eta horri datozen asteetan enpresak iragarri dituen 7 itxiera eguneko galera gehitu behar zaio. Neurri horien erantzulea VW Nafarroa da, motor falta dela-eta aurreikusia zuen eszenatoki honetarako antolakuntza falta izugarria erakutsi duelako. Azkenean, langileak izanen dira kaltetu bakarrak. Datorren urterako T-Cross modeloa martxan jartzearekin, 340.000 auto egiteko aurreikuspena dago, inoizko kopuru handienetik oso gertu (353.000, 2011n). Egun VWk duen malgutasuna ikusita, 375.000 auto egitera irits daitezke. Gainera, ezin ahaztu, enpresa hornitzaileetako zein azpikontratetako langileek bizi duten ezegonkortasun egoera, egun, guztiek ERTE neurria abendua bitarte ezartzeko aukera dutelarik.

Gasteizen Mercedesek duen lantokian, aurrikuspena da 147.000 ibilgailu egitea, inoiz egindako kopuru altuena baino 3.000 gutxiago bakarrik. Datorren urterako aurrikuspena, 154.000 ibilgailu egitea da, inoiz Gasteizen egindako kopuru altuena. Hala ere, gaueko txanda kendu dute urte amaierarako eta egun batzuetan ekoizpena gelditu dute. Ebentualak kaleratzen hasi dira. Hiru hornitzaile nagusien artean ere malgutasuna eta kaleratzeak egiten hasi dira. Lan karga badago lanaren antolaketa arrunta egiteko. Ez dago langilerik soberan, ez dago murrizketak egiteko arrazoirik.

Baina ondorioak zuzenean Volkswagenen lan egiten duten 10.000 langileetatik haratago doaz: kontuan izan behar dugu lantegi hauek, ekoizpena baino osagaiak muntatzen dituzte, beraz, ibilgailuen balioaren %75a lantoki horietatik kanpo sortzen da.

Honek suposatzen du, altzairugintza, trokelgintza, industria kimikoa, industria elektrikoa, matrizeriak eta beiraren industria sektoreetan eragin zuzena duela lantegi nagusi horietan gertatzen denak. Gutxienez 60.000 langile daude zuzenean lotuta automobilgintza sektorearekin.

Zorion Ortigosaren hitzartzea, LABeko Industria federazioko kidea:

Urteetan dieselaren kontsumoa bultzatu duten arren, eta gaur egungo dieselek gutxiago kutsatzen duten arren, orain motor dieselen salmenta jaistea erabaki dute.

Onartezina da interes ekonomiko partikularrak langileen eskubideen kontura aberastea. Baina gainera, bi aldiz izango dira kaltetuak langile gehienak, langile moduan eta kontsumitzaile bezala ere bai, emango den zerga igoera jasan beharko baitute.

Automobilgintza sektoreko lobbie boteretsuek argi dute bidea: helburua irabaziak handitzea da, enpresa nagusietatik azkeneko hornitzailera. Baina gainera gure iritziz jokaldia biribiltzeko diru-laguntzak lortzeko helburuarekin ari dira.

Ez dago inolako oztoporik egungo instalazioak auto eskaerara egokitzeko. Eta ez da egia lan karga falta dagoela: Volkswagen eta Mercedesen inoizko aurrikuspen handienak dituzte.

Hortaz, Volkswagen eta Mercedes bi multinazionalei exijitzen diegu lan eskubideen murrizketak alde batera uzteko. Ez dute inolako arrazoi objektiborik horrelakorik egiteko.

Diesel motorren iruzurra errudunik gabe, diru publikoa jasota eta langileek ondorioak ordainduta konpondu zen bezala, orain beste iruzur bat gauzatu nahi dute. Eta oraingo iruzur hau betikoek ordaintzea nahi dute, automobilgintza sektoreko balio kate osoko langileek.

Patronalak piztutako polemika baliatu nahi du bere benetako helburua lortzeko, hau da, diru publikoa esku pribatuetara pasatzea, gobernuen diru-laguntzak eta laguntzak eskuratuz. Horretarako ari dira langileak erabiltzen, inolako gupidarik gabe, iruzur berri bat, dieselaren iruzur berria egiteko. Iruzur hau gainera, instituzioen laguntzarekin egin nahi dute.

Instituzioek askotan saritzen dituzte eta eredu bezala jarri enpresa hauek. Bada, LABek diru publikoa arduraz erabiltzeko deia egiten die instituzioei. Multinazionalekiko menpekotasunak hauek eskubideak murrizteko aukerak biderkatzea ekartzen baitu.

Zehazki, Nafarroako Gobernuari eta Eusko Jaurlaritzari exijitzen diegu neurri hauek izango duten kalteagatik gizartearentzat, neurri hauen kontra egitea era aktiboan, zehazki aurkeztu dezaketen edozein ERE ez onartuz.

Iruzur honi aurre egiteko, LABek lantokiz lantoki dieselaren iruzurrak eragin zuzena izan dezakeen lantokietan langileak mobilizatzeko deia egiten du. Lantoki bakoitzeko langile batasuna ezinbestekoa izango da iruzur berri honi aurre egiteko.

LABen hasi gara mobilizatzen. Duela bi aste Gasteizen egin genuen eta bihar, ostegunarekin, Landabenen egingo dugu, Volkswageneko ate nagusian, 10:00etan.

 

 

 
1...721722723...1,592Page 722 of 1,592

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus