2026-01-25
Blog Page 716

Proposamena egin dugu blokeoa gainditu eta lehenbailehen Bizkaiko grafikagintzako hitzarmenaren negoziazioa hasteko

admin
-
0
Gaur urriak 26 hirugarren bilera egon da Bizkaiko Grafikagintzako hitzarmena berritzeko negoziazioa martxan jartzeko, inolako arrakastarik izan ez duena. Gaur gainera, CEBEK patronalak bilerara ez joatea erabaki du eta honela bere mespretxua adierazi dio sektoreko langileei eta bertan ordezkaritza dugun sindikatuei.

Gogoratu nahi dugu sektoreko langileek 2011tik dituztela lan-baldintzak izoztuta eta 2012tik ez da Bizkaiko Grafikagintzako negoziazioa mahaia biltzen. Hortaz, sektorearen egoera oso larria da eta bertako lan-baldintzak prekarioak. Premiazkoa da Grafikagintzako hitzarmen berriaren negoziazioa hastea.

Bien bitartean, eztabaidetan gotorturik jarraitzen dugu, ia mahai berria eratu behar den edo 2012ko mahai negoziatzailea berrartu. Zilegiak baina korporatiboak diren interesen gainetik, interes orokorrari ematen dio lehentasuna LABek: Bizkaiko Grafikagintzako milaka langilek euren lan-baldintzak hobetzen direla ikus dezatela.

Helburu honekin, LABek proposamena egin du gaur mahaian dagoen blokeoa kopondu eta lehenbailehen hitzarmenaren negoziazioari ekiteko. Aldeei planteatu diegu Lan Harremanen Kontseiluari txosten juridiko bat eskatzearen aukera, esango duena zein den dagokion negoziazio mahaia eta alde guztiok bere emaitza onartuko duguna. Momentuz, horixe da mahai gainean dagoen proposamen bakarra egun dagoen blokeoari aurre egiteko.

LABek ez dio patronalari jokoa egingo, hitzarmenaren negoziazioa eragotziz. Langileei gogorarazi nahi diegu Gipuzkoan, LABen gehiagoarekin, hitzarmen sektoriala indarrean eta eguneratuta dutela, kategoriako 4.000 euro eta 14 ordu gutxiagoren aldearekin. Hortaz ez dago aitzakiarik!

LABek borrokan jarraituko du enplegu duinaren alde Bizkaiko Grafikagintzako hitzarmen duinaren alde.
 

 

 

Brasilgo langilegoari gure elkartasuna helarazten diogu eta mundu hobe baten aldeko borrokarekin bat egiten dugu

admin
-
0

Brasilgo hauteskundeen bigarren itzuliaren atarian, LABeko idazkari nagusi ondoko Igor Arroyok elkartasun mezu bat helarazi die Brasilgo langileei.

 

 

 

Greba mugagabea egingo dute Talleres Berasateguiko langileek hitzarmen duinaren alde

admin
-
0
Arrigorriagako Txako poligonoan dago Talleres Berasategi, galdaragintza astunean jarduten duen 27 langiletako enpresa.

Urtebeteko negoziazioan zehar enpresak ez du akordioareko aldeko inolako jarrerak izan. Hori del eta, Talleres Berasateguiko langileek 24 ordutako greba egin zuten atzo, zuzendaritzak negoziatzeko inolako borondaterik ez duela ikusita.

Datorren asteartean, urriaren 30ean, berriro egingo dute 24 ordutako greba eta Eusko Jaurlaritzan greba mugagaberako komunikazioa erresgistratu dute, azaroaren 6tik aurrera.

Pasa den astean, zuzendaritzak eskaintza helarazi zien langileei enpresako hitzarmena sinatzeko. Honek ez zuen %100ean jasotzen langileek eskatzen zutena, baina nahikoa gerturatzen zen langileek onartzeko modukoa izatera. Hurrengo egunean eta inolako azalpenik gabe, eskaintza aldatu eta okerrago bat jarri zuen mahai gainean, langileek onartu ahal izatetik oso urrun dagoena.

Talleres Berasateguiko zuzendaritzak langileekiko duen jarrera ez da berria: errespetu falta, Hitzarmena ezartzerakoan urraketak, etab.

Horregatik, Talleres Berasateguiko langileek iritzi-publikoari jakinarazi nahi diote hitzarmenaren alde borrokatzeko duten determinazioa.
 

 

 

Telefonicako langileak inposaketaren aurka mobilizatu dira

admin
-
0
Telefonicako langileak inposaketaren aurka mobilizatu dira

LABek eta CIGk salatzen dugu Telefónicak kanpoko aseguru-entitate bati saldu nahi diola ANTARES (Osasun Aseguruak eta Aseguru Kolektiboak, Istripu, Bizitza eta Biziraupen Polizak). Langileen eskubideez ari gara, lan-bizitza osoan T.E.S.A.U. enpresarentzat, “Telefónica S.A.” taldearentzat eta honen aurrekoentzat egindako lanaren ordainez. Hura betetzen dela bermatzea Grupo Telefónicaren eta TESAUren betebeharra da, taldearen aktiboekin zuzenki lotua (Eraikinak, Sareak, Merkataritza Funtsa,…), hura funtsen egiazko berme bakarra izanik, enpresak bere langileekiko duen Gizarte-aurreikuspeneko eginkizunak bete daitezen.

Betebehar hauek merkaturatuz eta kanpora eramanez, enpresatik eta haren aktiboetatik besterenduz, denok hura sortzen lagundu genuen, hura galtzeko arriskua ekarriko liguke, langile gehienok Gizarte-aurreikuspena gehien behar dugunean hain zuzen.

Enpresa honetan egunero suntsitzen da enplegu duina; gaur egun, Banakako Etendura Planaren bitartez, iraganean Enplegua Erregulatzeko Espedienteen bidez. Enplegu duina prekarioaz ordezkatzen da, gaizki ordaindua eta sasi-morrontzako baldintzetan. Oraingoan ekin diote geratzen diren eta enpresatik joan behar izan duten langileen gizarte-aurreikuspena kanpora eramateari.

Telefónica pribatizatu zutenetik 55.000 lanpostu baino gehiago suntsitu dira. 53, 55, 57… urtetako profesional bikainak baztertu dituzte, erabili eta botatzeko produktuak bailiran zokoratuz, hamarkada luzetan egin borroka eta mobilizazioen ondorioz lanpostu duinari eutsi diotelako. Aipatu lanpostuak autonomo faltsuez edota kontrata eta azpikontraten bidez ordezkatu dituzte.

LABek eta CIGk aldarrikatzen dugun gizarte eredua aberastasunaren banaketa solidarioan oinarritzen da, sortzen den langabezia eta miseria suntsitzeko. Enpresari dagokionez, horrez gain, lortu nahi dugu: lanpostuen egonkortasuna, lan eta gizarte baldintzen hobetzea, azpikontratazioa eta prekarietatea amaitzea, enplegu duina sortzea eta askoz ere kalitate hobeagoko zerbitzua ematea.

 

 

 

Gasteizko Legebiltzarreko taldeekin bildu gara, enplegu kontsolidazio prozesuak eta zorraren aitortza aurrekontuetan jaso dadin

admin
-
0
Gasteizko Legebiltzarreko taldeekin bildu gara, enplegu kontsolidazio prozesuak eta zorraren aitortza aurrekontuetan jaso dadin

Legebiltzarreko talde guztiekin gure aldarrikapenak konpartitu ditugu eta aurrekontuak onartzerakoan kontuan hartu ditzaten eskatu diegu. Izan ere, oposizioko taldeen artean harrera ona izan dute, eta, hori hala izanik, espero dugu aurrekontuen eztabaidan pisua izatea. Legebiltzarretik murrizketekin amaitzeko borondatea erakutsi izan dute zenbait alderdik; iritsi da momentua borondate hori ekintzetara itzuli dadin.

Eusko Jaurlaritzak negoziazio kolektiborako borondaterik erakusten ez duela ez da honezkero inolako berrikuntzarik Mahai Orokorraren baitan dauden langileen artean. Oso garbi gelditu zen azkeneko bileran, non LAB sindikatuak negoziazio proposamen zehatzak egin zituen soldata eta egonkortasunaren gaietan. Gobernuak zuzenean akordiorik ez zegoela ebatsi zuen eta zuzenean egindako proposamena aurrekontuetara eramango zuela esan ziguten.

Esan eta egin. Gobernuak aurkeztu duen aurrekontu proposamenean sindikatu guztiok ez-nahiko bezala definitu genuen proposamena zuzenean txertatu dute. Gobernuak ez ditu jaso ez enpleguaren egonkortasunerako neurri zehatzak ez eta langileekin dagoen zorraren aitortza.

Ez da guretzat sorpresa izan. Aspaldian ikusten ari gara gure negoziazio mahaiak antzu bihurtzen ari direla. Gobernuak esaten du ziurtasun juridikoa beharrezkoa duela baina gero ez du inolaz ere daukan gaitasun legegile osoa erabili nahi. Gure ustez Aurrekontuen Legean normaltasunez jaso daitezke enplegua kontsolidatzeko gure administrazioek behar dituzten neurriak, baita langileekin dagoen zorraren aitortza ere.

Horretara joan gara gaur Legebiltzarrera. Alderdi politiko guztiei proposamen bera egin diegu: Legebiltzarrak daukan gaitasun legegilea erabilita, aurrekontuetan langile publikoek beharrezkoak dituzten neurri zehatzak jaso behar dira. Murrizketen aroarekin amaitu behar da eta horretarako ezinbestekoak diren bi neurri aurrekontuetan txertatzea eskatu dugu:

• Enpleguaren eta langileen egonkortasuna lortzeko kontsolidazio prozesuak bertan egiteko tresnak.
• Langileekin dagoen soldataren %13,3ko zorraren aitortza egitea.

Legebiltzarreko talde guztiekin aldarrikapen hauek konpartitu ditugu eta aurrekontuak onartzerakoan kontuan hartu ditzaten eskatu diegu. Izan ere, oposizioko taldeen artean harrera ona izan dute gure aldarrikapenek, eta, hori hala izanik, espero dugu aurrekontuen eztabaidan pisua izatea. Legebiltzarretik murrizketekin amaitzeko borondatea erakutsi izan dute zenbait alderdik; iritsi da momentua borondate hori ekintzetara itzuli dadin.

Euskal Herrian zerbitzu eta lan baldintza publikoak lege propioen bidez adostu daitezke, baina bitarte horretan aurrekontuen legeek ere lagundu dezakete. Aukera bideragarria dela argi gelditzen da Jaurlaritza eusten duten alderdi beraiek kudeatzen dituzten beste erakunde nagusietan. Halere ez dugu gauza handiegirik espero. Oso garbi daukagu soilik mobilizazioaren bidez lortuko dugula benetako negoziazio dinamika bat abiatzea. Hala ere, politikariei interpelazio zuzena egitea ere beharrezkotzat jotzen dugu, beraien bozkarekin langile publikoon etorkizuna baldintzatzen dutela argi gelditu behar zaie.

 

 

 

Langabeziaren jaitsiera fikzio hutsa da hirugarren hiruhilekoan: Hego Euskal Herrian, 7.400 enplegu neto suntsitu dituzte

admin
-
0
Biztanleria Aktiboaren Inkestaren arabera, hirugarren hiruhilekoari dagokionez, lan okupazioa Hego Euskal Herrian 1.205.300 pertsona kopurura jaitsi da, hau da, aurreko hiruhilekoan baino 7.400 gutxiagora.

Egoera profesionalei dagokienez, bere kabuz lan egiten dutenen (-5.200) eta sektore pribatuan soldatapean ari direnen (-5.500) artean izan du eragin gehien enpleguaren galerak. Beste kolektibo batzuetan egondako hobekuntza txikia ez da nahikoa izan galera orekatzeko.

Gainera, emakumeak kolpatu ditu bereziki enpleguaren bilakaera ezkorrak, kopuru netoei erreparatuta, emakumeen okupazioa %2,6 jaitsi baita hiru hilabetetan. Honek esan nahi du, aurreko hiruhilekoarekin alderatuta, 15.400 emakume gutxiago daudela soldatapeko lan batekin.

Biztanleria aktiboaren jaitsiera nabarmenak mozorrotu du lan merkatuak hartutako zorigaiztoko bidea. Hain zuzen ere, enplegua modu aktiboan bilatzen ari ziren pertsona askok eta askok bilaketari uko egin diotelako eman da langabeziaren jaitsiera; honek mozorrotu du okupazioaren jaitsiera.

Soldatapeko biztanleriaren artean dagoen behin behinekotasun tasari dagokionez, besteentzako lan egiten duten lau pertsonetatik bati eragiten dio gaur egun, baina, emakumeen kasuan, kopuru hori handiagoa da; %27,4koa, hain justu.

Biztanleria Aktiboaren Inkestaren arabera, soldatapeko biztanleriak 26.600 pertsonetan egin du gora azken urtean, baina soldatapeko hamar enpleguetatik zazpi behin behinekoak dira.

Prekarietatea eta prekarietatearen gehiegizko erabilera enpresen estrategia bilakatuta da, lan kostuak merketzeko eta malgutasun gehiago izateko lan taldeak egokitzeko orduan. Hori kontutan hartuta ulertzen da zergatik Hego Euskal Herrian langabezia eta enplegu prekarioen artean 385.000 pertsona dauden harrapatuta, behin behineko kontratu ezegonkorren eta langabeziaren artean, edo langabe egoera kronikoan.
 

 

 

Elkarkideren enpresa batzordeak bertze proposamen bat egin dio zuzendaritzari, hitzarmenaren negoziazioa desblokea dadin

admin
-
0
Elkarkideren enpresa batzordeak bertze proposamen bat egin dio zuzendaritzari, hitzarmenaren negoziazioa desblokea dadin

Enpresak Batzordea deitu zuen joan den ortziralerako, urriak 19 zituela. Dena den, bileran mugatu zen hark egindako proposamen ezagunaren, eznahikoaren eta eskasaren berri ematera. Hortaz, esan dezakegu ez zuela aldatu jarrera, eta ez zuela negoziazioa askatzen lagunduko lukeen inolako berrikuntzarik ekarri. Hala, enpresa batzordeak, langileek bizi duten egoera kaskarra dela-eta, hitzarmen honek egoera iraultzen hasteko duen garrantzia ikusita, bertze proposamen bat egin dio zuzendaritzari egoera iraul dadin.

Proposamena horrelaxe laburbil daiteke: 4 urteko indarraldia lukeen hitzarmen batean (2017-2020); langile ororentzat, 2018ko urtarrilaz geroztik, KPIren araberako soldata-igoera batean; egurats gorrian nahiz tailerretan lan egin ohi duten pertsonei dagokienez, Enplegu Zentro-Berezietako plusak berreskuratu (hitzarmena sinatu zenetik gauzatuko direnak); lehen hiru egunetan %100ean Ezintasun Iragankorreko osagarria; eta langile orori urrituko zaio malgutasuna 20 ordutara.

Batzordeak lanuzte partzial guztiak eta urrian eta azaroan deitu manifestazioak bertan behera uzteko konpromisoa agertu du. Adierazi du ere hitzarmena azaroa amaitu baino lehen sinatzeko asmoa duela.

Era berean salatu nahi dugu orain arte Estellerrian enpresako langileak egiten zuten buzoneo lana azpikontratatu duela Elkarkidek, enpresako langileen grebarako eskubidea oztopatzeko asmoz eta greban dauden langileen ordezkapen ilegala dela uste dugu.

Azkenik, langileen soldata apalak izanik, horietako askori Lanbide arteko Gutxiengo Soldata egokitzen zaiela, hiritarren laguntza eskatu nahi dugu borroka hau ito ez dadin soldata txikitan; helburu horretan, kontu korronte bat eratu dugu ekarpen ekonomikoak egiteko: ES06 3035 0183 67 1831046111

Elkarkideko langileen urriaren 5ean bi orduko lanuztea egin eta gero eta urriaren 11n egun osoko greba egin zuten. Eta urriaren 22tik lanuzte partzial gehiago egin dituzte, egun hauetan: urriaren 22, 23, 24, 25, 26, 29, 30 eta 31n, eta azaroaren2, 5, 7, 8, eta 9an.

 

 

 

Areetan mobilizatu gara, “komenientziako denda” berri baten irekiera dela eta

admin
-
0
Areetan mobilizatu gara, “komenientziako denda” berri baten irekiera dela eta

Areetako Supercor dendaren aurrean mobilizatu gara gaur, urteko egun guztietan eta ordutegi zabalarekin irekita egoteko zabaldu baititu ateak. Elkarretaratzearekin, irekiera mugagabedunen merkataritza ereduaren aurka egin dugu protesta, azken asteetan egin dugun bezala, "komenientziako denda" hauek ugaritzen ari baitira, esplotazioa eta prekarietatea hedatuz.
 

 

 

EAEko ikastetxe publikoetako jangeletako langileak borrokan hitzarmenaren alde

admin
-
0
EAEko ikastetxe publikoetako jangeletako langileak borrokan hitzarmenaren alde

Kontzentrazioa egin dugu gaur Eusko Jaurlaritzaren Hezkuntza Sailaren aurrean Bilbo, Gran Via 85ean, eskola jangeletako hitzarmen duina eskatzeko. Gainera, ikasturte hasierarekin bat, EAEko eskola-jangeletako langileen asanbladak deitzen hasi da LAB, hitzarmen kolektiboaren egoera konpartitzeko.

Hitzarmen honetan patronala kezkatuago dago laneko absentismoagatik langileen lan-kargengatik baino. Azpikontratetako langileek Hezkuntzako murrizketak jasan behar dituzte soldata berdinagatik funtzio gehiago hartuz euren gain, euren lanaren aitortzarik jaso gabe gainera.

Euren aldarrikapenak argiak dira: Hezkuntzako langile laboralekin soldata parekatzea, ratioak hobetzea, zentroaren antzinakotasuna ezartzea, funtzioak berraztertzea, urteko lanaldia euren egutegietara egokitzea, aldizkako langile finkoen kontratazioa, langile guztiak euskalduntzea.
 

 

 
1...715716717...1,586Page 716 of 1,586

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus